Ufaru 17
17
Akucunu adama a mapaɗa mo uryumbu
1Ana Aburam da̱na̱i na a'wan kupakucci na̱ kucci, a̱vu A̱sulazuva o roco yi aciya̱yi, reve u damma yi, <<A̱mu ɗa Mogono me Ili Suru. Vu toni mu no okolo a̱ ta̱. 2N ta yuwan akucunu na̱ a̱vu waru n ta ca wu limatan va̱ a̱bunda̱.>> 3A̱vu Aburam ka̱ɗa̱to nu urewesu e iɗa, a̱vu A̱sula̱ a damma yi, 4<<Akucunu a na maa yuwaan wu a ɗa nda: vu to o'wo akaya e iɗa ya̱ a̱bunda̱. 5A̱a̱ da̱shi ɗe wu Aburam shi, amma aala a̱ wu a̱ ta̱ ka̱mba̱ Ibrahim, #17:5 E elentsu a aza a Yahuda, urevu wa aala <<Ibrahim>> a̱yi ɗa <<Akaya e iɗa ya̱ a̱bunda̱.>> adama a na n zuwa wu ta̱ vo o'wo akaya e iɗa ya̱ a̱bunda̱. 6N ta ca wu limatan va̱ a̱bunda̱, waru vu ta̱ da̱na̱ na̱ muwun n na moo o'wo iɗa ya̱ a̱bunda̱. A̱tsuma̱ e le ozo o ro o to o'wo ngono. 7N to shiton akucunu a na n yuwain na̱ a̱vu na̱ limatan va̱ a̱ca̱pa̱ suru. Akucunu a na oo koto shi a ɗa maa yuwaan wu, na̱ limatan va̱ a̱ca̱pa̱ a̱ wu. N to o'wo A̱sula̱ a̱ wu na̱ limatan va̱ a̱ca̱pa̱ a̱ wu. 8N ta ca wu oɓolo na̱ muwun mu ugundo ma̱ wu iɗa i na i ri pe o limocin. Iɗa ya Ka'ana suru i to o'wo iɗa i muwun mu ugundo ma̱ wu suru suru, waru n to o'wo A̱sula̱ e le.>>
9A̱vu A̱sula̱ a damma Ibrahim, <<A̱vu vu toni akucunu a̱ va̱, a̱vu na̱ muwun mu ugundo ma̱ wu pa elime. 10Akucunu a̱ va̱ a ɗa nda na voo toni na̱ a̱vu na̱ muwun mo ugundo ma̱ wu elime: Ulobo suru vu ta paɗa yi uryumbu. 11A ta paɗa wu uryumbu, a̱yi ɗa woo o'wo iroci ya akucunu a̱ va̱ na̱ a̱vu. 12Ulobo u na u yuwain rana kunla̱ suru nu umatsun a̱tsuma̱ a̱ ɗu, a ta paɗa yi uryumbu hali a̱ tyo o ugundo u ɗu suru. Za na a matsain o u'wa, ko za na a tsulai ni ikebe o ukere wu mocin suru, za na ri umatsun u ɗu shi, a paɗa yi uryumbu. 13Umatsun wu u'wa wa̱ wu suru na̱ za na a tsulai ni ikebe, na a ciga a 'yuwan a paɗa yi uryumbu. Mayuwaan ne ɗa lipu ɗu oo roco a na akucunu a̱ va̱ na̱ a̱ɗu oo koto shi. 14Vali na suru a paɗai uryumbu shi a ta tawa yi a̱tsuma̱ a ama a̱ yi; u kuɗa ta̱ akucunu a̱ va̱.>>
15A̱vu A̱sula̱ a damma yi, <<O una̱ wu ka va̱ wu, she vu da̱shi ɗe yi Saraya wan, Saratu#17:15 E elentsu a aza a Yahuda, urevu wa aala <<Saratu>> a̱yi ɗa <<Usheli u mogono.>> ɗa oo o'wo aala a̱ yi. 16N ta zuwaa yi aba'un, waru n ta ca wu mawun e ekere a̱ yi. N ta zuwaa yi aba'un, waru u to o'wo mma vi iɗa. Ngono n to uta̱ e ekere a̱ yi.>>
17A̱vu Ibrahim ka̱ɗa̱to nu urewesu wa̱ yi e iɗa, reve u zo'oso o okolo a̱ yi, adansa, <<Cine aa matsaan za na ri na a'wan ukpaku ulobo? Saratu waru u ta gura matsan a̱yi na a'wan kupakucci?>> 18Reve Ibrahim damma A̱sula̱, <<Vu shi vu lyawa Isma'ila goon woo o'wo mawun ma na maa tara agadu a̱ va̱.>>
19A̱vu A̱sula̱ a damma, <<Ne ɗa shi! Ka va̱ wu Saratu, a̱yi ɗa waa matsaan wu mawun mo ulobo. Ishiyaku#17:19 E elentsu a aza a Yahuda, urevu wa aala <<Ishiyaku>> a̱yi ɗa <<Izo'oshi.>> ɗa vaa ca yi aala. Ya̱'a̱ yi ɗa mee isawaton akucunu a babu ukotu a̱ va̱, na̱ limatan va̱ a̱ca̱pa̱ va̱ yi. 20Adama a Isma'ila waru, mu uwwa wu ta̱, n ta zuwaa yi aba'un, waru n ta ca yi limatan lon reve waru n zuwa yi u bala lon. U ta matsan ngono kupa ne ejere, n ta zuwa yi wo o'wo iɗa i gbain. 21Agba n te isawaton akucunu a̱ va̱ na̱ mawun ma̱ wu Ishiyaku, za na Saratu aa matsan nkoli a mantsa mo gogo.>> 22Ana A̱sula̱ o kotoi adanshi na̱ Ibrahim, reve u ka̱ra̱ u lyawa yi.
23A̱vu Ibrahim tara Isma'ila mawun ma̱ yi, na aza a na a matsain o u'wa wa̱ yi suru, na aza a na u tsulai ni ikebe ya̱ yi suru, ali a na a̱ ri o u'wa wa̱ yi suru u paɗa le ta̱ aryumbu o urana u ndolo cine A̱sula̱ a damma niyi u yuwan. 24Ibrahim na a'wan kupakucci na̱ kucci ɗaɗa a paɗa niyi uryumbu. 25Ulobo wa̱ yi Isma'ila waru u shi ta̱ na a'wan kupa na aza a ta'atsu ana a paɗa niyi uryumbu. 26O urana u ndolo u ɗa a paɗai Ibrahim nu ulobo wa̱ yi Isma'ila uryumbu; 27na ali o u'wa wa̱ yi suru, aza a na a matsain pe na aza a na a tsulai ni ikebe o ukere wu mocin, a paɗa le ta̱ aryumbu oɓolo na̱ a̱yi.
Currently Selected:
Ufaru 17: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
