Sins Lâka 7
7
Rug mairin aihka puli ba
1Luhpi, yang bîli nani ban bri bas,
bara lâika bîla nani ba sin
ban lukankam ra bri bas.
2Yang lâika bara bîli nani ba wali dauks,
smalkanki nani ba sin;
baha nani ba main kaiks
namkra yula nani baku,
bara raya kama.
3Baha nani mihtam sirpi nani ra wilks;
lukankam kat ulbi mangks.
4Sins lâka wal lamkra taks;
diara tânka alkaia lâka wal
uplikam aihwa taks.
5Witin mita pri mai sâkbia upla maya wina,
baha tringsar maisa kakapra bîla aisi ba wina sin.#S L 2.16.
6Yu kum waitla windarka ayan ni paskan bâk kaiki kapri,
7wahma kum kum sins tânka aitani briras,
bara pain laki kaikri kau taniskira pali ba.
8Yabal un kum kat wan ba ra,
baila wala ra luan
baha mairka watla tani ra.
9Mahka tutni tawi kan
bara pat tihmia iwi kan.
10Aihni mairin ba bal takan,
wahma ba wal prawaia
dîa sut ai nakra ra kaiki kan,
kunin muni ba bara dîa rug mairin kum
ai prana dauki ba kat;
11mairin kum plaplapra taukisa
bara ai kupia sin lukras
ai watla ra minit kum sin takaskaia sip apia,
12bara ban wataukisa yabal tara ra,
tawan bilara
bara un raya nani ra,
ya pas bal lubia ba alkaia.
13Mairin ba mita
ai klahkla ra kiaubi alki wahma ba ra kiawalan
bara ai swira âpu kira naku aisin:
14“Yang pramis takri kan
kli wal uplika takaia sakripaiska ba daukaia,
dîa daukaia pramis takri ba naiwa sut daukri.#7.14 Upla kum kli wal ai pâtka swih tikaia sakripaiska dauki ba ra, witin daiwan wîna ba wina piaia sa (Lib 7.16). Baha mita mairin ba wiaia sa, ai watla ra plun pain bâra sa.
15Bahamna yang bal takri man wal prawaia;
mai kaikan pali ai dauki kan,
bara yawan wal prawisa.
16Yang krikriki purara palki swiri sa Idsip wina
linin blanhkit painkira ba ni.
17Yang mita purara isint kîa pain nani laikri sa;
sîka mâka kîa painkira, alus bara sinimint aihwa sin.
18Kaisa, latwan lâka kapka ba
tnata kat danh dauki bîla man swiaia,
kaisa yawan wal latwan lâka ni
lilia bri lalawaia titan kat,
19mayi ba utla ra âpu sa bamna,
witin laihura impaki wan.
20Witin lalah watla kum brih wan;
kati tilwan yua kat kli ai watla ra balbia.”
21Ai bîla aisinka damni ba,
bara kli kli aisanka ba mita
wahmika kupia laki brisuya.
22Dîa sin aisaras mahka witin ninara auya,
bîp wainhka mahka ikaia ra brih auya ba baku,
sula wainhka daiwan alkaika ra kauhi ba baku,
23tnawira kumi alkaika kat
aihni pali dimi ba,
bara witin baha ba kaikras
ai rayaka pruaia dukiara daukan ba,
trisbaya kumi ningkara ai kupia sabi baila walak luki ba.
24Bamna nanara, yang luhpi, ai wals;
yang bîli aisinka nani sin aman wali bas.
25Mairka ba yabalka ra,
yarka kupiam tawi wabiara,
ai yabalka bîla nani ra sin mamwahkpara.
26Witin pat upla manis ra klaki ikan sa;
pât ra lakan nani ba ailal pali bâra sa.
27Ai watla ra waia yabalka ra wapaia ba lika
pruaia tasbaya ra waia yabalka pali sa.
Currently Selected:
Sins Lâka 7: MSKTU
Highlight
Copy
Compare
Share
Want to have your highlights saved across all your devices? Sign up or sign in
© 2010 Bible Society in Nicaragua
