Kulki Kaikanka 22
22
Balac bui Balaam ra paiwan balaia
1Israel luhpia nani ai yabalka ra ban impaki wan, bara Moab langnika ra ai watla nani mâkan Jordan lalmika ra, Jeriko mawan kat.
2Sipor luhpia Balac kaikan, Israel luhpia nani bal amorreo nani ra dîa munan ba. 3Bamna Moab uplika nani sibrin pali takan, Israel luhpia nani ailal pali kan kaikan bamna. 4Bara Moab uplika nani mita Madián almukka nani ra win: “Naha uplika nani balan na wan tasbaya aiska na âpu daukbia, bîp wainhka kum insla ra dimi diara pâwi kan sut pi âpu dauki ba baku.”
Baha piua Balac ba Moab kingka kata, 5bara witin bîla blikan Balaam Beor luhpia ba#2 Pi 2.15-16; Jud 11. paiwaia. Witin Petor ra takaski kan, Éufrates awalka lamara, Amav kuntrika ra. Balac bui Balaam ra naku ai bîla blikan ai sturka twatwilkra nani wal: “Idsip wina upla nani dakni tara balan bara tasbaya aiska ra taukisa, bara nanara uplika nani ba yang laimara bal takaskan. 6Bamna man takaskpara, bal bara naha uplika nani ra yang tâiwan lahtuban bîla wis, kan witin nani ba yang nani wal kau karna pali sa. Ban kra yang baku sip kamna witin nani ba batakaia, bara kuntri ba wina kangbi sakaia. Yang nu sna dîa man wisma ba kat takisa, yamni wisma kaka, apia kaka saura wisma kaka sin.”
7Moab bara Madián almukka nani sut ai mihta ra lalah nani bri aidrubi wan, lahtuban bîla nani aisabia ba mana aibapaia dukiara. Witin nani Balaam bâra kan ba kat wan ba ra, Balac ai bîla blikan ba maisa pakan. 8Bara Balaam pana baha uplika nani ra win:
—Naha tihmia nâra takasks, bara Dawan dîa ai wibia ba yang bui man nani ra mai wimna.
Bamna Moab almukka nani ba witin wal takaskan. 9Sakuna tihmia Gâd Balaam ra param taki, makabi walan:
—¿Baha uplika nani man wal ba ya nani sa?
10Balaam pana win:
—Sipor luhpia, Moab kingka ba, Balac mita yang ra ai wiaia blikan, 11Idsip wina upla nani ailal taki balan tasba aiska na banhkan sa. Bamna Balac brin daukisa baha ba yang wih uplika nani ra lahtubamna, bara baku witin sip kabia sapa baha uplika nani ra war aiklabi pura luaia, bara ai tasbaya wina sin kangbi sakaia.
12Bara Gâd Balaam ra win:
—Man lika witin nani wal wapara, baha uplika nani ra sin saura wipara, kan yang mita baha uplika nani ra yamni wîri sa.
13Yu wala titan, Balaam buan bara baha uplika nani Balac mita blikan balan ba uplika nani ra win:
—Man nani tasbayam ra kli mahka was. Dawan ai wiras sa, man nani wal wamna.
14Moab uplika nani kli mahka wan Balac bâra kan ba kat, bara witin ra wi banhwan:
—Balaam bila yang nani aikuki balaia apia wisa.
15Sakuna Balac takaskras lalka wala nani kli blikan, upla kau ailal, kau tara kulki nani ba blikan. 16Witin nani Balaam kaikaia wan bara win:
—Sipor luhpia Balac, ai blikan man ra mai wiaia: ‘Du pali, man balaia apia wipara. 17Yang bui man ra mayunra lâka kau tara ba maikamna, man bui dîa ai makama ba sut, yang daukamna; sakuna man takaskpara, bal bara naha uplika nani ra saura wis.’
18Sakuna Balaam pana win:
—Balac gul nani bri ba king watla ra, gul silbar nani auhbi bri ba sut aikbia sin, yang sip diara daukamna apia, diara tara kra, diara sirpi kra daukaia. Dawan Gâdki ai lâka aikan ba wina sip tnaya ra tawamna apia. 19Ban sakuna, man nani sin naha tihmia nâra takasks, bara kaikamna Dawan naha piua dîa ai wibia sapa.
20Tihmia Gâd Balaam ra latan takan, bara win:
—Baha waitnika nani man mamta balan sa kaka, man lika witin nani aikuki was, sakuna dîa yang mai wimna ba kat man daukaia sma.
Balaam yabal ra Dawan insalka wal prawan
21Balaam yu wala titan witin buan ba ra, ai birikuka satil mangki, Moab uplika tara nani balan ba aikuki wan. 22Balaam ai birikuka purara uli auya kan, ai albika wâl sin witin aikuki wan.
Sakuna Gâd lika witin ra ai kupia baikan witin ban auya ba dukiara, bara Dawan insalka ba witin luaia kan ba yabalka kat buan, swika luaia apia dukiara. 23Biriku ba kaikan Dawan insalka kum sord ai mihta ra brih yabal ba kat buisa, bara biriku ba yabal wina tnaya ra taki tnaya ra wapan; sakuna Balaam mita biriku ba ra prukan kli yabal ra aimaki wapbia dukiara. 24Bara Dawan insalka ba yabal bîla kau sirpi kan ba lila kat wih buan, baha yabalka ba wain nasla bâk luaia kan, bara walpa kutbanka bri kan tnaya tani wâlsut ra. 25Biriku ba Dawan insalka ba kaikan ba ra, baha walpa kutbanka tnaya kum ra ban aitnikan, bara walpa kutbanka ba Balaam ra kuhma ra taiban. Baha kat Balaam biriku ba kli prukan. 26Sakuna Dawan insalka witin nani kainara wih, yabal sirpi pali ba lilapas kat buan, baha yabalka ra lika upla kumi sip tnaya walak luras kata. 27Bara biriku ba Dawan insalka ba kaikan bara tasba ra aitnikan, bara Balaam kupia baiwan bara dus ni biriku ba ra prukan. 28Baha kat Dawan mita daukan biriku ba Balaam ra sturi aisaia:
—¿Yang dîa mai munri tâwan naha kat man aima yumhpa dus ni ai prukisma na?
29Balaam pana win:
—Man laiwaska kikisma. Skiru mihti ra bri katna kaka, naha kat mai ikaia kapri.
30Sakuna biriku ba pana win:
—Yang na man birikukam sna bara piua bani yang ra ai ulisma, bara pain nu sma kau aima kumi sin baku mai munras katna.
Balaam pana win:
—Man kasak pali aisisma.
31Bara Dawan mita ai insalka ba kaikaia Balaam ra marikan, witin ai mihta ra sord kumi brih yabal lilapas kat bûi ba. Balaam aimakupan, ban ai mawan tasba kat bri si prakan, 32sakuna Dawan insalka ba witin ra win:
—¿Dîa muni man birikukam ra aima yumhpa prukram ba? Yang sika balri man yabalkam ba prakaia, kan man naku impakisma na yang brinki apia sa. 33Biriku ba ai kaikan, baha mita aima yumhpa tnaya ra tawan. Witin tnaya ra tawras kata, yang pat mai ikri kaia kan, bara biriku ba lika raya swiaia kapri.
34Bara Balaam pana Dawan insalka ra win:
—Yang saura daukri, yang tânka briras katna man bahara yabalki praki kapram ba. Bamna yang wamna ba yamni kaikras sma kaka, naha wina kli mahka ninira tawi wama.
35Sakuna Dawan insalka ba pana win:
—Man sip sma baha waitnika nani aikuki waia, sakuna yang dîa mai wimna ba baman man wima.
Balac Balaam wal lilia ai lakula daukan
Bamna Balac lika Balaam blikan uplika nani ba aikuki wan, 36bara Balac walan Balaam pat aula, witin taki wan baha tasbaya piarkika tani ra, Moab kuntrika kumi Arnón awala lama ba kat. 37Bara witin ra win:
—Yang kli kli upla blikri man mai paiwaia. ¿Bara dîa muni man balaia brin mai daukras kan ba? ¿Man lukisma sip apia sna man ra mamna maikaia?
38Bara Balaam pana win:
—Âu, kaiks nanara yang pat nâra sna, mai kaikaia balri. Sakuna karnika âpu sna, brinki ba kat diara aisaia. Bamna Gâd bui dîa ai wibia ba baman sip sna aisaia.
39Baha wina Balaam Balac wal Quiriat-husot ra wan. 40Balac mita win kan bahara bîp mairin nani bara sîp nani ikaia, bara Balaam sin bahara bri wabia, witin ra sturi wiaia blikan uplika nani ba sut sin wabia.
41Yu wala titan Balac bui Balaam pliki saki, witin wal Bamot-baal ilka ra ulan, baha pliska ba wina sip kan Israel luhpia nani ai watla mâkan ba kaikaia.
<p>© 2010 Bible Society in Nicaragua</p>