Mota̱a̱ 28

A̱tugu a Tsuganu

1<<Vu ta̱wa̱ na̱ mawun ma̱ a̱na̱wun ma̱ wu Haruna a̱tsuma̱ a aza a Isra'ila oɓolo no olobo a̱ yi: Nadab na̱ Abihu na̱ Eliyaza na̱ Itama adama a yuwaan mu ulinga u tsuganu. 2Vu yuwaan Haruna mawun ma̱ a̱na̱wun ma̱ wu a̱tugu a akiza, a tsugbain nu ulobonu. 3Vu damma aza a na a gurai suru a na n cayi urevu adama o ndolo a yuwaan Haruna a̱tugu adama a tawa yi ko'o, tsa̱ra̱ u yuwaan mu a̱ga̱nda̱ a tsuganu. 4Apa cu'un va̱ a̱tugu a na a̱a̱ zula̱: osonu a̱ ma̱ka̱ka̱n na̱ epo nu utugu wu uga'an na̱ mokoɗi mo utugu uɗavu wu ukere no ookokolo na̱ gbakala vi ikyun. A ta yuwaan Haruna mawun ma̱ a̱na̱wun ma̱ wu no olobo a̱ yi a̱tugu a akiza a nda, adama a yuwaan mu ulinga u tsuganu. 5Vu zuwa le a yuwan ulinga na̱ a̱punda̱ a̱ mini ma zinariya na̱ za bulu na̱ za vu ushili u ma̱ɗiya̱ na̱ za shili san na̱ a̱punda̱ o okoro a sa'ani upundu.

6<<A yuwan epo va̱ a̱punda̱ a zinariya na̱ za mini ma̱ bulu nu ushili u ma̱ɗiya̱ na̱ za vu ushili san no okoro a sa'ani upundu, ulinga wu za na gurai lon. 7A yuwaan epod'u ili yu usa̱ga̱dosu a̱ nlyungu e re, reve o ɓolo le a̱ mɓa̱nga̱ n re ma̱ yi, adama a̱ nla̱ yi. 8Gbakala vu uɗavu wu za na gurai u da̱na̱ ili i ta̱ uɓoluloi na̱ a̱yi, a yuwan yi tsa̱ yi. A ta yuwan yi na̱ a̱punda̱ a zinariya na̱ mini ma̱ bulu nu ushili u ma̱ɗiya̱ na̱ mini mo ushili san na̱ a̱punda̱ o okoro a sa'ani upundu. 9Reve vu tara atali e ikebe e re a na a̱ tsu ɗe onis, reve vu ɗana ɗe ala a̱ muwun ma Isra'ila. 10Vu ɗana ala e le ukuruwula̱i cine a matsan nle, ala a̱ ta̱li a aatali a̱ ta̱ a̱za̱ a̱ ta̱li waru a aatali e ire. 11Vu ɗana ala a̱ muwun ma Isra'ila a atali e re'e cine za vu ushe'en wa atali tsu ɗana uzuwu wu ukere ɗe. Reve vu kuru atali'i o uzuwata u zinariya. 12Reve vu ɓama le a mupaɗi mu nlyungu e epo wo o'wo atali o ucuwusan e ekere a̱ muwun ma Isra'ila, cine A̱sulazuva a dammai Musa. Ne ɗa Haruna a̱ ta̱wa̱ a̱ ma̱ka̱ka̱n ma̱ A̱sulazuva na atali a nda a̱ nlyungu ma̱ yi adama wo o'wo macuwayin. 13Vu yuwan mukpati n zinariya, 14na akani o umungu e re a zinariya can, reve vu ɓolo akani'i a mukpati'i.

15<<Reve vu yuwan apaɗi o umuna u ma̱ka̱ka̱n me izami yi ili i na A̱sulazuva a cigai ulinga wu za na gurai. Vu yuwan yi na̱ a̱punda̱ oroci e epod, na̱ a̱punda̱ a zinariya, na̱ mini ma̱ bulu nu ushili u ma̱ɗiya̱ nu ushili u san na̱ a̱punda̱ o okoro a sa'ani upundu. 16Washin wa̱ yi nu uga'an wa̱ yi u da̱na̱ inci kucci kucci una̱ta̱ ukutsuluwu ure. 17Reve vu gere ɗe daru na̱shi va atali e ikebe. Udaru wu ufaru u da̱na̱ na̱ karmiliya na̱ tofas oɓolo na̱ zumurudu. 18Udaru we ire waru u da̱na̱ na̱ kirisolat na̱ sapiya na̱ diyamon. 19Udaru wa ta'atsu waru e gere na̱ yasi na agat na̱ ameti. 20Udaru wa̱ na̱shi e gere berili na̱ onis na̱ yasfa#28:20 Atali a na e kecei nda suru a ta yuwusan adanshi a atali a sa'ani e ikebe. Vu zuwa le e mekpete ma zinariya. 21Atali kupa ne ejere a̱ ta̱ da̱na̱ lo, aatali a̱ ta̱ suru o una̱ wa aala a̱ ta̱ wo olobo a Isra'ila. Vu ɗana a aatali suru aala o ugundo u ta̱ wu gundo kupa ne ejere'e tsu uzuwu wu ukere.

22<<Vu yuwaan apaɗi o umuna a̱ ma̱ka̱ka̱'a̱n akani a zinariya can umungu tsa amunga. 23Vu yuwan nkawani n zinariya adama a mapaɗi ma̱ ma̱ka̱ka̱'a̱n reve vu nla̱ le zuva vu nge'en n re m mapaɗi m ma̱ka̱ka̱'a̱n. 24Reve vo oto akani e re a zinariya a̱tsuma̱ a nkawani n na n ri a̱ nge'en ma zuva va apaɗi a̱ ma̱ka̱ka̱n e epod'u. 25Reve vu ɓolo kosu re va akani'i a̱ mukpete n re n zinariya'a, tsundolo tsa ɗa o ɓolo nle e elime a apaɗi a̱ ma̱ka̱ka̱n e epod'u. 26Reve vu yuwan nkawani n re n zinariya, aza na a̱a̱ nla̱ o kosu re na̱ a̱tsuma̱ a mapaɗi a̱ ma̱ka̱ka̱n m epod'u. 27Vu da̱shi yuwan nkawani n re n zinariya, reve vu nla̱ le ne elime za̱la̱ mupaɗi n re mu nlyungu m epod'u zuzu nu uga'asatan na̱ mapaɗi ma̱ ma̱ka̱ka̱n gon gbakala vu uɗavu vi ikyun epod'u. 28Reve a̱ nla̱la̱i apaɗi a̱ ma̱ka̱ka̱n na̱ nkawani ma̱ yi na̱ nkawani m epod'u na amunga a̱ mini ma̱ bulu, adama o ɓolulo niyi na̱ gbakala vu uɗavu sa'ani lo'on, adama mapaɗi ma̱ ma̱ka̱ka̱n u sa̱ka̱tsa̱ e epod'u wan.

29<<A mantsa ma na suru Haruna uwai Upasu wa Akiza, u ta̱ da̱na̱ na ala a̱ muwun ma Isra'ila biti o okolo a̱ yi a̱ ma̱ka̱ka̱n ma̱ A̱sulazuva zuva vo oosonu a̱ ma̱ka̱ka̱'a̱n a matara ma̱ a̱sa̱la̱, adama wo o'wo ili yu ucuwusan uba̱ta̱ wa̱ A̱sulazuva kuci. 30Waru vu zuwa Urim#28:30 Urim na̱ Tumim ele ɗa ili i na Haruna a yuwan ulinga ne ele adama u roco ili i na A̱sula̱ a cigai. na̱ Tumim a̱tsuma̱ o osonu a̱ ma̱ka̱ka̱'a̱n adama a̱ da̱na̱ o okolo a Haruna a mantsa ma na suru u ta̱wa̱i a̱ ma̱ka̱ka̱n ma̱ A̱sulazuva. Ne ɗa Haruna a̱ da̱na̱ ni ili na A̱sulazuva a cigai aza a Isra'ila a yuwan o okolo a̱ yi a̱ ma̱ka̱ka̱n ma̱ A̱sulazuva kuci.

A̱tugu a Tsuganu o ro

31<<Vu yuwaan epod'u utugu wu uga'an u mini ma̱ bulu suru, 32nu uba̱mu u na aaci aa uwa e memere. Reve a̱a̱ guma̱#28:32 Urevu wu danshi nda na̱ Tsuyahuda wu uta̱ a alanga eteshe shi wungu'u a̱ ka̱nda̱ruwa̱, tsa̱ wungu wu utugu wu uga'an adama u kara wan. 33Za̱la̱ ve elentsu o utugu'u vu yuwan yironishi yu uɗanga u muwun m peme ɗe na̱ a̱punda̱ a̱ mini ma̱ bulu nu ushili u ma̱ɗiya̱ nu ushili u san. Reve vu yuwan lingi zinariya usataru ne ele. 34E te gere lingi zinariya na̱ ɗanga muwun m peme usatarulai a̱ ka̱nda̱ruwa̱ elentsu o utugu'u. 35Utugu u nda u ɗa Haruna o oto na̱ waa yuwan a̱ga̱nda̱. A̱ ta̱ ri n uwwusa mesun ma̱ lingi'i nnu u uwa Upasu wa Akiza a̱ ma̱ka̱ka̱n ma̱ A̱sulazuva, na̱ wu uta̱ waru, adama u kuwa̱ wan.

36<<Vu yuwan makpata ma zinariya can, reve vu she'en ɗe iɗana tso uzuwu wu ukere: AKIZA ADAMA A̱ A̱SULAZUVA. 37Reve vu nla̱ yi na̱ mamunga ma̱ mini ma̱ bulu adama a̱ nla̱ yi o okokolo'o. U da̱na̱ a̱ cin vo okokolo'o. 38U ta̱ da̱na̱ a̱ cin va Haruna, ne ɗa waa tara ume wu nusu va aza a Isra'ila u na a yuwain a mantsa ma na a cayi ne'e va akiza le suru na a tawai a̱ nge'en. U ta̱ da̱na̱ a̱ cin va Haruna kuci adama A̱sulazuva a̱ usu le.

39<<Vu yuwan waru mukoɗi ma̱ a̱tugu na̱ a̱punda̱ o okoro a sa'ani. Reve waru vu yuwan ookokolo o okoro a sa'ani, na̱ gbakala ulinga wu ukere. 40Reve vu yuwaan olobo a Haruna mukoɗi ma̱ a̱tugu ni igbakala na̱ nlezu adama u ca le tsugbain nu ulobonu. 41Na̱ vo oto Haruna mawun ma̱ a̱na̱wun ma̱ wu no olobo a̱ yi itana i nda, reve vu tsuwa̱n le mani'in n vu zuwa le ulinga. Vu tawa le na akiza tsa̱ra̱ a yuwaan mu ulinga u tsuganu. 42Reve vu yuwaan le mukoɗi ma acaka n na maa pala lipu le diga e ikyun a̱ tyo a agutsu. 43Haruna no olobo a̱ yi o to oto le mantsa ma na suru aa uwa o Oogodo o Uga'asusan ko aa rawa zuzu na̱ masa'a a yuwan a̱ga̱nda̱ Uba̱ta̱ wa Akiza, ta̱wa̱ a̱ da̱na̱ nu unusu a̱vu a̱ kuwa̱ wan. A̱yi nda u to o'wo ili i na Haruna nu ugundo wa̱ yi a̱a̱ da̱na̱ a yuwusan kuci.>>

Currently Selected:

Mota̱a̱ 28: TSW

Highlight

Copy