ရှာန်လုကာ 23
23
အခန်း (၂၃)
ကိုယ်တော်ယေရှုတေ ပိလတ်ရှာန်းပလာန်ရှာပါ ကော်လာန်ပဲဘင်း
(ရှာန်မဿဲ ၂၇:၁-၂၊ ၁၁-၁၄။ ရှာန်မာကု ၁၅:၁-၅။ ရှာန်ယောဟန် ၁၈:၂၈-၃၈)
1စီးမှါခ့်ခါ တရားရုံးဘေ စုသဘန်းနင်းကြီးဘင်း သမီဆာတာတ်ကား ရဲဘန်း ကိုယ်တော်ယေရှုတေ ရှာန်းပလာန်ရှာပိလတ်ပါ ကော်လာန်ဘဲကြီးမှာ။ 2အန်ဘင်းဆိတ်တာတ်ကား “အဘင်းဆိတ်ကား အလေဘင်း တိုင်းသူပြေဆားတာတ်တေ ပက်သဘန်းနင်းမှာငှေါဘင်းနာတေ အလေကတုံန်ရီမှာ။ ဟိန်ကား ဧကရာဇ်ရှာန်းပလာန်တုံန်းတေ အခွန်အအီဒင် ငှေါဘန်း ဟိန်ကောက်ဟိန် မေရှိယရှာန်းပလာန် ဟော်ဝါထှာမှာညယ်ရီး ငှေါဘန်းနင်းမှာ” ညယ် ကိုယ်တော်ဒေ စသဘန်း စွပ်စွဲသကြီးမှာ။
3အမှာတွာတ် ပိလတ်ရှာန်းပလာန်ရီးဒါး ကိုယ်တော်ယေရှုတေ “နာန်ကား ဂျူးသမီဆာတာတ်ပင်း ရှာန်းပလာန်ချီလဲ” ညယ် စိန်ယူဘင်းအတွာတ် ကိုယ်တော်ရီးဒါး “နာန်ငှေါဘင်းအတိုင်း ထှာမှာ” ညယ် ဖြေသမှာ။
4အန်၌မှါခ့်ခါ ပိလတ်ရှာန်းပလာန်ရှာကား ဂျူးပုရောဟိတ်ဟလာန်းစါတ်တုံန်းတာတ်ယောက် သမီဆာတာတ်တေ “အဘင်းဆိတ်ပေ အပြစ်စားနူစားနာ ငါအကတုံန်ဝါး” ညယ် ငှေါမှာ။
5အန်နိမ်စါန်းငှေါဒီ အန်တာတ်ကား “အဘင်းဆိတ်ကား ဂါလိလဲပြေဟက်စသဘန်း ဂျေရုဆလင်မြို့ထုတ်ကွန်း ယုဒပြေတစ်ခွာမ်လုံးတေ ဟိန်ဟောသကာ ဆွောန်သကာဘင်းတေယောက် ကပြောင်းကပြန်ထှာကွန်း အွန်ဘန်းနင်းမှာ” ညယ် ငှေါကြီးမှာ။
ယေရှုတေ အုပ်ချုပ်သဘင်းဆိတ်ဟေရုဒ်မန်းပါ ကော်ရီဘင်းနာ
6အန်နိမ်ငှေါနင်းဘင်းနာဒေ ပိလတ်ရှာန်းပလာန်ရှာသက်ပူမှါခ့်ခါ “အဘင်းသမီဆာကား ဂါလိလဲပြေဆားရဲ” ညယ် စိန်ယူမှာ။ 7ကိုယ်တော်ယေရှုကား ဟေရုဒ်အုပ်ချုပ်သဘင်း ဂါလိလဲဟက်ငှေါဘင်းတေ မိန်းရှာတ်ခါမှါခ့်ခါ ဟိန်ကားကိုယ်တော်ဒေ ဟေရုဒ်ပါဆာတ်အာန်မှာ။ အန်ကားအချိန်ဘေ ဟေရုဒ်ကား ဂျေရုဆလင်မြို့ဘေ ထုတ်ပန်းနင်းမှာ။
8ဟေရုဒ်ကား ကိုယ်တော်ယေရှုအကြောင်းတေ သက်ပူဘန်း ကတုံန်ကာတ်ပန်းနင်းဘင်းနာကား မှါတ်နင်းဘင်းအတွာတ် ကိုယ်တော်ဒေ ကတုံန်မှါခ့်ခါ အကြီးကျယ်မွန်းမှာ။ ဟိန်ကား ကိုယ်တော်ယေရှု အွန်ဘင်း အံ့ဩသထာတ်မဲဘင်း နိမိတ်လက္ခဏာစားနူစားနာတေ ကတုံန်လူကွန်း ဒဲဘန်းနင်းမှာ။ 9အမှာတွာတ် ဟေရုဒ်ကား ကိုယ်တော်ဒေ မေးခွန်းတေကလောင်းတုံန်း စိန်ယူဒီဒါး ကိုယ်တော်ကား ဟမာန်ကစဲအငှေါဝါး။ 10စီးမှါခ့်ခါ ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား စပ်ပန်းနာ ကိုယ်တော်ဒေ အကြီးကျယ် စွပ်စွဲသကြီးမှာ။ 11ဟေရုဒ်ယောက် ဟိန်ဘင်းစစ်ဆားတာတ်ကား ကိုယ်တော်ဒေ နီးကြီးဘန်းနာ ကိုယ်တော်ဒေ ရှာန်းပလာန်တော်ဘင်း ပြာန်ဘင်းဆာန်ဆုန်တေ တော်အီစိန်းရာန်ဘန်း ပိလတ်ရှာန်းပလာန်ပါ ဆာတ်ခါန်းရာန်မှာ။ 12ဟေရုဒ်ယောက် ပိလတ်တာတ်ကား ဟလိန်းပါမှါခ့်ခါ ရန်သူတေထှာကြီးဒီဒါး အန်ဘင်းမာန်းရာတ်ပေ မိတ်ဆွေတေထှာကြီးရာန်မှာ။
ကိုယ်တော်ဒေရှီးဘင်းဒဏ်အီဘင်း
(ရှာန်မဿဲ ၂၇:၁၅-၂၆။ ရှာန်မာကု ၁၅:၆-၁၅။ ရှာန်ယောဟန် ၁၈:၃၉-၁၉:၁၆)
13ပိလတ်ရှာန်းပလာန်ရှာကား ဂျူးပုရောဟိတ်ဟလာန်းစါတ်တုံန်းတာတ်၊ ဂျူးသမီဆာ ဟလာန်းစါတ်တာတ်ယောက် သမီဆာကလောင်းတုံန်းတေဒေ စုသစိန်းဘန်း 14“အဘင်းဆိတ်ကား သမီဆာတေဒေ ကပြောင်းကပြန်ထှာကွန်း အွန်ဘင်းဆိတ်ညယ် ဟနိမ်ငှေါဘန်း ငါပါ ကော်ကြီးရီမှာ။ အန်နိမ်စါန်းငှေါဒီ ငါကား ဟနိမ်အားလုံးမန်းဘေ ဟိန်ဒေစစ်ဆေးသဒီဒါး ဟနိမ်ငှေါဘင်းအတိုင်း အဘင်းဆိတ်ပေ အပြစ်စားနူစားနာ အွန်ပဲဘင်းနာတေ အကတုံန်ငှါး။ 15ဟေရုဒ်ရီဒါး ဟိန်ဒေ အပြစ်သန်ဘန်း အကတုံန်ဘင်းအတွာတ် အလေပါ တာတ်ခါန်းရီလားထှာမှာ။ အဘင်းဆိတ်ကား ရှီးကွန်းအပြစ်အီထှာကူဘင်း အပြစ်စားနူစားနာဆဲ အအွန်ပဲရား။ 16အမှာတွာတ် ငါကား ဟိန်ဒေ ကြိမ်ဒဏ်အီဘန်း တာတ်နာန်ကူ” ညယ် ငှေါမှာ။ 17ပိလတ်အန်နိမ်ငှေါထှာဘင်းကား ပသခါပွဲတော်မာန်းရာတ်ပေ ထောင်အက်နင်းဘင်း သမီဆတာတ်နောင်းဟက် ဟော်ဝါဟော်ဝါတေ တာတ်အီထှာကူဘင်း ထုံးစံငှါဘင်းအတွာတ်ထှာမှာ။#23:17 အန်ဘင်းကျမ်းပိုဒ်တေ စယ်ယာဘင်း မူရင်းကျမ်းတေဘေ အရေးသပဲရား။
18အန်နိမ်စါန်းငှေါဒီ သမီဆာကလောင်းတုံန်းတာတ်ကား#23:18 သမီဆာကလောင်းတုံန်းငှေါဘင်းနာကား ဂျူးပုရောဟိတ် ဟလာန်းစါတ်တုံန်းတာတ် သမီဆတေဒေငှေါလားထှာမှာ။ “ဟိန်ဒေ သာန်းရှီးဘန်း အလေအတွာတ် ဗာရဗ္ဗတေတာတ်အီ” ညယ် ဟာတ်ပန်း ငှေါကြီးမှာ။ 19ဗာရဗ္ဗကား မြို့နောင်းဘေထှာရီဘင်း ပုန်ကန်သဘင်းအမှုယောက် သမီဆာသာန်းရှီးရီဘင်းအမှုဒေ အွန်နီဘင်းအတွာတ် ထောင်အက်ပန်းနင်းဘင်းဆိတ်ထှာမှာ။
20ပိလတ်ကား ကိုယ်တော်ယေရှုတေ တာတ်အီကာတ်ပင်းအတွာတ် သမီဆာကလောင်းတုံန်းတေ ပန်းနူစိန်ယူဟာန်းမှာ။ 21အန်နိမ်စါန်းငှေါဒီ အန်တာတ်ကား “ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်။ ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်” ညယ် ဆာတ်သဘန်း ဟာတ်ကြီးမှာ။
22အန်၌မှါခ့်ခါ ပိလတ်ရှာန်းပလာန်ကား “ဟိန်ကား ဟမာန်အမျိုးအပြစ်တေ အွန်ပတ်နီဒေ။ ဟိန်ဒေ ရှီးဘင်းဒဏ်အီလောက်သကွန်း အပြစ်တေ ငါအကတုံန်ငှါး။ အမှာတွာတ် ဟိန်ဒေ ကြိမ်ဒဏ်အီဘန်း တာတ်ခါန်းငါန်ကူ” ညယ် အန်တာတ်တေ တတိယအကြိမ် ထပ်သဘန်း ငှေါရာန်မှာ။
23အန်နိမ်စါန်းငှေါဒီ သမီဆာပရိတ်သတ်တာတ်ရီးဒါး ကိုယ်တော်ယေရှုတေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးဒင်တွာတ် အကြီးကျယ်ဟာတ်ပန်းနင်းဘင်းအတွာတ် နောက်ဆုံးဘေ အန်တာတ် နားရာန်မှာ။ 24စီးမှါခ့်ခါ သမီဆာပရိတ်သတ်တာတ် တောင်းဆိုသဘင်းအတိုင်း ပိလတ်ရှာန်းပလာန်ရီး အွန်အီတင်ဆုံးဖြတ်တာန်မှာ။ 25ဟိန်ကား သမီဆတာတ် တောင်းဆိုသဘင်းအတိုင်း ပုန်ကန်သဘင်းအမှုယောက် သမီဆာသာန်းရှီးရီဘင်းအမှုဒေ အွန်နီဘင်းအတွာတ် ထောင်အက်ပန်းနင်းဘင်း ဆိတ်တေ သာတ်အီရာန်ဘန်း ကိုယ်တော်ယေရှုတေ အန်တာတ်အလိုအတိုင်း အွန်ဒင် အန်တာတ်ပါ အီရာန်မှာ။
တာပ်ပါးကပ်ပင်းတိုင်ဘေတာန်သဘင်း
(ရှာန်မဿဲ ၂၇:၃၂-၄၄။ ရှာန်မာကု ၁၅:၂၁-၃၂။ ရှာန်ယောဟန် ၁၉:၁၇-၂၇)
26စစ်ဆားတာတ်ကား ကိုယ်တော်ဒေ ကော်လာန်ပဲမှါခ့်ခါ ကုရေနေမြို့ဆား ရှိမုန်ကော်ဘင်းဆိတ်ကား ထိန်ဟက် ဒီဟာန်းဘင်းနာတေ ကတုံန်မှါခ့်ခါ ဟိန်ဒေရင်ဘန်း ကိုယ်တော်ဟလိန်းဟက် တာပ်ပါးကပ်ပင်းတိုင်တေ ဖဲဘန်း ဒီရာတ်စိန်းယုတ်မှာ။ 27သမီဆာကလောင်းတုံန်းတာတ်ယောက်အတူတူ ကိုယ်တော်အတွာတ် အကြီးကျယ်အဆေင်အမဲငှါဘန်း ဟပ်နင်းကြီးဘင်း အီးရှီတာတ်ရီးဒါး ကိုယ်တော်ဟလိန်းဟက် ဒီရာတ်ကြီးမှာ။ 28အန်၌မှါခ့်ခါ ကိုယ်တော်ယေရှုကား အန်ဘင်းဆိတ်တာတ်ပါ လှည့်သဘန်း “ဂျေရုဆလင်ဟက် အီးရှီတာတ်၊ ငါအတွာတ် အဟပ်ကြီးဆာ။ ဟနိမ်ယောက် ဟနိမ်ဆာ ဆအိတ်တေ အတွာတ်၌ဆာ ဟပ်ကြီး။ 29ဟမာန်တွာတ်ငှေါဘန်းတာတ်ငှေါ ‘မြုံသနင်းဘင်းအီးရှီတာတ် အန်နိမ်အချီ ဟာ၌မှါခ့်ခါစဲ ရှရှာအပန်ပတ်ပင်းအီးရှီတာတ် အန်နိမ်အချီ ဟာ၌မှါခ့်ခါစဲ စုတ်ရှီအတိုက်သပတ်ပင်း အီးရှီတာတ်ကား မန်းအီလားခံသထှာဘင်းဆိတ်တာတ်ထှာမှာ’ ညယ် သမီဆာတာတ်ကား ငှေါကြီးကူဘင်းမန်းရာတ်ကား အမှါတ်ကြီ ထုတ်အီကူထှာမှာ။ 30အန်ဘင်းအချိန်ထုတ်ပန်းကား ကျမ်းကျိန်းဘေ ရေးသပဲဘင်းအတိုင်း
သမီဆာတာတ်ကား ကယာတေဒေ ‘အလေစောက်ပါ ပြိုသအက်ဆွန်နာန်’ ညယ် ငှေါကြီးဘန်း
ကယာရှာတေရီဒါး ‘အလေတေ အွပ်ပဲရာန်’ ညယ် ငှေါကြီးကူ။
31ဟမာန်တွာတ်ငှေါဘန်းတာတ်ငှေါ အန်တာတ်ကား စိမ်းသဘန်းနင်းနာန်ဘင်း ဖွန်းကလွုန်တေနိမ် အပြစ်အဘိုဘင်း ငါစောက်ပေဆဲ အန်နိမ်အွန်ဘန်းကား ကူးစာတ်ပင်း ဖွန်းကလွုန်တေနိမ် အပြစ်ဆားတေထှာကြီးဘင်း ဟနိမ်စောက်ပေ ဟာနယ်ထုတ် ပိုသောဆိုးဆိုးဝါးဝါး အွန်နာန်ကူသမား” ညယ် မိန့်သမှာ။
32တခြားရာဇဝတ်ဆား ကလိန်းဟူးရီးတေရီးဒါး ကိုယ်တော်ယောက်အတူတူ သာန်းရှီးဒင် ကော်ကြီးရီမှာ။ 33အန်တာတ်ကား ဟလာန်းအုတ်ခွံ ညယ်ကော်ဘင်း အရပ်ပေထုတ်မှါခ့်ခါ ကိုယ်တော်ယေရှုတေ တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်ယောက် သာန်းကြီးရာန်မှာ။ အန်တာတ်ကား ရာဇဝတ်ဆားကလိန်းဟူးဒေရီးဒါး ကိုယ်တော်ယေရှုဘင်း ညာပါဟော်ဝါ၊ ဘယ်ပါဟော်ဝါ တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်ယောက် သာန်းကြီးရာန်မှာ။ 34အန်၌မှါခ့်ခါ ကိုယ်တော်ယေရှုကား “အဝါဘုရားရှာန်၊ အန်တာတ်ကား အန်တာတ်အွန်နင်းဘင်းနာတေ အမိန်းရှာတ်ခါကြီးဘင်းအတွာတ် အန်တာတ်တေ ခွာမ်းလွှတ်သအီယုတ်” ညယ် ဆုစိန်မှာ။#23:34 အရာန်ရေးဒီဘင်း အန်ဘင်းကျမ်းကျိန်းကား ကျမ်းကျိန်းစယ်ယာဘေကား အပါသဝါး။ စီးမှါခ့်ခါ စစ်ဆားတာတ်ကား ကိုယ်တော်ဆာန်ဆုန်တေဒေ မဲနုတ်ပန်း မံဘန်းလာကြီးမှာ။#မ၊ ၂၇:၃၅။ မာ၊ ၁၅:၂၄။ ယော၊ ၁၉:၂၄
35သမီဆာကလောင်းတုံန်းကား အန်ပိုက်ပေစပ်ပန်း ယူနင်းကြီးဘန်းနာ ဂျူးသမီဆာ ဟလာန်းစါတ်တာတ်ရီးဒါး ကိုယ်တော်ဒေ နီးဘန်း “အန်ဘင်းဆိတ်ကား သမီတေဒေ ကယ်တာန်ဒီမှာ။ ဟိန်ကား ဘုရားရှာန်မယ်ပဲဘင်း မေရှိယချီဘန်းကား ဟိန်ကောက်ဟိန်ကာ ကယ်တာန်သစိန်း” ညယ် ငှေါကြီးမှာ။
36စစ်ဆားတာတ်ရီးဒါး ကိုယ်တော်ဒေ နီးကြီးဘန်းနာ ကိုယ်တော်ပါဒီဘန်း ချည်းဘင်းစပျစ်ဝိုင်ဒေ#23:36 ချည်းဘင်းစပျစ်ဝိုင်ငှေါဘင်းကား ချည်းဘင်းဝလဲစားနူထှာမှာ။ ကနာဘင်းဒေ ဆာတ်ဆာသစိန်းဒင် နပ်ကြီးမှာ။ ယုဒသန်ကျမ်းဘေ ပုံးရေညယ် ကာပဲမှာ။ အူစိန်းယုတ်မှာ။
37အန်တာတ်ကား ကိုယ်တော်ဒေ “နာန်ကား ဂျူးသမီဆာတာတ်ပင်းရှာန်းပလာန် ချီဘန်းကား နာန်ကောက်နာန် ကယ်တာန်ဒါန်” ညယ် ငှေါကြီးမှာ။ 38ကိုယ်တော်ဟလာန်းစောက်ပေရီး “အဘင်းဆိတ်ကား ဂျူးတာတ်ရှာန်းပလာန်ထှာမှာ” ညယ် ရေးသပဲဘင်း ဆိုင်းဘုတ်တေ ဝယ်ပဲမှာ။
39တာပ်ပါးကပ်ပင်းတိုင်စောက်ပေ ဝယ်ပဲလားခံသထှာဘင်း ရာဇဝတ်ဆား ကလိန်းဟူးနောင်းဟက် ဟော်ဝါကား ကိုယ်တော်ဒေ “နာန်ကား မေရှိယအချီရားရဲ။ မေရှိယအရှာန်ထှာဘန်းကား နာန်ကောက်နာန် ကယ်သဘန်း အလေတေရီဒါး ကယ်သောအီ” ညယ် စော်ကားသဘန်းနာငှေါမှာ။
40အန်နိမ်စါန်းငှေါဒီ နောက်ရာဇဝတ်ဆားဟော်ဝါကား အန်ဘင်းဆိတ်တေ “နာန်ကား အဘင်းဆိတ်နိမ် ပြစ်ဒဏ်ခံသနင်းထှာဘင်းဆဲ ဘုရားရှာန်ဒေ အစာတ်နွန်းရဲ။ 41အလေကား အလေအွန်နီပတ်ပင်း အမဲဘင်းအပြစ်တေအတွာတ် အရာတ်နိမ် အပြစ်ဒဏ်ခံသထှာဘင်းနာ ထိုက်တန်သမှာ။ အန်နိမ်စါန်းငှေါဒီ အဘင်းဆိတ်ကား ဟာဘင်းအပြစ်စဲ အအွန်နီရား” ညယ် တင်းမှာ။
42စီးမှါခ့်ခါ ဟိန်ကား ကိုယ်တော်ယေရှုတေ “ကိုယ်တော်ယေရှု နာန်ကား ရှာန်းပလာန်ဟော်ဝါနိမ် အုပ်စိုးသကူညယ်ဒီမှါခ့်ခါ ငါတေ ဆတီးလူ” ညယ် လျှောက်တာန်သမှာ။
43အန်၌မှါခ့်ခါ ကိုယ်တော်ယေရှုရီးဒါး “နာန်တေ ငါချီလားငှေါကူ။ နာန်ကား အရာတ်မှါတ်မာန်းရာတ်ပေစဲ ငါယောက်အတူတူ ပရဒိသုဘုံဘေငှါနင်းကူ#23:43 ပရဒိသုဘုံငှေါဘင်းကား ဖြောင့်မတ်သဘင်းဆိတ်တာတ်ကား အဆာတ်စားဟာန်းဘင်းယောက် နောက်ဆုံး တရားစီရာန်သဘင်းတေ ဒဲဘန်းနင်းဘင်း ငြိမ်းချမ်းသဘင်း နေရာထှာမှာ။” ညယ် ကတိအီမှာ။
ကိုယ်တော်အဆာတ်စွန့်သဘင်း
(ရှာန်မဿဲ ၂၇:၄၅-၅၆။ ရှာန်မာကု ၁၅:၃၃-၄၁။ ရှာန်ယောဟန် ၁၉:၂၈-၃၀)
44အန်ဘင်းအချိန်ကား မွန်းတည့်သဘင်းအချိန် ထှာဘန်း အန်ဘင်းအချိန်ဟက်စသဘန်း သုံးနာရီထုတ်ကွန်း တစ်တိုင်ပြေလုံးရီးဒါး ထာန်ဘန်းနင်းနာန်မှာ။ 45စမိတ်အရောင်ရီးဒါး ကယာရာန်ဘန်း ဗိမာန်တော်နောင်းဘေငှါဘင်း ကန့်လန့်ကာတုံန်းရီးဒါး#23:45 အန်ဘင်းကန့်လန့်ကာကား မြင့်မြတ်သဘင်းနေရာယောက် အမြင့်မြတ်ဆုံးထှာဘင်း နေရာကြားဘေ ကာသဘန်းပဲဘင်း အကြီးကျယ်တုံန်းဘန်း ထယ်ဘင်း ကန့်လန့်ကာထှာမှာ။ ဘလမ်းဟက် ဆိုက်အာန်မှာ။ 46ကိုယ်တော်ရီးဒါး ဆကလားဝါတ်ဆလာတ်တုံန်းယောက် “အဝါဘုရားရှာန်၊ ငါဝိညာဉ်တေ အရှာန်ဘင်းသဟူးနောင်းဘေ အပ်သမှာ” ညယ် မိန့်သမှာ။ အန်နိမ်မိန့်သစီးမှါခ့်ခါ ကိုယ်တော်ကား အဆာတ်တေ စွန့်တော်မူသမှာ။
47အန်ဘင်းထှာဘင်းတေဒေ ကတုံန်ဘင်း ရောမတပ်မှူးကား ဘုရားရှာန်ဒေ ချီးမွမ်းသဘန်း “အဘင်းဆိတ်ကား အဟုတ်မလပ် ဖြောင့်မတ်သဘင်းဆိတ်ထှာမှာ” ညယ် ငှေါမှာ။ 48အန်ဘင်းမြင်ကွင်းတေ ယူဒင် ဒီကြီးဘင်း သမီဆာတာတ်ကား အန်ဘင်းထှာရာန်ဘင်းတေ ကတုံန်မှါခ့်ခါ အကြီးကျယ်အဆေင်အမဲငှါဘန်းနာ ရင်ဘတ်တုံန်းတေထုသကြီးဘန်းနာ ကျေမ်းပါလာန်ဟာန်းကြီးမှာ။ 49အန်နိမ်စါန်းငှေါဒီ ဂါလိလဲပြေဟက် ကိုယ်တော်ဟလိန်းဘေ ဒီရာတ်ပင်း အီရှီတာတ်ယောက် ကိုယ်တော်ဒေ ရင်းနှီးသကြီးဘင်း သမီဆတာတ်ကား လမ်းစာလာဟက် စပ်ပန်း ယူနင်းကြီးမှာ။
ကိုယ်တော်ယေရှုဒေဂူဆွာန်းသဘင်း
(ရှာန်မဿဲ ၂၇:၅၇-၆၁။ ရှာန်မာကု ၁၅:၄၂-၄၇။ ရှာန်ယောဟန် ၁၉:၃၈-၄၂)
50အန်ကားအချိန်ဘေ တရားလွှတ်တော်အဖွဲ့ဝင်ထှာဘင်း ယောသပ်ညယ်ကော်ဘင်း ဖြောင့်မတ်သဘင်းဆိတ်ဟော်ဝါကား အန်ဘင်းနေရာဘေ ငှါဘန်းနင်းမှာ။ 51ဟိန်ကား ကိုယ်တော်ယေရှုစောက်ပေ တခြားလွှတ်တော်အဖွဲ့ဝင်တာတ် အွန်နီဘင်း ဆုံးဖြတ်ချက်တေဒေ သဘောအတူဒီရား။ ဟိန်ကား ယုဒပြေ အရိမဿဲမြို့ဟက် ဒီဘင်းဆိတ်ထှာဘန်း ဘုရားရှာန်ဘင်းသာသနာတော်ဒေ ဒဲဘန်းနင်းဘင်းဆိတ်ရီးထှာမှာ။ 52ဟိန်ကား ကိုယ်တော်အလောင်းတေ ဂူဆွာန်းသဒင် ပိလတ်ရှာန်းပလာန်ရှာဘေ စိန်မှါခ့်ခါ ပိလတ်ရီးဒါး ခွာမ်းအီရာန်မှာ။ 53အမှာတွာတ် ဟိန်ကား ကိုယ်တော်လာန်တေ တာပ်ပါးကပ်ပင်း တိုင်စောက်ဟက် ချသဘန်း မဲဘင်းပိတ်စယောက် ပတ်တာန်မှာ။ စီးမှါခ့်ခါ လုံးကရှီကယာဒေ ထွာမ်းသပဲဘင်း ဟာဟမဲဆဲ ဂူအဆွာန်းသလူနွန်းဘင်း ဆာန်းကျိုင်းဂူ နယားနောင်းဘေ ကိုယ်တော်ဘင်းအလောင်းတေ ပဲမှာ။ 54အန်ဘင်းမာန်းရာတ်ကား ပြာန်ဆာန်သထှာဘင်း မာန်းရာတ်ထှာဘန်း#23:54 ပြာန်ဆာန်သထှာဘင်း မာန်းရာတ်ငှေါဘင်းနာကား ဥပုသ်မာန်းရာတ်အထုတ်ကြီ အဖိတ်နေ့ထှာမှာ။ ဥပုသ်မာန်းရာတ်ယောက် ထုတ်ထံဘင်းအချိန်ထှာမှာ။
55ဂါလိလဲပြေဟက် ကိုယ်တော်ဟလိန်းဘေ ဒီရာတ်ပင်း အီရှီတာတ်ကား ယောသပ်ဟလိန်းပါ ဒီရာတ်ကြီးဘန်း ဆာန်းကျိုင်းဂူယောက် ကိုယ်တော်ဘင်း အလောင်းဒေ ဟာနိမ်ပဲမှာငှေါဘင်းတေ ကတုံန်ကြီးရီမှာ။ 56စီးမှါခ့်ခါ အန်တာတ်ကား ကျေမ်းပါလာန်ဟာန်းဘန်း ကိုယ်တော်ဘင်း အလောင်းဒေ ပူဇော်သဒင် သွန်းဘင်းဆလောတေယောက် အမွှေးနံ့သာတေဒေ ပြာန်ဆာန်သပဲကြီးမှာ။ အန်နိမ်စါန်းငှေါဒီ အန်တာတ်ကား ပညတ်တော်အတိုင်း ဥပုသ်မာန်းရာတ်ပေ အနားလာကြီးမှာ။
Currently Selected:
ရှာန်လုကာ 23: ZKD
Highlight
Share
Copy
Want to have your highlights saved across all your devices? Sign up or sign in
Kadu Bible by Beyond Translation is licensed under Creative Commons Attribution-ShareAlike 4.0 License.
ရှာန်လုကာ 23
23
အခန်း (၂၃)
ကိုယ်တော်ယေရှုတေ ပိလတ်ရှာန်းပလာန်ရှာပါ ကော်လာန်ပဲဘင်း
(ရှာန်မဿဲ ၂၇:၁-၂၊ ၁၁-၁၄။ ရှာန်မာကု ၁၅:၁-၅။ ရှာန်ယောဟန် ၁၈:၂၈-၃၈)
1စီးမှါခ့်ခါ တရားရုံးဘေ စုသဘန်းနင်းကြီးဘင်း သမီဆာတာတ်ကား ရဲဘန်း ကိုယ်တော်ယေရှုတေ ရှာန်းပလာန်ရှာပိလတ်ပါ ကော်လာန်ဘဲကြီးမှာ။ 2အန်ဘင်းဆိတ်တာတ်ကား “အဘင်းဆိတ်ကား အလေဘင်း တိုင်းသူပြေဆားတာတ်တေ ပက်သဘန်းနင်းမှာငှေါဘင်းနာတေ အလေကတုံန်ရီမှာ။ ဟိန်ကား ဧကရာဇ်ရှာန်းပလာန်တုံန်းတေ အခွန်အအီဒင် ငှေါဘန်း ဟိန်ကောက်ဟိန် မေရှိယရှာန်းပလာန် ဟော်ဝါထှာမှာညယ်ရီး ငှေါဘန်းနင်းမှာ” ညယ် ကိုယ်တော်ဒေ စသဘန်း စွပ်စွဲသကြီးမှာ။
3အမှာတွာတ် ပိလတ်ရှာန်းပလာန်ရီးဒါး ကိုယ်တော်ယေရှုတေ “နာန်ကား ဂျူးသမီဆာတာတ်ပင်း ရှာန်းပလာန်ချီလဲ” ညယ် စိန်ယူဘင်းအတွာတ် ကိုယ်တော်ရီးဒါး “နာန်ငှေါဘင်းအတိုင်း ထှာမှာ” ညယ် ဖြေသမှာ။
4အန်၌မှါခ့်ခါ ပိလတ်ရှာန်းပလာန်ရှာကား ဂျူးပုရောဟိတ်ဟလာန်းစါတ်တုံန်းတာတ်ယောက် သမီဆာတာတ်တေ “အဘင်းဆိတ်ပေ အပြစ်စားနူစားနာ ငါအကတုံန်ဝါး” ညယ် ငှေါမှာ။
5အန်နိမ်စါန်းငှေါဒီ အန်တာတ်ကား “အဘင်းဆိတ်ကား ဂါလိလဲပြေဟက်စသဘန်း ဂျေရုဆလင်မြို့ထုတ်ကွန်း ယုဒပြေတစ်ခွာမ်လုံးတေ ဟိန်ဟောသကာ ဆွောန်သကာဘင်းတေယောက် ကပြောင်းကပြန်ထှာကွန်း အွန်ဘန်းနင်းမှာ” ညယ် ငှေါကြီးမှာ။
ယေရှုတေ အုပ်ချုပ်သဘင်းဆိတ်ဟေရုဒ်မန်းပါ ကော်ရီဘင်းနာ
6အန်နိမ်ငှေါနင်းဘင်းနာဒေ ပိလတ်ရှာန်းပလာန်ရှာသက်ပူမှါခ့်ခါ “အဘင်းသမီဆာကား ဂါလိလဲပြေဆားရဲ” ညယ် စိန်ယူမှာ။ 7ကိုယ်တော်ယေရှုကား ဟေရုဒ်အုပ်ချုပ်သဘင်း ဂါလိလဲဟက်ငှေါဘင်းတေ မိန်းရှာတ်ခါမှါခ့်ခါ ဟိန်ကားကိုယ်တော်ဒေ ဟေရုဒ်ပါဆာတ်အာန်မှာ။ အန်ကားအချိန်ဘေ ဟေရုဒ်ကား ဂျေရုဆလင်မြို့ဘေ ထုတ်ပန်းနင်းမှာ။
8ဟေရုဒ်ကား ကိုယ်တော်ယေရှုအကြောင်းတေ သက်ပူဘန်း ကတုံန်ကာတ်ပန်းနင်းဘင်းနာကား မှါတ်နင်းဘင်းအတွာတ် ကိုယ်တော်ဒေ ကတုံန်မှါခ့်ခါ အကြီးကျယ်မွန်းမှာ။ ဟိန်ကား ကိုယ်တော်ယေရှု အွန်ဘင်း အံ့ဩသထာတ်မဲဘင်း နိမိတ်လက္ခဏာစားနူစားနာတေ ကတုံန်လူကွန်း ဒဲဘန်းနင်းမှာ။ 9အမှာတွာတ် ဟေရုဒ်ကား ကိုယ်တော်ဒေ မေးခွန်းတေကလောင်းတုံန်း စိန်ယူဒီဒါး ကိုယ်တော်ကား ဟမာန်ကစဲအငှေါဝါး။ 10စီးမှါခ့်ခါ ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား စပ်ပန်းနာ ကိုယ်တော်ဒေ အကြီးကျယ် စွပ်စွဲသကြီးမှာ။ 11ဟေရုဒ်ယောက် ဟိန်ဘင်းစစ်ဆားတာတ်ကား ကိုယ်တော်ဒေ နီးကြီးဘန်းနာ ကိုယ်တော်ဒေ ရှာန်းပလာန်တော်ဘင်း ပြာန်ဘင်းဆာန်ဆုန်တေ တော်အီစိန်းရာန်ဘန်း ပိလတ်ရှာန်းပလာန်ပါ ဆာတ်ခါန်းရာန်မှာ။ 12ဟေရုဒ်ယောက် ပိလတ်တာတ်ကား ဟလိန်းပါမှါခ့်ခါ ရန်သူတေထှာကြီးဒီဒါး အန်ဘင်းမာန်းရာတ်ပေ မိတ်ဆွေတေထှာကြီးရာန်မှာ။
ကိုယ်တော်ဒေရှီးဘင်းဒဏ်အီဘင်း
(ရှာန်မဿဲ ၂၇:၁၅-၂၆။ ရှာန်မာကု ၁၅:၆-၁၅။ ရှာန်ယောဟန် ၁၈:၃၉-၁၉:၁၆)
13ပိလတ်ရှာန်းပလာန်ရှာကား ဂျူးပုရောဟိတ်ဟလာန်းစါတ်တုံန်းတာတ်၊ ဂျူးသမီဆာ ဟလာန်းစါတ်တာတ်ယောက် သမီဆာကလောင်းတုံန်းတေဒေ စုသစိန်းဘန်း 14“အဘင်းဆိတ်ကား သမီဆာတေဒေ ကပြောင်းကပြန်ထှာကွန်း အွန်ဘင်းဆိတ်ညယ် ဟနိမ်ငှေါဘန်း ငါပါ ကော်ကြီးရီမှာ။ အန်နိမ်စါန်းငှေါဒီ ငါကား ဟနိမ်အားလုံးမန်းဘေ ဟိန်ဒေစစ်ဆေးသဒီဒါး ဟနိမ်ငှေါဘင်းအတိုင်း အဘင်းဆိတ်ပေ အပြစ်စားနူစားနာ အွန်ပဲဘင်းနာတေ အကတုံန်ငှါး။ 15ဟေရုဒ်ရီဒါး ဟိန်ဒေ အပြစ်သန်ဘန်း အကတုံန်ဘင်းအတွာတ် အလေပါ တာတ်ခါန်းရီလားထှာမှာ။ အဘင်းဆိတ်ကား ရှီးကွန်းအပြစ်အီထှာကူဘင်း အပြစ်စားနူစားနာဆဲ အအွန်ပဲရား။ 16အမှာတွာတ် ငါကား ဟိန်ဒေ ကြိမ်ဒဏ်အီဘန်း တာတ်နာန်ကူ” ညယ် ငှေါမှာ။ 17ပိလတ်အန်နိမ်ငှေါထှာဘင်းကား ပသခါပွဲတော်မာန်းရာတ်ပေ ထောင်အက်နင်းဘင်း သမီဆတာတ်နောင်းဟက် ဟော်ဝါဟော်ဝါတေ တာတ်အီထှာကူဘင်း ထုံးစံငှါဘင်းအတွာတ်ထှာမှာ။#23:17 အန်ဘင်းကျမ်းပိုဒ်တေ စယ်ယာဘင်း မူရင်းကျမ်းတေဘေ အရေးသပဲရား။
18အန်နိမ်စါန်းငှေါဒီ သမီဆာကလောင်းတုံန်းတာတ်ကား#23:18 သမီဆာကလောင်းတုံန်းငှေါဘင်းနာကား ဂျူးပုရောဟိတ် ဟလာန်းစါတ်တုံန်းတာတ် သမီဆတေဒေငှေါလားထှာမှာ။ “ဟိန်ဒေ သာန်းရှီးဘန်း အလေအတွာတ် ဗာရဗ္ဗတေတာတ်အီ” ညယ် ဟာတ်ပန်း ငှေါကြီးမှာ။ 19ဗာရဗ္ဗကား မြို့နောင်းဘေထှာရီဘင်း ပုန်ကန်သဘင်းအမှုယောက် သမီဆာသာန်းရှီးရီဘင်းအမှုဒေ အွန်နီဘင်းအတွာတ် ထောင်အက်ပန်းနင်းဘင်းဆိတ်ထှာမှာ။
20ပိလတ်ကား ကိုယ်တော်ယေရှုတေ တာတ်အီကာတ်ပင်းအတွာတ် သမီဆာကလောင်းတုံန်းတေ ပန်းနူစိန်ယူဟာန်းမှာ။ 21အန်နိမ်စါန်းငှေါဒီ အန်တာတ်ကား “ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်။ ဟိန်ဒေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးရာန်” ညယ် ဆာတ်သဘန်း ဟာတ်ကြီးမှာ။
22အန်၌မှါခ့်ခါ ပိလတ်ရှာန်းပလာန်ကား “ဟိန်ကား ဟမာန်အမျိုးအပြစ်တေ အွန်ပတ်နီဒေ။ ဟိန်ဒေ ရှီးဘင်းဒဏ်အီလောက်သကွန်း အပြစ်တေ ငါအကတုံန်ငှါး။ အမှာတွာတ် ဟိန်ဒေ ကြိမ်ဒဏ်အီဘန်း တာတ်ခါန်းငါန်ကူ” ညယ် အန်တာတ်တေ တတိယအကြိမ် ထပ်သဘန်း ငှေါရာန်မှာ။
23အန်နိမ်စါန်းငှေါဒီ သမီဆာပရိတ်သတ်တာတ်ရီးဒါး ကိုယ်တော်ယေရှုတေ တာပ်ပါးကပ်ပင်းတိုင်စောက်ပေ တာန်သဘန်း သာန်းရှီးဒင်တွာတ် အကြီးကျယ်ဟာတ်ပန်းနင်းဘင်းအတွာတ် နောက်ဆုံးဘေ အန်တာတ် နားရာန်မှာ။ 24စီးမှါခ့်ခါ သမီဆာပရိတ်သတ်တာတ် တောင်းဆိုသဘင်းအတိုင်း ပိလတ်ရှာန်းပလာန်ရီး အွန်အီတင်ဆုံးဖြတ်တာန်မှာ။ 25ဟိန်ကား သမီဆတာတ် တောင်းဆိုသဘင်းအတိုင်း ပုန်ကန်သဘင်းအမှုယောက် သမီဆာသာန်းရှီးရီဘင်းအမှုဒေ အွန်နီဘင်းအတွာတ် ထောင်အက်ပန်းနင်းဘင်း ဆိတ်တေ သာတ်အီရာန်ဘန်း ကိုယ်တော်ယေရှုတေ အန်တာတ်အလိုအတိုင်း အွန်ဒင် အန်တာတ်ပါ အီရာန်မှာ။
တာပ်ပါးကပ်ပင်းတိုင်ဘေတာန်သဘင်း
(ရှာန်မဿဲ ၂၇:၃၂-၄၄။ ရှာန်မာကု ၁၅:၂၁-၃၂။ ရှာန်ယောဟန် ၁၉:၁၇-၂၇)
26စစ်ဆားတာတ်ကား ကိုယ်တော်ဒေ ကော်လာန်ပဲမှါခ့်ခါ ကုရေနေမြို့ဆား ရှိမုန်ကော်ဘင်းဆိတ်ကား ထိန်ဟက် ဒီဟာန်းဘင်းနာတေ ကတုံန်မှါခ့်ခါ ဟိန်ဒေရင်ဘန်း ကိုယ်တော်ဟလိန်းဟက် တာပ်ပါးကပ်ပင်းတိုင်တေ ဖဲဘန်း ဒီရာတ်စိန်းယုတ်မှာ။ 27သမီဆာကလောင်းတုံန်းတာတ်ယောက်အတူတူ ကိုယ်တော်အတွာတ် အကြီးကျယ်အဆေင်အမဲငှါဘန်း ဟပ်နင်းကြီးဘင်း အီးရှီတာတ်ရီးဒါး ကိုယ်တော်ဟလိန်းဟက် ဒီရာတ်ကြီးမှာ။ 28အန်၌မှါခ့်ခါ ကိုယ်တော်ယေရှုကား အန်ဘင်းဆိတ်တာတ်ပါ လှည့်သဘန်း “ဂျေရုဆလင်ဟက် အီးရှီတာတ်၊ ငါအတွာတ် အဟပ်ကြီးဆာ။ ဟနိမ်ယောက် ဟနိမ်ဆာ ဆအိတ်တေ အတွာတ်၌ဆာ ဟပ်ကြီး။ 29ဟမာန်တွာတ်ငှေါဘန်းတာတ်ငှေါ ‘မြုံသနင်းဘင်းအီးရှီတာတ် အန်နိမ်အချီ ဟာ၌မှါခ့်ခါစဲ ရှရှာအပန်ပတ်ပင်းအီးရှီတာတ် အန်နိမ်အချီ ဟာ၌မှါခ့်ခါစဲ စုတ်ရှီအတိုက်သပတ်ပင်း အီးရှီတာတ်ကား မန်းအီလားခံသထှာဘင်းဆိတ်တာတ်ထှာမှာ’ ညယ် သမီဆာတာတ်ကား ငှေါကြီးကူဘင်းမန်းရာတ်ကား အမှါတ်ကြီ ထုတ်အီကူထှာမှာ။ 30အန်ဘင်းအချိန်ထုတ်ပန်းကား ကျမ်းကျိန်းဘေ ရေးသပဲဘင်းအတိုင်း
သမီဆာတာတ်ကား ကယာတေဒေ ‘အလေစောက်ပါ ပြိုသအက်ဆွန်နာန်’ ညယ် ငှေါကြီးဘန်း
ကယာရှာတေရီဒါး ‘အလေတေ အွပ်ပဲရာန်’ ညယ် ငှေါကြီးကူ။
31ဟမာန်တွာတ်ငှေါဘန်းတာတ်ငှေါ အန်တာတ်ကား စိမ်းသဘန်းနင်းနာန်ဘင်း ဖွန်းကလွုန်တေနိမ် အပြစ်အဘိုဘင်း ငါစောက်ပေဆဲ အန်နိမ်အွန်ဘန်းကား ကူးစာတ်ပင်း ဖွန်းကလွုန်တေနိမ် အပြစ်ဆားတေထှာကြီးဘင်း ဟနိမ်စောက်ပေ ဟာနယ်ထုတ် ပိုသောဆိုးဆိုးဝါးဝါး အွန်နာန်ကူသမား” ညယ် မိန့်သမှာ။
32တခြားရာဇဝတ်ဆား ကလိန်းဟူးရီးတေရီးဒါး ကိုယ်တော်ယောက်အတူတူ သာန်းရှီးဒင် ကော်ကြီးရီမှာ။ 33အန်တာတ်ကား ဟလာန်းအုတ်ခွံ ညယ်ကော်ဘင်း အရပ်ပေထုတ်မှါခ့်ခါ ကိုယ်တော်ယေရှုတေ တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်ယောက် သာန်းကြီးရာန်မှာ။ အန်တာတ်ကား ရာဇဝတ်ဆားကလိန်းဟူးဒေရီးဒါး ကိုယ်တော်ယေရှုဘင်း ညာပါဟော်ဝါ၊ ဘယ်ပါဟော်ဝါ တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်ယောက် သာန်းကြီးရာန်မှာ။ 34အန်၌မှါခ့်ခါ ကိုယ်တော်ယေရှုကား “အဝါဘုရားရှာန်၊ အန်တာတ်ကား အန်တာတ်အွန်နင်းဘင်းနာတေ အမိန်းရှာတ်ခါကြီးဘင်းအတွာတ် အန်တာတ်တေ ခွာမ်းလွှတ်သအီယုတ်” ညယ် ဆုစိန်မှာ။#23:34 အရာန်ရေးဒီဘင်း အန်ဘင်းကျမ်းကျိန်းကား ကျမ်းကျိန်းစယ်ယာဘေကား အပါသဝါး။ စီးမှါခ့်ခါ စစ်ဆားတာတ်ကား ကိုယ်တော်ဆာန်ဆုန်တေဒေ မဲနုတ်ပန်း မံဘန်းလာကြီးမှာ။#မ၊ ၂၇:၃၅။ မာ၊ ၁၅:၂၄။ ယော၊ ၁၉:၂၄
35သမီဆာကလောင်းတုံန်းကား အန်ပိုက်ပေစပ်ပန်း ယူနင်းကြီးဘန်းနာ ဂျူးသမီဆာ ဟလာန်းစါတ်တာတ်ရီးဒါး ကိုယ်တော်ဒေ နီးဘန်း “အန်ဘင်းဆိတ်ကား သမီတေဒေ ကယ်တာန်ဒီမှာ။ ဟိန်ကား ဘုရားရှာန်မယ်ပဲဘင်း မေရှိယချီဘန်းကား ဟိန်ကောက်ဟိန်ကာ ကယ်တာန်သစိန်း” ညယ် ငှေါကြီးမှာ။
36စစ်ဆားတာတ်ရီးဒါး ကိုယ်တော်ဒေ နီးကြီးဘန်းနာ ကိုယ်တော်ပါဒီဘန်း ချည်းဘင်းစပျစ်ဝိုင်ဒေ#23:36 ချည်းဘင်းစပျစ်ဝိုင်ငှေါဘင်းကား ချည်းဘင်းဝလဲစားနူထှာမှာ။ ကနာဘင်းဒေ ဆာတ်ဆာသစိန်းဒင် နပ်ကြီးမှာ။ ယုဒသန်ကျမ်းဘေ ပုံးရေညယ် ကာပဲမှာ။ အူစိန်းယုတ်မှာ။
37အန်တာတ်ကား ကိုယ်တော်ဒေ “နာန်ကား ဂျူးသမီဆာတာတ်ပင်းရှာန်းပလာန် ချီဘန်းကား နာန်ကောက်နာန် ကယ်တာန်ဒါန်” ညယ် ငှေါကြီးမှာ။ 38ကိုယ်တော်ဟလာန်းစောက်ပေရီး “အဘင်းဆိတ်ကား ဂျူးတာတ်ရှာန်းပလာန်ထှာမှာ” ညယ် ရေးသပဲဘင်း ဆိုင်းဘုတ်တေ ဝယ်ပဲမှာ။
39တာပ်ပါးကပ်ပင်းတိုင်စောက်ပေ ဝယ်ပဲလားခံသထှာဘင်း ရာဇဝတ်ဆား ကလိန်းဟူးနောင်းဟက် ဟော်ဝါကား ကိုယ်တော်ဒေ “နာန်ကား မေရှိယအချီရားရဲ။ မေရှိယအရှာန်ထှာဘန်းကား နာန်ကောက်နာန် ကယ်သဘန်း အလေတေရီဒါး ကယ်သောအီ” ညယ် စော်ကားသဘန်းနာငှေါမှာ။
40အန်နိမ်စါန်းငှေါဒီ နောက်ရာဇဝတ်ဆားဟော်ဝါကား အန်ဘင်းဆိတ်တေ “နာန်ကား အဘင်းဆိတ်နိမ် ပြစ်ဒဏ်ခံသနင်းထှာဘင်းဆဲ ဘုရားရှာန်ဒေ အစာတ်နွန်းရဲ။ 41အလေကား အလေအွန်နီပတ်ပင်း အမဲဘင်းအပြစ်တေအတွာတ် အရာတ်နိမ် အပြစ်ဒဏ်ခံသထှာဘင်းနာ ထိုက်တန်သမှာ။ အန်နိမ်စါန်းငှေါဒီ အဘင်းဆိတ်ကား ဟာဘင်းအပြစ်စဲ အအွန်နီရား” ညယ် တင်းမှာ။
42စီးမှါခ့်ခါ ဟိန်ကား ကိုယ်တော်ယေရှုတေ “ကိုယ်တော်ယေရှု နာန်ကား ရှာန်းပလာန်ဟော်ဝါနိမ် အုပ်စိုးသကူညယ်ဒီမှါခ့်ခါ ငါတေ ဆတီးလူ” ညယ် လျှောက်တာန်သမှာ။
43အန်၌မှါခ့်ခါ ကိုယ်တော်ယေရှုရီးဒါး “နာန်တေ ငါချီလားငှေါကူ။ နာန်ကား အရာတ်မှါတ်မာန်းရာတ်ပေစဲ ငါယောက်အတူတူ ပရဒိသုဘုံဘေငှါနင်းကူ#23:43 ပရဒိသုဘုံငှေါဘင်းကား ဖြောင့်မတ်သဘင်းဆိတ်တာတ်ကား အဆာတ်စားဟာန်းဘင်းယောက် နောက်ဆုံး တရားစီရာန်သဘင်းတေ ဒဲဘန်းနင်းဘင်း ငြိမ်းချမ်းသဘင်း နေရာထှာမှာ။” ညယ် ကတိအီမှာ။
ကိုယ်တော်အဆာတ်စွန့်သဘင်း
(ရှာန်မဿဲ ၂၇:၄၅-၅၆။ ရှာန်မာကု ၁၅:၃၃-၄၁။ ရှာန်ယောဟန် ၁၉:၂၈-၃၀)
44အန်ဘင်းအချိန်ကား မွန်းတည့်သဘင်းအချိန် ထှာဘန်း အန်ဘင်းအချိန်ဟက်စသဘန်း သုံးနာရီထုတ်ကွန်း တစ်တိုင်ပြေလုံးရီးဒါး ထာန်ဘန်းနင်းနာန်မှာ။ 45စမိတ်အရောင်ရီးဒါး ကယာရာန်ဘန်း ဗိမာန်တော်နောင်းဘေငှါဘင်း ကန့်လန့်ကာတုံန်းရီးဒါး#23:45 အန်ဘင်းကန့်လန့်ကာကား မြင့်မြတ်သဘင်းနေရာယောက် အမြင့်မြတ်ဆုံးထှာဘင်း နေရာကြားဘေ ကာသဘန်းပဲဘင်း အကြီးကျယ်တုံန်းဘန်း ထယ်ဘင်း ကန့်လန့်ကာထှာမှာ။ ဘလမ်းဟက် ဆိုက်အာန်မှာ။ 46ကိုယ်တော်ရီးဒါး ဆကလားဝါတ်ဆလာတ်တုံန်းယောက် “အဝါဘုရားရှာန်၊ ငါဝိညာဉ်တေ အရှာန်ဘင်းသဟူးနောင်းဘေ အပ်သမှာ” ညယ် မိန့်သမှာ။ အန်နိမ်မိန့်သစီးမှါခ့်ခါ ကိုယ်တော်ကား အဆာတ်တေ စွန့်တော်မူသမှာ။
47အန်ဘင်းထှာဘင်းတေဒေ ကတုံန်ဘင်း ရောမတပ်မှူးကား ဘုရားရှာန်ဒေ ချီးမွမ်းသဘန်း “အဘင်းဆိတ်ကား အဟုတ်မလပ် ဖြောင့်မတ်သဘင်းဆိတ်ထှာမှာ” ညယ် ငှေါမှာ။ 48အန်ဘင်းမြင်ကွင်းတေ ယူဒင် ဒီကြီးဘင်း သမီဆာတာတ်ကား အန်ဘင်းထှာရာန်ဘင်းတေ ကတုံန်မှါခ့်ခါ အကြီးကျယ်အဆေင်အမဲငှါဘန်းနာ ရင်ဘတ်တုံန်းတေထုသကြီးဘန်းနာ ကျေမ်းပါလာန်ဟာန်းကြီးမှာ။ 49အန်နိမ်စါန်းငှေါဒီ ဂါလိလဲပြေဟက် ကိုယ်တော်ဟလိန်းဘေ ဒီရာတ်ပင်း အီရှီတာတ်ယောက် ကိုယ်တော်ဒေ ရင်းနှီးသကြီးဘင်း သမီဆတာတ်ကား လမ်းစာလာဟက် စပ်ပန်း ယူနင်းကြီးမှာ။
ကိုယ်တော်ယေရှုဒေဂူဆွာန်းသဘင်း
(ရှာန်မဿဲ ၂၇:၅၇-၆၁။ ရှာန်မာကု ၁၅:၄၂-၄၇။ ရှာန်ယောဟန် ၁၉:၃၈-၄၂)
50အန်ကားအချိန်ဘေ တရားလွှတ်တော်အဖွဲ့ဝင်ထှာဘင်း ယောသပ်ညယ်ကော်ဘင်း ဖြောင့်မတ်သဘင်းဆိတ်ဟော်ဝါကား အန်ဘင်းနေရာဘေ ငှါဘန်းနင်းမှာ။ 51ဟိန်ကား ကိုယ်တော်ယေရှုစောက်ပေ တခြားလွှတ်တော်အဖွဲ့ဝင်တာတ် အွန်နီဘင်း ဆုံးဖြတ်ချက်တေဒေ သဘောအတူဒီရား။ ဟိန်ကား ယုဒပြေ အရိမဿဲမြို့ဟက် ဒီဘင်းဆိတ်ထှာဘန်း ဘုရားရှာန်ဘင်းသာသနာတော်ဒေ ဒဲဘန်းနင်းဘင်းဆိတ်ရီးထှာမှာ။ 52ဟိန်ကား ကိုယ်တော်အလောင်းတေ ဂူဆွာန်းသဒင် ပိလတ်ရှာန်းပလာန်ရှာဘေ စိန်မှါခ့်ခါ ပိလတ်ရီးဒါး ခွာမ်းအီရာန်မှာ။ 53အမှာတွာတ် ဟိန်ကား ကိုယ်တော်လာန်တေ တာပ်ပါးကပ်ပင်း တိုင်စောက်ဟက် ချသဘန်း မဲဘင်းပိတ်စယောက် ပတ်တာန်မှာ။ စီးမှါခ့်ခါ လုံးကရှီကယာဒေ ထွာမ်းသပဲဘင်း ဟာဟမဲဆဲ ဂူအဆွာန်းသလူနွန်းဘင်း ဆာန်းကျိုင်းဂူ နယားနောင်းဘေ ကိုယ်တော်ဘင်းအလောင်းတေ ပဲမှာ။ 54အန်ဘင်းမာန်းရာတ်ကား ပြာန်ဆာန်သထှာဘင်း မာန်းရာတ်ထှာဘန်း#23:54 ပြာန်ဆာန်သထှာဘင်း မာန်းရာတ်ငှေါဘင်းနာကား ဥပုသ်မာန်းရာတ်အထုတ်ကြီ အဖိတ်နေ့ထှာမှာ။ ဥပုသ်မာန်းရာတ်ယောက် ထုတ်ထံဘင်းအချိန်ထှာမှာ။
55ဂါလိလဲပြေဟက် ကိုယ်တော်ဟလိန်းဘေ ဒီရာတ်ပင်း အီရှီတာတ်ကား ယောသပ်ဟလိန်းပါ ဒီရာတ်ကြီးဘန်း ဆာန်းကျိုင်းဂူယောက် ကိုယ်တော်ဘင်း အလောင်းဒေ ဟာနိမ်ပဲမှာငှေါဘင်းတေ ကတုံန်ကြီးရီမှာ။ 56စီးမှါခ့်ခါ အန်တာတ်ကား ကျေမ်းပါလာန်ဟာန်းဘန်း ကိုယ်တော်ဘင်း အလောင်းဒေ ပူဇော်သဒင် သွန်းဘင်းဆလောတေယောက် အမွှေးနံ့သာတေဒေ ပြာန်ဆာန်သပဲကြီးမှာ။ အန်နိမ်စါန်းငှေါဒီ အန်တာတ်ကား ပညတ်တော်အတိုင်း ဥပုသ်မာန်းရာတ်ပေ အနားလာကြီးမှာ။
Currently Selected:
:
Highlight
Share
Copy
Want to have your highlights saved across all your devices? Sign up or sign in
Kadu Bible by Beyond Translation is licensed under Creative Commons Attribution-ShareAlike 4.0 License.