1 Timoti 2

Wan pura sunra tânka ulbi smalkisa

1Bamna tâura lika, yang makabi wisni, makabanka nani ba, pura sunra nani, makabanka ba, bara Gâd ra tingki wiaia ba sin, upla sut dukiara kaia sa. 2Tâ bri nani bara wihta nani sin sut ba pura sunaia sa, yawan wan rayaka na sâpkira bara kupia kumi lâka bri kabia; bara baha ba aiska pali Gâd ra yabi, bara sins lâka kat brih iwi kaia. 3Naha na pain sa, bara Gâd wan Sasakra mita sin yamni kaikisa; 4kan witin want sa, upla sut ba swaki sakan kabia, kasak tânka ba sin witin nani kakaira taki banhbia. 5Gâd kumi baman bâra sa, bara Gâd, witin lika upla nani wal asla kumi dauki ba sin kumi baman sa; baha sika Jisas Kraist, bara witin ba sin upla sa. 6Jisas Kraist ai wîna tara ba prura mihta ra mangkan, upla sut swaki sakan kaia ba mana aibapaia dukiara;#Mt 20.28; Mk 10.45; Gal 1.4; Tai 2.14. bara naha na ai piua aimakan kat latan marikan kata. 7Naha dukiara yang na bîla twatwilkra bara apastil baku ai mangkan sa, kasak lukan lâka bara kasak tânka ba sin, Ju apia nani ra aisi smalkamna wisi. Yang diara kasak ba kat aisisna, kunin aisaras.#2 Ti 1.11.

8Baku bamna, yang want sna waitna nani ba plis sut ra ai pura suni kabia, bara ai kupia sunu brih ai mihta nani purara buki kabia, lawan âpu bara unsaban sin âpu. 9Bara mairin nani ba, ai prâka nani dimra ra ai sinska yamni bri nani kaia sa, bara baha nani ba tânkira ai prâka dimi kabia, aiskahkan tara wal lika apia. Ai wîna tara ba aiskahki kabia, tâwa pitbanka aihkakira wal lika apia, gul ni, sita nakra manira nani, apia kaka prâk manira nani ni sin apia;#1 Pi 3.3. 10sakuna wark yamni nani wal, bara baku sika Gâd ra pliki mairka nani daukaia ba. 11Smalkanka ra mairin nani ba sâp bara bawikira pali wali banhwaia sa. 12Yang bui mairin nani ba yabri smalkras, waitna ra taibaia sin apia; witin nani ba ai bîla praki bri kaia sa. 13Kan Gâd bui Adam ba pas paskan,#Bla St 2.7. bara baha ningkara Iv.#Bla St 2.21-22. 14Bara Adam ra lika kunin munras kata; mairin ba ra sika kunin munan kata ba, bara witin ba Gâd lâka krikan.#Bla St 3.1-6. 15Sakuna mairin ba lika swaki sakan kabia yapti baku, dîa daukaia win ba aiska daukbia kaka, witin ba kasak lukan lâka, latwan lâka kat, holi lâka kat sin, ai sinska ba yamni bri kabia kaka.

Currently Selected:

1 Timoti 2: MSKTU

Highlight

Copy

Compare