Mota̱a̱ 26

Oogodo o Uga'asusan

1<<I yuwan Oogodo o Uga'asusan na amuna kupa a̱ a̱punda̱ a sa'ani o okoro na̱ mini ma̱ bulu nu ushili u ma̱ɗiya̱ nu ushili u san. Reve a kala le nu ulinga u nan kerobobi wu za na gurai lon. 2Amuna'a suru nle a̱ da̱na̱ una̱ta̱, umuna suru uga'an wa̱ yi u rawa ana amunga ne ejere, washin wa̱ yi waru u da̱na̱ ana a̱ ta̱li. 3I ɓoluloi amuna o ton uba̱ta̱ u ta̱, ne ɗa waru ozo o ton a na buwai. 4A̱vu a yuwaan oɓolo o umuna wu ufaru nwo'oto na̱ mini ma̱ bulu a̱ nge'en, ne ɗa waru a yuwayin oɓolo e ire'e. 5I zula̱ nwo'oto kupoton o umuna u ta̱ reve waru i zula̱ kupoton a̱ nge'en mu za ve ire, nwo'oto'o a̱ da̱na̱ a̱ nka̱la̱la̱i. 6Reve vu yuwan koroto zinariya kupoton, a̱vu vu nla̱ amuna'a oɓolo adama oogodoꞌo wo o'wo ili i ta̱.>> 7Reve waru vu yuwan amuna e eleme e mgbele kupa na̱ za ta̱ wo o'wo aapalutsu o oogodoꞌo. 8Amuna kupa na̱ za ta̱'a̱ suru a̱ da̱na̱ una̱ta̱ uga'an wu za ta̱ suru ana amunga no ozo o ton washin waru ana a̱ ta̱li. 9Vu ɓoluloi amuna o ton uba̱ta̱ u ta̱, a̱za̱ a̱ ta̱li a na a buwai waru uba̱ta̱ u ta̱. Reve vu konzuloi za va̱ a̱za̱ a̱ ta̱li'i ure elime o oogodoꞌo. 10Reve vu yuwan nwo'oto kupoton a̱ nge'en mu ukosu wu umuna u ta̱, kupoton waru a̱ nge'en mo oɓolo e ire. 11Reve vu yuwan koroto kupoton wu rumushili reve vo oto le pe a̱ a̱la̱ta̱'a̱ adama wu nla̱ oogodoꞌo uba̱ta̱ u ta̱. 12Reve akapi o umuna wo oogodo a na a buwai vu sa̱ga̱do yi a̱ cipa̱ o ucina̱ wo oogodoꞌo. 13Reve vu lyawa udasuwu anana a̱ ta̱ na akapi o umuna suru a̱ ta̱lyuwusa̱ e eɓele biti adama u ɓa̱ru oogodoꞌo. 14Vu yuwaan oogodoꞌo aapalutsu a kwan va̱ a̱giri'i mini ma̱ shili. Reve waru vu yuwan aapalutsu o ro wa alanga na̱ kwan sa'ani.

15Vu yuwan akpata a̱ nge'en oogodoꞌo mishin na akpata a ɗanga akashiya. 16Aakpata a̱ nge'en suru uga'an wa̱ yi u rawa ana gendu, washin wa̱ yi waru u rawa ana e re na akapi o uɓatsulai. 17Aakpata a̱ nge'en suru vu yuwaan yi akatsu e re adama o moɓolo. Tsundolo tsa ɗa vaa yuwaan akpata a̱ nge'en mo oogodoꞌo suru. 18Vu yuwan akpata a̱ nge'en ushin mo uyagi mo oogodoꞌo, 19reve vu yuwaan akpata'a nda̱na̱ta̱ n azurufa amunga, nda̱na̱ta̱ n re e ikyun ya aakpata a̱ nge'en a̱ ta̱ akatsu a̱ ta̱ a̱ wungu wu nda̱na̱ta̱'a̱. 20Vu yuwaan upasu u na u buwai upasu wu ugana wo oogodoꞌo akpata a̱ nge'en ushin, 21na̱ nda̱na̱ta̱ n azurufa amunga, ejere za̱la̱ va aakpata a̱ nge'en a̱ ta̱ suru. 22Vu yuwan akpata a̱ nge'en a̱ ta̱li adama o ucina̱ wo oogodoꞌo we eɓele a̱ a̱livu, 23reve vu yuwan akpata a̱ nge'en e re adama o obolu e re o ucina̱ wo oogodoꞌo. 24Akpata a̱ nge'en e re o obolu'u o to ɓolo le diga e ikyun hali a̱ tyo zuva, reve o oto le a makawani ma̱ ta̱. Ne ɗa akpata a̱ nge'en e re'e oo o'wo. 25O to o'wo akpata a̱ nge'en kunla̱ na̱ nkyun n azurufa kupa na̱ a̱za̱ a̱ ta̱li aakpata a̱ nge'en suru na̱ nkyun mu nda̱na̱ta̱ n re. 26Waru vu yuwan aɗanga na akpata o uɗanga u akashiya: ozo o ton adama a akpata a̱ nge'en n ta̱ mo oogodoꞌo, 27ozo o ton adama a̱ nge'en n ro, ozo o ton waru adama a akpata a̱ nge'en ma̱ a̱livu mu ukosu mo oogodoꞌo. 28Aaɗanga e memere a akpata'a u reme diga o ukosu a̱ tyo o ukosu. 29Vu sura akpata a̱ nge'e'en na̱ zinariya, reve vu yuwan nkawani n zinariya n na ma̱a̱ guzula̱i aɗanga'a. Reve vu sura aɗanga'a na̱ zinariya. 30Vu shuwa̱ oogodoꞌo cine n roco nuwu zuva masasa'an tsoyi.

31Vu yuwan umuna u mini ma̱ bulu, nu ushili u ma̱ɗiya̱ nu ushili u san oɓolo no okoro a sa'ani o uɗavu, reve a yuwaan yi ulinga u kerobi wu za na gurai lon. 32Reve vu sa̱ga̱do umuna'a a̱ a̱shuwutsu a̱ na̱shi a akpata o uɗanga u akashiya a na a sarai na̱ azurufa aza a na a̱ ri na̱ koroto zinariya na a̱ ri mishin a̱ nkyun n na̱shi n azurufa'a. 33Vu sa̱ga̱do umuna'a o ugeru wu nkoroto'o reve vu zuwa Akpati a Nzuwulai'i o ucina̱ wu umuna'a. Umuna'a wu kasa Upasu wa Akiza nu Upasu u na u La'ai Akiza. 34Vu zuwa aapalutsu a matara mo unusu a Akpati a Nzuwulai 'i o Upasu u na u La'ai Akiza. 35Reve vu zuwa apada'a elime o umuna'a upasu wu ugana a̱tsuma̱ o Upasu wa Akiza wo oogodoꞌo, reve vu zuwa wisawatan u fitila'a a̱ nka̱la̱la̱i na apada'a upasu wu uyagi.

36A̱vu waru vu yuwaan u'uwata wo oogodoꞌo umuna u mini ma̱ bulu nu ushili u ma̱ɗiya̱ na̱ mini ma̱ shili san no okoro a sa'ani o uɗavu nu ulinga wu ukere. 37Vu yuwaan umuna'a koroto zinariya na̱ a̱shuwutsu o ton a aɗanga akashiya usuru na̱ zinariya. Reve vu zuɗa̱a̱ le nda̱na̱ta̱ n ton mu rumushili.

Currently Selected:

Mota̱a̱ 26: TSW

Highlight

Copy