Hibru Nani 2

Swaki sakan lâka ba bahki kulkaia apia

1Baha mita sika, yawan diara nani walan ba pain pali alki kaia sa, bara baku mika yawan yabal ba wina tnaya ra tawbia apia. 2Piu wala nani ra insal nani bîla aisin tânka ba kasak pali marikan kata, bara ani uplika nani saura dauki baha bîla ba kat wali daukras kan ba, witin nani dîa klalka briaia kan ba kat bri banhwan. 3Baku bamna, ¿nahmuna swaki sakan lâka tara pali na alki briras ban pali swibia kaka, yawan na nahki swak takbia ki? Dawan pali mita naha swaki sakan lâka na pas dahra aisan, bara baha ningkara, witin ra walan nani ba yawan ra latan wan marikan baha ba kasak pali sa. 4Bara Gâd sin baha dukiara witnis aisin sa, sain nani dauki, diara aihkakira nani ni bara sain aihkakira ailal daukan ba mita sin. Witin mita sin Spirit Holikira prisantka nani ba yawan ra sât sât yuan sa, witin ai kupia lâka ba kat.

Jisas Kraist ba ai muihni nani baku takan

5Baha tasbaya naika kabia dukiara yawan aisi ba purara, Gâd mita insal nani ba wihta nani mangkras sa. 6Sakuna, Ulbanka wina pîs kumi ra upla kum mita latan wisa:

“¿Upla ba dîa sa

man bui witin ra kupiam kraukisma ba?

Upla, witinka pruaia ba,

¿dîa kan ki man bui witin ra ban main kaikisma ba?

7Piu wiria baman, witin ba insal nani wina kau mâyara mangkram,

sakuna prana kraunka bara pain kulkan lâka kraunka ba witin ra yabram,

8diara sut ba witin karnika munhtara mangkram.”#Law 8.4-6.

Baku bamna, Gâd mita diara nani sut ba upla karnika munhtara mangkan sa; naha tânka na latan sa diara sut kat ba, upla mina munhtara mangkan sa. Ban sakuna, upla ba diara sut purkara wihta aimakan yawan kau kaikras sa. 9Sakuna yawan Jisas ba kaikisa, witinka Gâd mita piu wiria insal nani wina kau mâyara mangkan kan ba. Gâd ai latwanka mita want kan, Jisas ba upla sut dukiara prubia; bara nanara witin prura pâtka wahwan ba mita, prana kraunka ba bara pain kulkan lâka kraunka ba sin witin ra yaban sa.#Pil 2.6-11; Hib 12.2.

10Diara sut ba Gâd dukia nani sa, bara witin mita sin paskan sa; bara Gâd want sa ai luhpia nani sut ba ai prana ra ai dukia bri kabia. Baha mita, pât wahwan bâk, Gâd mita Jisas Kraist ba aiska aihwa daukaia kan, Jisas sika witin nani Sasakrika bamna. 11Witin bui upla nani ba ai saurka nani wina tâski âpu daukisa, bara witin baha nani klin sakan ba sut sin, Aisika kumi luhpia nani sa. Baha mita, Jisas ba witin nani ra ai muihni wiaia ai swira lukras sa. 12Ulbanka ra witin wi ba baku:

“Man dukiamra muihki nani ra aisamna,

bara aidrubanka mawanra,

lawana nani man ra aiwanamni.”#Law 22.22.

13Naku sin wisa:

“Yang lika Gâd ra luki kamni.”#Ais 8.17.

Bara witin kli wisa:

“Yang nâra sni,

Gâd mita luhpi nani aikan ba wal.”#Ais 8.18.

14Utla uplika kum luhpia nani ba, sim wîna bara sim tâlia brisa; baku sin, Jisas ba upla wîna bara tâlia sin bri kan, bara baku lika witin sip kaia kan ai pruanka ba ni dibil upla ikaia karnika bri kata ba, sauhki tikaia. 15Baku witin ba, baha nani ai rayaka yua nani aiska ra prura sibrinka mita alba nani kan ba, sut pri sakan. 16Kan latan sa, witin insal nani ra hilp munaia balras, sakuna Ebraham kiamka nani ra lika. 17Baku bamna, Jisas lika diara sut mapa ra ai muihni nani baku takaia kan, bara baku mika witin sip kaia kan, kasak mapa ra bara umpira wan kaikan lâka ra sin Gâd mawanra prîs tara kaia, bara upla nani saurka nani ba sin sakripais dauki bâk saurka diki sakaia kan. 18Bara witin pali pât wahwan bara traika kaikan kan ba baku, nanara witin mita sip sa traika kaikan uplika nani ra ban hilp munaia.

Currently Selected:

Hibru Nani 2: MSKTU

Highlight

Copy

Compare