2 King Nani 2
2
Ilayas kasbrika purara uli auya
1Dawan bui Ilayas pâsa karna kum ni kasbrika purara pali ba ra brih waia piua aimakan, bamna Ilayas bara Ilaidsa wal ba Guilgal wina taki wan. 2Bara Ilayas bui Ilaidsa ra win:
—Takaski nâra bas, kan Dawan bui Betel ra ai blikuya bamna.
Sakuna Ilaidsa win:
—Dawan nina ra swer takisna bara man ra sin, yang yakan mai swimna apia.
Bara witin wâlsut Betel ra wan. 3Bara Betel ra prapit nani bâra kan ba, taki wi banhwan aikuki prawaia, bara Ilaidsa ra win:
—¿Man damra walisma Dawan bui man smasmalkrikam ba man wina sakuya ba?
Bara Ilaidsa win:
—Âu, yang pat nu sna, sakuna man nani diara aisapara.
4Bara Ilayas bui Ilaidsa ra win:
—Takaski nâra bas, kan Dawan bui Jeriko ra ai blikan bamna.
Sakuna Ilaidsa pana win:
—Dawan nina ra swer takisna bara man ra sin, yang yakan mai swimna apia.
Bamna Jeriko kat witin wal wan. 5Bara prapit nani Jeriko ra bâra kan ba, Ilayas ra balan, bara win:
—¿Man nu sma ki Dawan bui smasmalkrikam naiwa man wina sakuya ba?
Bara Ilaidsa win:
—Âu, yang nu sna, sakuna man nani diara aisapara.
6Bara Ilayas win:
—Takaski nâra bas, kan Dawan bui Jordan ra ai blikuya bamna.
Bara Ilaidsa win:
—Dawan nina mâki swer takisna bara man ra sin, yakan mai swimna apia.
Bara witin nani wâlsut wan. 7Sakuna prapit nani 50 balan ba ra wiria laihura takaskan, Ilayas bara Ilaidsa ra kaiki kan; bara witin wâl lika Jordan awala un ra bûi kan. 8Bara Ilaidsa ai prâka ba brih, blaki liura wipan; bara baiwi takan, bara witin wâlsut tasba lâwan bâk wapi lui wan. 9Witin nani awala ba luan ningkara, Ilayas bila Ilaidsa ra win:
—Man dîa brin mai daukisa kaka yang bui dauki maikamna, ai wis, yang kau man wina dakwi takras sna ba ra.
Ilaidsa win:
—Man spiritkam ba aima wâl praiska yang ra aikma want sna.#Man spiritkam ba...want sna: Baha sika luhpia waitna tawahkia ai prapatika briaia ai raitka bri ba raitka ba makabisa.
10—Man wiria baman makabras sma —Ilayas win—. Sakuna man wina dakwi takamna ba ra ai kaikma kaka, man ra kau maikan kabia. Baku apia kaka lika kaikma apia.
11Bara witin nani wal wapi aisi wan ba ra, ai dahra walras kan wagin ba pauta klauhan; bara araska ba sin pauta klauhi kan, bara wal dakwi takan, bara Ilayas ba laih kasbrika purara pali, bara pâsa karna kum mita brih uli wan. 12Naha kaikan ba ra, Ilaidsa winan: “¡Aisiki, aisiki, Israel mapa ra war daknika karnikira kum baku katma!”
Baha ningkara witin kli Ilayas kaikras kan.
Ilaidsa ba Ilayas warkka ra aimakisa
Bara Ilaidsa ai prâka ba brin, bara pîs wâl kalkan. 13Ba ningkara Ilayas prâka kauhan kan ba brin, bara kli tawi balan, Jordan awala un ra bal takaskan. 14Bara Ilaidsa prâka kauhan kan brin ba wal, lî ra wipan, bara winan: “¿Anira sa ki Dawan, Ilayas Gâdka ba?”
Liura wipan wal baku, tnaya kum ra bara tnaya wala ra baiwi takan, ara Ilaidsa ba bâk lui wan. 15Bara prapit nani Jeriko ra kan nani ba, naha kaikan bara win: “¡Ilayas spiritka kata ba nanara Ilaidsa ra iwan!”
Bara witin nani ai mapara balan, witin wal prawaia; bara witin nani ai mawanra bawan, 16bara naku wi banhwan:
—Yang nani tilira kaiks, dukiam dadaukra nani, kupia karnira nani 50 nâra sa. Swis witin nani nanara wabia, bara smasmalkra ba plikaia, ban kra Gâd spiritka bal bukan bara il bahna ra, apia kra il langnika bîla ra kra bri si swin sa baku sa.
Bara witin win:
—Apia, upla kumi sin man nani blîkpara.
17Ban sakuna, witin nani ban aisi kan ba mita, ban swin wan Ilayas ba plikaia waitna nani 50 ba; witin nani lapta yumhpa Ilayas ra pliki kan, ban sakuna witin nani sip sakras kan. 18Bara witin nani Jeriko ra tawi wan Ilaidsa takaskan ba pliska ra, bara witin nani ra win:
—Yang bui man nani ra mai wîri plikma apia.
Ilaidsa bui Jeriko laya kârma klin daukisa
19Bara tawan uplika nani ba bui Ilaidsa ra win:
—Kaiks, naha tawanka paskanka na aitani kat sa, kaikisma ba baku; sakuna laya na saura sa, bara tasbaya na ra sin diara pâwras.
20Bara witin win:
—Kâp tara raya kum bri sal aik, bara sâl sin.
Kâp tara ba brih wan ba ra, 21Ilaidsa lî kârma nani ra bara tingni nani ra sin wih sâl yakaban, bara win:
—Naku Dawan wisa: ‘Yang mita naha laya nani ba klin daukri, bara kli nahara upla prubia apia, bara tasba ba saumuk luha daukbia apia.’
22Bara baha yua wina laya ba klin takan naiwa kat ban sa, dîa Ilaidsa win ba kat.
23Baha ningkara Ilaidsa Betel ra wan. Bara witin yabal ra auya kan ba ra, tuktan dakni kum tawan ba wina lawaska kiki, wini win: “¡Lal daiwra, uli was! ¡Lal daiwra, uli was!”
24Bara Ilaidsa tawi kaiki Dawan nina ra lahtuban. Bara baha minit wingku tara wâl unta wina taki bal pîs ra daukan baha tuktika nani 42 kan ba sut ra. 25Baha wina Ilaidsa Carmelo ilka ra wan, bara baha wina witin kli Sameria ra tawi wan.
Currently Selected:
2 King Nani 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua