1 Pita 2
2
1Baha mita man nani saurka ba sut mahka swis; kunin lâka kli daukaia apia, kunin daukanka nani mahka swiaia, tuman lâka bara nina sauhki aisanka sâtka nani sut sin. 2Tukta swap lupia bisiura aisubi takan baku, plun mai dauki ba, spirit tialka laya pali ba pliks, bara baha bâk di pâwma, bara swak takan lâka ba brima. 3Baku ba kasak pali man tânka briram sa kaka, Dawan ba yamni sa.#Law 34.8.
Kraist, walpa rayakira ba
4Baku bamna, man nani, Dawan lamara bal, walpa rayakira kum baku. Upla nani mita Kraist ba lulki swin, kuna Gâd mapa ra lika walpa bâk saki brin kum sa, bara mana tara brisa. 5Naha natka ra, Gâd bui man nani ra, walpa rayakira nani baku, spirit tempelka kum mai daukbia, prîs holikira nani, Jisas Kraist bâk spirit sakripaiska nani dauki yaia, Gâd ra yamni kabia. 6Baha mita sin Ulbanka ra wisa:
“Yang Saion ra walpa kum mangkisni,
baha ba sika rayaka wihtka walpaya,
bâk sakan bara sin mana tara pali sa;
ya witin ra kasak lukbia ba,
bahki ra takaskbia apia.”#Ais 28.16.
7Man nani kasak lukisma ba mampa ra lika, baha walpaya ba mana tara pali brisa; sakuna kasak lukras nani ba mapa ra lika, Ulbanka ra naku aisi na tnata alkisa:
“Utla mâmakra nani mita lulki swin walpaya ba,
kau rayaka wihtka walpaya takan sa.”#Law 118.22.
8Bara naha wala na sin:
“Walpa tara kum, walpa kum ra sika ai mina prukbia.”#Ais 8.14-15.
Kan witin nani ai mina prukisa, sturi yamni bîla wali daukras ba mita, Gâd kupia lâka kat witin nani ra baku takaia kan.
9Sakuna man nani sika kiamka kumi bâk saki brin ba, king prîska nani ba, nisan holikira kum,#Imp St 19.5-6; Ais 43.20; 2 Mac 2.17. Gâd uplika nani pali.#Imp St 19.5; Kli S 4.20; 7.6; 14.2; Tai 2.14. Bara baha ba baku sa, man nani bui Gâd warkka aihkakira nani ba saki aisama dukiara,#Ais 43.21. witinka mita man nani tihmu tila wina saki, ai ingnika aihka painkira ra dimma wisi mai paiwan ba.#Ais 9.2. 10Blasi pali man nani ba Gâd uplika nani apia katma, kuna nanara lika, witin uplika nani sma; blasi pali upla kumi sin umpira mai kaikras kan, sakuna nanara lika, Gâd mita man nani ra umpira pali mai kaikisa.#Os 2.23.
Gâd dukia daukaia raya sa
11Laitwankira nani, man nani ra bik takisna, man nani naha tasba ra impapakra tringsar nani baku, wan wîna brinka nani wan sulka mapara aiklabi ba, dauki banhpara.#Law 119.19. 12Gâd ra kakaira apia nani tilara pain watauki bas. Baku, witin nani bui mampara man nani ba lâ sasauhkra nani baku damhra sâkbia ba ra, daukankam pain nani ba kaiki, Gâd ra mayuni kabia, witin bal tânkam dukiara mamkabi walbia yua ra.
13Dawan tâwan, upla mita wihta nani mangkan bani ra bawi bas: king ra, witin ba kau karnika tara brisa bamna, 14witinka mita sin wihta tara nani ba lâ sasauhkra nani ra klala yabia bara yamni dadaukra nani ra prana yabia wisi bliki ba. 15Kan Gâd lika want sa, man nani diara yamni ba daukma, diara lan âpu nani bara sins âpu nani bîla prakaia dukiara.
16Upla pri nani baku iwi bas; kuna pri lâmka ba wal saura lâka pura prakaia lika yus munpara. Sakuna Gâd napakanka nani baku iwi bas. 17Upla sut ra kulki bas. Wan muihni nani ra latwan kaiks, Gâd ra sibrin bri banhwi bas, bara king ra sin kulki bas.
Kraist pât wahwanka tânka kat iwi kaia ba
18Man nani dukia dadaukra nani, dawankam nani ra kulki bawi bas; pain bara diara tânka kat kaiki nani ra baman lika apia, sakuna saura nani ba ra sin. 19Kan upla kum Gâd ra latwan kaiki ba tâwan, lâ watawi nani mita pât nani yabi ba, ban bapi bûi wahwisa kaka, Gâd bui yamni munbia. 20Kan man nani diara kum saura daukisma ba tâwan, klala maikisa bara baha ba ban bapi bûi wahwisma kaka, ¿dîa mana brima ki? Sakuna diara kum yamni daukram tâwan ban bapi mita pât wahwisma kaka, baha ba pain sa Gâd mawanra. 21Bamna Gâd bui man nani naha dukiara mai paiwan sa; kan Kraist lika man nani dukiamra pât wahwan, bara witin daukan baku daukma wisi ai lâka ba sin maikan, ai mina wapanka nani nina blîkma dukiara. 22Kraist ba saurka kumi sin daukras; upla kumi ra sin kunin munras kan.#Ais 53.9. 23Witin ra lahtubi kan ba ra, pana lahtuban kumi sin aisaras kata; pât nani yaban wahwi kan ba ra, pana witin mita saura munaia wiras kata, sakuna ai tânka nani ba Gâd mihta ra mangki kan, witinka kasakka lâka kat lâ dauki ba.#Ais 53.7. 24Kraist mita ai wîna tara ra wan saurka nani twilkan dus prihni purara, bara baku yawan sip kabia wan saurka nani mapara pruaia bara kasakka lâka ra iwi kaia. Witin ai wîna ra insauhkan ba mita, man nani sut mai rakan sa.#Ais 53.5. 25Kan man nani pas piua sîp aimawahkan nani baku tauki kapram,#Ais 53.6. sakuna nanara kli Kraist ra tawi balram, bara witinka sika sepad baku tâm brisa bara sulkam nani sin main kaikisa.
Currently Selected:
1 Pita 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua