Nan Ganu 26
26
Aba'un adama o tsutoni
(U.Wl 27:12-24; 28:1-14)
1<<I yuwaan aciya̱ɗu a̱ma̱li wan ko i shuwa̱ uruma ko ijigo wan waru she i she'en aatali e iɗa i ɗu a na ya̱a̱ ka̱ɗa̱ta̱wa̱ yi wan adama a na a̱mu ɗa A̱sulazuva A̱sula̱ a̱ ɗu. 2I tara Ashibi a̱ va̱ na akiza waru i ca a̱a̱'isa̱ a̱ va̱ tsugbain. A̱mu ɗa A̱sulazuva.
3<<Nni i kuru ili i na n zuwaa nɗu reve waru i toni wila̱ u va̱ ulobonu, 4n ta̱ lyunguwa̱a̱ ɗu ni iro'i a̱tsuma̱ a mantsa, iɗa i ta ca limatan va̱ yi waru ɗanga ta ca limatan le. 5Itana ya̱ a̱ɗuma̱ a̱ ɗu a ta yuwan a̱bunda̱ reve i da̱na̱ o ugasa hali a̱ tyo a mantsa mo uta'an wa̱ inabi, waru i ta̱ da̱na̱ a ta'asan umatsun wa̱ ina̱bi u ɗu hali mantsa ma̱ ca̱'a̱n mo ro ma̱ ka̱nda̱ruwisa̱. I ta lyuwa ilyalya i cuwa̱n waru i yuwan nden n ɗu a̱tsuma̱ a asuvu nden a̱tsuma̱ e iɗa i ɗu.
6<<N ta ca ɗu asuvu nden e iɗa'a. I to von i lantsa babu wovon wu za. N to loso inama yu una i na i ri na̱ meleshe a̱tsuma̱ e iɗa'a, waru a̱a̱ da̱shi yuwan uvon a̱tsuma̱ e iɗa i ɗu shi. 7I ta saɓa n'yuwatan n ɗu. Waru i to una le na̱ matsun me pe'eni. 8Ama o ton a̱ ɗu, o to loso ama ukpaku (100,) ama ukpaku u ɗu gba o to loso ama ukpakukupa kupa (10,000.) I to una n'yuwatan n ɗu na̱ matsun me pe'eni reve a̱ riya̱ elime a̱ ɗu.
9<<N ta̱ ka̱lyuwa̱ ɗu nu urewesu wi isa'ani, waru n ta zuwa ɗu i matsan lon i bala. Waru n to shiton akucunu a na n yuwain na̱ a̱ɗu. 10I ta̱ da̱na̱ a lyuwusa itana ya̱ a̱ɗuma̱ a̱ ɗu ya aa'wan a na a̱ ka̱ra̱i hali a̱ tyo a mantsa ma na yoo uta̱a̱ le adama i ca aza a sa'avu ure. 11N ta zuwa uba̱ta̱ wu nden n va̱ a̱tsuma̱ a̱ ɗu, waru mee ene ɗu ili yi idaba shi. 12N ta̱ da̱na̱ oɓolo na̱ a̱ɗu, moo o'wo A̱sula̱ a̱ ɗu. A̱ɗu waru yo o'wo ama a̱ va̱. 13A̱mu ɗa A̱sulazuva A̱sula̱ a̱ ɗu za na uta̱a̱ nɗu a̱tsuma̱ e iɗa ya Masar, adama i da̱na̱ agbashi e le wan. Reve mu kuɗa a̱a̱gba̱la̱ a na a tsugba nɗu, reve n zuwa ɗu i yuwan mmalu mejege.
A̱tsuma̱lima̱ adama o ulambu u tsutoni u wila̱
(U.Wl 28:15-68)
14<<Agba nni i 'yuwan a uwwa mu, waru i 'yuwan a yuwan ili i na n damma nɗu suru, 15waru nni i kuɗa wila̱ u va̱, hali i tara le ili yi idaba, reve i kuɗa̱ o toni ili i na n dammai, reve waru i kuɗa akucunu a̱ va̱, 16to, n ta gba a yuwaan ɗu ili i nda: N ta̱ lyunguwa̱ ɗu upepu u cingi wi iwuya lon, oɓolo na̱ mɓa̱la̱ icu'un icu'un, hali na̱ mɓa̱la̱ n na ma̱a̱ lungusa̱ ɗu esu. Reve i ka̱ra̱ a rumba̱na̱sa̱ a̱vu u zuwa mɓa̱la̱ mo okolo. I ta yuwan ca̱'a̱n ve pere, adama a na n'yuwatan n ɗu n ɗa maa lyuwa le. 17N ta yuwan tsurala na̱ a̱ɗu adama n'yuwatan n ɗu n lyuwa ɗu nu uvon. Aza a na a 'yuwan nɗu ele ɗa aa yuwan tsugono tsa̱ ɗu, waru i ta̱ ka̱ra̱ e ilaɗi ko na̱ za lo a saɓusa ɗu shi.
18<<Agba suru na̱ ne, ni i 'yuwan a zuwaa mu atsuvu, to n ta̱ gba o doɓonuwo ɗu a̱tsuma̱lima̱ a̱ ɗu toto ucindere. 19N ta kuɗa ucira wu uvaɗu wa aciyogbamu u ɗu. N ta zuwa eleshe a na a̱ ri zuva ɗu o o'wo tsu rumu, iɗa i na i ri za̱la̱ ɗu waru tsu rumushili.#26:19 Tsu rumu na̱ rumushili ta yuwusan adanshi o ulambu wi iro'i 20I to una ucira u ɗu pere adama a na iɗa i ɗu yaa matsan ili shi, waru ɗanga vi iɗa i ɗu aa matsan ili shi.
21<<Agba hali n gogo ni i yuwaan mu aciyogbamu, waru ni i 'yuwan a zuwaa mu atsuvu, n ta̱ gba a̱ da̱shi ɗu a̱tsuma̱lima̱ udoɓonuwu toto ucindere adama o unusu u ɗu. 22N ta̱ waru a̱ lyungu inama yu una ivama a aci a̱ ɗu aza a na oo una muwun n ɗu ni iliyamunga i ɗu. Waru a ta jiba a̱bunda̱ a̱ ɗu hali re ɗu vo o'wo babu ama.
23<<Agba suru ni ili i nda, ni i 'yuwan a̱ usu tsuɓari tsa̱ va̱, reve i lyuwa elime a yuwusaan mu aciyogbamu, 24a̱mu fo, n to ronu na̱ a̱ɗu. A̱mu na aciya̱va̱ a ɗa maa yuwan nla̱ngi na̱ a̱ɗu. A̱vu n ca ɗu a̱tsuma̱lima̱ toto ucindere adama a̱ nusu ɗu. 25N ta̱ ta̱wa̱a̱ ɗu nu uvon u na waa tsupaa mu adama a na i kuɗai akucunu a̱ va̱. Nni i rono a̱ ka̱mba̱ na̱ a̱ca̱pa̱ a̱ tyo a̱tsuma̱ e ilyuci i ɗu, n ta̱ lyunguwa̱ ɗu na̱ mɓa̱la̱, reve i riya̱ e ekere a n'yuwatan n ɗu. 26N te geshe ure u ma̱tsura̱ me ilyalya i ɗu hali she na̱ a̱ma̱ci kupa a̱ zun opopofu e eelele a̱ ta̱, reve a ca ɗu uritowu. I ta lyuwa agba ya̱a̱ cuwa̱n shi.
27<<Agba suru na̱ ne, nna̱ yu uwwa mu shi, reve i ka̱ra̱ a mmalu n ɗu a̱ 'ya̱susa̱a̱n mu aci, 28a̱mu gba n ta̱ 'ya̱sa̱a̱n ɗu nu upan lon. Reve a̱mu na aciya̱va̱ n doɓonuwo ɗu a̱tsuma̱lima̱ toto ucindere adama a̱ nusu ɗu. 29I ta tama inama i muwun n ɗu mo olobo ne esheli. 30N ta̱ lungusa̱ a̱'isa̱ a̱ a̱ma̱li a̱ ɗu uba̱ta̱ wa̱ a̱ga̱nda̱. Waru n ta̱ lungusa̱ musa'a ma̱ a̱tsuka̱ a̱ ma̱guru n ɗu. N ta̱ waru gba a̱ kunguru a̱kwa̱kwa̱ a̱ ɗu zuva va̱ a̱kwa̱kwa̱ va̱ a̱ma̱li a̱ ɗu. I to o'wo ili yi idaba e ekere a̱ va̱. 31N ta̱ ka̱mba̱to ilyuci i ɗu asa'a. Waru n ta̱ lungusa̱ a̱'isa̱ a̱ ɗu. Ma̱a̱ da̱shi ciga ma̱guru ma̱ kucci ɗu shi. 32N ta̱ lungusa̱ iɗa i ɗu hali wo o'wo cine n'yuwatan n na n ri na̱ nden pe aa lamba ili i na aa damma. 33N te bete'we ɗu a̱ tyo a̱tsuma̱ a nɗa n ro, reve n tala matsun me pe'eni ma̱ va̱ n saɓa ɗu. A̱vu n zuwa iɗa i ɗu yo o'wo asa'a waru a̱ lungusa̱ ilyuci i ɗu. 34Ɗaɗa iɗa i ɗu ya̱a̱ tsura̱ yu uwwa uyo'o wa Aa'wan a̱ wivuwun wa̱ yi a mantsa ma na u ri okongo. Ni i ri e iɗa yi n'yuwatan n ɗu, iɗa'a i ta̱ tsura̱ wivuwun wa̱ yi waru wu uwwa uyo'o u wivuwun. 35Mantsa ma na u ri okongo suru, iɗa'a i ta̱ tsura̱ wivuwun u na u shi tsura̱i shi a mantsa ma̱ wivuwun wa Ashibi ma na na i da̱na̱i pe nden.
36<<Amma o una̱ u ɗu gba aza a na a buwai, n ta zuwa wovon wa̱ a̱bunda̱ o okolo a̱ ɗu a̱tsuma̱ e iɗa yi n'yuwatan n ɗu. Hali ni ilama ya̱ a̱vu'un yaa saɓa ɗu. I ta suma she damma aza a na aa sumusa matsun me pe'eni, reve i riya̱, ko na wo o'woi za lo aa saɓusa ɗu shi. 37I ta̱ da̱na̱ a ngamulai va̱ni ɗu tsa ama a na a sumusaa una̱ u matsun me pe'eni ko na wo o'woi za lo aa saɓusa le shi. Adama o ndolo yaa gura isawan a̱ ma̱ka̱ka̱n ma n'yuwatan n ɗu shi. 38I ta̱ kuwa̱ a̱tsuma̱ a nɗa n ro. Iɗa yi n'yuwatan n ɗu i ta lyuwa ɗu. 39Amma o una̱ u ɗu gba aza a na a buwai, i ta̱ kuwa̱ a̱tsuma̱ e iɗa yi n'yuwatan n ɗu adama a̱ nusu ɗu na̱ wa aza a nkaya n ɗu.
40<<Agba nna a pati gafura vu nusu le na̱ nusu vu nkaya n le nu ulambu wa amayun e le e ekere a̱ va̱ waru nna̱ a̱ usu a yuwaan mu ta̱ aciyogbamu, 41ili i na i zuwai n 'yuwan nle hali n keɓe nle a̱ tyo e iɗa yi n'yuwatan nle, nna̱ a̱ ka̱ɗa̱to okolo a aciyogbamu e le reve a̱ usu unusu u le, 42n ta cuwan na akucunu a na n yuwain na̱ Yakubu, na̱ Ishaku na̱ Ibrahim. N ta gba a cuwan ni iɗa'a. 43Amma a ta lyawa iɗa'a i tsura̱ wivuwun a mantsa ma na u ri okongo. A ta̱ gba a tsupa o una̱ wu nusu le adama a na a 'yuwain wila̱ u va̱ waru e enei wila̱ u va̱ idaba. 44Agba suru na̱ ne, a mantsa ma na a̱ ri e iɗa yi n'yuwatan n le, maa lyawa le shi, ko me ene le idaba shi hali na moo kototo le suru suru shi ko n kuɗa akucunu a na n yuwaan n le. A̱mu ɗa A̱sulazuva A̱sula̱ e le. 45Amma adama a̱ ɗu n ta cuwan na̱ akucunu a na n yuwain na̱ nkaya n ɗu aza a na mu uta̱yi a̱tsuma̱ e iɗa ya Masar e esu a ama a nɗa n ro adama moo o'wo A̱sula̱ e le. A̱mu ɗa A̱sulazuva.>>
46Ele nda e le ɗa ili i na a zuwai na̱ wila̱ nu uritosu u na A̱sulazuva a yuwain na ama a Isra'ila e ekere a Musa a Masasan ma Sinai.
Currently Selected:
Nan Ganu 26: TSW
Highlight
Share
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
