Ishaya 58
58
Akuli a amayun
1<<Salai lon, she i ɓa̱na̱ yi o okolo wan. 'Ya̱sa̱in uɗyo u ɗu zuva tsa aavana. Dammai ama a̱ va̱ u'wa wa Yakubu iwuya i le na̱ waru unusu u le. 2Adama a na a ta zama mu urana suru. O rotso ta̱ she damma a ta a maluwa mo ure u va̱ na amayun. She damma ele iɗa i na yaa yuwusan ili i na i ri mejege ma ɗa koto a lyawa wila̱ wa̱ A̱sula̱ e le shi. E te eceshe mu a̱sa̱la̱ a na a̱ ri mejege a̱vu a yuwan she damma a̱ ta maluwa A̱sula̱ a rawa zuzu ne ele. 3A̱vu a damma, <Adama a̱ nye tsu yuwain akuli, agba ve ene shi? Adama a̱ nye tsu ka̱ɗa̱toi aciya̱tsu, agba vu reve shi?> >> A̱vu A̱sulazuva a̱ usu u damma, <<Uwwai nda, a̱tsuma̱ o urana wa akuli u ɗu i tsu kurusu ta̱ ili i na i cigai, a̱vu i paalasa aza a na aa yuwusaan ɗu ulinga. 4Akuli a̱ ɗu o tsu koso ta̱ na̱ mawasan na̱ nla̱ngi na̱ nlapulai na̱ likuku vi iwuya. Cu'un va akuli a na yaa yuwusan ana'an waa zuwa aa uwwa uɗyo u ɗu zuva shi. 5Cu'un va akuli na n ɗangwai ɗa nda'a urana u ta̱ vuma ca aciya̱yi a̱tsuma̱lima̱? Ko u ka̱ɗa̱to aaci a̱ yi goon tsa apumpu na adama o uvosun na akashamuna utsuwun no okomo? Ili i ndolo i ɗa yee ɗesu akuli, urana u na A̱sulazuva a̱a̱ usu?>> 6<<O'o apa nda cu'un va akuli na n ɗangwai, a̱ ba̱ɗa̱ akani e iwuya, reve waru a̱ ba̱ɗa̱ amunga a̱ a̱a̱gba̱la̱ a aza a na a tsugbai. A̱vu waru a lyawa aza a na oo ɓongishi fa̱a̱n. A̱vu a kuɗa a̱a̱gba̱la̱ biti. 7A̱yi ɗa vu ne'eshen ilyalya ya̱ wu na̱ za na ri na ambulu. A̱vu vu ta̱wa̱ na̱ za na ri nu u'wa shi a̱tsuma̱ o u'wa. Na̱ ve ene za na ri ataɓu vo oto yi itana. Waru she vu suma lipu va̱ wu na̱ za na ri mpasa ma̱ wu wan. 8Ɗaɗa ekan a̱ wu ee ikana tsa̱ a̱ wutu wu urana, reve vo o'wo gbaga ni ilaɗi. A̱vu a̱ɓula̱ a̱ wu a wala elime a̱ wu, reve tsugbain tsa̱ A̱sulazuva tsa yuwaan wu mapari a̱ca̱pa̱. 9Ɗaɗa vee ɗe a̱vu A̱sulazuva a̱ usu. Vu ta yuwan mesun me izami yi ikambi, a̱vu u damma, <A̱mu ɗa nda.> Na̱ vu tawa a̱a̱gba̱la̱ e iɓongi nu usapishi wa akatsu na adanshi a vama. 10Na̱ vu ca aciya̱wu o una̱ wu za va ambulu, a̱vu vu kamba za na ri a̱tsuma̱ e iɓongi, ɗaɗa ekan a̱ wu ee ikana a̱tsuma̱ e irumbu. A̱vu ayin a̱ wu o o'wo tsu urana a aci. 11A̱sulazuva o to rono wu aɗanga kuci. U ta ca wu ili i na vu cigai biti a̱tsuma̱ e iɗa i na urana wa̱a̱ kula̱tosu, reve u gbamato etele a̱ wu. Vu to o'wo tsa̱ a̱a̱rumbu a na a̱a̱ tsurusa̱ mini ulobonu, tsa̱ lyusu mini ma na mini ma̱ yi ma tsu kasa shi. 12Waru vu ta suwisa akuci a sa'a a̱ wu a na o o'woi okongo mantsa ɗe nu ujumu reve a̱ 'ya̱sa̱n akuci a̱ nkyun mu ufaru. A̱ ta̱ ɗe wu Za vu Ulapulu vu Uɓaɓu u na wo Ocoi, Za vu Ulapulu wu re na̱ ba̱ta̱ a̱ Nden.>> 13<<Vu tawa ana a makuɗa ma Ashibi waru na̱ mayan cine vu cigai o urana wa akiza u va̱. Vu reme e ɗesu Ashibi ili i ma̱za̱nga̱ nu urana wa akiza wa̱ A̱sulazuva ili i tsugbain. Vu ca yi tsugbain vu lyawa a̱ kurusu ure wa̱ wu waru vu lyawa a yuwusan ili i na okolo a̱ wu a cigai na adanshi a vama. 14Ɗaɗa va̱a̱ tsura̱ ma̱za̱nga̱ uba̱ta̱ wa̱ A̱sulazuva. Reve n zuwa wu vo o'wo zuva vu uvaɗi, a̱vu n zuwa wu vu lyuwa a agadu a dada va̱ wu Yakubu.>> Una̱ wa̱ A̱sulazuva a ɗa a dammai.
©️2025 Language Development and Translation Initiative (LDTI)