Luk 9

Yĕsu la tebeih pochong lei hnih apranga teh

Mathi 10:5-15; Mak 6:7-13

1Äi pänäng Yĕsu la pochong lei hnih tebeih khäla lum.#9:1 Grik be äng yoei saw pochong lei hnih. Awhngaw kiyam boih äng yoei saw teh hmueitih khäl Ani la khrawse khäl thoh alaih saw la lawga khäl awpawi ini poh alaih hnäng saw thayung anih a pek. 2Äi pänäng Mawng Hnadaga pre sidawng ini hiyawkaih saw la lawgase khäla awpawi ini poh a laih koong anih a teh. 3Ani la anih a tak, “Ni bi äng khili nini komei khaw a kompum, khoila, eisaw, awmawn#9:3 Awmawn, äi hawuva kri poisa awlaw awat saklai nini konäng iha chieiyei chu. 4Nini kawi dün ima käh nam hlät chula loal chu saw sawgraw äi ima mäi bäichu. 5Awlaw khrawng khälla dä nangnih a anang laweiyah khaw, anih nam hlät chula nini chetal khaw a, anih ming äng sawksi nini thokaih koong, nini kho äng käh de hnui phawpeyal khäl bäichu.” 6Äidä Yĕsu tebeih khäl nam täng nam täng chet ula sidawng pawi ini hiyawk awlaw ätän täna khrawng khäla lawga känäng awpawi ini poh al.

Yĕsu kheu yaw bala Herawt okonggrah

Mathi 14:1-12; Mak 6:14-29

7Galil mräh khiyuptih Herawt#9:7 Grik be äng Herawt khiyuptih la Yĕsu la ibang bi äm äi sidawng kheni yawk. Äini ani käh awtawk tum. Iyaäm hngat pai hnih la tuilüh pektih Yohan düsaw känäng thouwal däk ting ini hawu. 8Üküt küt la Elija la adawnei saw ting ini hawu. Awlaw üküt küt la Hnadaga sidawng hiyawktih känäng käh hngat düsaw känäng othowal saw ting ini hawu. 9Äini Herawt la hawu, “Kei dä Yohan luki bängtih. Bahi kei kawyawk saw khrawng che u äm?” Äi koong Herawt la Yĕsu a uhmuh aih khiyang koong ohno.

Yĕsu la khrawng thong hngaw a eisaw pek

Mathi 14:13-21; Mak 6:30-44; Yohan 6:1-14

10Teh hmueitih khäl ini krawnal pänäng i aw ini bi äm äi khäl kheni Yĕsu a ini hawu pekal. Äidä Yĕsu la Ani tebeih khäla Betsida mräh a chih phuinawk. 11Äini Yĕsu chetsaw sidawng khrawng khälla ini hmawt ni, Ani hnung hnung äng ini chet. Ani la äi khrawng khäla lawkei. Äidä Mawng Hnadaga pre sidawng anih a chok awlaw lawga mawh khäla awpawi poh al. 12Khoni kraw aih däk khaw a, tebeih pochong lei hnih Yĕsu khäka lo ula ini tak, “Ni khrawng khäl hläta le. Anih ekena käh nama chet ula eisaw la ini mäiyeih dün la suyei seh u. Iyaäm niche himsim sim la dä.” 13Yĕsu la tak, “Nangnih dä anih a eisaw pek khäl.” Etebeih tih la ini takal, “Keinih khäka ha pai hngaw la ngaw thek hnih dä mäi saw. Keinih chet ungala ühlü saw si eisaw khrawng khäl koong kini hleyeih saw Nang nühlü saw ei?” 14Äiya pawtaw thong hngaw ini mäi hüt. Yĕsu la krawnak etebeih khäla tak, “Echen chaw chi chenak äng hngaw gip chi ini omaih saw ta khäl.” 15Tebeih khälla äi huih ükütni a ini om. 16Yĕsu la ha hlem hngaw la ngaw thek hnih law bala hawn pre pawta so bala eisaw koong Hnadaga a äkiyä tawngei. Äi pänäng ha la ngaw khäl pil bala khrawng khäla ini pheih pekaih koong tebeih khäla awp. 17Khrawng khälla ini hän luihyak ini ei. Äidä tebeih khälla ha la ngaw pil khäl mratal saw ini lumal ni tong lei hnih thäneyal.

Pitol sawksi thok

Mathi 16:13-19; Mak 8:27-29

18Krängak Yĕsu la lung khiyang suh atongei awlaw etebeih tih khäl ha Ani ängtu ini mäi hüt. Ani la etebeih khäla ihi, “Khrawng khälla kei u äm ting ini hawu äm?” 19Etebeih dukäng ükütla tuilüh pektih Yohan awlaw ükütla Elija ting ini tak. Awvawng la Hnadaga sidawng hiyawktih khäl äng käh hngat düsaw känäng thouwal tih ting ini tak. 20Äi khaw Ani la anih a tak, “Bakhaw che nangnih Kei u ting anang khinäm?” Pitol la krawn bala hawu pek, “Hnadaga käh äi Krito#9:20 Hipru be äng Mesaya awlaw Grik be äng “Krito” ni kheu ini phawngal hi thänei hmat hmueitih ting.”

Yĕsu la üdüaih lah saw khrang hawu pek

Mathi 16:20-28; Mak 8:30-9:1

21Äi khaw a Yĕsu la anih a sidih pek awlaw hngata ha hawu pekaih u saw koong ana pek. 22Ani la tak, “Luhchaw Chaw#9:22 “Luchaw Chaw” che Yĕsu la iming huih usumei la awbawng dukhah khawmaih lah saw. Awlaw gongsong khälla, pujawtih gong khälla, awlaw Mosi käh thung choktih khälla Ani üsüh äng hawn hnawh u saw. Anih la Ani a ini tukaih saw awlaw hnüp thum pänäng düsaw känäng thouwalaih saw.” 23Äidä Ani la hang hanga tak, “Losupei Kei hnung äng dä loaih khiyang hi, upum la hlüei saw huih biyah seh. Hnüpak khiyawnah upum käh krut kätei bala Kei hnung äng lo seh. 24Ulabang awsawk heneyeih khiyang äm, äila awsawk hiyumeyei. Äini ulabang Kei koong awsawk pekei äm, äila awsawk hiyumei hnawh. 25Iyaäm luhdül brat pängei bala ha ihisaw sawk dä hiyumei khaw äi äng ani a i amrat mäi saw äm? 26Losulapei Kei a awlaw Kei kheuwa hiyawh ei nawk hi, Luhchaw Chaw upum käh wachang äng awlaw Paw la asanh chang hawn natchaw khäl käh a wachang äng loal khaw a hiyawkei hnawh. 27Äini Kei nangnih a ihisaw kanang tak, niya ja bala mäitih awvawng che Mawng Hnadaga pre hmu lah u saw sawgraw dü hnawh u.”

Yĕsu hmawi bok phong phonga thänei

Mathi 17:1-8; Mak 9:2-8

28Ni kheu khäl hawu chak saw sapta ak pänäng Yĕsu suh tongeyeih saw koong Pitol, Yohan awlaw Yakub tih äng khuyung hngata ini chet. 29Suh tongei khina Yĕsu ulup waleu leuwa hleyal awlaw Ani wat che bok phong phonga thänei. Awlaw khrawng paihnih Ani ängtu ihni dawng. 30Äi khrawng paihnih che Mosi la Elija. Ahnih Yĕsu ängtu kräuvaih saw ihni chah. 31Ahnih la a wachang äng dawnei häih la Yĕsu chetalaih saw la Yĕlusalema düaih saw krong äng Anih ini kräuwei. 32Pitol la ani phäutih khäl äi khaw a ini ip. Äini anih ini khak ni Yĕsu käh wachang la äi khrawng paihnih a ja häih la ihni mäi saw ini hmuh. 33Äi khrawng paihnih Yĕsu hlät häih la ihni chetalaih khaw a Pitol la Yĕsu a tak, “Choktih o, nangkei niya ini mäiyeih saw mawt pawyei. Che, nangkei niya imchaw songthum#9:33 Im songthum Grik be äng tabarnakal pai thum. saw äng khä. Hngat che nang koong awlaw hngat che Mosi koong awlaw hngat che Elija koong.” Äini Pitol la i hawu saw äm upum la yawei chu ah. 34Pitol la ni kheu khäl hawu tun khaw a khose bok hngat lo bala anih a akün. Anih a khose bok la akün ni ini ke chak. 35Äi khose bok duk känäng asam hngat la ni huih hawu, “Nidä Kei chaw, Kei keheh lei saw chaw.#9:35 Awhngaw boih äng yoei “Ni che kei käh khetsu Chaw” Ani kheu khin khäl.” 36Äi asam hngat la hawu saw päih pänäng Yĕsu jiji dä lung khiyang dawngal. Tebeih khälla äi khin äng ibang äiya ini hmuh äm hngata ha iha hawu pekal u.

Khrawse la mawnsaw pawtaw chaw a Yĕsu la awpawi poh al

Mathi 17:14-18; Mak 9:14-27

37Äi hnüp pänäng Yĕsu la Ani tebeih khäl khuyung känäng ini komal khaw a, awbawng khrawng Ani äng ini khomei. 38Äi khaw a khrawng khäl duk känäng pochongak la hek bala hawu, “Choktih o, kei ekhet äng kini tak, kei chaw a bitchaw soeiye. Ani che kei käh hngat chaw pätpät chaw dä. 39Khrawse hngat la ani a mawn saw awlaw täkting ani ehek chi. Ni khrawse la ani a hlün chi khaw a awkaw känäng owon thokchi. Ani a asang hlätäl do khiyangah awlaw ani a awpawi chi taw ah. 40Kei Nang käh tebeih khäla ekhet äng äi khrawse ini thoh a laih saw katak hüt äini anih la hnäng u.” 41Yĕsu la krawn bala takal, “Uyum khrakeitih la pawyahtih lawm äng chetei tih khrawng khälo. Kei hnüp hiyawh nangnih ängtu kämäyeih saw äm awlaw nangnih kanang chuniyeih saw äm? Nang chaw niya lo.” 42Pawtaw chaw ekena olo ni khrawse la dekäng khrawk awlaw ani dekäng ähläwei. Äini Yĕsu la khrawse a ehekei ni äi pawtaw chaw pawiyal. Äidä ani paw khäka ani a awpal. 43Hnadaga käh tha hmu ula hang hang ni ini maw chak.

Yĕsu la dukhah bünaih saw kheu awlaw krawnak hawu pek

Mathi 17:22-23; Mak 9:30-32

Yĕsu la ibisaw khäl khrawng kheni la hmu ula ini maw khaw a tebeih khäla Ani la tak, 44“Kei ibang kanang takaih saw äm nini lung pekei chula mawt chaw khin khäl. Luhchaw Chaw äng lan poei ula lansu khäl kutäng ini awpai.” 45Äini ni hawu saw krong äng tebeih khälla iha hmawt u. Ni kheu khäl anih khäka thupei bala mäiyal. Tebeih khälla iha yawchu u, awlaw Yĕsu a ini hiyeih saw ha ini keh.

Elensum tih u äm?

Mathi 18:1-5; Mak 9:33-37

46Tebeih khäl dukäng elensum u äm ting kheu hawu ula Tebeih khäl ini chah lei. 47Yĕsu la anih lung äng käh tawk yawkchu ni sämäichaw hngata Ani kena aja sawk. 48Ani la anih a tak, “Ula ni sämäichaw a kei ming äng lawkei äm, äi khälla Kei a dä khrawng lawkei saw. Awlaw ula Kei a khrawng lawkei äm, Kei a etetih a dä anih la ini lawkei saw. Nangnih äng üküt thawka u elek chawsum äm, ani dä üküt thawka elensum.”

49Yohan la Yĕsu a tak, “Choktih o, pochongak la Nang ming äng khrawng hngat känäng khrawse othoh al saw kini hmuh. Äini keinih ani a kini nga. Iyaäm ani nangkei sawng äng käh hiyah.” 50Äini Yĕsu la tak, “Ani a nga ai chu! U bang nangnih lansu hiyah äm, ani che nangnih sawng äng käh dä.”

Samali a khälla Yĕsu a lawei u

51Yĕsu hawn pre a awkawyalaih saw ikhin ekena lo ni, Ani la Yĕlusalema chetaih koong ulung äng poei bala tawkei. 52Ani la Samali a käh nam hngata echetaih koong, Ani mäyeih phüh ala ächän taw hnäng hmawna Ani la sidawng pektih a ayang teh lawk. 53Äini Yĕsu Yĕlusalema chetaih koong tamai ulung la poei bala tawkei koong Samali a käh khälla Ani a lawei u. 54Yĕsu tebeih Yakub la Yohan la ni khäl hmu häih la ini hawu, “Boi o, anih a khrah aih saw koong hawn känäng mei kom ong kini paneyeih saw Nang nühlü ei?” 55Äini Yĕsu la anih pawta hleh ei bala che ehekei. 56Äidä Yĕsu awlaw Ani tebeih khäl awhngaw hngat nama ini chetal.

Yĕsu hnung äng tämtih i ini thäneyeih saw äm

Mathi 8:19-22

57Anih lawm äng ini chetei khaw a khrawng hngat la Yĕsu a tak, “Nang mawnga bang nechet äm, kei nang äng tutu kechetai.” 58Yĕsu la ani a takal, “Khewa a okho mäi awlaw haw a ubuh mäi. Äini Luhchaw Chaw la uluki tawkeiyeih dün ala mäyah.” 59Yĕsu la awlaw hngat khrawnga tak, “Kei hnung äng lo e.” Äini äi khrawng la krawn bala takal, “Boi o, kechetalaih maw awlaw kei paw a ayang kaphulalaih maw.” 60Yĕsu la ani a tak, “Dütih la dütih phulei seh u. Äini nang chet tila Mawng Hnadaga pre sidawng kheu ahiyawk.” 61Äi khaw a awlaw hngat la Yĕsu a tak, “Boi o, kei nang ängtu kolo ai. Äini chetal ngala ki imsaw äng kakhomeyalaih hüt.” 62Äini Yĕsu la ani a takal, “Nagol äng ukut tawyei bala u uhnung pawtäng suteyal äm, ani Mawng Hnadaga pre koong tawnah.”

Currently Selected:

Luk 9: CSH

Highlight

Copy