Mota̱a̱ 16

Mana na̱ nroni

1O urana we gendu o woto we ire a na aza a Isra'ila suru o uta̱i e iɗa ya Masar, a̱vu a lyawa Elim. Reve aza a Isra'ila'a a uwa a̱tsumona a na a̱ tsu ɗe Sin, ele a̱ 'ya̱wa̱ upasu wa Sinai. 2Ɗe ɗa ama'a suru a yuwayin Musa na̱ Haruna acingi a̱tsumona. 3A̱vu a damma le, <<U shi ta̱ a la'aa tsu na̱ A̱sulazuva o una tsu e iɗa ya Masar! Ɗe tsu da̱na̱ ta̱ ni inama na̱ cu'un vi ilyalya i na tsu cigai suru. A̱vu a̱vu gba vu uta̱a̱ tsu tsa̱ra̱ vu una tsu na ambulu a̱tsumona.>> 4Reve A̱sulazuva a damma Musa, <<N ta zuwa o oco ilyalya tsi iro'i diga zuva adama a̱ ɗu, avu ama o uta̱ o ɓoloto ilyalya yu urana u ta̱ usana biti, adama n lyungwa̱ le me ene ko a̱ ta̱ kuru adanshi a̱ va̱ ko gba shi. 5O urana wa̱ ta̱li o foɓo ili i na a̱ ta̱wa̱yi, wo o'wo ure wi ili i na a̱ tsu ɓoloto a akapi o urana suru,>> 6Ɗaɗa Musa na̱ Haruna dammai aza a Isra'ila suru, <<Nu ulivu i te reve a na A̱sulazuva a ɗa o uta̱a̱ nɗu diga e iɗa ya Masar. 7Adama a na wu uwwa ta̱ adanshawuya a na i yuwaan niyi, nu usana i te ene tsugbain tsa̱ A̱sulazuva, a̱tsu ili i ro i ɗa shi na yaa yuwaan tsu adanshawuya!>> 8Reve Musa damma, <<A̱sulazuva a ɗa a ca ɗu inama i na yaa tama nu ulivu reve waru u ca ɗu ilyalya i na yaa rawa ɗu nu usana, adama a na wu uwwa ta̱ adanshawuya a na i yuwaan niyi, a̱tsu nye i ɗa tsu ri na yaa yuwaan tsu adanshawuya? Adanshawuya a̱ ɗu a aci a̱ tsu a ɗa shi, amma a aci a̱ A̱sulazuva a ɗa.>> 9Reve Musa damma Haruna <<Vu damma aza a Isra'ila suru, <Ta̱wa̱i zuzu na̱ A̱sulazuva, adama a na wu uwwa ta̱ adanshawuya a̱ ɗu.> >> 10Reve a mantsa ma na Haruna a yuwusan adanshi na aza a Isra'ila suru, reve a uwa a̱ka̱nla̱ a̱tsumona, reve gba e ene tsugbain tsa̱ A̱sulazuva tso uta̱ e eleshe. 11A̱vu A̱sulazuva a damma Musa, 12<<Mu uwwa ta̱ ili i na ama a dammai, damma le, <Nu ulivu i ta̱ tsura̱ inama i tama, nu usana suru waru i ta̱ tsura̱ ilyalya. Ɗaɗa yee reve a̱mu A̱sulazuva, a̱mu ɗa A̱sula̱ a̱ ɗu.> >> 13Nu ulivu u ndolo, ɗaɗa nroni ma̱ a̱bunda̱ n ta̱wa̱ m ɓa̱ruyi uba̱ta̱ u na a̱ va̱la̱i. Nu usana reve a'iza a̱ ka̱nda̱ruwa̱ uba̱ta̱'a̱. 14Ana a'iza a̱ za̱ka̱tsa̱i, reve e ene ili i ro weshe weshe ana iceke a̱tsumona. 15Ana e ene nle a̱vu e ecelei, <<Nye i ɗa gba nda'a?>> Adama a na e revei ili'i shi. Reve Musa damma le, <<A̱yi ɗa ilyalya i na A̱sulazuva a ca nɗu i lyuwa. 16Apa nda ili i na A̱sulazuva a dammai: <Za suru ɓoloto ili i na waa gura lyuwa. Za suru u kene makundatsu o una̱ wa̱ a̱bunda̱ wa ama a na i ri ne ele o oogodo suru.> >> 17Reve a yuwan cine a damma nle; ozo o ro o ɓoloto lon ozo o ro gba wa'a. 18Amma ana a̱ kunzuyi na̱ makundatsu, reve za na ɓolotoi a̱bunda̱ u yuwan yi a̱bunda̱ shi, a̱yi waru za na ɓolotoi wa'a u ka̱la̱ma̱ yi shi. Vuma suru u ɓoloto ta̱ ili i na waa gura lyuwa. 19Reve Musa damma le, <<She ko za zuwa akapi she usana wan.>> 20Agba ozo o ro e le a zuwa atsuvu e ili i na Musa damma nle shi; a̱vu a zuwa akapi she usana. Reve u matsan azun, u shama o utusa̱ ushamu. Reve Musa yuwan upan ne ele. 21Usana suru o tsu ɓoloto ta̱ ili i na aa gura lyuwa, nu urana u suɗuwa reve wu jeruwe. 22O urana wa̱ ta̱li, reve o ɓoloto ili i na i rawai ure wi ili i na oo ɓolotosu. Reve azagbain a ama suru a̱ ta̱wa̱ a damma Musa ili i na i farai. 23Reve Musa damma le, <<Apa nda ili i na A̱sulazuva a zuwai: Nfa'an to o'wo urana u wivuwun, Ashibi a akiza e ekere a̱ A̱sulazuva. Adama o ndolo i zun ili i na ya̱a̱ zun, reve waru i ralu ili i na yaa ralu. Reve ili i na i buwai i zuwaa aciya̱ɗu she nfa'an.>> 24Adama o ndolo reve a zuwa akapi she usana cine Musa dammai, agba u shama ko gba u yuwan azun shi.

25Reve Musa damma, <<Lyuwa niyi ana'an, adama a na ana'an Ashibi a ɗa e ekere a̱ A̱sulazuva. Ya̱a̱ tsura̱ yi e iɗa ana'an shi. 26Rana ta̱li ɗa yoo ɓoloto yi, amma o urana we cindere, Ashibi, wa̱a̱ da̱na̱ lo shi.>>

27Agba suru na̱ ne, reve ozo o ro o uta̱ o rana'a adama o ɓoloto ilyalya, agba a̱ tsura̱ ili shi. 28Reve A̱sulazuva a damma Musa, <<Hali a̱ tyo mantsa ma̱ ne yaa lyuwa elime a 'yuwusan a̱ kuru wila̱ u va̱ nu uritosu u va̱? 29I reve a na A̱sulazuva a ca nɗu Ashibi; adama o ndolo a ɗa u ca nɗu ilyalya yi rana re o urana wa̱ ta̱li. Koyan ɗa wi isawan uba̱ta̱ u na u ri o urana we cindere she wu uta̱ wan.>> 30Ɗaɗa ama e ivuwain o urana we cindere. 31Reve aza a Isra'ila e ɗe ilyalya'a mana#16:31 Na̱ Tsuyahuda <<Mana>> shon ta̱ ana <<Nye i ɗa gba nda'a.>> Ka̱lyuwa̱ uguzu wa 15 . U shi tu u'uri she damma isu'wan i uri, peme va̱ yi tso opopofu a na a yuwain ni ishiki. 32Reve Musa damma, <<Apa nda ili i na A̱sulazuva a dammai: <I zuwa makundatsu ma mana adama a̱ muwun ma̱ a̱ca̱pa̱, adama e reve ilyalya i na n ca nɗu a̱ a̱tsumona a mantsa ma na mu uta̱a̱ nɗu diga e iɗa ya Masar.> >> 33A̱vu Musa damma Haruna, <<Tara a̱a̱ka̱bu reve vu shiton yi na̱ makundatsu ma mana. Reve vu zuwa yi uba̱ta̱ wa akiza a̱ ma̱ka̱ka̱n ma̱ A̱sulazuva hali a̱ tyo umatsun wa̱ a̱ca̱pa̱ u ɗu.>> 34Cine A̱sulazuva a zuwai Musa yuwan, ne ɗa Haruna zuwa niyi a̱ ma̱ka̱ka̱n me ili yi Nzuwulai, adama u da̱na̱ lo. 35Aza a Isra'ila a lyuwa ta̱ mana hali a'wan amunga hali she na a rawai e iɗa i na aa gura da̱nu. A lyuwa ta̱ mana she na a rawai utyo wi iɗa ya Ka'ana. 36Makundatsu a̱yi ɗa za ta̱ a̱tsuma̱ a kupa va efa#16:36 Efa a̱yi ɗa makundatsu ma gbain ma na aza a Isra'ila a yuwusayin akunda..

Currently Selected:

Mota̱a̱ 16: TSW

Highlight

Copy