Ishaya 47
47
A̱risa̱ a Babila
1<<Cipa̱, vu da̱nu a̱ ma̱buta̱, Usheli Babila u na u revei vali shi, danu e iɗa babu ootogu o tsugono, Usheli wa aza a Kaldiya. A buwa e ɗe wu usheli wa azagbain ili i sa'ani shi. 2Tara aatali a yira vi ira yira, vu palu'wa aapalutsu a̱ wu! Vu foɗo utugu wu uga'an wa̱ wu, vu kpa̱tu'wa̱ ana a̱ wu, vu pasalai na̱ ɗolu. 3E te ene ataɓu a̱ wu, waru e te ene wono wa̱ wu. N ta tsupa wu, agba ko za maa lyawa shi.>> 4Za na tsupaa ntsu, A̱sulazuva o oɓolo a̱ a̱soja a zuva a ɗa ala a̱ yi, a̱yi ɗa Za va Akiza a Isra'ila. 5<<Da̱nu kuci, a̱vu vu da̱nu a̱tsuma̱ e irumbu, Usheli wa aza a Kaldiya. A buwa e ɗe wu egbere lyuci tsugono vu nɗa n ro shi. 6N shi ta̱ a yuwusan upan na ama a̱ va̱ a̱vu n lungusa̱ le agadu a̱ va̱. N ca le ta̱ e ekere a̱ wu, agba ve ene iliyali i le shi. Hali na aza a na a kutsai fo vu zuwaa le ta̱ ulinga wu usa̱n. 7Vu damma, <N ta̱ da̱na̱ egbere lyuci kukuci!> Agba vu ka̱lyuwa̱ ili nda ko vu cuwan ni ili i na yaa fara shi.>> 8<<Gogo vu uwwa nda, a̱vu za vi icigi vu uyo'o, za na ri nden gbaga, a̱vu na vaa dansaa aciya̱wu, <A̱mu ɗa, waru babu za ro lo she a̱mu, moo o'wo ma̱runa̱ shi ko gba mawun ma̱a̱ kuwa̱ mu shi.> >> 9Agba ili i nda ra i ta cina wu gbagbalu, urana u ta̱: tsukwa̱ tsa̱ muwun na̱ tsuruna̱. A ta cina wu vere, suru na̱ a̱bunda̱ o oboci a̱ wu nu ucira u yindi ya̱ wu suru. 10<<Vu zuwa ta̱ ucira e iwuya ya̱ wu a̱vu vu damma, <Ko vuma e inda mu shi.> Ugbozu wa̱ wu nu urevu wa̱ wu u pusa̱n wu ta̱ a̱vu vu damma o okolo a̱ wu, <A̱mu ɗa, waru ko za ro lo shi she a̱mu.> >> 11A̱tsuma̱lima̱ a̱ ta̱ ta̱wa̱ wu, agba vee reve cine vaa takatsuwa yi shi. A̱tsuma̱lima̱ a̱ ta̱ riya̱a̱ wu a na vaa gura takatsuwato na atsupu shi. A̱tsuma̱lima̱ a na vaa gura cinkaya shi a̱ ta̱ ta̱wa̱ wu gbagbalu. 12Lyuwa elime na̱ tsuboci tsa̱ wu na̱ yindi ya̱ a̱bunda̱ ya̱ wu, aza a na vaa yuwusan diga a̱vu wa'a. U ta yuwan vu gura lyuwa aci ko gba vu gura ta̱wa̱a̱ na̱ wovon. 13Vu ta̱ka̱lyuwa̱ ta̱ na̱ a̱bunda̱ a̱ a̱sa̱la̱ a na aa casu wu! Lyawa aza a na e revei mmalu mi italyo'o ma̱ wu a rawa zuzu a kamba wu, aza a na a̱ tsu ka̱lyuwusa̱ italyo'o, aza a na a tsu dansa ili i na yaa fara woto woto. Lyawa le a wawa wu e ili i na yaa cina wu. 14Amayun, ele tsa̱ tsu'yuwa̱ tsa ɗa a̱ ri, akina a̱ ta̱ kula̱to le. Aa gura wawa aciyele e ekere o ucira we elentsu a akina'a shi. Va̱a̱ tsura̱ ikambi ya̱'a̱ le shi ko ke'en, agba uba̱ta̱ wa akina a na a̱a̱ da̱nu zuzu na̱ a̱yi ɗa shi. 15A̱yi nda a̱yi ɗa ili i na aa yuwaan wu, aza a na vu yuwain tsugbashi ne ele aza a na vu da̱na̱i a mmalu ne ele a̱vu wa'a. E te bete'we za suru reme ure wa̱ yi, ko vuma ta̱ aa gura wawa wu shi.
©️2025 Language Development and Translation Initiative (LDTI)