1 King Nani TÂ BÎLA NANI
TÂ BÎLA NANI
Naha wauhkataya ba king nani sturka ulban sa, king Debit yua nani ra ai kingka lâka asla bri ba, witin almuk pat pruaia baila kan, bara ai watlika ra Salaman ba mangkan. (1.1—2.12), witin king aimaki kan ba yua nani ra tara pâwan kan (2.13—11.43). Ai tasbaya piarkika ban tasba wala kat wan. Salaman yuyaka bara sinska lâka ba tasba aiska ra upla nani ba walan. Salaman pas Israel ra diara papaskra kan; tawan nani ba kli paski bara karna dauki kata, king watla ba bukan bara ris briaia pliska wan mihta warkka paskaia ba, Jerusalem tempelka watla ba.
Debit ra takan ba baku âiulbra painkira ba, Salaman ra tara yamni kaikan dîa daukan ba, ai swapnika sin brin mairin nani wal, aidul sin paskan. Tnata ra ai king lâka ba kauhan, ba mita king tasbaya ba baiki sakan. Baha ba ulban sa wauhkataya wala ra (12.1—22.53). Aisanka ba, naha piua kat, dakni wâl pâwanka dukiara aisisa: waupasa tani ba, Israel luhpia nani kingka pâwi kan, yahbra tani ba lika, Juda kingka bahara kan.
Sturi aisanka bâk wan marikisa, yahbra tani kingka lâka ba, kau Dawan yabalka wina kauhi auya kan. Waupasa tani kingka lâka ba kasak kan, sakuna king lukras nani kira prawan, sakuna daukanka smalkanka ba lika wal baku kan.
Nisan nani pâwanka ba sika, king nani Gâd ra sibrin bri kasak luki ba mita kata. Bara aidul lâka ba, bîla walras nani ba tâka mita klala, sauhki tikan lâka ba bri balisa. Naha piua ra, iwanka kum uba trabil ailal bâra kan, diara nani manis sins taki kan, sakuna baha piua ra prapit nani bal aisi smalkan; king nani Dawan wina laihura wan ba, bara Israel luhpia nani sin; naha nani ba yan Dawan Gâd kat mayunan.
Naha wauhkataya ra prapit kum kau tara dahra aisi ba sika, Ilayas, witin ba Baal dahra aisasarika smalkanka nani mapara kan.
Currently Selected:
1 King Nani TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua