Jasua 3
3
Israel luhpia nani Jordan awala luan
1Baha yua yapra wala titanka, titan pali, Jasua pat buan bara Israel luhpia nani sut aikuki, Sitim wina taki Jordan awala ra wan; sakuna bahara ai kiampka mâkan kau luras ba ra. 2Bara yu yumhpa luan kat, war wihtka nani ba kiamp aiska ba wapi kaikan, 3bara witin sin Israel luhpia nani ba pat maisa pakan kan: “Ani piua prîs nani Libait nani ba Dawan lâka auhbaia watla twilki taki wabia man nani nan kaikma ba ra, anira sma ba wina bal taki, witin nani nina blîks.#Kul K 10.33-36. 4Bara baku man nani sin anik waia yabalka ba kaikma, kan nanara kat man nani kumi sin kau naha yabalka nâk luras kapram, bamna kakaira apia sma. Sakuna man nani lâ nani auhbaia watla twilki ba lamara lika wapara, kilumita kum prais laih wina ninara wapi bas.”
5Klin takaia dukiara sin Jasua bui witin nani ra win: “Man nani sin klin taks, yauhka kaikma Dawan ai warkka aihka nani dauki ba.’’ 6Witin prîs nani ra sin win: Dawan lâka watla ba, man nani twilki upla nani tâura awala ba lui was.”
Bara prîs nani ba Dawan lâka auhbi watla ba twilki, upla nani tâura lui wan. 7Bara Dawan Jasua ra win: “Naiwa wina, piua bani yang bui maikrika Israel luhpia nani mawanra, man diara kau tara nani dauki kama. Bara baku witin nani kaikbia yang lika man wal sna, naipakan Moses wal kapri ba baku. 8Man adarkam nani yabi wiaia sma ba, prîs nani ra adar yabi wis, Dawan lâka watla ba witin nani twilki brih wabia Jordan awala un kat, baha wina awala kat dimi wih takaski bâra bûi kabia.”
9Bara Jasua wih Israel luhpia nani ra win: “Man nani bal Dawan Gâdkam aisi na wals. 10Dawan rayakira ba man nani tilamra bâra ba tânka man nani naku brima, man nani awala lui auma ba tâmra witin wabia, bara Kenan uplika nani ba, hitita nani, heveo nani, ferezeo nani, gergeseo nani, amorreo nani bara Jebús uplika nani ba sut munka plapbia. 11Man nani kaiki bas, tasba aiska Dawanka upla wal lâ daukan lâka auhbaika watla ba pas man nani tâura Jordan lubia. 12Ba mita, man nani waitna 12 pliki sâks, Israel masraka kumi bani ba tila wina waitna kum. 13Prîs nani Dawan lâka auhbaia watla ba twilki wabia, bara upla sut ai mina liura dingkbia ba ra, awala kla wina aubi ba takaskbia plis kumi ra.”
14-16Israel luhpia nani ai tintka watla ba wina takan Jordan awala ba baila wala ra luaia dukiara, bara witin nani ai tâura prîs nani ba Dawan lâka auhbaia watla ba brih wapan. Baha piua ba plun mâ nani dâkaia piua kan bamna, awala ba sin lisamra bri kan. Prîs nani ba nan ai mina liura buskan ba ra lî kla wina aubi kan ba ip takaskan, lî ba plapi ban ai klaura Adam kat uli wan Saretán tawan tara karnakira ba lama kat. Awala mâya tani ra lî ba lâwan, ban Kabu Pruan bâk wih lap tiwan. Baku Jordan awala laya ba aihka aihka baiki sakan kan, bara Israel luhpia nani ba bal lui Jeriko tawanka tara ba brin. 17Awala bîla lâwan bâk upla nani sut ba wapi lui wan, sakuna prîs nani ba lika awala bîla lila ba kat takaskata, kan Dawan lâ daukan auhbaia watla ba bâra bri kan, tasba lâwan karna ba purara.
<p>© 2010 Bible Society in Nicaragua</p>