Daniel 2
2
King Nabucodonosor yaprisauhkan kaikan ba
1King Nabucodonosor mani wâl king aimaki kan ba piua ra, witin yaprisauhkan kaikan, bara baha kaikan kata ba wina witin pali ai kupia wal uya pali aisi sip yapras kan. 2Bara witin bui âiulbra nani, smaya kakaira nani, sukia nani, sinskira nani#Sinskira nani: Hibru ra Caldea uplika nani ulban sa, bors 4,10 ba sin baku ulban sa. Baha tânka nâra wisa slilma nani tânka plaplikra, Babilon ra baha skulka diman uplika ba. sin paiwan, baha yaprisauhkanka tânka witin ra wibia dukiara. Witin nani wan king mawanra bûi banhwan, 3bara king bui witin nani ra aisin:
—Yang yaprisauhkan kum kaikri, bara kupi wal uya pali aisisna, baha dukiara tânka briaia brin ai daukisa.
4Bara sinskira Aram uplika bîla aisi pana king ra win:
—¡Man king lâmka ba ban kabia! Bara yaprisauhkankam kaikram ba yang nani ra ai wis, bara yang nani tânka ba mai wimna.
5—Naha sika yang lukanki ba —king bui pana win—: Man nani baha yaprisauhkanka kaikri ba bara tânka sin ai wiras sma kaka, irbi mai paskan kabia, bara wamtla nani ba sin slingbi pura kat paski swin kabia. 6Sakuna yaprisauhkan kaikri ba ai wima kaka bara ai tânka ba sin, yang bui man nani ra diara tara prisant maikamna, bara mayunra kulkanka lâka tara brima. Baku bamna yaprisauhkanki ba bara tânka ba sin man nani ai wis.
7Sinskira nani ba kli aima wala ra win:
—King, man dîa kaikram ba ai wis, bara tânka ba yang nani mai wimna.
8—Yang tânkam kasak brisna —king ba pana baku win— man nani lika kau sans briaia lukisma, kan man nani pat walram dîa yang brinki ba. 9Baku bamna, dîa yaprisauhkan ra kaikri ba ai wiras sma kaka, dîa pâtka brima wîri sut ba brih banhma. Bamna man nani sut aikuki diara kumi luki banhram sa kunin aisi diara bahki nani ai wiaia, bîla kaikisma piua na lubia ba ra. Bamna man nani ai wis, yaprikisauhkan kaikri ba, bara yang kaikamna man nani ba sip sma tânka sin ai wiaia.
10—Naha tasba ra upla âpu sa —sinskira nani ba mita win— man king tara ra mai wiaia sip ba, baha tânka wali na brin mai dauki ba. Baha sut purkara, kau king kumi ban tara karnakira kabia kra, nahmuna diara tara makabi walras kan sukia, diara kakaira nani, apia kaka sinskira. 11Man king tara sma ba, makabankam ba karna pali sa, bamna upla âpu sa baha mai wiaia, gâd nani baman lika, ¡sakuna baha nani ba wan tilara âpu sa!
12King baha walan ba ra kasak pali ai kupia sauhkan, bara adar yaban Babilon ra sinskira nani ba sut kat ikbia. 13King baha aisin ba upla sut ra maisa pakan, baku bamna Daniel bara ai pânika nani ba sin#Dn 1.20. plikan kumi bani ba ikaia.
King yaprisauhkan ra kaikan ba tânka Daniel aisin
14Bamna Daniel bui king suldiar lalka Arioc wal sinskira tânkira yamni luki lâka ra aisin, Babilon sinskirka nani ikaia wisi pat lâ daukan kan bamna. 15Bara witin makabi walan:
—¿Dîa muni king ba naha lâka na ban karna pali daukan ki?
Arioc pana tânka param win. 16Bara Daniel lika king ra wih makaban piua wiria yabia, bara witin baha yaprisauhkan kaikan ba wibia, tânka nani ba sin. 17Ningkara ai watla ra wan ai pânika nani ra, Ananías ra, Misael bara Azarías ra, dîa taki ba sut maisa pakan, 18witin nani hilp makabaia kasbrika purara ba Gâdka ra, baha dahra prakan tânka ba param marikbia dukiara. Bara baku Babilon sinskira nani aikuki ikan kabia apia dukiara. 19Baha tihmika diara aihka kaikan ra bal sinska lâka tara tânka ba Daniel ra param marikan; baha tânka brin ba ra, Daniel bui kasbrika purara ba Gâdka ra yamni pali win, 20naha bîla nani aisi:
“Gâd nina ba ban kaia ra yamni kulkan kabia,
kan sins lâka bara karnika ba man brisma bamna.#Job 12.13; S L 2.6.
21Witin mani nani bara piua wala nani ba sin lakisa,
king nani ba sakisa bara mangkisa,
sinskira nani ra sins lâka ba yabisa,
diara tânka bri nani ra tânka bri kaia yabisa.
22Diara tihu ra ba bara diara yukukan ba, witin mita param sakisa,
diara tihmu ra bâra ba tânka kaikisa,
kan ingni ba witin wal sa.#Job 12.22; Law 139.11-12.
23Aisiki nani Gâdka sma ba,
man ra tingki mai wisni bara mamyunisna,
kan man mita sinskira karnakira ai daukram bamna;
bara yang nani mamkabri ba tânka nanara mairikram:
king kupia turban kata ba tânka, yang nani ra mairikram.”
24Baha aisin ba ningkara, Daniel Arioc wal aisaia wan, witin ra sika king bui win kan ba, Babilon sinskirka nani sut ba ikbia, bamna witin ra win:
—Sinskira nani ba ikpara, king ra ai brih was, bara yang bui yaprisauhkanka aiska tânka ba wimna.
25Baha ningkara, Arioc mita Daniel ba king Nabucodonosor wal aisaia brih wan, bara win:
—Ju nani tasbaya wina alki brih balan ba tila wina, waitna kum sakri man king tara yaprisauhkan kaikram tânka ba mai wibia.
26Bara king mita Daniel nina Beltsasar mâki ba ra win:
—¿Man sip sma ki yaprikisauhkan kaikri ba bara tânka ba sin ai wiaia?
27Daniel pana win:
—Upla sinskira kumi sin âpu sa, âiulbra kra, smaya kaiki ba sapa, sukia, slilma tânka plaplikra sapa, man king tara baha yaprisauhkankam kaikram ba tânka nani sut mai wiaia. 28Sakuna kasbrika purara Gâd kumi bâra sa, upla nani diara tânka briaia sip apia ba param sakisa, bara naika dîa takaia ba king mita man ra pat mamrikan sa, bara man yapi kapram bara yaprisauhkan ra diara aihka nani kaikram tânka. Bara nanara mai wiaisna, 29man king tara, krikrikam ra prawi kapram, naika dîa takbia ba dukiara luki kapram, dahra prakan tânka param saki ba, witin bui man ra mamrikan. 30Baku bamna yang ra baha diara tânka yukuwan ra ba param mairikan, baha wal wiras sna yang na upla wala nani wal kau sinskira sna tânka ba mita lika apia, ban sakuna king dîa kaikan tânka ba wimna, bara king ba tânka bribia, witin ai krikrika ra prawi naika dîa takbia ba luki kaiki kan ba.
31“King tara, man yaprisauhkan ra kaikram, mamwanra sal bapan upla lilka tarka tara, ingni pali bara sirang wan ikisa. 32Baha lilka lal ba gul aihwa wal paskan kata; lama dusa bara klahkla nani ba silbar ni paskan, biara bara kuhma nani ba lika bras ni; 33wayata nani ba lika ayan ni daukan, mina wâl ba lika ayan ni bara slaubla ni sin paskan kan, 34Man king tara baha lilka ra kaiki kapram, bara il kum wina walpa kum ip daiwan, upla kum mita sin walpaya ba platukbras kan, bara baha bal lilka ba mina kat pruki slingbi tikan. 35Wan nakra klipan kum baku baha ayanka, slaubla ba, bras ba, silbar bara gul ba sut yamhpus baku takan, mani piua ra plawar taya pukbi baku, pâsa mita brih wan mina taibanka yawan sip kaikras ba baku daukan. Sakuna baha walpa ni lilka paskan ra prukan walpaya ba lika, il tara kum takan tasba aiska ra.
Yaprisauhkanka tânka ba
36“Naha sika yaprisauhkan kaikram ba. Bara nanara, man king tara, baha tânka ba mai wimna. 37Man king tara king nani sut purkara, king tara sma, Gâd kasbrika purara ba mita naha king kaia lâka ba maikan sa, karnika, sip kaia lâka, mayunra ba sin, 38ani anira upla nani iwi ba sut purara karnika ba maikan sa, daiwan nani bara tnawira nani ba sin, witin mita baha nani sut ba karnikam mununhtara mangkan sa, baha sika gul ni paskan ba, king tara, man. 39Bamna, man king tara, kingkam lâka ba ningkara king lâka wala mâyara kum bal takbia, baha ningkara king lâka yumhpika ba sika bras kabia, tasba aiska purara karnika alki bri kabia. 40Baha ningkara, king lâka walhwalka ba balbia, baha lâka ba karna pali kabia ayan baku; bara ayan bui diara sut kriki sauhki ba baku, baha kingka lâka ba mita wala nani sut kriki sauhki tiki âpu dauki, sut purara king aimakbia.
41“Bamna, man king tara, man sin kaikram mina sirpika nani sut ba lika slaubla ni bara ayan ni paskan kata, bara wala ba lika ayan ni daukan kan; naha tânka ba lika king lâka kum, sakuna baiki sakan kabia, âu, karnika lika wiria bri kabia, kan ayan ni paskan bamna, man king tara man kaikram ba ayan bara slaubla wal abalki daukan bamna. 42Mina sirpika nani ba ayan bara slaubla ni sin daukan ba, baha tânka ba kingka lâka ba ai karnika kabia, ban sakuna swapnika sin bri kabia. 43Baku bamna, man king tara, kingkam lâka ba ayan karnika slaubla wal abalkan ba baku, baha king tasbaya wihtka tara nani ba witin nani asla takan kabia marit taki ba baku lâka ra asla taki kabia ba mita; ban sakuna, witin nani sut kumi pali takbia apia, ayan slaubla wal abalkan asla apia ba baku. 44Baha kingka nani dauki yua nani ra kasbrika purara Gâdka ba king lâka kum bukbia bara ban kaia ra sauhki tikan kabia apia, nisan wala kumi mita sin pura lubia apia, ban sakuna, king lâka wala nani sut ra pura lubia, bâra ban kabia ban kaia ra. 45Baha sika tânka walpa kumi il wina ip daiwan upla kum mita sin platukbras kan karwi balan, man king tara, kaikram ba. Baha walpaya ba mita sika tasba yamhpuska baku daukan kabia, ayan, bras, slaubla, silbar, gul ba sin. Gâd tara pali mita king man ra mamrikan naika dîa takaia ba. Yaprisauhkankam ba kasak sa, ai tânka sin kasak sa.
46Bamna king Nabucodonosor Daniel mawanra ai lula krikan, ai lal ba ban tasba kat makupan, bara wih sakripais bara kîa yamni angki daukbia win. 47Baha ningkara, Daniel ra aisin:
—Kasak pali, man nani Gâdkam ba kanra tara sa, gâd wala nani sut ba wal; king nani sut Dawanka sa, witin mita dahra prakan ba param ra sakisa, bamna man sip sma naha dahra prakan ba param ra sakaia.
48Baha ningkara Daniel ba wark tara kum pura wihtka mangkan, bara prisant pranakira nani sin uya yan, baha purkara Babilon tasbaya aiska wihtka tara mangkan, bara baha tasbaya aiska ra sinskira nani ba wihtka sin mangkan.
49Daniel makaban ba kat, king ba mita mangkan, Sadrac, Mesac bara Abed-negó ba wark tara kum lalka, Babilon tasbaya aiska pura kaikaia warkka ra mangkan. Daniel lika king watla ra takaskan.
Currently Selected:
Daniel 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua