Mota̱a̱ 18

Jeturo burai Musa

1Reve Jeturo ganu va Midiya a̱sha̱wa̱le a Musa a uwwa ili i na A̱sula̱ a yuwayin Musa na ama a̱ yi aza a Isra'ila na̱ cine A̱sulazuva o uta̱yi aza a Isra'ila diga e iɗa ya Masar. 2A̱vu Jeturo a̱sha̱wa̱le a Musa a tara Zifora ka va Musa za na u shi u ka̱mbuwa̱i o u'wa, 3oɓolo no olobo e re a̱ yi. Ulobo u ta̱ a̱ tsu ɗe yi ta̱ Gashom, adama a na Musa damma ta̱, <<A̱mu mocin ɗa e iɗa i limocin.>> 4Za ve ire waru a̱ tsu ɗe yi ta̱ Eliyaza, adama a na u damma ta̱, <<A̱sula̱ a dada va̱ a ɗa ikambi i va̱; u wawa mu ta̱ a matsun me pe'eni ma Firi'awuna.>> 5A̱vu Jeturo a̱sha̱wa̱le a Musa a̱ ta̱wa̱ a bura yi, a̱vu u ta̱wa̱a̱ yi na̱ ka va̱ yi na̱ muwun ma̱ yi. A rawa ta̱ Musa na ama'a uva̱lu a̱ a̱tsumona zuzu na̱ masasan ma̱ A̱sula̱. 6A̱vu Jeturo a̱sha̱wa̱le a Musa a̱ lyunguwa̱ yi na adanshi a na, <<A̱mu Jeturo a̱sha̱wa̱ a̱ ɗu, n ta̱ lo a̱ ta̱wa̱ ya̱'a̱ wu oɓolo na̱ ka va̱ wu no olobo e re a̱ yi.>> 7Ɗaɗa Musa uta̱i adama u ga'aton a̱sha̱wa̱le, reve u ka̱ɗa̱to reve u papura yi. Reve a̱ ca̱sa̱la̱i e ecelei alafiya e le, a̱vu a uwa o oogodo. 8Reve Musa damma a̱sha̱wa̱le ili i na A̱sulazuva a yuwain na̱ Firi'awuna na ama a Masar suru adama u wawa aza a Isra'ila. Waru u damma yi ta̱ cu'un va̱ a̱tsuma̱lima̱ a na o sowoi o ure suru, na̱ cine A̱sulazuva a wawa nle a̱tsuma̱ a̱ a̱tsuma̱lima̱. 9Jeturo yuwan ta̱ ma̱za̱nga̱ ana wu uwwai ili i sa'ani i na A̱sulazuva a yuwayin aza a Isra'ila suru a na u wawa nle e ekere a aza a Masar. 10Reve u damma, <<Aba'un a̱ tyo e ekere A̱sulazuva, za na wawa nɗu e ekere a aza a Masar na̱ Firi'awuna, reve gba u wawa ama e ekere a aza a Masar! 11Gogo nda n reve ta̱ a na A̱sulazuva a la'ai musula̱ n na m buwai suru, adama a na u yuwaan ta̱ aza a na o ɓongiyi aza a Isra'ila cine a cigai.>> 12Reve Jeturo a̱sha̱wa̱le a Musa a ca A̱sula̱ kucci vu ukula̱tosu na akapi e ikucci. Reve Haruna ta̱wa̱ oɓolo na̱ mbara ma Isra'ila suru adama a lyuwa ilyalya oɓolo na̱ a̱yi a̱ ma̱ka̱ka̱n ma̱ A̱sula̱.

13Ana usana u tawai, reve Musa da̱nu adama u ge'eto ama. Reve ama o ɓoloto a̱ ka̱nda̱ruwa̱ yi ili yu usana she ulivu. 14Ana a̱sha̱wa̱le e enei ili i na waa yuwusan adama a ama suru, reve u damma, <<Nyen i ɗa vaa yuwusan na ama ne tsunda? Adama a̱ nye vu cigai vu yuwan ulinga u nda a̱vu a̱ nde'en? Ama a ɗa nda mishin uka̱nda̱ruwu na̱ a̱vu ili yu usana hali ulivu, tsa̱ra̱ a̱ tsura̱ ikambi ya̱ wu.>> 15Reve gba Musa usu yi, <<Adama a na ama'a a̱ ta̱wusa̱ ya̱'a̱ va̱ e ece ifoɓi ya̱ A̱sula̱. 16Na̱ a̱ ri o nronuloi a̱ tsu ta̱wa̱ ta̱ ya̱'a̱ va̱, reve n lapula vuma na̱ za va̱ yi. Reve waru n rito le ili i na A̱sula̱ a cigai na̱ wila̱ wa̱ yi.>> 17Reve a̱sha̱wa̱le a Musa a̱ usu, <<Ili i na vaa yuwusan u lobono shi.

18<<A̱vu na ama a nda i ta̱ kuna̱tola̱i suru suru, waru voo koto a̱vu a̱ nde'en shi. 19Vu uwwa adanshi a̱ va̱, n ta ca wu a̱sa̱la̱, lyawa A̱sula̱ a̱ da̱na̱ oɓolo na̱ a̱vu. Ciga 'yuwan vu yuwan vo o'wo ajiya a ama uba̱ta̱ wa̱ A̱sula̱ adama vu ta̱wa̱a̱ nu ulambu u muwwulai u le ya̱'a̱ yi. 20Vu roco le ili i na A̱sula̱ a dammai na̱ wila̱, reve waru vu roco le cine a yuwan nden ni ili i na u lobonoi a yuwan. 21Vu ɗangwa ali a na aa gura a̱tsuma̱ a ama, aza a na a uwwusa wovon wa̱ A̱sula̱. Waru a̱ da̱na̱ aza a na ama aa gura zuwaa ucira, aza a na a 'yuwain utowusu wu una̱. A̱vu vu zuwa le tsugbain a aci a ama, ukpakukupa (1,000) na̱ zagbain ta̱, ukpaku (100) na̱ zagbain ta̱. Kupoton waru a̱ da̱na̱ na̱ zagbain ta̱, kupa na̱ zagbain ta̱. 22Ama a nda ele ɗa a̱ da̱na̱ e ge'etosu ama kucci. She ili i gbagbain ele ɗa a̱a̱ ta̱wa̱a̱ wu, amma ili i wawa'a suru ele e ge'eto le. U te jebee wu itana, waru a ta kamba wu. 23Na̱ vu yuwan ne, A̱sula̱ o to rono wu aɗanga, vu ta gura kaɓa asuvu. Waru ama nda suru a̱ ta̱ ka̱mba̱ a 'wa le na asuvu nden.>>

24A̱vu Musa kuru ili i na a̱sha̱wa̱le a damma niyi, a̱vu u yuwan ili i na u dammai'i suru. 25Reve u ɗangwa ali a na aa gura a̱tsuma̱ a aza a Isra'ila suru, reve u zuwa le azagbain a ama, azagbain o ukpakukupa kupa no o ukpaku ukpaku na a kupoton uton na a kupa kupa. 26Reve e ge'etosu ama kucci. Adanshi a gbain a na a̱ ri usa̱n reve e tyowe Musa, amma adanshi e kekeꞌen reve e ge'eto na aciyele. 27Reve Musa lyawa a̱sha̱wa̱le a̱ ka̱ra̱, reve u ka̱mba̱ e iɗa i le.

Currently Selected:

Mota̱a̱ 18: TSW

Highlight

Copy