Luka 14

Yesu aundapa umwaume walwele

1Ubushiku bumo bwe sabata, imfumu imo ya ba Faliseyo yakutile Yesu mukulya ifyakulya na bakafundisha ba mafunde ba lemulolekesha mupepi pakuti ba musange ne filubo. 2Elo palya pene umuntu uwa iswilwe no bufwa aisangile kutanshi yakwa Yesu. 3Yesu aipwishe kuli bakafundisha ba mafunde na kuba faliseyo: “Amafunde yakwa Mose kyalisuminishiwa nangu awe ukundapa ubushiku bwe sabata?” 4Nomba taba aswike. Elo yesu abulile uyu muntu noku mundapa elo amutuma ku nganda yakwe. 5Kabili Yesu abeba: “Nga umo pali mwebo nakwata umwana wa ngombe aponena mukilindi ubushiku bwe sabata, mukaifunya palya pene, nangu fye bushiku bwe sabata?” 6Nomba ta bakwete ifya kuti basuke kuli filya alandile.

Yesu aleta amafunde kuli bambi abakutilwe na kumwine wa busefyo

7Elo Yesu amwene ukuti abantu bambi balesala inkende basungile abeni aba kindama, ala bafunda mu mapinda ukuti: 8“Elo nga waitwa kuli umo kubwinga, mwiyikala pakende ya kindama, pantu nalimo kukaba umuntu umbi uwa kindama ukukila pali webo uyo nakwe akakutwa. 9Nga uyu muntu wa kindama ukumikila akesa, ulya amikutile mwebonse babili akesa kuli mwebo noku myeba: na mipapata mulingile ukushila inkende uyu muntu, elo mulingile ukuya pa nkende ya abatakindama. Filya fikamipela insoni. 10Nomba elyo mwitilwe ku busefyo, kabuye kekale kunkende ya ba shakindama sana. Elo ulya muntu wa kimikuta akesa myeba: munandi nineni kuno kunkende ya bakindama, nomba ukamona. Ubukindami elyo bonse abetilwe bale kulolesha. 11Mulingile ukwikala ngefi, pantu uuli onse uufwaya ubukindami akekishiwa kuli Lesa. Nomba uuli onse uyo uwaikefya aka kindamikwa kuli Lesa.” 12Kabili Yesu aeba na ulya wamukutile: “Nga wa pekanya ikyakulya kya kasuba nangu ikya kyungulu, wika kuta abanobe, nangu ba munina bobe, nangu abafyashi, nangu bena mupalamano abakwata impiya, pantu nabo ba kakukuta ku busefyo bwabo pakuti ba kubweseshe. 13Elyo nga wa pekanya ubusefyo, kuta fye abapina, ifilema, na basunkuta, na ba mpofu, 14Elo Lesa akamipala, pantu aba bantu tekuti bamibweseshe. Lesa aka mibwesesha nge fifine ubushiku bumo akabwesha ubumi kuli bonse aba lungami pa bafwa.”

Yesu ashimike ipinda lya busefyo bukulu

(Mt. 22:1-10)

15Balya balelya na Yesu baumfwile alelanda filya, na umo pali bena abele Yesu: “ulya ukaba kwitebulo mubufumu bwakwa Lesa ali palwa kuli Lesa.” 16Yesu alandile: “kwali ubushiku bumo umwaume alepekanya ubusefyo ubukulu no kukuta abantu abengi. 17Panshita ya busefyo, alituma uwankito kuba itilwe: ‘iseni, pantu fyonse nafi pekanishiwa.’ 18Nomba bonse batampile uku lomba ubwelelo umo-umo. Uwa bumo alanda ati: ngeleleko ‘nashita ibala kifwile fye inge mone.’ 19Umbi umuntu wa butatu alanda: ‘na papata, ngeleleko. Shaise pantu nafuma mukushita ingombe shibili-shibili shisano naya nombaline mukumona nga shilebomba bwino pamo neshinakwe.’ 20Umuntu uwa butatu alanda: ngeleleko ‘nafuma mukupa, ekyo shaishile.’ 21Mukubwela kwa wankito aleta aya mashiwi ku mfumu yakwe. Efyo imfumu ya nganda, mu kifukushi, aeba uwankito: ‘kabuye munkende na mu tushila tonse twa mu mushi na ulete pano abapina, nefi lema, na ba mpofu na basunkuta bese ku busefyo.’ 22Panuma uwankito akitile ifya mwebele imfumu, alandile ati: ‘mwe mfumu, ifyo wa nkituma nafi pangika kwashala kabili inkende ya ku pokelela limbi ibumba.’ 23Imfumu yakwe ya mweba: fumeni mu mushi, munshila ikalamba na munshila shimbi, na mukoshe ukuti abantu basumine ukwisa ku busefyo pakuti inganda isule ne bumba. 24Nde myeba ati, takuli nangu umo pali aba bantu nkutile aba kutampilapo uule pima ukumfwa ifyakulya ngipike.”

Ubukindami bwakuba umusambi

(Mt. 10:37-38)

25Ubushiku bumo, ibumba ilingi ilya bantu lyale konka Yesu mushila mu mushi waku Yerusalemu. Apilibuka kuli bena no kulanda: 26Nga umuntu aisa no kufwaya uku nkonke, ikitemwiko kuli nebo kilingile ukuba ikikulu ukukila ikya kwa wishi, ne kyakwa ngina ne kya mukashi wakwe, bana bakwe. Na kuli ba munina bakwe abaume na banakashi. Elo na ku ubumi bwakwe bwine. Nga talifyo, tekuti abe umusambi wandi. 27Kabili, nga tamuli abaipekanya ukukyula no kufwa na ndi ninshi tamulingile ukuba abasambi bandi. 28Nga, mulefwaya ukukula ubukule. Mulingile mbele ukwikala no kupenda bwino-bwino shinga shilya shikalombwa. Pantanshi mukamona, nga na mukwata impiya ishingi pakuti mupwishe ubukule bwenu! 29Nga tamupendele, kuti mwakula fye shinki nomba tekuti mu konkanyepo ukukula filya fimbi pansambu ya kubulwa kwa mpiya, elo bonse abo aba kakimona ikikulwa ba kamisalula! 30Bakalanda: uyu muntu takoseshe ubukule bwakwe atampile ukukula. 31Kimokine, nga imfumu yaile mubulwi ne mfumu inakwe, bakekala mbele noku sambilishanya nga kuti, umwanda umo wa bashilika, nga kuti balwisha balya bakesa kuba kolomona abali imyanda ibili ya bashilika. 32Nga imfumu ya mona, ati kikafya ukuwina, nomba akatuma intumi ku mfumu umulwani ne fita ilyo bakili ukutali pakuti babeebe. Balombe umutende. 33Mu musango umowine umo pali mwebo, alingile ukuipela nga kuti ali uwaipekanya ukuba umusambi wandi, pantu tekuti ube umusambi wandi nga taushile fyonse ifyo wa kwata.

Umukele wabula ubusuma tawakwata nkito

(Mt. 5:13 Mk. 9:50)

34“Nomba Yesu alandile ati: umukele kintu ikisuma sana, nomba nga taukwete ubusuma, kilya takya fwilisha ikintu. Tekuti mu ubweseshe ubusuma bwauko kabili. 35Uyu mukele tekuti ba ubomfye kwati mufundo pakuti umushili ukwate umufundo, nomba abantu balauposa. Na ulya ulefwaya ukumfwa ifyo Nde landa alingile ukungufwa bwino.”

Currently Selected:

Luka 14: KDG

Highlight

Copy