Hibru Nani 1
1
Gâd ai Luhpia bâk ai bîla aisin
1Patitara piua ra, ai prapitka nani bâk Gâd wan damika nani ra natka sât sât ra aima ailal aisin; 2bara nanara naha tnata yua nani na ra lika, witin mita ai Luhpia bâk wan aisin sa. Naha Luhpia na bâk Gâd mita tasba nani na paskan, bara diara nani sut ba witin mihta ra swin sa. 3Witin sika Gâd prana ingnika ni ingwi ba; witin sika Gâd lilka talia aihwa pali ba, bara witin sika ai bîla karnakira ni, diara nani sut dihbi alki bri ba.#Jn 1.1-3; Kol 1.15-17; Si L 7.25-26. Witin ba wan saurka nani wina sikbi wan sakan ningkara, Gâd king iwaika lama pali kat wih kasbrika purara iwan.
Gâd Luhpia ba kau tara sa insal nani ba wal
4Gâd Luhpia ba lika, insal nani purkara kau tara pali takan sa, kan Gâd mita ai nina yaban ba lika insal nani nina sut purkara sa. 5Bamna Gâd ba piu kumi sin ai insalka nani tila ba wina kumi ra naku wiras kata:
“Man ba yang Luhpi sma,
naiwa na, man Aisikam takri sa.”#Law 2.7.
Baku sin, insal kumi dukiara sin naku aisaras kata:
“Yang ba witin Aisika kamna,
bara witin ba lika yang luhpia kabia.”#2 Sa 7.14; 1 Kr 17.13.
6Sakuna Gâd mita ai Luhpia kumi baman ba naha tasba ra mahka blikuya kan ba ra, witin naku aisan:
“Gâd insalka nani sut ba,
witin ai pura suni mayuni banhwaia sa.”#Kli S 32.43; Law 97.7.
7Insal nani dukiara lika Gâd naku aisan:
“Gâd ai insalka nani ba pâsa nani baku daukisa,
bara ai napakanka nani ba lika pauta lakni baku.”#Law 104.4.
8Sakuna Luhpia ba dukiara lika naku wisa:
“Gâd, man king iwaikam ba lika ban kaia ra ban kabia.
Man lika kingkam lâka purara,
wapni lâka kat king aimakisma.
9Man ba kasakka lâka ba latwan kaikram,
bara saura lâka ba misbara kaikram;
ba mita sika, Gâd,
man Gâdkam ba mita bâk mai saki,
uplika wala nani wal,
man ra kau lilia tara maikan.”#Law 45.6-7.
10Gâd bila sin:
“Man, Dawan, kaina pali ra tasba na paskram,
bara mihtam nani wal
kasbrika pura nani ba sin daukram.
11Baha nani ba lika sut lap tiwbia,
sakuna man lika bâra ban kama.
Baha nani sut kwala baku almuk takbia;
12¡prâk kum baku man mita witin nani ba karbi blakma,
bara baha nani ba kwala baku aihka lakan kabia!
Sakuna man lika piua bani sim sât ban sma,
bara rayakam ba ban kaia ra âpu takbia apia.”#Law 102.25-27.
13Gâd ai insalka nani tila ba wina, kumi ra sin aima kumi pan naku wiras kata:
“Laima pali na ra iws,
yang mita waihlam nani ba
minam munhtara mangkamna ba kat.”#Law 110.1.
14Ban kaka, ¿insal nani ba dîa sa? Witin nani sut ba lika spirit sa, bara Gâd warkka daukisa, bara witin mita baha nani ba ani uplika nani swaki sakan lâka briaia ba ra, hilp munaia blikisa.
Currently Selected:
Hibru Nani 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua