Ishaya 60
60
Tsugbain tsa̱ Sihiyona
1<<'Yon Urishelima vu ca ekan, adama a na ekan a̱ wu a̱ ta̱wa̱ ta̱, tsugbain tsa̱ A̱sulazuva tsa̱ te ikanasa a aci a̱ wu. 2Uwwai nda, irumbu i ɓa̱ru ta̱ uvaɗi waru irumbu pici i ɓa̱ru ta̱ ama, agba A̱sulazuva a̱ te ikana a aci a̱ wu waru e te ene tsugbain tsa̱ yi a aci a̱ wu. 3Nɗa n ta̱ ta̱wa̱ uba̱ta̱ we ekan a̱ wu, ngono waru n ta̱ ta̱wa̱ e ene ekan o u'yowun wa̱ wu. 4'Ya̱sa̱n esu a̱ wu vu ka̱lyuwa̱ a̱ ka̱nda̱ruwa̱ wu. Ama a̱ wu suru o ɓoloto ta̱ a̱vu a̱ ta̱wa̱ uba̱ta̱ wa̱ wu. Olobo a̱ wu a̱ ta̱ a̱ ma̱ta̱wa̱ diga alanga, esheli a̱ wu waru usheɗu e ekere. 5Vu te ene vi ikana, okolo a̱ wu a ta shiwan na̱ ma̱za̱nga̱, adama a na a̱ ta̱ ta̱wa̱a̱ wu nu utsuru u mala, utsuru wu nɗa u ta̱ ta̱wa̱ ya̱'a̱ wu. 6Oɓolo a arakumi a̱ ta̱ ɓa̱ru wu, murakumi ma Midiya na̱ Efa. Suru nle suru a̱ ta̱ ta̱wa̱ diga Sheba. A̱ ta̱ ta̱wa̱a̱ na̱ zinariya na̱ furenkisen, waru a ta damma alabari a sa'ani e ili i na A̱sulazuva a yuwain. 7Oɓolo e ikyon ya Keda suru o to ɓolotowo wu ele, a̱giri'i a Nebayo waru a̱ ta̱ ta̱wa̱ ne ele adama a yuwaan wu a̱ga̱nda̱. A̱ ta̱ ushi le a̱ga̱nda̱ a masa'a ma̱ va̱, waru n to lobonoto u'wa u tsugbain tsa̱ va̱. 8Nan zane a ɗa nda'a aza a na a̱ ri a tsu'yan tse eleshe, a tsu'yan tsa muɗa a̱ tyo e nkinda i le? 9Amayun nɗa m memere ma̱ mini n ta zuwaa mu okolo, na antsun a Tarshishi elime e le a̱ ta̱wusa̱ na̱ muwun ma̱ wu diga alanga, utanuwu na̱ azurufa na̱ zinariya le adama a ca ala a̱ A̱sulazuva A̱sula̱ a̱ wu Za va Akiza a Isra'ila tsugbain, adama a na u zuwa wu ta̱ vu lobono.>>
10<<Omocin a ta suwisa ɓaɓu va̱ wu, a̱vu ngono n le n yuwaan wu a̱ga̱nda̱. Ko na n ga̱la̱ nuwu a̱tsuma̱ o upan, agba a̱tsuma̱ e isa'ani i va̱ n te ene iliyali ya̱ wu. 11Na̱ntsu va̱ wu ta̱ da̱na̱ ukpa̱tu'u kuci, urana na ayin a̱a̱ ɓa̱ru le shi, adama ama a̱ ta̱wa̱a̱ wu nu utsuru wu nɗa, na̱ ngono n le ugeru elime. 12Adama a na iɗa na̱ tsugono tsa na tsaa yuwaan wu tsugbashi shi u to koto, nɗa n ndolo o to kototo le suru suru.>> 13<<Tsugbain tsa Lebanon tsa̱ ta̱ ta̱wa̱ ya̱'a̱ wu, ɗanga fir na̱ amon na aza a seda, adama a kakala A̱a̱'isa̱ a̱ va̱. Reve n zuwa udasata wa ana a̱ va̱ a̱ tsura̱ tsugbain. 14Muwun ma aza a na a ca nuwu a̱tsuma̱lima̱ n ta̱ ta̱wa̱ a̱ ka̱ɗa̱ta̱wa̱ wu. Aza a na waru a tara nuwu ili i ro shi a̱ ta̱ ka̱ɗato a ana a̱ wu. A̱vu e ɗe wu Lyuci Gbain va̱ A̱sulazuva, Sihiyona lyuci vu Za va Akiza va Isra'ila.>> 15<<Ko na wo o'woi a lyawa wu ta̱ a̱vu waru a 'yuwan wu, babu ko za na o utula̱i a̱tsuma̱ a̱ wu, n ta̱ ka̱mbuwa̱ wu ili i tsugbain babu ukotu, ili i ma̱za̱nga̱ hali hali. 16Vu to sowo maani ma nɗa a̱vu a kungwato wu a maani mo tsugono. Reve vu reve a na a̱mu, A̱sulazuva, a̱mu ɗa Iwawi ya wu, Za va Atsupu va̱ wu, Za vu Ucira va Yakubu. 17N ta̱ ta̱wa̱a̱ na̱ zinariya o una̱ wu rumushili, azurufa waru o una̱ wu rumu. O una̱ wa akpata waru n ta̱ ta̱wa̱a̱ wu na̱ rumushili, na̱ rumu o una̱ wa atali. N ta zuwa nden ma asuvu wo o'wo zagbain va̱, a̱ɓula̱ waru aa yuwan tsugbain a aci a̱ wu. 18A̱a̱ da̱shi uwwa u'ya̱susa̱n wu ugbozu e iɗa ya̱ wu shi, ko ulungusu ko ukototosu a̱tsuma̱ e iɗa ya̱ wu shi. Agba vu te ɗe ɓaɓu va̱ wu Iwawi, na̱ntsu va̱ wu waru Ica. 19Urana wa̱a̱ da̱shi o'wo ekan a̱ wu nu urana shi, ko gba ekan o woto e ikana a aci a̱ wu shi, adama a na A̱sulazuva o to o'wo ekan a̱ wu babu ukotu. A̱sula̱ a̱ wu o to o'wo tsugbain tsa̱ wu. 20Urana wa̱ wu u buwa a̱a̱ da̱shi riya̱ shi, woto wa̱ wu waru wa̱a̱ ka̱mba̱ na̱ a̱ca̱pa̱ shi, adama a na A̱sulazuva o to o'wo ekan a̱ wu a babu ukosu, rana wa̱ a̱tsuma̱lima̱ va̱ wu waru to koto. 21Reve ama a̱ wu suru oo o'wo a̱za̱ a̱ a̱ɓula̱ reve iɗa'a yo o'wo za le hali hali. Ele eten a na n cu'wa̱in ɗa, ulinga we ekere a̱ va̱, adama a ca mu tsugbain. 22Za na ri uka̱la̱mu a̱tsuma̱ a̱ ɗu u to o'wo a̱bunda̱ lon, za na waru la'ai uka̱la̱mu u to o'wo iɗa yu ucira. A̱mu ɗa A̱sulazuva a mantsa ma na ma ntsayi n ta zuwa ili'i u yuwan go'o.>>
©️2025 Language Development and Translation Initiative (LDTI)