Kulki Kaikanka 7
7
Wark uplika nani prisantka nani ba
1Baku bamna, Moses tint watla ba buki mâki danh takan ba ra, altar ra kan ba sut, utla bara diara nani bilara kan ba, purara batana laiki holikira daukan. 2Israel luhpia nani kiamka lal uplika nani, ai taika nani wihtka bâk nani, upla kulki hilp tâka ba, 3witin nani sin Dawan ra ai prisantka nani brih balan, wagin matlalkahbi bara bîp wainhka sin 12, wagin kumi bani ra lalka nani wâl ulaia, wibia kaka wagin kumi bani ra bîp wâl wilkaia, bara lalka kumi bani ba kum bribia. Bara baha prisantka yan ba sut tint watla lamara swin.
4Bara Dawan bui Moses ra win: 5“Bîp nani bara wagin nani ba witin nani wina bris, baha ba tint watla ra wark daukaia dukiara kabia, bara Libait nani ra yama, kumi bani ai warkka bri ba tânka kat yus munbia.”
6Bara Moses wagin nani ba, bîp wainhka nani ba sin brih Libait nani ra yan. 7Wagin wâl bara bîp wainhka walhwal ba, Guersón kiamka luhpia nani ra yan, witin nani ai warkka daukaia baha want kan. 8Bara Merarí luhpia nani ra wagin walhwal bara bîp wainhka 8 yan, baha witin nani want kan ai warkka daukaia, witin nani Eran luhpia, Itamar adarka ra wark taki ba. 9Ban sakuna, Quehat luhpia kiamka nani ra lika wagin bara bîp sin yaras kata, kan witin nani lika diara holi nani ba ai pahpaya ra twilki kaia kan ba mita.
10Altar nani ba Dawan mihta ra mangkaia yua batana laikaia piua ra, Israel taika wihtka nani ba sin ai prisantka nani bri si yan. 11Bara Dawan bui Moses ra win: “Yu bani witin nani lika upla kulki wihtka nani kumi baman altar ra ai prisantka bri balbia, wala ba yu wala ra bri balbia.”
12Pas yua ba Nahasón, Aminadab luhpia ba ai prisantka bri balan, witin lika Juda kiamka ba wina. 13Witin nani kumi bani ai prisantka bri balan ba naha dukia nani kata: Silbar baulka kum 50 auns bri kan, silbar bisinka kum 30 auns bri kan, tint watla lalahka wirhika kulkanka ba praiska kat. Baha watlika wâlsut ba plawar bara batana laya laiki akban plun mâ prisantka; 14gul plitka kum auns walhwal bri kan kîa pain angkaia dukia banhki kan, 15bîp wainhka luhpia kum, sîp kum, sîp wala kum mani kum bri ba, baha nani angki sakripais daukaia, 16guts kum saura daukan mana sakripais daukaia, 17bara lâs piua ra upla wal kli kupia kumi takaia sakripaiska ba dauki ba, bîp wainhka wâl, sîp wainhka matsip, guts wainhka matsip, sîp wainhka lupia mani kum bri ba matsip. Naha sika Nahasón prisantka, Aminadab luhpia ba wina.
18Yua wala ba Natanael, Suar luhpia ba bri balan, Isacar kiamka wina ba, 19-23bara Nahasón ai prisantka brih balan ba baku, witin sin brih balan.
24Yua yumhpika ba Eliab, Helón luhpia ai prisantka ba bri balan, witin lika Zabulón kiamka wihtka ba, 25-29bara ai prisantka ba wala nani yan ba baku yaban.
30Yua walhwalka ba Elisur, Sedeúr luhpia ai prisantka ba bri balan, witin lika Ruben kiamka ba wina, 31-35bara ai prisantka ba wala nani yaban ba baku yaban.
36Yua matsipka ba Selumiel, Surisadai luhpia ba bri balan, witin lika Simian kiamka ba wina, 37-41bara ai prisantka ba wala yaban ba baku yaban.
42Yua matlalkahbi ba Eliasaf, Reuel luhpia ai prisantka ba bri balan, witin lika Gad kiamka ba wina, 43-47bara ai prisantka ba wala nani yaban ba baku yaban.
48Yua 7 ba Elisamá, Amihud luhpia ai prisantka ba bri balan, witin lika Efraín kiamka ba wina, 49-53bara ai prisantka ba wala nani yaban ba baku yaban.
54Yua 8 ba Gamaliel, Pedasur luhpia ai prisantka ba bri balan, witin lika Manasés kiamka ba wina, 55-59bara ai prisantka ba wala nani yaban ba baku yaban.
60Yua 9 ba Abidán, Guidoní luhpia ai prisantka ba bri balan, witin lika Benjamín kiamka ba wina, 61-65bara ai prisantka ba wala nani yaban ba baku yaban.
66Yua matawalsip ba Ahiézer, Amisadai luhpia ai prisantka ba bri balan, witin lika Dan kiamka ba wina, 67-71bara ai prisantka ba wala nani yaban ba baku yaban.
72Yua 11 ba Paguiel, Ocrán luhpia ai prisantka ba bri balan, witin lika Aser kiamka ba wina, 73-77bara ai prisantka ba wala nani yaban ba baku yaban.
78Yua 12 ba Ahirá, Enán luhpia ai prisantka ba bri balan, witin lika Neftalí kiamka ba wina, 79-83bara ai prisantka ba wala nani yaban ba baku yaban.
84Baku bamna, altar ba Dawan mihta ra mangkan ba ra, Israel kiamka nani lalka nani ba silbar ni paskan baulka 12 yaban, silbar nani bisinka 12 bara gul plitka nani 12. 85Silbar ni paskan baulka bani ba 60 paun bri kan, bara gul plitka ba lika 48 auns bri kata. Sut ba ra, silbar baulka nani bara gul plitka nani ba 26,400 ‘‘gramo’’ bri kan, plis holikira paun kulkaika bri kan ba natka kat. 86Ispan yahpa sin 12 bâra kan awas mâka kîa banhki, baha nani kumi bani 110 ‘‘gramo’’ bri kan, plis holikira paun kulkaika bri kan ba natka kat. Ispan yahpa gul bri nani kan ba lika sut asla ba ra ai wirhika 1,320 ‘‘gramo’’ bri kan.
87Kli wal ai uplika takaia dukiara sakripais dauki yaban daiwra nani ba lika guts 12 mani kum bri ba bara barli mâ prisantka nani ba kira, bara guts lupia sin 12, baha sut lika saura daukan ba mana sakripais yabaia dukiara. 88Kli wal ai uplika takaia dukiara sakripais yaban daiwra nani ba lika sut ba ra bîp lupia 24, sîp wainhka 60 bara guts wainhka 60 kan, sut ba mani kum daiwra atia. Naha prisantka nani na sika altar Dawan mihta ra mangkan ba ra yus munan ba, baha holi daukan ba ningkara.
89Moses ba Dawan wal aisaia tint watla ra wih diman ba ra, witin walan Dawan bui witin ra aisi kan lâ watla auhban pura prakaika ba wina, insal lilka wâl ba lilapas wina.
Currently Selected:
Kulki Kaikanka 7: MSKTU
Highlight
Copy
Compare
Share
Want to have your highlights saved across all your devices? Sign up or sign in
<p>© 2010 Bible Society in Nicaragua</p>