Zaburi 34
34
Amahirwe y’intungane n’ibyago by’umugiranabi#34.1 . . . n’ibyago by’umugiranabi: mu gice cya mbere, umuririmbyi arasaba ab’intamenyekana gufatanya na we gusingiza Imana no kuyishimira, kuko yamukijije ibyamuteraga ubwoba byose (2–11). Mu gice cya kabiri, umuririmbyi ameze nk’umubyeyi uhugura abana be: Uhoraho ahemba iteka intungane, agahana abagiranabi; ni ngombwa rero kumuhoranira igitinyiro (12–23).
1Iri mu zo bitirira Dawudi. Ibivugwamo byerekeye igihe yihinduye nk’umusazi ahingutse imbere y’Abimeleki, maze undi yamwirukana, Dawudi akigendera.
Alefu
2Nzashimira Uhoraho igihe cyose,
ibisingizo bye bizahora ubudahwema mu munwa wanjye.
Beti
3Ishema mfite ryose ndikesha Uhoraho,
ab’intamenyekana nibabyumve, maze bishime!
Gimeli
4Nimwogeze Uhoraho hamwe nanjye,
twese hamwe turatire izina rye icyarimwe.
Daleti
5Nashakashatse Uhoraho, aransubiza,
nuko ankiza ibyankuraga umutima byose.
He
6Abamurangamira bahorana umucyo,
mu maso habo ntiharangwa ikimwaro.
Zayini
7Umunyabyago yaratabaje, Uhoraho aramwumva,
maze amuzahura mu magorwa ye yose.
Heti
8Umumalayika w’Uhoraho aca ingando
hafi y’abamutinya, akabagoboka.
Teti
9Nimushishoze maze mwumve
ukuntu Uhoraho anogera umutima;
hahirwa umuntu abereye ubuhungiro!
Yodi
10Nimutinye Uhoraho, mwebwe abo yitoreye,
kuko abamutinya nta cyo babura.
Kafu
11Abakire bageza aho bakena bagasonza,
naho abashakashaka Uhoraho nta cyo babura.
Lamedi
12Bana, nimuze muntege amatwi,
mureke mbigishe uko mutinya Uhoraho.
Memu
13Ari hehe umuntu ukunda ubugingo,
akifuza guhirwa mu buzima bwe bwose?
Nuni
14Ururimi rwawe rero urarurinde ikibi,
n’umunwa wawe uwurinde amazimwe.
Sameki
15Zibukira ikibi, ukore ikiri cyiza;
shaka amahoro, abe ari yo uharanira.
Ayini
16Amaso y’Uhoraho ayahoza ku bantu b’intungane,
amatwi ye agahora yitaye ku maganya yabo.
Pe
17Uhoraho ashyamirana n’abagiranabi,
kugira ngo azimanganye ku isi icyatuma babibuka.
Sade
18Intungane ziratabaza, Uhoraho akazumva,
maze akazikiza amagorwa yazo yose.
Kofu
19Uhoraho aba hafi y’abafite umutima washengutse,
akaramira abafite umutima wihebye.
Reshi
20Intungane igira ibyago byinshi,
ariko buri gihe Uhoraho akabiyikiza.
Shini
21Arinda umubiri wayo wose,
ntihagire igufwa ryayo na rimwe rivunika.
Tawu
22Nyamara icyago gihitana umugome,
abanga intungane bagahabwa igihano.
23Uhoraho arengera amagara y’abayoboke be,
kandi nta n’umwe mu bamuhungiraho uzahabwa igihano.
Currently Selected:
Zaburi 34: KBNT
Highlight
Share
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
