Josuwa 8
8
Aza a Isra'ila a lyuwa ta̱ Ai nu uvon
1Reve A̱sulazuva a damma Josuwa, <<She vu uwwa wovon wan waru she okolo a kuɗa wu wan. Tara ali o uvon suru, vu 'yon vu gawan vu riya̱a̱ Ai nu uvon. Ka̱lyuwa̱, n ca wu ta̱ ɗe mogono ma Ai e ekere a̱ wu na ama a̱ yi na̱ lyuci va̱ yi ni iɗa ya̱ yi. 2Na̱ vu 'yuwan ciga vu yuwan na̱ Ai na̱ mogono ma̱ yi cine vu yuwain na̱ Jeriko na̱ mogono ma̱ yi. Amma i ta gura pura̱ itana ya̱ yi ni iliyamunga ya̱ yi adama a aciya̱ɗu. I vawan le a̱ mɓa̱nga̱ n ro n lyuci'i na̱ a̱livu babu ele urevu.>>
3Ɗaɗa Josuwa na ali o uvo'on suru a̱ 'yoyin adama a̱ riya̱a̱ Ai nu uvon. A̱vu Josuwa ɗangwa ali a na a la'a gurai uvon ama ukpakukupa mata'atsu (30,000), reve u lyungu le na ayin. 4Reve u damma le, <<Poloi atsuvu ulobonu, i ta vawan lyuci'i a̱ mɓa̱nga̱ n ro na̱ a̱livu. She i yuwan alanga na̱ lyuci'i wan, agba suru nɗu i da̱na̱ ufoɓu. 5A̱mu gba oɓolo na ama a na a̱ ri oɓolo na̱ a̱mu tsu ta rawa zuzu na̱ lyuci'i. Reve nna ama'a o uta̱ adama a yuwan uvon na̱ a̱tsu tsu ufaru, a̱vu tsu sumaa le. 6A̱ to uta̱ a saɓa tsu hali she na̱ tsu pura̱ ugbozu u le o uta̱ a̱ lyuci'i adama a na a ta damma, <A sumaa tsu ta̱ tsu ufaru.> Ne ɗa na̱ tsu sumaa le, 7reve a̱ɗu i 'yon uba̱ta̱ u na i ri uvawun, a̱vu i lyuwa lyuci'i, adama a na A̱sulazuva A̱sula̱ a̱ ɗu a ta ca ɗu a̱yi e ekere a̱ ɗu. 8Reve ni i lyuwa lyuci'i a̱vu i daɓa yi akina. I yuwan cine A̱sulazuva a dammai. I ka̱mbuwa̱ ugbozu, adama a na n damma ɗu ta̱ ɗe ili i na yaa yuwan.>>
9Reve Josuwa lyawa le a̱ ka̱ra̱, reve a̱ tyo uba̱ta̱ u na aa vawan, a̱vu o von e memere ma Betel na̱ Ai upasu wa̱ a̱livu wa Ai. Amma Josuwa asa ta̱ oɓolo na akapi a ama.
10Reve Josuwa 'yon na̱ wasasa a̱vu u ɓoloto ama a̱ yi reve a̱ ka̱ra̱ a gawan, a̱yi na azagbain ama Isra'ila a uwa ta̱ elime a ama a̱ tyo Ai. 11Reve a̱za̱ o uvon a na a̱ ri oɓolo na̱ a̱yi suru a rawa zuzu na̱ lyuci'i, reve a̱ va̱la̱ upasu wu ugana wa Ai nu uka̱ri e memere me le na̱ lyuci'i. 12U tara ta̱ ama a na a rawai ukpakukupa uton (5,000), reve u zuwa le a vawan e memere ma Betel na̱ Ai, a̱livu a̱ lyuci'i. 13Ali o uvon a̱ va̱la̱ ta̱ upasu wu ugana na̱ lyuci'i a̱vu aza a na a vawain waru a̱livu a̱ lyuci'i. Agba Josuwa asa ta̱ o uka̱ri.
14Reve ana mogono ma Ai me enei ali o uvon a na a̱ ri oɓolo na̱ Josuwa, a̱vu a̱yi na ama a̱ lyuci'i suru, a̱ jika̱ o uta̱ na̱ wasasa adama a ga'an na aza a Isra'ila uba̱ta̱ o uvon, uba̱ta̱ u ro zuzu na̱ upasu wu Uka̱ri wa Araba. Agba u reve a na a vawan niyi a̱ mɓa̱nga̱ n lyuci shi. 15Reve Josuwa na aza a Isra'ila suru a yuwan she damma a lyuwa le ta̱, reve o rono na̱ a̱ca̱pa̱ a̱vu a suma a̱ tyo a̱tsumona. 16Ɗaɗa e ɗeyi ama a̱ lyuci va Ai suru o uta̱ a saɓa le. Reve ana a saɓai Josuwa a̱vu u pura̱ ugbozu u le o uta̱ a̱ lyuci'i. 17Ko vuma ta̱ buwa pe a̱ lyuci va Ai ko Betel za na kuɗa̱i a saɓa Isra'ila shi. A̱vu a lyawa na̱ntsu lyuci'i ukpa̱tu'u. Reve a saɓa aza a Isra'ila.
18Reve A̱sulazuva a damma Josuwa, <<Sapi mabata ma na ma̱ ri o ukere wa̱ wu a̱ tyo Ai adama a na n ta ca wu lyuci'i o ukere wa̱ wu.>> Ɗaɗa Josuwa sapiyi mabata'a a̱ tyo a̱ lyuci'i. 19Josuwa a sapi ukere wa̱ yi, reve ama a na a̱ ri uvawu'un a̱ 'yoshin a suma o uta̱ uba̱ta̱ u na a̱ ri, a̱vu a suma a uwa a̱ lyuci'i a̱vu a lyuwa yi nu uvon. Reve a̱ jika̱ a daɓa lyuci'i akina.
20Reve ana ama a Ai a̱ ka̱lyuwa̱i a̱ca̱pa̱, reve e ene mikyon n lyuci'i n gawan a̱ tyo zuva, agba a̱ ri nu ure u na aa suma uba̱ta̱ u ro shi, adama a na aza a Isra'ila a na sumai a̱ tyo o ogozo a vadala ta̱ a yuwan uvon ne ele. 21A mantsa ma na Josuwa na aza a Isra'ila suru e enei aza a na a vawain e reme ta̱ lyuci'i, waru mikyon n lyuci'i n gawan ta̱ zuva, reve a vadala a̱ riya̱a̱ ama a Ai. 22Reve waru aza a Isra'ila a na a̱ ri pe a̱ lyuci'i o uta̱ a̱ riya̱a̱ le nu uvon, adama o ndolo a̱vu o o'wo e memere ma aza a Isra'ila ozo o ro e eɓele a nda ozo o e eɓele a̱ ndeɗe. A̱vu aza a Isra'ila o una le suru ko vuma ta̱ pasa ko u suma shi. 23Amma e reme ta̱ mogono ma Ai wuma, a̱vu a̱ ta̱wa̱ na̱ a̱yi ya̱ Josuwa.
24Ana aza a Isra'ila o unai ama a Ai suru a agalaci o ogozo uba̱ta̱ u na a saɓa nle, reve ana za suru kuwa̱i a matsun me pe'eni, a̱vu aza a Isra'ila suru a̱ ka̱mba̱ Ai a̱vu o una za na ri pe suru. 25Aza a na a̱ kuwa̱i urana u ndolo ali na̱ a̱ma̱ci a Ai ama ukpakukupa nu ukpakure (12,000). 26Agba Josuwa voton ukere wa̱ yi shi za na u sapiyayi mabata hali she na u kototoi aza a na a̱ ri Ai suru. 27Iliyamunga ni itana i lyuci i ɗa goon aza a Isra'ila a̱ pura̱i o uvon cine A̱sulazuva a dammai Josuwa.
28A̱vu Josuwa kula̱to Ai a̱vu wo o'woto yi aganga o okongo hali na ana'an hali hali hali. 29Reve u sa̱ga̱do mogono ma Ai zuva vu uɗanga hali she ulivu. Reve urana a̱ ma̱riya̱a̱ Josuwa zuwa a̱ cipa̱to lipuꞌu o uɗanga'a, reve a vari yi o una̱ntsu u lyuci'i. Reve o ɓolotowo yi a̱ba̱jini a aganga a atali za na ri lo hali na ana'an.
A yuwisan ta̱ akucunu a Masasan ma Eba
30Reve Josuwa suwaa A̱sulazuva A̱sula̱ a Isra'ila masa'a a Masasan ma Eba,#8:30-32 Ka̱lyuwa̱: U.Wl 27:2-8 31cine Musa aagbashi a̱ A̱sulazuva a zuwai aza a Isra'ila. U suwa yi ta̱ cine u ri uɗanu a Aatagada a̱ Wila̱ wa Musa, <<Masa'a ma atali ma na e she'ein shi a za na ko vuma yuwain ulinga na̱ rumu shi.>>#8:31 Ka̱lyuwa̱: Mta̱ 20:25 Reve a yuwaan ɗe A̱sulazuva kucci vu ukula̱tosu na̱ kucci muwwulai. 32Reve ɗe a̱ ma̱ka̱ka̱n ma aza a Isra'ila Josuwa pura̱ ɗe a atali'i wila̱ wa Musa u na u ɗanai. 33#8:33-35 Ka̱lyuwa̱: U.Wl 11:29; 27:12-13Reve aza a Isra'ila suru omocin nu umatsun wi iɗa, na̱ mbara n le na azagbain na̱ a̱za̱ o uge'etosu e isawan a̱ nka̱la̱la̱i na Akpati a Nzuwulai a̱ A̱sulazuva elime a nan ganu o ugundo wa̱ Levi aza a na a tanuyi akpati'i. Uɓatsulai wa a ama gba e isawan elime a Masasan ma Gerizim, uɓatsulai waru e isawan elime a Masasan ma Eba, cine Musa aagbashi a̱ A̱sulazuva a dammai ɗe nu ufaru ana u dammai a zuwaa aza a Isra'ila aba'un!
34Ana o kotoi, a̱vu Josuwa ɗewe ama'a nuna̱ idanshi i wila̱ꞌa̱ suru, aba'un nu una̱, cine u ri uɗanu suru a Aatagada a̱ Wila̱. 35Ko danshi ta̱ lo e ili i na Musa zuwai suru na Josuwa kuɗa̱i ee ɗenuna̱ a̱ ma̱ka̱ka̱n mo oɓolo a aza a Isra'ila suru shi, oɓolo na̱ a̱ma̱ci na̱ muwun no omocin a na a̱ ri nden oɓolo ne ele.
Currently Selected:
Josuwa 8: TSW
Highlight
Copy
Compare
Share
Want to have your highlights saved across all your devices? Sign up or sign in
©️2025 Language Development and Translation Initiative (LDTI)