Ester 9
9
Ju nani ai waihla pura luisa
1Yua 13, kati 12 ra, Adar katka mâki ba ra, king adarka ba aimakaia kata; baha yua pali ba sika Ju nani wailhka ba aihwaki kan, Ju nani ba iki, âpu tiki, dukia kukanka nani ba ai dukia briaia, ban sakuna lâka kata aikarwi tawan. Bara pana Ju nani mita witin nani ra misbara kaiki kan uplika nani ra, taibi pura luan bara ai dukia kukan nani kan ba, nanara witin nani sika dawanka takan. 2Bara Ju nani aiska ba, ai tawanka nani bani ra asla taki banhwan, baku sin Asuero tasbaya bani ra, baha uplika nani witin nani ra saura munaia lukan nani ba mapara aiklabaia aihwaki kan. Bara upla kumi sin sip apia kan witin nani wal aiklabaia, kan pat upla nani kupia ra sibrin tara bâra kan Ju nani ba dukiara. 3Bara tawan wihtka nani, aiklaklabra wihtka nani, ai tawanka watlika ra aimaki nani bara king albika nani sut ba, Ju nani ra tâ baiki kan, Mardoqueo sibrinka ra. 4Bamna Mardoqueo ba pat king watla bilara kulkan tara bri kan, baha purkara sin ai kulkanka ba king tasbaya aiska ra pâwi kan, baku sin, yu bani ra kau kulkanka tara pali yabi kan. 5Bara Ju nani mita ai waihla nani ba iki âpu daukan sord nani wal; ai waihla nani ra dîa daukaia lukan ba kat âpu daukan. 6Bara Susa kan kahbaika pliska bri ba ra baman waitna nani 500 ikan. 7Bara Parsandata, Dalfón, Aspata, 8Porata, Adalías, Aridata, 9Parmasta, Arisai, Aridai bara Vaizata, naha nani sut ra ikan. 10Baha nani sika Amán luhpia waitna nani matawalsip kan ba, sut ikan, witin lika Ju nani wailhka kata; sakuna ai dukia kukanka nani ba lika kangbras kata.
11Bara sim yua ra king ba walan, Susa kan kahbaika pliska bilara, upla ailal pruan kan ba. 12Bara king mita kwin mairin Ester ra win:
—Susa kan kahbaika pliska ra, Ju nani mita waitna nani 500 ra ikan, baku sin Amán luhpia nani matawalsip kan ba sin ikan. ¿Dîa kau daukan sa ni, king tasbaika wala nani ra? Bamna ai wis dîa kau brin mai daukisa, bara yang daukamni.
13Bara Ester pana win:
—Kingki tara, yamni kaikisma kaka, yauhka yua ra Ju nani Susa ra iwi ba witin nani ra yas, naiwa lâka daukan ba kat daukbia, bara Amán luhpia nani matawalsip ba dus ra pambia. 14Bara king adar yaban baku daukaia; naha adarka ba Susa ra yaban bara Amán luhpia nani matawalsip ikan nani ba sut dus ra pami swin.
15Bara Ju nani Susa ra kan ba, kli asla takan, yua 14 Adar katka ra, bara Susa ra upla nani 300 ikan, sakuna diara kukanka bri nani ba ra lika kangbras kan. 16Bara sin Ju nani king tasbaya wala ra kan ba, asla takan sim kati yua 13 ra ai rayaka swaki sakaia aiklaban, baku ai waihla nani mihta ba wina dakwi takan, bara ai waihla nani ra 75,000 ikan, sakuna ai dukia kukan nani ba lika kumi sin kangbras ba kat swin. 17Yua 14 ba ris bri banhwan, pata tara dauki bara lilia sin bri banhwan.
18Sakuna Ju nani Susa ra kan ba lika baha katka lapta 13 bara 14 yua wal ba asla taki banhwan, sakuna yua 15 ba ris bri banhwan, pata tara dauki lilia kira ni. 19Bahamna, Ju nani tawan sirpi nani ra, kau tawanka kutbras iwi kan nani ba lika, Adar kati yua 14 ra, lilia tara brin, pana pana prisant yaban.
Purim liliaka ba
20Bara Mardoqueo lika naha diara nani ba dukiara wauhtaya ulbi blikan, dîa takan ba king Asuero tasbaya ra, Ju nani iwi kan bani ra, lamara bara laihura iwi kan nani sut ra. 21Bara adar yaban, Adar katka bani yua 14 ra, 15 mani bani, lilia tara dauki kaia. 22Ju nani ai waihla nani wina kupia kumi lâka brin yua kulkaia, baha katka ba kupia wirha katka kan, bara âuyapah yua daukan kabia; baku sin baha yua ba upla bani ai lamara iwi nani ra diara pana pana bliki kabia, ba purkara sin umpira nani ra diara mana luha yabi kabia. 23Bara yua nani ba aitani pali kulkan baku daukbia, dîa pat tâura daukan baku, Mardoqueo mita ulban ba kat. 24Kan Amán, witin ba Ju nani sut ra waihla saki kan, lukanka kumi sakan kan Ju nani ba iki âpu daukaia, bara lat lulki kaikan#Est 3.7. witin nani ba iki âpu daukaia. 25Sakuna Ester ba king kaikaia balan ba ra, king mita ulbi adar yaban baha waitnika ai lukanka ra saura luki, Ju nani ra sauhki tikaia daukan ba witin ai lal ra kabia, witin ra bara ai luhpia nani ra sin dus ra pami langki ikbia. 26Baha ba mita naha yua nani nina ba purim mâkan, tânka walpa lupia nani; pur tânka ba lika walpa nani.#9.26 Purim...pur: Witin nani kuntrika ra aisi bîla ba tânka kat pur tânka bri ba sika luk (wibia sa kaka, Acad bîla, gukluk). Hibru ulbanka ra, ai natka kat, naha nina tânka ba ulban sa, naiwa kat, Ju nani lilia dauki sim nina bri ba.
Baku sika, Mardoqueo wauhkataya blikan ba mita, witin nani kaikan bara bahara sin iwan. 27Bara Ju nani ba naha yua ba ai natka baku alki brin, ai kiamka yua nani sut ra. Bara ya uplika Ju takan ba sut, naha yua wâl ba kulkanka tara yabaia sa, bara mani bani naha yua aimaki bani ba yua tara daukbia. 28Bara baha yua ba ai kupia krauki kaia sa, kiamka nani bani lilia tara dauki ba wal, tawan bani ra bara tasba bani ra sin, baha purkara sin, Ju nani bani naha pri takan yua ba kulkanka yabaia sa, bara kiamka nani aiska ba baha purim lâka ba ai kupia kraukaia sa, ai âuya tikaia apia dukiara. 29Bara kwin mairin Ester, Abihail luhpia mairin wihki Mardoqueo Ju waitna ba wal wauhtaya wala ulban, karnika aiska ba wal, Purim lâka takan ba kau karnika yaia dukiara. 30Baha king Asuero tasbaya nani 127 bâra banhwi kan nani ra blikan wan, kasak tânka bîla nani ba wih, kupia kumi bîla nani ba wal. 31Baha pri takan yua nani mangkan ba kasak kulki, ai yua nani kat daukan kabia sa, Mardoqueo wihki kwin mairin wal mita dîa adarka yaban ba kat, bara ai kiamka nani aiska sut ra, baha yua plun piras wini makabi kan ba ai kupia krauki kaia wisi. 32Bara Ester adarka dîa daukaia win kan ba, Purim takan liliaka ba dukiara baha kat dauki kan; bara naha diara nani aiska ba wauhtaya ra ulbi swin.
<p>© 2010 Bible Society in Nicaragua</p>