2 Sama'ila 8
8
Ulyuwu wa aci wa̱ Da̱wuda
(1 Alb 18:1-13)
1Ana a̱yi ndolo kotoi, reve Da̱wuda lyuwa aza a Filistiya nu uvon, a̱vu u ta̱wa̱ nu ukosu u tsugbain tsa̱ le a̱tsuma̱ e iɗa'a. A̱vu u usa lyuci va Mete Ammah e ekere a aza a Filistiya.
2A̱vu u lyuwa a̱za̱ a̱ Mowa nu uvon. Reve u zuwa le o von e iɗa ugeru ugeru, a̱vu u rito le na amunga o uritosu wu usaa. Uritowu u re suru a̱vu u zuwa o una le, a̱vu a lyawa uritowu wa ta'atsu wuma. A̱vu ama a̱ Mowa o'wo agbashi a̱ Da̱wuda, a̱vu a casu yi utafa u le.
3Da̱wuda lyuwa ta̱ ulobo wa Rehob za na a̱ tsu ɗe Hadadeza mogono ma̱ Zoba vi iɗa ya Suriya nu uvon a mantsa ma na u da̱na̱i a mmalu a̱ tyo upasu wu Uɗolu wa̱ Yufiriti, adama u ka̱mbuwisa̱ uba̱ta̱'a̱ za̱la̱ vu ucira va̱ yi. 4A̱vu Da̱wuda reme akumbi e ido o mogono ma̱ Zoba ukpakukupa nu ukpakucindere (1,700), na̱ a̱soja a na a̱ da̱na̱i a ana ukpakukupa ushin (20,000). Da̱wuda kutsuma̱to ta̱ ido'o suru amma u lyawa ta̱ ido i na yoo ronuso ikeke ukpaku (100).
5Ana a̱soja a Suriya a Dimaska a̱ ta̱wa̱i adama a kamba Hadadeza mogono ma̱ Zoba, a̱vu Da̱wuda una a̱soja ukpakukupa ushin nu ukpakukupa ure (22,000). 6Reve Da̱wuda shuwa̱ va̱la̱ta̱ vo oɓolo a̱ a̱soja a̱tsuma̱ a Dimaska va Suriya. Ɗaɗa aza a Suriya o o'woi agbashi a̱ Da̱wuda reve a casu yi utafa. A̱vu A̱sulazuva a casu ta̱ Da̱wuda ulyuwu wa aci uba̱ta̱ u na u 'ya̱wa̱i biti.
7A̱vu Da̱wuda pura̱ a̱ra̱ga̱ a zinariya ya yali ya̱ a̱soja a Hadadeza a̱vu u ta̱wa̱ ne ele Urishelima. 8Waru a̱tsuma̱ a Beta na̱ Berotai e ilyuci ya Hadadeza, Da̱wuda mogono ma̱ pura̱ ta̱ irumushili na̱ a̱bunda̱.
9Ana Toyi mogono ma Hamat ma uwwai a na Da̱wuda lyuwa ta̱ a̱soja a Hadadeza nu uvon ma̱ɓula̱, 10reve u lyungu ulobo wa̱ yi Yoram uba̱ta̱ u mogono Da̱wuda u ca̱sa̱ yi reve waru u cuwa yi nu ulyuwu wa aci u na u lyuwai Hadadeza nu uvon za na da̱na̱i o uvon na̱ Toyi. Yoram gba u ta̱wa̱a̱ ta̱ Da̱wuda ni itana i azurufa na̱ zinariya na̱ rumushili.
11Mogono Da̱wuda tawaa ta̱ A̱sulazuva itana i nda suru cine u tawai azurufa na̱ zinariya aza a na wu usai uba̱ta̱ a nɗa n na u lyuwai nu uvon suru, 12ele ɗa aza a Edom na̱ Mowa na̱ Amon na̱ Filistiya oɓolo na̱ Amaleka. Waru u tawa ta̱ ili i na a pura̱i uba̱ta̱ o uvon e ekere o mogono Hadadeza ma̱ Zoba ulobo wa Rehob.
13Da̱wuda gba yuwan ta̱ ala a na u ka̱mba̱i diga uba̱ta̱ o uvon na wu unai aza a Edom ukpakukupa kupa na̱ ukpakukupa kunla̱ (18,000), o Uka̱ri wa Akpaɗi.#8:13 Ka̱lyuwa̱: Ica 60 Aciya adanshi e ishipa.
14Reve Da̱wuda shuwisa̱ va̱la̱ta̱ vo oɓolo a̱ a̱soja uba̱ta̱ suru e iɗa ya Edom. Reve ama a Edom o'wo agbashi a̱ yi. A̱sulazuva a ca ta̱ Da̱wuda ulyuwu wa aci uba̱ta̱ u na u 'ya̱wa̱i suru.
Azagbain a̱ Da̱wuda
(1 Alb 18:14-17)
15Reve Da̱wuda yuwan tsugono a̱tsuma̱ a Isra'ila ma̱ɓula̱, u yuwusan ta̱ ili i na i ri mejege na̱ a̱ɓula̱ e ekere a ama a̱ yi suru. 16Yowab za na mma va̱ yi ɗa Zeruya, a̱yi ɗa u da̱na̱i yali ya̱ a̱soja. Jehoshafa ulobo wa Ahilu a̱yi ɗa za na tsu ɗanasa ili i na i farai. 17Saduku ulobo wa Ahitu na̱ Ahimele ulobo wa Abiyata ele ɗa nan ganu. Seraya a̱yi ɗa za vi iɗana. 18Benaya ulobo wa Jehoyida a̱yi ɗa zagbain va aza a Keretiya na̱ aza a Feletiya, a̱soja a na a yuwusan ipiri ya̱ Da̱wuda. Waru olobo a̱ Da̱wuda ele ɗa nan ganu.
©️2025 Language Development and Translation Initiative (LDTI)