Emos 2
2
Uge'etosu wi iɗa ya̱ Mowa
1Apa nda ili i na A̱sulazuva a dammai:
<<O una̱ wu nusu wa̱ a̱bunda̱ a na Mowa a yuwusan kuci,
maa bula̱ upan u va̱ shi.
Adama a na u kula̱toi etele o ngono ma Edom
hali o'wo okomo.#Ish 15:1-16:14; 25:10-12; Irm 48:1-47; Izk 25:8-11; Zaf 2:8-11.
2N ta̱ lyunguwa̱a̱ Mowa na akina
na aa lyuwa uba̱ta̱ wu upa'atan wu ucira wa Keriyot.
O to kototo a ama a Mowa
a̱tsuma̱ a̱ba̱jini o urupulu,
na̱ a̱tsuma̱ a yisali a̱soja na̱ mesun ma avana.
3A̱vu A̱sulazuva a damma,
n to kototo mogono ma̱ yi,
reve fo mu una azagbain a̱ yi suru oɓolo na̱ yi.>>
Uge'etosu wi iɗa ya Yahuda
4Apa nda ili i na A̱sulazuva a dammai:
<<O una̱ wu nusu wa̱ a̱bunda̱ a na aza a Yahuda a yuwusan kuci,
maa bula̱ upan u va̱ shi.
Adama a na a 'yuwain wila̱ wa̱ A̱sulazuva,
agba a̱ kuru ili i na u zuwai shi,
musula̱ nle me epen mu luluma̱ le ta̱,
cine a̱ luluma̱i nkaya nle.
5Adama o ndolo n ta̱ lyunguwa̱ Yahuda na akina
na aa lyuwa uba̱ta̱ wu upa'atan wu ucira wa̱ Urishelima.>>
Uge'etosu wa aza a Isra'ila
6Apa nda ili i na A̱sulazuva a dammai,
<<O una̱ wu nusu wa̱ a̱bunda̱ a na aza a Isra'ila a yuwusan kuci,
maa bula̱ upan u va̱ shi.
Adama a na a ta winasa za va̱ a̱ɓula̱ o una̱ u azurufa,
za vu ulambu waru o una̱ u wotowu wa atan a̱ ta̱.
7A ta dasasa a aci a̱ a̱za̱ o ulambu
tsa̱ ma̱buta̱ me iɗa
reve a putsaa aza a na o ɓongiyi na amayun.
Dada nu ulobo wa̱ yi o to vosun nu usheli u ta̱,
ne ɗa a̱ lungusa̱i ala a akiza a̱ va̱.
8O to vosun elime masa'a suru
o una̱ wa̱ a̱tugu a na a̱ ushiyi o una̱ wo okopu.
A̱tsuma̱ o u'wa u ma̱sula̱ me e le o to sowuso masayan
ma na a̱ ushiyi
o una̱ wu ugana.>>
9<<Agba a̱ yi ɗa nda adama e le ɗa
n kototoi aza a Amoriya,
aza a na uga'an u le u shi tsa ɗanga a̱ sida,
ucira u le waru tsu ɗanga vo Oku.
N kototo ta̱ umatsun wa̱ yi u na u ri ɗe zuva
na aralu a̱ yi na ri za̱la̱.#U.Wl 3:8-11.
10Waru a̱mu ɗa mu uta̱a̱ nɗu diga a̱tsuma̱ e iɗa ya Masar,
a̱vu n rono ɗu aɗanga a'wan amunga a̱tsumona,
adama i usa iɗa ya aza a Amoriya wo o'wo a̱ɗu agadu.>>
11Reve A̱sulazuva a damma,
<<N 'ya̱sa̱n ta̱ muwun nɗu n ro
a na o'wo ama̱sula̱,
oɓolo na aza a Isra'ila o ro na tawai aciyele adama a̱ va̱.
Ama a Isra'ila ne ɗa shi?>>#Mkc 6:1-8.
12Agba a̱vu i reme i zuwa aza a Isra'ila na tawai aciyele o ndolo'o,
o sowo masayan ma̱ ina̱bi,
a̱vu waru i damma ama̱sula̱'a̱
she a yuwan adanshi e ikaka ya̱ A̱sula̱ wan.
13Gogo gba, n ta tsugba ɗu e iɗa uba̱ta̱ u na i ri,
cine akatalu a̱bunda̱ a tsu tsugba keke matara me itana.
14To, za na ri ni ilaɗi lon waa la'a shi,
za vu ucira waru waa buwa nu ucira shi,
za na gurai uvon waru waa gura wawa wuma shi.
15Za vu utan aa gura isawan uvon shi,
waru soja na gurai ilaɗi waa wawa aciya̱yi shi.
Za na fo aa kumbusa ido
waa gura wawa wuma wa̱ yi shi.
16Reve A̱sulazuva a damma,
<<O urana u ndolo ko soja vo okolo o ugbamu u ta zuwa itana yu uvon ya̱ yi, a̱vu u suma ataɓu.>>
Currently Selected:
Emos 2: TSW
Highlight
Copy
Compare
Share
Want to have your highlights saved across all your devices? Sign up or sign in
©️2025 Language Development and Translation Initiative (LDTI)