1 King Nani 3
3
Salaman ba king fero luhpia mairin wal marit takisa
1Bamna Salaman Idsip kingka, king fero wal ai uplika pali takan. Ban sin king fero luhpia mairin ai maya brin, bara Debit Tawanka ra bri balan, baha piua ra witin ai watla ba paski tnata alki kan, Dawan watla bara Jerusalem tawan tnaya kutbanka ba sin. 2Ban sakuna, baha piua ra upla nani lika il nani ra sakripais dauki kan idan nani ai pura suni kan pliska nani ra, kan baha piua nani ra Dawan tempelka kumi sin kau paskras kan.
Salaman sins lâka Dawan ra makabisa
(2 Kr 1.1-13)
3Baha sut purkara Salaman Dawan ra latwan kaiki kan, Debit ai papika mita lâ nani mangki yan ba kat wapi kan. Witin sakripais daukaia ai brinka kan, kîa pain sin angki kan il nani ra. 4Ba purkara witin sin Gabaón ra wi kan sakripais daukaia, pliska ba tânka tara kulki kan ba mita, plis wala nani wal kau purara; bahara aiska angkan sakripaiska nani 1,000 dauki kan.
5Bara Gabaón ra tihmia kumi yaprisauhkan ra Dawan Salaman ra latan takan, bara win: “Dîa want sma ba makas, bara yang maikamna.”
6Bara Salaman bui win: “Man bui albikam aisiki Debit ra kupia yamni lâka tara pali daukram, kan witin lika man mamwanra pain tauki kan kasakka lâka ba kat, ai kupia sin wapnikira pali. Bara man bui ban yamni main kaiki brisatma, witin ai luhpia kumi ai king iwaika ra iwaia naiwa yua ra taki ba baku. 7Bara nanara, Dawan Gâdki, man mita papiki Debit watlika ra king kamna wisi ai mangkram. Bara yang na kau wahma sna, bamna yang tâinka pain briras nahki taki waia bara kli bal dimaia sna ba. 8Bamna man albikam na, uplikam nani wahbi sakram ba lila kat sna, upla daknika tara pali sa: upla ailal pali ba mita sip sin kulki sakaia tânka âpu sa. 9Baku bamna, aik kupi ra sins lâka, bara baku lika sip kamna tâ briaia uplikam lâka wapni kat aisi dauki kaia, saura yamni ba tânka pain bri kaia. ¿Bamna uplikam nani ailal pali na ya sip kabia ki tâ briaia?”
10Bamna naha diara Salaman makaban ba, Dawan bui pain kaikan, 11bara Gâd bui pana win: “Naha diara makabram bamna, man makabras kapram rayakam yua nani yari briaia, yuyaka ailal briaia, waihlam nani âpu daukaia dukiara, sakuna man makabram sins lâka, tânkira lâ dauki kaia dukiara. 12Bara kaiks, yang lika man bîlam nani kat daukamna. Bamna kaiks, yang kupia sinskira lâka ba maikuna, diara sut tânka pain bri kaia, bara man baku wala kainamra âpu kan, bara ningkamra sin âpu kabia. 13Bara sin man bui diara nani makabras kapram dukia nani ba sut maikuna, yuyaka manis briaia lâka bara prana lâka sin. Baku bamna man yuam nani sut ra, king wala âpu kabia man baku. 14Bamna man kupi lâka daukma kaka, yang lâika bara lâika bîla nani kat daukma kaka papikam Debit tauki kan baku, yang yuam nani ba sin yari maikamna.”
15Bamna Salaman yapi si kupia krawan buan, bara ai dahra walan baha ba yaprisauhkan kata. Bara witin Jerusalem ra bal Dawan lâka auhbaia watla ba mawanra buan, bara kli wal wan uplika takaia bara aiska angkan ba daukan, ai albika nani sut dukiara pata tara kum sin daukan, sakripaiska kîa yamni ba daukan. Baha ningkara ai albika nani sut dukiara plun tara kum sin daukan.
Salaman, sinskira lâ dadaukra ba
16Baha piua ra rug mairin wâl balan, bara witin nani wâlsut king mawanra buan. 17Bara mairka kumi ba bui naku win:
—¡Ay, kingki tara! Naha mairka na yang wal utla kumi ra takaskisna, bara yang lika witin wal utla kumi ra katna piua ra luhpa kum briri. 18Yang luhpa baikri yu yumhpa ningkara, witin na sin luhpa kum baikan. Yang nani wâl asla ban takaskisna, upla tringsar wala kum watla ba ra âpu sa, yang nani wâl na baman utla ba ra sna. 19Bara tihmia kumi ra naha mairka luhpia waitna bibi lupia ba pruan, witin bui ai luhpia ba taibi ikan. 20Bara tihmia wâl bakriki, witin mita yang albikam yapi kapri, luhpi raya kata ba tnaya wina saki witin ai tnaya ra laki swin, witin ai luhpia pruan kata ba yang tnaiya ra tnikan. 21Bara yu baiwaia lama buri luhpi ra tiala dakakaia, bara kaikri pruan kan, sakuna titan kaikri baha ba yang luhpi apia kan, yang baikri ba tuktika apia kan.
22Bara mairka wala ba bila:
—Apia, raya ba sika yang luhpi bara pruan ba lika man luhpiam sa.
Bamna wala bui kli pana win:
—Apia, pruan ba lika man luhpiam bara raya ba lika yang luhpi sa.
Baku witin nani pana pana king mawanra aisi kan. 23Bamna king mita mahka luki kan: “Naha bila wisa raya ba sika witin luhpia, bara pruan ba lika mairka wala ba luhpia; ¡sakuna wala ba lika tânka wala pali aisa!” 24Bara king mita win:
—¡Man nani sord kum sal aik!
Witin nani sord kum king ra bri si yan ba ra, 25king ba win:
—Tukta raya ba klaki lilak baiki sâks, bara pîs kum ba kumi ra yas, pîska wala ba wala ra yas.
26Bara tukta raya yaptika pali ba sari takan ai luhpia ba dukiara, bara king ra makaban:
—¡Du pali! ¡Kingki tara, tukta raya ba ikpara! ¡Kau pain kabia naha mairka ra yama kaka!
Sakuna mairka wala ba bila:
—Apia, aitani sa baku daukan kaia, yang duki apia, man dukiam sin apia. ¡Klaki baiks!
27Bamna king bui pana aisi, win:
—Tukta raya ba mairka na ra yas. Iki banhpara, kan witin ba sika yaptika pali ba.
28Bara Israel aiska king lâ daukan ba walan, bara king ra sibrin taki banhwata, kan kaiki banhwan Gâd wina sinska lâka brin lâ kasak ba aisi daukaia dukiara.
Currently Selected:
1 King Nani 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua