Ufaru 12
12
A̱sula̱ e ɗe ta̱ Aburam
1A̱vu A̱sulazuva a damma Aburam, <<Lyawa iɗa ya̱ wu, a̱za̱ a̱ wu, nu u'wa wa dada va̱ wu, a̱vu vu ka̱ra̱ a̱ tyo e iɗa i na moo roco wu.
2<<N ta zuwa wu vo o'wo iɗa i gbain, a̱vu n zuwaa wu aba'un, n ta ca wu ala a gbain, vu to o'wo ure wa aba'un a̱ tyo e ekere o ozo o ro. 3Aza a na a zuwaa nuwu aba'un, n ta zuwaa le fo aba'un. Aza a na a yuwaan nuwu una̱, n ta yuwaan le fo una̱. Adama a̱ wu, ama o uvaɗi a nda a̱a̱ tsura̱ aba'un.>>
4A̱vu Aburam 'yon cine A̱sulazuva a damma niyi, a̱vu Lutu kuru yi. Ana Aburam foɓoi, tsa̱ra̱ u lyawa lyuci na a̱ tsu ɗe Haran, a̱yi a'wan kupocindere no ozo o ton. 5A̱vu Aburam tara ka va̱ yi Saraya na̱ Lutu ulobo wu zawa'a va̱ yi, nu utsuru na agbashi a̱ yi, ni ili i na o ɓolotoi a Haran suru. Reve a̱ ka̱ra̱ a̱ tyo Ka'ana, a̱vu a rawa ɗe. 6Aburam utula̱i ta̱ ni iɗa'a a̱ tyo Shekem, uba̱ta̱ o uɗanga wo Oku va̱ More. A mantsa mo ndolo aza a Ka'ana a ɗa a̱ da̱na̱i e iɗa'a. 7Reve A̱sulazuva o roco aciya̱yi ya Aburam, a̱vu u damma, <<N ta ca muwun mu ugundo ma̱ wu iɗa i nda.>> Reve u suwaa A̱sulazuva masa'a, za na roco niyi aciya̱yi. 8Diga lo reve u wala a̱ tyo e iɗa ya agaɗi asana a Betel, reve u shuwa̱ oogodo a̱ yi, Betel a̱livu, Ai waru asana. Ɗe ɗa u suwayi A̱sulazuva masa'a, reve u yuwaan yi a̱ga̱nda̱. 9Reve Aburam lyuwa elime a̱ tyo Nege.
Aburam na̱ Saraya e iɗa ya Masar
10A mantsa'a reve a yuwan ambulu e iɗa'a. Ɗaɗa Aburam ka̱ra̱i a̱ tyo e iɗa ya Masar adama u yuwan nden n limocin ɗe, adama a na ambulu'u a̱ shi ta̱ a yuwan usuɗuwu lon e iɗa'a. 11A̱yi a zama u uwa Masar, reve u damma ka va̱ yi Saraya, <<N reve ta̱ a̱vu ka sa'ani ɗa, 12waru na aza a Masar e ene wu a ta damma, <A̱yi nda ka va̱ yi ɗa,> reve o una mu a̱vu a lyawa wu wuma. 13Vu damma a̱vu zawa'a va̱ ɗa, ko adama a̱ wu ili biti yaa wala mu mejege, waru ko ma̱a̱ da̱na̱ wuma adama a̱ wu.>> 14Ana Aburam uwai Masar reve gba aza a Masar e ene ka'a u tu ulobonu lon. 15Ana azagbain a Firi'awuna e ene niyi, reve a cuwa yi a̱ ma̱ka̱ka̱n ma Firi'awuna, a̱vu a tara yi a̱ tyo o u'wa wa Firi'awuna. 16Adama a̱ yi reve Firi'awuna yuwaan Aburam isa'ani lon; reve u tsura̱ ikyon, ni inan no ogono na̱ a̱na̱wun o nloli na agbashi ali na̱ a̱ma̱ci na arakumi. 17Agba reve A̱sulazuva o foro Firi'awuna nu u'wa wa̱ yi na̱ mɓa̱la̱ n wuya adama a Saraya ka va Aburam. 18Ɗaɗa Firi'awuna ɗeyi Aburam, reve u damma, <<Nye i zuwai vu yuwan numu ne tsunda? Nye i zuwai vu damma numu a̱yi ka va̱ wu ɗa shi? 19Adama a̱ nye vu dammai, <A̱yi zawa'a va̱ ɗa,> hali gba n tara yi wo o'wo ka va̱? Gogo, apa ka va̱ wu, tara yi vu ka̱ra̱.>> 20Reve Firi'awuna yuwaan ama a̱ yi adanshi a̱ yi; reve e shewun yi, oɓolo na̱ ka va̱ yi ni ili i na u ri na̱ a̱yi suru.
Currently Selected:
Ufaru 12: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
