Josuwa 7
7
Unusu wa Akan
1Amma a̱vu aza a Isra'ila a yuwan ulambu wa̱ a̱ɓula̱ adama e ili i na a tawai adama o ukototosu. Akan ulobo wa Karmi, ulobo wa Zabdi ulobo wa Zera vu ugundo wa Yahuza, u tara ta̱ a̱tsuma̱ e ili i na a tawai'i. Reve gba A̱sulazuva a yuwan upan na aza a Isra'ila.
2Josuwa lyungu ta̱ ama diga Jeriko a̱ tyo Ai, lyuci na ri zuzu na̱ Bet Aven asana a Betel. A̱vu u damma le, <<Gawain i 'ya̱wa̱ i tawa utyo wi iɗa'a.>> Reve ama'a a gawan a tawa utyo wa Ai.
3Ana a̱ ka̱mba̱i uba̱ta̱ wa Josuwa a̱vu a damma yi, <<She vu zuwa ama'a suru a gawan wan. Vu lyungu ama ukpakukupa ure (2,000) ko ukpakukupa uta'atsu (3,000) a yuwan uvon na̱ Ai. She vu zuwa ali o uvon suru o sowo a̱tsuma̱lima̱ ɗe wan, adama a na wa'a ɗa a̱ ri.>> 4Adama o ndolo a ta rawa ama ukpakukupa uta'atsu (3,000) aza a na a̱ 'ya̱wa̱i uvon. Agba reve a sumaa ama a Ai. 5A̱vu ama a Ai o una ama a na aa rawa mata'atsu na̱ a̱za̱ a̱ ta̱li a̱tsuma̱ e le. Reve o lo aza a Isra'ila diga o una̱ntsu u lyuci'i hali a̱ tyo Shebarim#7:5 Shebarim Urevu wa aala a nda a̱yi ɗa uba̱ta̱ u na a̱a̱ ka̱pusa̱ atali. , reve o una le o uzuru. Reve okolo a ama e jeruwe na̱ wovon.
6Reve Josuwa oɓolo na̱ mbara ma Isra'ila a karalai a̱tugu e le, reve o von ma̱kpa̱ɓa̱ e iɗa a̱ ma̱ka̱ka̱n ma Akpati a Nzuwulai a̱ A̱sulazuva hali she ulivu. Reve a̱ tsun ma̱buta̱ a aci e le adama a̱tsumola̱ngu. 7A̱vu Josuwa damma, <<A̱tsuma̱lima̱! A̱sulazuva Zagbain, adama a̱ nye vu ta̱wa̱i na ama nda mavada ma̱ Urudu gba, vu zuwa tsu e ekere a aza a Amoriya adama o kototo tsu? U shi ta̱ a la'aa tsu na̱ tsu shi tsu da̱nu mavada ma̱ Urudu ma̱ ndeɗe! 8Zagbain, nye maa damma ana Isra'ila vadalai a sumayi n'yuwatan n le! 9Aza a Ka'ana na aza a na a̱ ri nden e iɗa'a suru a ta uwwa, reve a̱ ka̱nda̱ruwa̱ tsu a̱vu a tasa ala a̱ tsu o uvaɗi. Nye gba vaa yuwan adama a ala a gbain a̱ wu?>>
10Reve A̱sulazuva a damma Josuwa, <<'Yon! Adama a̱ nye vu voyin ma̱kpa̱ɓa̱ e iɗa? 11Isra'ila yuwan ta̱ unusu, a kuɗa ta̱ akucunu a̱ va̱ a na n zuwaa nle. A tara ta̱ a̱tsuma̱ e ili i na a tawai adama o ukototosu, e iva̱ ta̱, a yuwan ta̱ epen, a zuwa le ta̱ oɓolo ni itana i le. 12Adama o ndolo a ɗa aza a Isra'ila a gura isawain a̱ ma̱ka̱ka̱n ma n'yuwatan n le shi. A vadala ta̱ ucina̱ u le a sumaa n'yuwatan n le adama a na ele ɗa o o'woi ili i na oo kototo. Ma̱a̱ da̱shi da̱na̱ oɓolo na̱ a̱ɗu waru shi, she ni i kototo ili i na a tawai adama o ukototosu a̱tsuma̱ a̱ ɗu. 13'Yon vu ka̱mbuwa̱ ama na akiza vu damma le, <Ka̱mbuwa̱i aciya̱ɗu na akiza, adama a nfa'an adama a na apa ili i na A̱sulazuva A̱sula̱ a Isra'ila a dammai, <<Ili i na a tawai adama o ukototosu i ta̱ pe e memere ma̱ ɗu, a̱vu Isra'ila. Vaa gura isawan a̱ ma̱ka̱ka̱n ma n'yuwatan ma̱ wu shi she na̱ yu uta̱a̱ ili i na a tawai'i adama o ukototosu e memere ma̱ ɗu.>> 14I ta̱wa̱ na aciya̱ɗu zuzu nu usana gundo gundo. Reve ugundo u na A̱sulazuva a ɗangwai u ta̱wa̱ zuzu umatsun umatsun. Reve umatsun u na A̱sulazuva a ɗangwai, u ta̱wa̱ zuzu 'wa 'wa. Reve u'wa u na A̱sulazuva a ɗangwai a̱ ta̱wa̱ aci aci. 15Reve za na e remei ni ili i na a tawai adama o ukototosu'u a̱ kula̱to yi na akina, a̱yi na̱ u'wa wa̱ yi oɓolo ni ili i na u ri na̱ a̱yi suru, adama a na u kuɗai akucunu a̱ A̱sulazuva, waru adama a na u yuwan ta̱ ili i wono a̱tsuma̱ a Isra'ila!> >>
16Ɗaɗa Josuwa 'yoyin nu usana usana a̱vu u ta̱wa̱ na̱ Isra'ila zuzu gundo gundo. Reve a ɗangwa ugundo wa Yahuza. 17Reve u ta̱wa̱ nu ugundo wa Yahuza zuzu umatsun umatsun, reve a ɗangwa umatsun wa Zera. Reve a̱ ta̱wa̱a̱ nu umatsun wa Zera zuzu 'wa 'wa, reve a ɗangwa u'wa wa Zabdi. 18Reve u ta̱wa̱ nu u'wa wa Zabdi suru zuzu aci aci, reve a ɗangwa Akan ulobo wa Karmi, ulobo wa Zabdi, ulobo wa Zera vu ugundo wa Yahuza.
19Reve Josuwa damma Akan, <<Mawun ma̱ va̱ vu ca A̱sulazuva A̱sula̱ a Isra'ila tsugbain a̱vu vu damma amayun. Damma mu ili i na vu yuwain, she vu pala mu wan.>>
20A̱vu Akan usu Josuwa, u damma, <<Amayun n yuwaan ta̱ A̱sulazuva A̱sula̱ a Isra'ila unusu. Apa nda ili i na n yuwain: 21Ana me enei utugu wu uga'an u sa'ani wa Babila#7:21 Shina a̱yi ɗa aala o ro a Babila. u makundatsu azurufa ukpakure (200), na̱ zinariya vu ume makundatsu kupoton,#7:21 Makundatsu kupoton u zinariya una̱ta̱ u ɗa u ri nu uɓatsulai u kilo. a̱tsuma̱ e ili i na tsu pura̱i. Reve n zuwa okolo a̱ va̱ ya̱'a̱ le, ɗaɗa n tara nle. A̱ ta̱ pe usokowu e iɗa o oogodo a̱ va̱ na̱ azurufa za̱la̱.>>
22Ɗaɗa Josuwa lyunguyi nlingata, a̱vu a suma a̱ 'ya̱wa̱ o oogodoꞌo, reve gba a cina le pe usokowu o oogodo a̱ yi na̱ azurufa'a za̱la̱. 23Reve o uta̱a̱ le o oogodoꞌo a̱vu a̱ ta̱wa̱a̱ Josuwa ne ele na ama a Isra'ila suru. A̱vu a̱ zuɗa̱ le e iɗa a̱ ma̱ka̱ka̱n ma̱ A̱sulazuva.
24Reve Josuwa oɓolo na ama a Isra'ila suru a tara Akan ulobo wa Zera, oɓolo na̱ azurufa nu utugu wu uga'a'an na̱ zinariya'a no olobo ne esheli a̱ yi ni inan ya̱ yi na̱ nloli ma̱ yi ni ikyon na̱ mgbele ma̱ yi oɓolo no oogodo a̱ yi ni ili i na u ri na̱ a̱yi suru. A̱vu a̱ ta̱wa̱ ne ele o Uka̱ri wa Ako. 25A̱vu Josuwa damma, <<Adama a̱ nye vu ronoo ntsu addama? A̱vu fo A̱sulazuva a̱ ta̱ ta̱wa̱a̱ wu na addama ana'an.>> Reve aza a Isra'ila suru a vara yi na atali hali u kuwa̱. Reve a vara akapi'i fo a̱vu a̱ kula̱to le na itana i le na akina. 26Reve o ɓolotowo yi a̱ba̱jini a aganga a atali, za na ri lo hali na ana'an. Reve A̱sulazuva a lyawa upan wu usuɗuwu wa̱ yi. Adama o ndolo a ɗa hali na ana'an a̱ tsu ɗe uba̱ta̱ u ndolo Uka̱ri wa Ako.#7:26 Ureve wu danshi <<Ako>> na̱ Tsuyahuda a̱yi ɗa <<addama.>>
Currently Selected:
Josuwa 7: TSW
Highlight
Copy
Compare
Share
Want to have your highlights saved across all your devices? Sign up or sign in
©️2025 Language Development and Translation Initiative (LDTI)