Yeremiya 37
37
Sedekiya agisha inama Yeremiya
1Sedekiya mwene Yoziya, yasimbuye Koniyahu mwene Yoyakimu ku ntebe y’ubwami, ari we Nebukadinetsari, umwami w’i Babiloni, yari yarimitse mu gihugu cya Yuda. 2Ariko, ari we, ari abagaragu be, ari n’abaturage b’icyo gihugu, bari barimye amatwi amagambo Uhoraho yavuze yifashishije umuhanuzi Yeremiya wari waratorewe uwo murimo.
3Umwami Sedekiya yohereza Yukali mwene Shelemiya n’umuherezabitambo Sefaniyahu mwene Maseya, abatuma kuri Yeremiya kumubwira bati «Ndakwinginze, dutakambire kuri Uhoraho Imana yacu!» 4Icyo gihe Yeremiya yarishyiraga akizana mu muryango we; yari atarafungwa. 5Icyo gihe, ingabo za Farawo zari zihagurutse mu Misiri; nuko Abakalideya bari bagose Yeruzalemu, bamenye iyo nkuru, bajya kubatanga imbere. 6Uhoraho ni ko kubwira umuhanuzi Yeremiya, ati 7«Uhoraho, Imana ya Israheli avuze atya: Umwami wa Yuda wabohereje ngo mungishe inama, muzamubwire muti ’Ingabo za Farawo zahagurutse mu Misiri zije kubatabara, zizasubira mu gihugu cyazo cya Misiri. 8Abakalideya bazagaruka gutera uyu mugi, bawufate maze bawutwike. 9Uhoraho avuze atya: «Ntimwibeshye mukeka ko Abakalideya bavuye iwanyu ubutazagaruka; nta ho bagiye. 10N’iyo mwaba mwatsembye ingabo z’Abakalideya zibugarije, inkomere zarokoka zava mu mahema yazo, zigatwika uyu mugi.’»
Yeremiya aregwa kuba umugambanyi
11Igihe ingabo z’Abakalideya zavaga mu mugi wa Yeruzalemu zikanze iza Farawo, 12Yeremiya yasohotse i Yeruzalemu ashaka kujya mu gihugu cya Benyamini, azinduwe no guhabwa umunani#37.12 guhabwa umunani: aha ngaha baravuga wa murima Yeremiya yaguze; reba 32,7–16. mu muryango we. 13Ageze ku irembo rya Benyamini, ahasanga umutware w’abarinzi witwaga Yiriya mwene Shelemiya wa Hananiya. Uwo murinzi yataye muri yombi umuhanuzi Yeremiya, agira ati «Ugiye mu Bakalideya!» 14Yeremiya arasubiza ati «Urabeshya, singiye mu Bakalideya!» Nyamara ariko Yiriya ntiyashaka kumwumva, ahubwo aramufata amujyana imbere y’abatware. 15Abo batware baramurakarira, baramukubita, maze bamufungira mu nzu y’umunyamabanga Yehonatani yari yarahinduwemo uburoko. 16Ubwo rero Yeremiya afungirwa mu nzu iri hasi y’izindi, amaramo igihe kirekire.
Sedekiya abonana na Yeremiya mu ibanga
17Hanyuma, umwami Sedekiya ategeka ko bamumuzanira#37.17 ko bamumuzanira: umwami Sedekiya ni umunyabwoba; rimwe anyuzamo akemera Yeremiya, ubundi akumva amabwire y’ibyegera bye.. Nuko amujyana iwe rwihishwa, aramubaza ati «Hari ijambo Uhoraho yakubwiye?» Yeremiya arasubiza ati «Rirahari», ndetse yongeraho ati «Ugiye kuzatabwa mu maboko y’umwami w’i Babiloni.» 18Yeremiya arongera abwira Sedekiya, ati «Ni ikihe cyaha nagukoreye wowe, n’abagaragu bawe, n’umuryango wawe, kugira ngo mube mwarandoshye mu buroko? 19Ese ba bahanuzi banyu bari he, bamwe bababwiraga ko mwebwe n’igihugu cyanyu mutagomba kwikanga igitero cy’umwami w’i Babiloni? 20None rero, mwami, mutegetsi wanjye, wumve neza icyo ngusaba: ntunsubize mu nzu y’umunyamabanga Yehonatani, ntava aho mpapfira.» 21Umwami Sedekiya ategeka ko bafungira Yeremiya mu gikari cy’inzu y’imbohe, kandi bakajya buri munsi bamuha umugati uguzwe ku muhanda w’abayikora; kugeza ubwo imigati izashira mu mugi. Nguko uko Yeremiya yagumye mu gikari cy’imbohe.
Currently Selected:
Yeremiya 37: KBNT
Highlight
Share
Compare
Copy
Want to have your highlights saved across all your devices? Sign up or sign in
Kinyarwanda Bibiliya Ntagatifu, Verbum Bible © The Bible Society of Rwanda, Rép. Dém. du Congo, 2012.
