ရှာန်လုကာ 20

အခန်း (၂၀)

ကိုယ်တော်ယေရှုဘင်းအခွာမ်းအာဏာ

1ရအာမှါခ့်ခါ ကိုယ်တော်ကား သမီဆာတာတ်တေဒေ ဗိမာန်တော်နောင်းဘေ ဆတာန်းမလဲတေ ဟောသကာနင်းမှါခ့်ခါ ဂျူးပုရောဟိတ်ဟလာန်းစါတ်တုံန်းတာတ်၊ ကျမ်းကျိန်းပေါ့ပင်း အိုးဆကြီးတာတ်ယောက် ဂျူးသမီဆာဟလာန်းစါတ်တာတ်ကား ထုတ်အီဘန်း 2အန်တာတ်ကား ကိုယ်တော်ဒေ “နာန်ကား အဘင်းနာတေဒေ ဟာဘင်းအခွာမ်းအာဏာယောက် အွန်နင်းတေ။ ဟာဟမဲကား အဘင်းအခွာမ်းအာဏာတေ အီပဲမှာငှေါဘင်းတေ အလေနင်းငှေါကာ” ညယ် စိန်ယူကြီးမှာ။

3အန်၌မှါခ့်ခါ ကိုယ်တော်ကား “ငါရီးဒါး ဟနိမ်တေ စားနူစိန်ယူကူ။ ဟနိမ်ဖြေသကြီး။ 4ယောဟန်ကား သမီဆတာတ်တေ ဝဲငွတ်ပင်းမာန်းဂလာ အွန်အီဘင်းအခွာမ်းအာဏာကား ဘုရားရှာန်ဟက် ဒီလည်း အန်နိမ်အချီ သမီဆတာတ်ဟက်ရဲ” ညယ် စိန်ယူမှာ။

5အန်၌မှါခ့်ခါ အန်တာတ်ကား အချန်းချန်းဆွေးနွေးသကြီးဘန်း “အဟုတ်မလပ် အလေကား ‘ယောဟန်ဘင်း အခွာမ်းအာဏာကား ဘုရားရှာန်ဟက်ဒီမှာ’ ညယ် ဖြေသဘန်းကား ဟိန်ကား အလေတေ ‘အန်နိမ်ငှေါဘန်းကာ ဟနိမ် ဟမာန်ငြားယောဟန်တေ အယုံကြည်သောဒေ’ ညယ် ငှေါကူ။ 6အန်နိမ်စါန်းငှေါဒီ အလေကား ‘ယောဟန် အခွာမ်းအာဏာကား သမီဆတာတ်ဟက်ဒီမှာ’ ညယ်ငှေါဘန်းကား သမီဆတာတ်ကား ယောဟန်တေ ပရောဖက်ထှာမှာညယ် ယုံကြည်သဘင်းအတွာတ် အန်တာတ်ကား အလေတေ လုံးကရှီယောက် တက်ရှီးကြီးကူ” ညယ် ငှေါနင်းကြီးမှာ။

7အမှာတွာတ် အန်တာတ်ကား “သမီဆတာတ်တေ ဝဲငွတ်ပင်းမာန်းဂလာအီဘင်း ယောဟန်အခွာမ်းအာဏာကား ဟာဟမဲဟက်ဒီမှာငှေါဘင်းနာတေ အလေအမိန်းရှာတ်ခါး” ညယ် ပြန်သဘန်း ငှေါကြီးမှာ။

8အန်၌မှါခ့်ခါ ကိုယ်တော်ကား “အန်နိမ်ငှေါဘန်းကာ ငါရီးဒါး အန်ဘင်းအမှုကိစ္စတေဒေ ဟာဟမဲဘင်း အခွာမ်းအာဏာယောက် အွန်နင်းမှာငှေါဘင်းနာတေ ဟနိမ်တေ ငှေါကလားအချီယား” ညယ်မိန့်သမှာ။

စပျစ်ကလာန်ငှါးသဘင်းဆိတ်တာတ်

9စီးမှါခ့်ခါ ကိုယ်တော်ကား သမီဆာကလောင်းတုံန်းတေ ဥပမာစားနူဒေ ငှေါကာမှာ။ ကိုယ်တော်ကား “သမီဆာဟော်ဝါကား စပျစ်ကလာန်ကန်မှာတေ စုတ်အီမှာ။ စီးမှါခ့်ခါ ကလာန်တေ အငှါးချသပဲဘန်းနာ မှါတ်ကွန်း ခရီးပူလာန်ဘဲမှာ။ 10စပျစ်ရှီတေ ကွန်ဘင်းအချိန်ထုတ်မှါခ့်ခါ ဟိန်ကား အစေခံဟော်ဝါတေ စပျစ်ကလာန်ငှါးသဘင်းဆိတ်တာတ်ပါ တာတ်ပန်း ဟိန်လူထိုက်သဘင်းဝေစုတေ လာစိန်းယုတ်မှာ။ အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား အန်ဘင်းအစေခံဒေ သာန်းဘန်း ဟာဘင်းတေဆဲအအီညယ် တာတ်ခါန်းငါန်မှာ။ 11အမှာတွာတ် ကလာန်အဆိတ်ကား အနားအစေခံဟော်ဝါတေ ပြန်သဘန်း တာတ်ခါန်းမှာ။ အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား အန်ဘင်းအစေခံတေရီးဒါး သာန်းဟာန်းကြီးဘန်း မန်းကတန်ကွန်းအွန်ဘန်း ဟမာန်ကစဲအအီညယ် တာတ်ခါန်းကြီးမှာ။ 12အနားပန်းနူ ကလာန်ဆိတ်ကား တတိယမြောက်အစေခံတေ ပြန်သဘန်း တာတ်ခါန်းမှာ။ အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား အန်ဘင်းအစေခံတေရီးဒါး ဒဏ်ရာလူကွန်းအွန်ဘန်း ကလာန်ပြာန်ပါ ငါတ်တာတ်နာန်မှာ။

13အန်၌မှါခ့်ခါ စပျစ်ကလာန်အဆိတ်ကား ‘ငါဟာနိမ်အွန်ထှာကူးတေ။ ငါအကြီးအကျယ်မစ်ပင်း ငါဆာဒေ တာတ်နာန်ကူ။ အန်တာတ်ကား ငါဆာဒေ လေးစားသကြီးကူ’ ညယ် ဟော်ဝါဆာငှေါဘန်း ဆာတေ တာတ်နာန်မှာ။

14အန်နိမ်စါန်းငှေါဒီ ကလာန်ငှါးသဘင်းဆိတ်တာတ်ကား ကလာန်အဆိတ်ဆာတေ ကတုံန်မှါခ့်ခါ ‘အန်ဘင်းဆိတ်ကား ကလာန်အဆိတ်ဆာထှာမှာ။ ဟိန်ဒေ သာန်းရှီးကြီးထှာမှာ။ အန်နိမ်ငှေါဘန်းကား ဟိန်ပိုင်းသဘင်းတေ အလေလူကြီးကူ’ ညယ် အချန်းချန်းတိုင်ပါန်သကြီးမှာ။

15အမှာတွာတ် အန်တာတ်ကား စပျစ်ကလာန်အဆိတ်ဆာတေ ကလာန်ပြာန်ပါတွန်းပူဘန်း သာန်းရှီးကြီးရာန်မှာ။ အန်နိမ်ငှေါဘန်းကာ ကလာန်ဆိတ်ကား အန်တာတ်တေ ဟာနိမ်အွန်ကူတေ။ 16ကလာန်ဆိတ်ကား ဟိန်ကိုယ်တိုင်ဒီဘန်း စပျစ်ကလာန်ငှါးသဘင်းဆိတ်တာတ်တေ သာန်းရှီးရာန်ကူ။ စီးဘန်းကား ကလာန်တေ တခြားဟော်ဝါပါ အီရာန်ထှာကူ” ညယ် မိန့်တော်မူသမှာ။ အန်ဘင်းဒေ သက်ပူကြီးဘင်းဆိတ်တာတ်ရီးဒါး “အဘင်းကိစ္စကား ဟာ၌မှာဆဲ အထှာရီစိန်းရီဆာ” ညယ် ငှေါကြီးမှာ။

17ကိုယ်တော်ကား အန်တာတ်တေ စိုက်သပန်းယူပန်းနာ

“ကျမ်းကျိန်းနောင်းဘေ ရေးသပဲဘင်း ‘တိုက်တေစာဘင်းဆိတ်တာတ် တက်ပဲဘင်းလုံးကရှီကား

အရေးတုံန်းဘင်း ထောင့်ချုပ်လုံးကရှီထှာရီမှာ’ ညယ် ငှေါဘင်း အဓိပ္ပာယ်ကား ဟမာန်ဒေ ငှေါကာတ်တေ။

18အန်ဘင်းလုံးကရှီ‌စောက်ပေ အက်ပင်းဆိတ်တာတ်ကား သွောမ်နာစီ ဗူကြီးဆွန်နာန်ကူ။ အန်ဘင်းလုံးကရှီရီးဒါး ဟော်ဝါဟော်ဝါစောက်ပေ အက်နာန်ဘန်းရီးဒါး အန်ဘင်းဆိတ်ကား ဗူဝါမ်ကူ” ညယ် မိန့်တော်မူသမှာ။

19ဂျူးပုရောဟိတ်ဟလာန်းစါတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား အန်တာတ်နင်း ရည်ရွယ်သဘန်း အန်ဘင်းဥပမာတေ ကိုယ်တော်ကား မိန့်သမှာငှေါဘင်းတေ မိန်းရှာတ်ခါကြီးမှာ။ အန်ဘင်းဘေ ကိုယ်တော်ဒေ ရင်ကာတ်ကြီးဒီဒါး အန်တာတ်ကား သမီဆာကလောင်းတုံန်းတေ စါတ်ပန်းနင်းကြီးမှာ။

အခွန်အီထှာဘင်း

20အမှာတွာတ် အန်တာတ်ကား ကိုယ်တော်ဒေ ဒဲဘန်းယူဘန်းနာ တူးသပေါက်လားဘေ အပြစ်သန်ဘန်း ရှာန်းပလာန်ရှာ သဟူးနောင်းဘေ ရင်ဘန်းအပ်သရန်လူကွန်း သမီဆာမလဲနိမ် အယောင်ဆောင်သပဲဘင်း သူလျိုတာတ်တေဒေ တာတ်နာန်မှာ။ 21သမီဆာမလဲနိမ် အယောင်ဆောင်သပဲဘင်း သူလျိုတာတ်ကား ကိုယ်တော်ဒေ “အိုးဆကြီး၊ အိုးဆကြီး ဟောသကာ ဆွောန်သကာဘင်းတေကား ချီမှာငှေါဘင်းနာတေ အလေမိန်းရှာတ်ခါမှာ။ အိုးဆကြီးကား ဟာဟမဲတေစဲ မန်းအလိုက်သဘန်း ဘုရားရှာန်ဘင်း လမ်းစဉ်တေဒေ ချီဘင်းအတိုင်း ဆွောန်သအီမှာငှေါဘင်းတေ အလေမိန်းရှာတ်ခါမှာ။ 22အမှာတွာတ် အလေကား ရောမဧကရာဇ်တေ အခွန်ဆက်သဒဘင်းနာကား ပညတ်တော်ယောက်ညီသလဲ အန်နိမ်အချီ အညီသဝါးရဲ ငှေါဘင်းတေ အလေနင်း ငှေါကာအီယုတ်” ညယ် လျှောက်တာန်သကြီးမှာ။

23ကိုယ်တော်ကား အန်ဘင်းဆိတ်တာတ် ဉာဏ်ဆင်သဘင်းတေ မိန်းရှာတ်ခါဘင်းအတွာတ် 24အန်ဘင်းဆိတ်တာတ်တေ “ငါတေ ဒေနာရီဖူးဒင်္ဂါး ပါတ်အာတေ ကာယုတ်။ အန်ဘင်းဘေ ဟာဟမဲဘင်းရုပ်ပုံယောက် ဟာဟမဲဘင်းနာမယ်ပါသောဒေ” ညယ် စိန်ယူမှါခ့်ခါ အန်ဘင်းဆိတ်တာတ်ရီးဒါး “ရောမဧကရာဇ်ဘင်း နာမယ်ယောက် ရုပ်ပုံထှာမှာ” ညယ် ဖြေသကြီးမှာ။

25အန်၌မှါခ့်ခါ ကိုယ်တော်ကား “ရောမဧကရာဇ်ယောက် ဆိုင်သဘင်းနာတေဒေ ရောမဧကရာဇ်နင်းအီကြီး။ ဘုရားရှာန်ယောက်ဆိုင်သဘင်းနာတေဒေ ဘုရားရှာန်နင်း အီးကြီး” ညယ် မိန့်တော်မူသမှာ။

26အန်ဘင်းဆိတ်တာတ်ကား သမီဆာတာတ်မန်းဘေ ကိုယ်တော်ဒေ အချီဘင်းတူးစားနူစားနာငှေါစိန်းတင် အွန်လားအလူငှါနင်းကြီးမှာ။ အန်တာတ်ကား ကိုယ်တော်ဖြေသဘင်းနာတေဒေ အံ့ဩသနင်းကြီးဘင်းအတွာတ် ရွပ်ပန်းနင်းကြီးရာန်မှာ။

ရှီးလားဟက်ပြန်သဘန်းစားဟာန်းရီဘင်းဒေ စိန်ယူဘင်း

(ရှာန်မဿဲ ၂၂:၂၃-၃၃။ ရှာန်မာကု ၁၂:၁၈-၂၇)

27ရှီးလားဟက် ပြန်သဘန်းစားဟာန်းရီဘင်းနာဒေ အယုံသကြီးဘင်း ဇဒ္ဒုကဲညယ်ကော်ဘင်း#20:27 ဇဒ္ဒုကဲ - ဇဒ္ဒုကဲငှေါဘင်းနာကား အနားဘဝငှါမှာငှေါဘင်းတေ လက်အခံသဝါး၊ ရှီးစီးမယောက် ဝိညာဉ်ပါ ကယာလာန်ဘဲမှာညယ် ယုံကြည်သကြီးဘင်း ဂျူးဘာသာရေး အဖွဲ့စည်းစားနူထှာမှာ။ သမီဆာစယ်ယာကား ကိုယ်တော်ပါ ဒီဘန်း 28“ကိုယ်တော်၊ မောရှေပညတ်ကျမ်းဘေ ရေးသပဲဘင်းအတိုင်း ‘အိတ်ငှါဘင်းသမီဆာဟော်ဝါကား ရှာဆာအဘိုညယ်ရှီးရာန်ဘန်းကား ဟိန်နရှီကား အက်ပဘဲဘင်း မုဆိုးမအီးရှီတေ လာထှာမှာ။ အန်တာတ်ကလိန်းဟူးဟက် အရာန်ဆုံးလူဘင်းဆာတေ ရှီးရာန်ဘင်း ဟိန်အမူးဘင်းဆာညယ် သတ်မှတ်သထှာမှာ’ ညယ် ရေးသပဲမှာ။ 29အန်နိမ်ငှေါဘန်းကား အမူးနရှီစစ်ဟူးဘေ တုံန်းဆိတ်ကား အိတ်လူဘန်း ဆာ၊ ဆအိတ်အလူညယ် ရှီးလာန်ပဲမှာ။ 30ဒုတိယတုံန်းဘင်းဆိတ်ကား အန်ဘင်းမုဆိုးမအီးရှီတေ လာဒီဒါး ဆာဆအိတ် အလူညယ် ရှီးလဟာန်းဘဲမှာ။ 31တတိယနရှီရီးဒါး အာနိမ်အတိုင်း ငှါဟာန်းမှာ။ အန်နိမ်ယောက် အကိုနရှီစစ်ဟူးကား မုဆိုးမအီးရှီယောက်လာဘန်း ဆာ၊ ဆအိတ်အလူညယ် ရှီးကြီးရန်မှာ။ 32အဆုံးဘေကား အန်အီးရှီရီးဒါး ရှီးလာန်းဘဲမှာ။ 33အန်နိမ်ငှေါဘန်းကား အန်ဘင်းအီးရှီကား အမူးနရှီစစ်ဟူးစလုံးယောက် လာရီဘင်းအတွာတ် ဘုရားရှာန်ကား သမီဆတာတ်တေ ရှီးလားဟက် ပြန်သဘန်းစားဟာန်းစိန်းမှါခ့်ခါ အန်ဘင်းအီးရှီကား ဟာဟမဲအိတ်ထှာဒေ” ညယ် စိန်ယူမှာ။

34အန်၌မှါခ့်ခါ ကိုယ်တော်ကား “အဘင်းကမ္ဘာစောက်ပေ ငှါဘင်းသမီဆာတာတ်ကား မာန်းဂလာပွဲတေအွန်နာန်၊ သမီနင်းမာန်းဂလာတေ အွန်အီရာန်ညယ် နင်းကြီးမှာ။ 35အန်နိမ်စါန်းငှေါဒီ ရှီးလားဟက် ပြန်သဘန်းစားဟာန်းရီစိန်းဒင် ထိုက်တန်သဘင်းဆိတ်တာတ်ကား ရွှေမြို့တော်ဘေ နင်းကြီးမှါခ့်ခါ မာန်းဂလာဆောင်သဘင်းတေ၊ သမီနင်း မာန်းဂလာတေ အွန်အီဘင်းတေရီး ငှါကဘန်းလားအချီရား။ 36အန်တာတ်ကား မဲဘင်းဟမန်းတာတ်နိမ် ရှီးဘင်းတေရီး ငှါကလားအချီရား။ အန်တာတ်ကား ရှီးလားဟက် ပြန်သဘန်းစားဟာန်းရီဘင်း အခွာမ်းတေ လူဘင်းဆိတ်တာတ် ထှာကြီးဘင်းအတွာတ် ဘုရားရှာန်ဘင်း ဆာဆအိတ်တေရီး ထှာကြီးရီမှာ။ 37ရှီးလားဟက် ပြန်သဘန်း စားဟာန်းရီဘင်း အကြောင်းတေ မောရှေကား ရှာန်းရှာန်းလာန်းလာန်း သက်သေကာရီမှာ။ ဝါမ်ဟူနင်းဘင်း စောဟားချုံပုတ်အကြောင်းတေ ရေးသပဲဘင်း ကျမ်းကျိန်းဘေ မောရှေကား အရှာန်တေ ‘ဘုရားရှာန်ကား အာဗြဟံဘင်း ဘုရား၊ ဣဇက်ပင်း ဘုရားယောက် ယာကုပ်တာတ်ပင်း ဘုရားထှာမှာ’ ညယ်ကာဘန်းပဲမှာ။ 38ဘုရားရှာန်ကား ရှီးဘင်းဆိတ်တာတ် ဘုရားရှာန်အချီရား၊ အဆာတ်စားဘင်းဆိတ်တာတ်ဘုရားထှာမှာ။ ဘုရားရှာန်ဘင်း သမီဆတာတ်ကား ဘုရားရှာန်ဘေ အဆာတ်စားဘန်းနင်းကြီးမှာ” ညယ် မိန့်တော်မူသမှာ။

39အန်၌မှါခ့်ခါ ကျမ်းကျိန်းပေါ့ပင်း အိုးဆကြီးတာတ်ကား “အိုးဆကြီးပြန်သဘန်းဖြေသဘင်းကား အကြီးကျယ်မဲမှာ” ညယ် လျှောက်သမှာ။ 40အန်၌မှါခ့်ခါဟက်စသဘန်း ဟာဟမဲစဲ ကိုယ်တော်ဒေ အနားပန်းနူ မေးခွန်းတေ အစိန်ယူကြီးစာတ်ပန်း။

မေရှိယယောက်ဆိုင်သဘင်းမေးခွန်း ဒါဝိဒ်ဘင်းဆာ

(ရှာန်မဿဲ ၂၂:၄၁-၄၆။ ရှာန်မာကု ၁၂:၃၅-၃၇)

41စီးမှါခ့်ခါ ကိုယ်တော်ကား သမီဆာတာတ်တေ “ကယ်တာန်ရှာန်မေရှိယကား ဒါဝိဒ်ရှာန်းပလာန်ဘင်းဆာတော်ထှာမှာညယ် ဟမာန်တွာတ်ငှေါနင်းကြီးတေ 42ဆာလံကျမ်းဘေ ဒါဝိဒ်ရှာန်းပလာန်ကိုယ်တိုင်

‘ဘုရားရှာန်ကား ငါဘင်းအရှာန်တေ

43နာန်ဘင်းရန်သူတေဒေ နာန်သဖာတွန်ဘေ တာတာန်သဘင်းခုံအနေယောက်

ငါချသပဲကွန်း ငါဘင်းလက်ယာပါဘေ စံမြန်းဒနင်း’#မာ၊ ၁၂:၃၆ ညယ် မိန့်သည်မှာ” ညယ် ငှေါရီမှာ။

44စီးမှါခ့်ခါ ဒါဝိဒ်ကား ကယ်တာန်ရှာန်မေရှိယတေ “‘ဟိန်ဘင်းအရှာန်’ ညယ် ငှေါဘင်းအတွာတ် ကယ်တာန်ရှာန်မေရှိယကား ဒါဝိဒ်ဘင်းဆာ ဟာနိမ်ထှာရန်ကူတေ” ညယ် မိန့်တော်မူသမှာ။

ကျမ်းကျိန်းပေါ့ပင်း အိုးဆကြီးတာတ်တေဆတီးအီဘင်း

(ရှာန်မဿဲ ၂၃:၁-၃၆။ ရှာန်မာကု ၁၂:၃၈-၄၀)

45ကိုယ်တော်ကား သမီဆာကလောင်းတုံန်း သက်နင်းမှါခ့်ခါ တပယ့်တော်တာတ်တေ 46“ကျမ်းကျိန်းပေါ့ပင်း အိုးဆကြီးတာတ်တေ ဆတီးပဲဘန်း ရှောင်သကြီး။ အန်တာတ်ကား လမ်းဘေပူဘန်းကား ဆာန်ဆုန်စောက်ဆလောက်တုံန်းတေဒေ တော်ဘန်း ဈေးနောင်းဘေ သမီဆတာတ် အလေးပဲဘင်းနာတေ ကြိုက်သကြီးမှာ။ ဓမ္မာရုံတေဘေရီးဒါး အရေးတုံန်းဘင်း ထိုင်ခုံတေဘေ ထုံးထှာဘင်းတေ ကြိုက်သကြီးဟာဘန်း ယုတ်ပင်းအူဘင်းပွဲတေဘေရီးဒါး မဲမှာငှေါဘင်းနေရာဘေ ထုံန်းကြီးဟာမှာ။ 47မုဆိုးမတာတ်ပင်းကျေမ်းတေ အတာန်းလာကြီးဘန်း ဆုစိန်ကြီးမှါခ့်ခါရီးဒါး သမီဆတာတ်တေ ဖြောင့်မတ်သဘင်းဆိတ်တာတ်ညယ် ထာန်သစိန်းဒင် စောက်ဆလောက်တုံန်းတေ ဟန်ဆောင်သဘန်း ဆုစိန်ကြီးဟာမှာ။ ဘုရားရှာန်ကား အန်ဘင်းဆိတ်တာတ်တေ တခြားဘင်းဆိတ်တာတ်ထာတ် တုံန်းဘင်းအပြစ်တုံန်းတေ အီကူ” ညယ် မိန့်တော်မူသမှာ။

Currently Selected:

ရှာန်လုကာ 20: ZKD

Highlight

Copy