Matoosa Mishiraachcho 26

Ayhudati Yesusa Wodhanaas Maqeteth

(Mar 14:1-2; Luqa 22:1-2; Yoha 11:45-53)

1-2Yesusi hessa haasayi wursidaappe guye bana kaallizaytas, «Nam7u gallassafe guye Paaziga gididayssa ereetii? Asa Nay kaqettanaas aadhdhi imettana» gides.#Kessa 12:1-27

3-4Hessafe guye qeeseta halaqatinne dere cimati Qayafa geetettiza qeeseta halaqaa gibben shiiqidi hiillara Yesusa oyththidi wodhisanaas maqettida. 5Gido attiin, «Asaa giddon ooshshi dendontta mala ba7aale gallas gidoppo» giidi qachchida.

Yesusa Shitto Tiyda Maccassayo

(Mar 14:3-9; Yoha 12:1-8)

6Yesusi Bitaaniyan inchchirachcha hargera diza Simoona geetettizaade soon dishin, 7issi maccas dizaara gatey keehi al7o gidida albasxiroose#26:7 Albasxiroose: Albasxiroose bonchcho miish izappe oosettiza booththa al7o shuchcha. shitto bilqaaxe kumeth oykkada Yesusaakko shiiqada izi maaddan utti dishin iza hu7e bolla shittoza gussadus.#Luqa 7:37-38 8Iza kaallizayti, «Hessa be7idi hayssi aazas mela moorettizee? 9Shittozi daro gates bayzettidi miishshay manqotas imettizaakochchii?» gida.

10Yesusi hessa eridi, «Hanno maccassayo aazas waayiseetii? Iza taas lo7o ooththadus. 11Manqoti ubba wode inttenara deettes; ta gidikko ubba wode inttenara diikke.#Zaare 15:11 12Iza shittoza ta bolla gussidayssi tana moogos giigsanaassa. 13Ta inttes tumu gays; hayssi Mishiraachcho qaalay sabbakettiza alame yuushon awanka iza ooththidayssi izo qofsizaaz gididi haasayettana» gides.

Yesusa Aaththi Immanaas Yuhuda Giigeteth

(Mar 14:10-11; Luqa 22:3-6)

14Hessafe guye tammanne nam7atappe issoy Asqoronto Yuhuda geetettizayssi qeeseta halaqataakko biidi, 15«Ta inttes iza aaththa immiko intte taas ay immanee?» gides. Isttika izas heedzdzu tammu bira iza kushen taybi immida.#Zaka 11:12 16He gallassafe simmidi Yuhuday Yesusa isttas aaththi immanaas injje wode naagishe gam7ides.

Godaa Kawo

(Mar 14:12-21; Luqa 22:7-13; Yoha 13:21-30)

17Ukeththa ba7aale geetettiza ba7aale gallas iza kaallizayti Yesusaakko shiiqidi, «Ne Paaziga maanaso awan giigsana mala koyay?» gida.

18Izikka isttas zaaridi gede katama biidi ebelo geetettiza as, «Astamaarey, ‹Ta wodey matida gishshas tana kaallizaytara Paaziga ta ne keeththan bonchchana gides› gi yootite» gides. 19Iza kaallizaytikka Yesusi istta azazida mala Paaziga kawo giigsida.

20Gadey omarsishin Yesusi tammanne nam7atara maaddan uttides. 21Istti muussan dishin izi isttas, «Ta tumu gays; inttefe issoy tana aaththi immana» gides.

22Isttika keehi muuzottidi taran taran, «Godoo taneeshaa?» gida. 23Izikka zaaridi, «Tana aaththi immanaadey keren tanara kushe yeddizaade.#Maza 41:9 24Iza gishshas kase xaafettidayssa mala Asa Nay baana; gido attiin Asa Naa aaththi immizaades aayye ana! Hessaadey yelettontta attidaakko izas lo7okkoshin» gides. 25Iza aaththi immana Yuhuday, «Astamaaree! Taneeshaa?» gides. Izikka, «Ee, ne gida mala» gides.

26Istti muussan dishin Yesusi miza qumaappe ekkidi anjjides. Menththidinne bana kaallizaytas immidi, «He7ite miite; hayssi ta ashokko» gides. 27Qasseka ushshaa denththidi galatidinne bana kaallizaytas immidi, «Wurikka hayssafe uyite; 28daro asaa nagarappe maarana gukkiza ta ooraththa caaqo suuththay hayssa.#Kessa 24:8; Er 31:31-34 29Ta inttes gizay ta Aawaa Kawoteththan ta inttenara ooraththa woyne ushshaa uyana gakkanaas hayssafe guye hayssa woyne ushshaa inttenara uyikke» gides.

30Yeththa yexxidaappe guye pude Dabrazayte geetettiza zuma bolla kezida.

Phexroosi Iza Kaddanayssa Yesusi Kaseti Yootides

(Mar 14:27-31; Luqa 22:31-34; Yoha 13:36-38)

31Yesusi isttas, «Intte wuri hach omarsi tanan dhuphettidi tana yeggi baana; ‹Heemmizayssa ta shocana; meheti laalettana› geetettidi kase xaafettides.#Zaka 13:7 32Gido attiin tani dendidaappe guye inttefe sinththatada Galila baana» gides.#Mato 28:16

33Phexroosi zaaridi, «Hankkoyti wuri ne gaason dhuphettikokka tani mulekka dhuphettike!» gides. 34Yesusikka izas zaaridi, «Tumu gays; hach omars kuttoy waassontta kasetada heedzdzuto ne tana kaddana» gides. 35Phexroosi qasse, «Nenara ta hayqqana koshshikokka mulekka ta nena kaddike!» gides. Yesusa kaalliza hankkoytikka kumeth izayssaththoka gida.

Getesemaanen Yesusa Woosa

(Mar 14:32-42; Luqa 22:39-46)

36Hessafe guye Yesusi bana kaallizaytara Getesemaane geetettizaso bides. Isttaka, «Hee baada ta woossishin intte hayssan uttiishshite» gides. 37Phexroosara Zabdoosa nayta nam7ata banara ekki biidi muuzoteththinne daro qofeteth oykkides. 38Hessafekka, «Ta shemppoya hayqqana gakkanaas daro muuzottadus; tanara minnidi hannin takkite» gides.

39Isttafe guuth gede haakki bi gufannidi, «Ta Aawawu! Nees dandayettiko hayssi metoy taappe aadho; gido attiin tani koyida mala gidontta neni koyida mala hano» gi woossides. 40Hessafe simmidi bana kaallizaytakko yiidi istti dhiskishin demmides. Phexroosakka, «Hayto asatoo! Intte tanara issi saatekka minnanaas xoonidee? 41Paacen intte gelontta mala minnidi woossite; ayanay giigettides shin ashoy gidikko daaburanchcha» gides.

42Qasseka nam7anththo biidi, «Ta Aawawu! Ta hayssa uyanayssi taas attontta miish gidikko ne sheney poletto» giidi woossides. 43Qasseka izi yishin istta ayfen dhiskoy deexxida gishshas ichchidayta be7ides. 44Istta aggidi qasseka biidi heedzdzanththo kase woossida qaala zaari woossides.

45Hessafe bana kaallizaytakko simmidi, «Ha7ikka shempi dhiskidetii? Hekko ha7i saatey matides; Asa Nay nagaranchchata kushen aadhdhi imettana. 46Dendite ane boos! Tana aaththi immizaadey yuussa bolla dees» gides.

Yesusa Oyketeth

(Mar 14:43-50; Luqa 22:47-53; Yoha 18:3-12)

47Izi haasayshin tammanne nam7atappe issoy Yuhuday yides. Qeeseta halaqatinne dere cimati yeddida daro asay tooranne durqqa oykkidi Yuhudara issife dees. 48Yuhudaykka, «Ta yeerizaadey iza gidida gishshas oykkite» giidi kase yooti woththides.

49Sitti gi Yesusaakko biidi, «Astamaaree! Saro» gishe Yesusa yeerides. 50Yesusikka, «Ta laggee! Ne yida qofaa pola» gides. Heerakka asay shiiqidi Yesusa oykki qachchides. 51Yesusara dizaytappe issoy giththa mashsha shoddidi qeeseta halaqaza ashkaraa hayth qanxxides.

52Yesusikka, «Ane ne mashshaa koohon zaara gelththa; mashsha shoddizayti mashshan dhayana. 53Koshshiko tani ta Aawaa oychchizaakko daro shiyan qoodettiza oliza kiitanchcha taas yeddontta aggana nees misatizee? 54Hessaththo ooththiko qasse Geeshsha Maxaafatan hanana geetettidayssi waani polettanee?» gides.

55He wode Yesusi asaa, «Panga oykkiza asaththo mashshanne durqqa ekkidi tana oykkana yidetii? Wontiin wontiin Xoossa Keeththan uttada ta tamaarsishin kase oykkibeekketa shin.#Luqa 19:47; 21:37 56Gido attiin hayssi wurikka hanidayssi kase nabeti Geeshsha Maxaafatan yootidayssi polettanaassa» gides. He wode Yesusa kaallizayti iza yeggidi dhayda.

Pirda Duulata Sinth Yesusa Aadheth

(Mar 14:53-65; Luqa 22:54-55,63-71; Yoha 18:13-14,19-24)

57He wode Yesusa oykkidi asati Muse wogaa astamaaretinne dere cimati issife shiiqidason qeeseta halaqa Qayafakko efida. 58Gido attiin Phexroosi qeeseta halaqa gibbe gakkanaas haahora Yesusa kaallides. Gibbe giddo gelidi hanizayssa wurseth beyanaas, gibbe naagizaytara uttides.

59He wode qeeseta halaqatinne Ayhudata duulatay kumeth Yesusa wodhisanaas wordo markka koyides. 60-61Daro wordo markkati shiiqikkoka bessiza markkateth demmibeettenna; gido attiin guyeppe nam7u as dayti shiiqidi, «Hayssi addezi, ‹Tani Xoossa Keeththaa laallada heedzdzu gallassara zaarada keexxana dandayays› gides» giidi markkattida.#Yoha 2:19

62Hessa siyida qeeseta halaqay uteththafe dendi eqqidi, «Hayti asati ne bolla markkattizayssas aykkoka zaarikkii?» gides. 63Yesusikka co7u gides. Qeeseta halaqay, «Ta nena de7o Xoossaa sunththan oychchays! Neni Xoossa naa Kirstoosa gidikko taas yoota!» gides.

64Yesusikka, «Ne goyssaka mala; gido attiin inttes ubbaas ta yootizay sinththafe Asa Nay Wolqqamaza ushachchan uttidi salo shaarara yiza wode intte beyana» gides.#Daane 7:13

65He wode qeeseta halaqay ba may7o daakkidi, «Xoossa bolla cashsha qaala haasaydes; nuus hayssafe aadhdhiza hara aaza markka koshshizee! Xoossa bolla cashsha qaala izi haasayshin intte intte hayththara siyideta. 66Inttes ay misatizee?» gides. Isttika zaaridi izas, «Hayqoy izas bessees» gida.

67He wode Yesusa ayfeson cuttishe iza iccida; baggayti iza baqqishe, 68«Kirstoosaa! Ne nena nabe gaasa shin nena baqqiday oonakkon ane nuus yoota» gida.

Phexroosi Yesusa Kaddides

(Mar 14:66-72; Luqa 22:56-62; Yoha 18:15-18,25-27)

69Hessafe guye Phexroosi qeeseta halaqaza gibben utti dishin keeththa giddon ooththiza issi maccas dizaara izakko shiiqada, «Nenikka Galila Yesusara dizaade!» gadus.

70Izi qasse, «Ne ay gizaakko ta erikke!» giidi ubba asaa sinththan kaddides. 71Gibbeza penge izi bishin issi hara oosanchchaya iza xeellada heen dizaytas, «Hayssi addezi Naazirete Yesusara dizaadeko!» gadus.

72Izikka, «Ta iza erikke!» giidi nam7anththo kaddides. 73Guuth gam7ishin heen eqqida asati shiiqidi Phexroosa, «Ne haasayay ne haytara dizayssa qonccisees; tumappe ne istta bagga asa» gida. 74Izikka caaqishenne amatishe, «Hessa addeza ta erikke!» gides. Heerakka kuttoy waassides.

75He wode Yesusi kase Phexroosas, «Kuttoy waassanaas ne tana heedzdzuto kaddana» giidi yootida qaalay qofettiin, Phexroosi kare kezidi camo yeeho yeekkides.

Currently Selected:

Matoosa Mishiraachcho 26: GM

Highlight

Copy