Jems 4

Tasba ra latwan kaiki uplika ba

1¿Man nani tilamra, ani wina war nani bara aiklabanka nani ba takisa ki? Brinkam saura nani wînam ra ban aiklabi ba wina takisa. 2Man nani diara brin mai daukisa, bara sip briras sma ba mita, upla ikisma; diara kum dukiara tuman brisma, bara sip briras sma bamna, aiklabisma, war sin daukisma, man nani dîa want sma ba kat sip briras, Gâd ra makabras sma bamna. 3Man nani makabankam nani ba saura makabisma bamna, sip briras; kan man nani wînam liliaka dukiara baman lukisma bamna. 4¡Alai upla sip kasak lukras sma nani ba!#Ais 1.21; Jir 3.6-10; Os 2.2. ¿Man nani kaikras sma ki, tasba ra latwan kaikaia lâka ba lika, Gâd wal waihla takaia lâka ba?#Mt 6.24; Lk 16.13. Ya ya tasba ra latwan kaikisa kaka, Gâd wal waihla takisa. 5Diara bâra ba mita Ulbanka ra wisa: “Gâd mita baha Spiritka wan tilara yan iwi ba ra, tâwan lawi latwan pali kaikisa.”#Imp St 20.5; Kli S 4.24; Sak 8.2. 6Sakuna Gâd ai yamnika mita kau latwan wan kaikisa, kan Ulbanka ra naku wan wisa: “Gâd bui prautkira nani ba mapara buisa, sakuna bawikira nani ra lika ai yamnika ba ni hilp munisa.”#S L 3.34; 1 Pi 5.5. 7Baku bamna, Gâd ra bawi banhs. Sitan mapara dutki bus, bara witin ba man nani wina plapbia. 8Gâd lamara man nani was, bara witin lika man nani lamamra wabia. ¡Saura dadaukra nani, mihtam nani ba siks! ¡Bara man nani bui Gâd ra latwan kaikisma, bara sim piua ra tasba ra latwan kaikaia lukisma nani ba, kupiam nani sunu dauks! 9Man nani sari taks, ini yahwi bas; kikisma ba yarka inan lâka ra tawbia, lilia lâka ba sari ra tawbia. 10Gâd mawanra mâyara bawi bas, bara witin mita purara mai bukbia.#Mt 23.12; 1 Pi 5.6.

Muihkam ra lâka daukpara

11Muihki nani, pana pana man nani saura aisapara. Ya ai muihni mapara saura aisi, lâka sin aisi dauki kaka, witin lika Gâd lâka mapara saura aisisa; bara lâ wihtka aimakisa. Bara man nani bui Gâd lâka mapara aisisma kaka, lâ bîla wali daukaia katma watlika ra, lâ wihtka ni aimakisma. 12Bamna Gâd mita lâ ba yaban, bara witin sika lâ wihtka aimaki ba. Bara witin baman swaki wan sakaia sip sa, bara iki wan tikaia sin. Bara, ¿man ba ya sma ki, uplikam lâka daukisma ba?

Yauhka dukiara lukaia apia ba

13Nanara man nani wals, naku aisisma ba: “Naiwa, yauhka kra, yawan tawan kum ra wabia, bara bahara mani kum wark taki lalah daukbia”, 14sakuna man nani kaikras sma yauhka ba dîa takbia sapa.#Sins 1 27.1. ¿Bara upla rayaka ba, dîa sa ki? Mukus kum wiria man taki si, ba wina lap tiwi ba baku sa. 15Man nani naku ni aisaia sma: “Dawan baku want sa kaka, yawan raya kabia, bara dîa dîa daukan wan daukbia ba yawan daukbia.” 16Sakuna man nani uya mamyuni aisisma; bara naha pura luaia lukanka na sika saura. 17Ya yamni daukaia kaiki si daukras kaka, witin saura daukisa.

Currently Selected:

Jems 4: MSKTU

Highlight

Copy

Compare