Alajiya 2
2
Mawwa mo uyo'o ili ya̱ pere i ɗa
1A̱vu n damma aciya̱va̱, <<Lyawa n zuwa okolo a̱ va̱ na maa uwwa uyo'o, tsura̱ n reve cine mawwa moo uyo'o ma̱ ri!>> Amma n cina ta̱ ili i ndolo suru ili ye pere i ɗa. 2N gura ta̱ reve izo'oshi tsulo tsa ɗa, wuma u mawwa mo uyo'o fo, u ri nu urana shi. 3N gura ta̱ idana okolo a̱ va̱, cine maa ca aciya̱va̱ mawwa mo uyo'o na̱ masayan ma inabi, mantsa ma na ugbozu u ri a majiyan ma̱ va̱. A̱vu waru n tara tsulo adama na mee e reve ili na i ri ulobonu u na vaɗilima̱ a yuwan a̱tsuma̱ o uvaɗi a rana ke'en u wuma u le. 4N yuwa ta̱ ili i gbagbain na̱ a̱bunda̱, a̱vu n suwaa aciya̱va̱ 'wa, a̱vu waru n cu'wa̱a̱n aciya̱va̱ a̱ɗuma̱ a inabi. 5N yuwaan ta̱ aciya̱va̱ a̱ɗuma̱ na̱ ba̱ta̱ wivuwun, waru n cu'wa̱n ta̱ cu'un vu ɗanga biti za na tsu matsusan muwun. 6N yuwaan ta̱ aciya̱va̱ uba̱ta̱ wu uɓolotosu u mini, adama a na a ca ɗanga na kungwai mini. 7A̱vu n tsulaa aciya̱va̱ agbashi a ali na̱ a̱ma̱ci, a̱vu fo a matsaan mu muwun ma agbashi a̱tsuma̱ o u'wa u va̱. Waru n da̱na̱ fo za vi iliyamunga, wi inan ni ikyon na̱ mgbele nna n la'ai za suru, na fara da̱nu wa̱ numu a̱tsuma̱ a̱ Urishelima.#1 Ngo 4:23. 8N ɓolotowo ta̱ aciya̱va̱ azurufa na̱ zinariya, no oɓolo e itana i maluwa va̱ a̱za̱ o tsugono, oɓolo no ozo o tsugono tsu upasu u na maa yuwusan tsugono tsa̱ le. A̱vu n tsura̱ ashipi ali na̱ a̱ma̱ci adama a canaa mu ishipa, ni ili icu'un icu'un adama a mawwa mo u uyo'o u wuma, na̱ a̱ma̱ci a̱ nge'en a̱bunda̱ a na n zuwai. 9Na amayun tsugbain tsa̱ va̱ tsa̱ da̱shi ta̱, waru n la'a ta̱ aza a na a fara da̱nuwa̱ numu a̱tsuma̱ a̱ Urishelima. Na̱ ne suru ugbozu u va̱ wu kasa na̱ a̱mu shi.#1 Alb 29:25.
10Ili i na lyusu va̱ ri a maluwa biti,
n tsu putsaa yi shi.
N tsu putsaa aciya̱va̱
na̱ mawwa moo uyo'o shi.
Wuma u va̱ wu uwwa uyo'o wu ulinga u va̱,
a̱yi nda a̱yi ɗa iliyinkapa yu ulinga u va̱ suru.
11N yuwan ta̱ majiyan mo ulinga wu ukere u va̱ suru,
nu ulinga u na n yuwain suru
na ma̱a̱ tsura̱ ulyuwu we elime,
me ene ta̱ a̱ yi ndolo suru ili ya̱ pere i ɗa
waru suru ndolo tsa̱ me reme mo upepu u ɗa.
Babu ili na i ri ulobonu
a wuma wu uvaɗi u nda.
Ugbozu na̱ tsulo suru ili ya̱ pere i ɗa
12A̱vu n vadala majiyan ma̱ va̱ uba̱ta̱ wu ugbozu,
oɓolo nu ujaru na̱ tsulo.
Adama a na za na aa lyuwa tsugono nye wa yuwan?
Babu ili i ro,
ili ta̱ i ɗa wa gura yuwan
a̱ yi ɗa u yuwan ili i na a̱za̱ o tsugono tsu ufaru a yuwain.
13Me ene ta̱ ulinga wu ugbozu u la'a ta̱ tsulo,
cine ekan i la'ai irumbu.
14Vuma vu ugbozu tsu da̱na̱ ta̱ nu urevu,
amma ulo u tsu wala ta̱ a̱tsuma̱ e irumbu.
Na̱ ne suru, mee ene ta̱
ukosu wi ili biti ili i ta̱ i ɗa.
15A̱vu n damma aciya̱va̱,
<<Ili i na i cinai ulo, u ta cina na mu fo.
To, iliyinkapa i ne i ɗa n tsura̱i a̱ nden mu za vu ugbozu?>>
A̱vu n damma aciya̱va̱,
<<Suru ili ya̱ nda ili ya̱ pere i ɗa.>>
16Adama a na za vu ugbozu nu ulo suru,
a cuwan na̱ le a̱ ya̱wa̱ elime shi.
A rana ve elime a̱ ta̱ e icina ne le suru.
Cine za vu ugbozu tsu kuwa̱,
ne ɗa fo ulo u tsu kuwa̱!
Ulinga fo ili ya̱ pere i ɗa
17Adama o ndolo, wuma ili i ro i ɗa shi e ekere a̱ va̱, adama a na e ekere a̱ va̱ suru, ili na a yuwusan a wuma wu uvaɗi u nda, u ri nu urana shi. Suru ili, ili ya̱ pere i ɗa, waru ndolo suru tsa̱ mereme mo upepu u ɗa. 18Ulinga u va̱ u na n yuwain suru o uvaɗi u nda, ili i ro i ɗa shi e ekere a̱ va̱, a na wo o'woi n gura revei n ta lyawaa za na a tara agadu a̱ va̱. 19Zane revei za na aa tara a agadu a̱ va̱'a̱, vuma ɗa na ri nu ugbozu ko ulo u ɗa? Na̱ ne suru, u ta tara agadu e ili i na n leweyin a̱tsuma̱ o uvaɗi u nda suru. Ili ya nda suru ili ye pere i ɗa. 20Na m petelyuwei reve okolo a̱ va̱ a kuɗa a̱tsuma̱ o ulinga u na n yuwain a̱tsuma̱ a wuma u va̱ wu uvaɗi u nda. 21Adama a na za na yuwain ulinga wa̱ yi nu ugbozu nu urevu nu uguru, na̱ ne suru, u ta lyawaa nanza za na suɗuwai oɓolo na̱ a̱yi shi. Ili ya nda ili ye pere i ɗa, agba ili yi iwuya i ɗa. 22Nye ɗa vaɗilima̱ tsu tsura̱ a̱tsuma̱ o ulinga u na aa yuwusan, na̱ cu'un va̱ a̱tsuma̱lima̱ na a tsu sowuso a̱tsuma̱ a wuma u le a̱tsuma̱ o uvaɗi nda? 23Adama a na wuma u le u ta̱ tapu nu usa̱n, ulinga u le waru a̱tsuma̱lima̱ a ɗa. Na ayin fo okolo e le a tsu ivuwan shi. Ili ya nda suru ili ya̱ pere i ɗa.#Ayb 5:7; 14:1. 24Babu ili i na i la'ai ulobonu e ekere a vaɗilima̱, na la'ai a lyuwa a̱vu a̱ osowo, waru a uwwa uyo'o wu ulinga u le. N reve ta̱, a na nda'a diga uba̱ta̱ wa̱ A̱sula̱ a ɗa.#Alj 3:13; 5:18; 9:7; Luk 12:19; 1 Kor 15:32. 25Cine vuma a gura uwwa uyo'o wa alya no oso, nna̱ diga uba̱ta̱ wa̱ A̱sula̱ a ɗa shi? 26E ekere a za na a yo'onotosu A̱sula̱ ookolo, A̱sula̱ ɗa a tsu ca yi ugbozu, nu urevu, na̱ ma̱za̱nga̱. Amma e ekere a za vu unusu, A̱sula̱ a tsu ca yi ta̱ usa̱n wi izami nu uɓolotosu, a̱ tyo o ukosu a̱vu u ca za na tsu yo'onotosu A̱sula̱ ookolo. Na̱ ne suru ili ya nda ili ya̱ pere i ɗa, waru suru ndolo tsa̱ me reme mo upepu u ɗa.#Ayb 32:8; Udm 2:6.
Currently Selected:
Alajiya 2: TSW
Highlight
Share
Compare
Copy
Want to have your highlights saved across all your devices? Sign up or sign in
©️2025 Language Development and Translation Initiative (LDTI)
