Liuk 13
13
Kabadezid, nama enni sen avi matak
1Ki ukem ini ani, ubiak in̄wi ediebine Jizȯs edidȯhȯ Anyi ki Pailed ȯkȯnȯ-uje yak eluȯk ubra ubiak in̄wi Galilii. Ima ekun̄ iseghe ekegbo in̄wi ani sighi imi efȯ-uwaa. 2Jizȯs abid imi, «Ifi ikre ki in̄wi Galilii ani ekepe mpe afai siaki ani imi ekenne ndiȯk-in̄wi ekie in̄wi Galilii imaki? 3Ih! ih! Eni ntak ano. Yak ndȯhȯ ifi, aneki nama ifi ikabadezid isa udiȯkmpȯ ifi iyak, afidefid ifi ngo mipan̄a. 4Ȯsȯ ani aki in̄wi evumite ami ekepan̄a kini ami akanyȯn̄ uvȯk ki Silȯm ȯkȯduȯhȯvi? Ifi ikre kenni imi ekenne ndiȯk-in̄wi ekie afidefid in̄wi ki udun̄ Jeruzelem? 5Ih! ih! Eni ntak aneno. Yak ndȯhȯ ifi, aneki ifi nama ikabadezid isa udiȯkmpȯ ifi iyak, afidefid ifi ngo mipan̄a.
Ebetȯ nsen̄e ami aban̄a atitie fik ami nama enwin nkim
6Ene Jizȯs atan̄ nsen̄e ki ebetȯ ȯnȯ imi ȯgȯ, «Anye anwi sin̄ ami ȯkȯtȯ atitie fik ki ȯkȯh iseghe. Kini adikȯ ini ami akanasi atitie ani anwin nkim, anyi akase nimakid nkim iseghe, ani anyi ekid nkim sisin̄. 7Ene, anyi ȯdȯhȯ apime ȯkȯh iseghe, «Pan̄utȯn̄ nȯmi, isuehe ite anem tȯn̄ȯ nkinsan̄a ndinse ni ma nkid nkim ki atitie fik ami, ani ami ankid nkim sisin̄. Pehe anyi seghe! Ufȯ ebak anyi idila ibiad edeghe isȯn̄-ukȯ. 8Apime ȯkȯh ȯbrȯ, «Ete, sa anyi yak ȯsȯla isuehe ntin ngo. Ami ma ntie uduan̄ n̄kan atak iseghe nkuk ndȯn̄ ibȯk-utȯ-mpȯ ki atak iseghe. 9Aneki anyi anwin nkim isuehe ntin mafȯ, ani aneki nama enwin nkim, ma mpehe anyi nseghe.
Jizȯs ȯkȯk anwinwa ukwai ki uso sabad
10Sighi Jizȯs epiek in̄wi mpȯ ki obio-udun̄ ki uso sabad sin̄. 11Anwinwa sin̄ ami upaha-epo okodio kille akabak nen. Upaha-epo okopok anyi ndido kille ki ufan̄ isuehe evumite. Anyi ȯkȯlȯn̄ȯ ukwai enȯn̄ ekime idinien̄e isan̄a. 12Kini Jizȯs akid anyi, okuo anyi adiebine imi ȯnȯn̄ ȯdȯhȯ anyi, «Mma, Ahta-Etie ȯkȯk fi ulȯn̄ȯ.» 13Jizȯs ede ubȯk ȯtu anyi ki edeh. Inisin̄inisin̄, anyi enien̄e asan̄a ȯnȯn̄ ȯtȯn̄ȯ iditro Ahta-Etie ki imi ibȯhȯ ȯkikikȯk. 14Ani alanye ki obio-udun̄ ayadazid siaki Jizȯs ȯkȯk anwi ulȯn̄ȯ ki uso sabad. Ene anyi ȯdȯhȯ in̄wi nen, «Uso iten̄esin̄ ki urue enen idinne uto. Idi ki ima uso ani idibȯhȯ ȯkikikȯk. Anni udiȯk mpȯ ifi ididibȯhȯ ukȯk ki uso sabad. 15Ȯgwȯn̄-Etie ȯbrȯ, «Ifi in̄wi mbubik, afidefid ifi isan̄a itra enan̄ ifi ikinȯ mmȯn̄ ȯn̄wȯn̄ ki uso sabad. 16Ene, enni udiȯk mpȯ idikȯk anwinwa ami setan ȯkȯmȯ odio ki ufen ulȯn̄ȯ ki isuehe evumite ki uso sabad siaki anyi anni oyo-winwa anin̄ Ebraham. 17Sighi Jizȯs atan̄ sen, epen̄ ȯfuk afidefid imami ekeyadazid ma Anyi. Ani in̄wi imaki eniezid siaki imi ekid ima utibe mpȯ ami Jizȯs enne.
Ebetȯ nsen̄e ami aban̄a ukra anin̄ Ahta-Etie
(Matiu 13:31,32; Mak 4:30-32)
18Ene Jizȯs ȯdȯhȯ, «Iyak n̄nȯ ifi mbuk mban̄a ukra anin̄ Ahta-Etie ma si anyi abi. 19Anyi abi usip mȯstad ami anwi abe agatȯ ki ȯkȯh iseghe. Anyi amine ȯyȯd opono atitie ami ima unun̄ȯ ȯnyȯn̄ edun̄ ki ima nkȯk iseghe. 20Ene Jizȯs ȯnȯn̄ȯsȯ ȯdȯhȯ, «Ami ma n̄nȯ ifi ugbȯpȯ ami mban̄a ukra anin̄ Ahta-Etie. 21Anyi abi uyo udime livin ami anwinwa abe ede anuan̄ ndo-uyo ami awak man anyi enne afidefid ndo-uyo ȯtȯd.
Onon̄o adigbȯhȯ?
(Matiu 7:13,14)
22Sighi Jizȯs asan̄a kȯpȯdeghe idika udun̄ Jeruzelem ma mbed Iseghe, Anyi epiek in̄wi mpȯ ki ima udun̄ ami obono kȯpȯdeghe ani. 23Anwi abid Anyi, «Ȯgwȯn̄-Etie, ndi Ahta-Etie adinne enyan̄a itan̄itan̄ in̄wi iseghe ki udiȯk mpȯ? Jizȯs ȯbrȯ afidefid in̄wi nen, 24«Iseghe afidefid uti idiluk ukra anin̄ Ahta-Etie ami abi afihifaha uluk. Ndȯhȯ fi ki awikiwak in̄wi medime ukeme idiluk, ani edikȯd iluk-o. 25Ani kini anye uvȯk alahala ekwe uluk, ifi mila kesen̄e ituak uluk ipe-ubȯk igȯ, «Ȯgwȯn̄-Etie, kuȯn̄ȯ uluk nȯ inyin. Anye uvȯk madȯhȯ kama imi ifiak ifi. 26Ene ifi mitȯn̄ȯ ididȯhȯ, «Ani Ȯgwȯn̄-Etie, inyin ikillia mpȯ ma Avi. Avi ȯkȯnȯn̄ epiek inyin mpȯ ki ima efak udun̄ inyin.» 27Ani Anyi madȯhȯ ifi, «Ami amfiak ifi, ȯnȯn̄ amfiak puk ifi isie idi. Idian̄a iyak Mi, ifi ima anan̄a ndiȯk mpȯ. 28Ene mmon̄-eje ma nta-edi mabak siaki ifi mikid Ebraham, Aizik, Jekȯb ma afidefid ima asiakuduak ki ukra anin̄ Ahta-Etie, ani mebine ifi eseghe. 29Ani awikiwak in̄wi ulid mesie ki afidefid ipehe oduobod edillia mpȯ ma afidefid imami ebak ki ukra anin̄ Ahta-Etie. 30Ubiak imami nama egbȯ mpȯ sisin̄ ulahami mepo etieti inien, imami epo ulahami edigbo mpȯ sisin̄ inien-o.
Jizȯs emee in̄wi Jeruzelem
31Ki ukem ini ani, ubiak ima Farisi edisim enȯn̄ edȯhȯ Jizȯs, «Idȯhȯ yak Avi ȯgbȯ kudun̄ ami aka onun̄ mbie, siaki Erȯd ameni akrikra mȯkȯluȯn̄ȯ avan̄ idigbo Fi. 32Ani Jizȯs ȯdȯhȯ imi, «Erȯd ani akra-nkra si ukid! Ika ikidȯhȯ anyi, Ami ma mbine ima upaha-epo nsuȯn̄ȯ in̄wi kille nlaha nkȯk in̄wi ulȯn̄ȯ ki uyuyo ini, edibuhȯbuk Ami ma n̄ne uto Mi nkre. 33Adeghe akeneni, anasi nkanye ki isan̄ Ami ki upokupok ini nsim Jeruzelem siaki ala si Jeruzelem anni udun̄ ami anasi afidefid ima asiakuduak epe.
Mbȯm Jeruzelem anye Jizȯs
(Matiu 23:37-39)
34O! ifi in̄wi Jeruzelem! Ami mvuhȯ mban̄a ifi etieti! Ifi ikitȯ ima asiakuduak ami Ahta-Etie ȯkȯdȯn̄ uto ȯnȯ ifi ki utai iwȯd! Ami nsan̄a nluȯn̄ȯ iditra ubȯk ifuk afidefid ifi si ekie unnie ede mba ȯfuk iyo iseghe, ani ifi iluȯn̄ȯ. 35Ipan̄utȯn̄, Ahta-Etie masin uvȯk ifi. Anasi ifi ifiak kama ifi idisȯ ikid Mi tutu ifi idȯhȯ ȯgȯ, «Iyak inyin itro anyemi adi ki enyin anin̄ Ahta-Etie.
Currently Selected:
Liuk 13: EBG
Highlight
Share
Compare
Copy
Want to have your highlights saved across all your devices? Sign up or sign in
Ebughu Bible by Beyond Translation is licensed under Creative Commons Attribution-ShareAlike 4.0 License.
