Hibru Nani 8

Jisas, lâ raya daukan ba hilpka aisisa

1Yawan diara nani aisi yana tânka kau tara ba sika naha: wan prîs tara ba naku sa, bara kasbrika purara Gâd king iwaika lama pali kat iwisa. 2Witin ba kau plis holikira ba kat prîs warkka daukisa, bara baha sika Dawan mita paskan ba, upla nani mita lika apia.#Law 110.1.

3Prîs tara bani ba prisant nani bara sakripais nani sin yabaia wisi mangkan sa; bara baku sin, Jisas Kraist ba diara kum yabaia witin bri kaia sa. 4Witin tasba ra kan kaka, prîs kaia sin apia kan, prîs nani kau nâra ba mita, bara witin nani ba Moses lâka kat prisant nani ba yabisa. 5Witin nani prîs warkka dauki nani ba lika, kasbrika purara ba lilka, patrangka bara natka ra baman daukisa. Yawan kaiki nani ba lilka nani, kan Moses ba tint watla paski kan ba ra, Gâd wisata: “Pain kaiki, il ra lilka mai marikatna ba natka kat dauks.”#Imp St 25.40. 6Sakuna wan prîska tara na lika prîs warkka ba baha nani bri kan ba purkara kau tara daukan, kan witin ba lâ daukan kau pain kum lengstarka sa, bara baha ba diara kau pain nani yaia pramiska dauki lâka daukan kata.

7Pas lâka daukan ba kasak aihwa kan kaka, lâ daukan wala kum want apia kan. 8Sakuna Gâd mita ai uplika nani aimawahki tauki nani ba sakan, witin nani dukiara ulbanka ra wisata ba baku:

“Dawan naku wisa: Yua nani balbia,

bara Israel luhpia nani bara Juda uplika nani aikuki sin

kli lâ raya kum daukamna.

9Witin nani damika nani wal lâ daukri ba baku kabia apia,

witinka nani mihta alki,

Idsip tasbaya wina brih sakri yua ba.

Witin nani wal lâ daukri ba kat kulki banhras kan,

bara ba mita witin nani ba lulki swiri,

Dawan baku wisa.

10Baha yua nani ningkara

Israel nisanka wal lâ daukamna ba

naku kabia wisa, Dawan bila:

Yang lâika nani ba witin nani lukanka ra mangkamna,

bara ai kupia nani bilara baha nani ba ulbamni.

Bamna yang lika witin nani Gâdka takamna,

bara witin nani ba upliki nani kabia.

11Kumi bani sin ai uplika ra bara

ai muihni ra sin wiaia apia kabia:

Man ba Dawan tânka kakaira taks.

Kan upla sut yang ra kakaira banhwi kabia,

witin nani tilara kau sirpika ba wina kau tarkika ba kat.

12Witin nani watawanka nani ba ban swih tikamna, lukamna apia,”#Jir 31.31-34.

bara ai saurka nani ra yang kli kupi kraukamna apia.’’

13Lâ raya kum dukiara aisisa ba ra, Gâd bui pas lâka kata ba almuk daukan sa; bara dîa dîa patitara wina bâra ba bara mahka almuk sin taki ba, naika mapa lap tiwbia.

Currently Selected:

Hibru Nani 8: MSKTU

Highlight

Copy

Compare