ລູກາ 5
5
ພຣະເຢຊູເຈົ້າຊົງກາເລົົາຈ໋ອກສາວົກເມົ໋າທຳອິດ
(ມທ 4:18-22; ມຣກ 1:16-20)
1ໂມຍຕະໄງ ຂະນະທີ່ພຣະເຢຊູເຈົ້າເຊິ່ງໂກທີ່ພຽງທະເລສາບເຄັນນາຊາເຣັດ ທີ່ກາເລົາກັນວ່າທະເລຄາລີເລ ປະຊາຊົນມຶມຶນທຳປະໂຊມອ້ອມພຣະອົງ ເຜີຕາເມິງພຣະຄຳທິພຣະເຈົ້າ. 2ພຣະອົງປິດຕາຍໂຕຼກປຣຽຣ໌ຄັນ ຈອດທົວະເຮິຕາພຣຽນປີນຸ໋ຍທັຽງຕຼືປິດເຍືອຍເກິດໂຕຼກເຢຍ ແລ້ວຫາມາຍກຳລັງຣາວມອງ 3ພຣະເຢຊູເຈົ້າຕຶກເຮິໂຕຼກມີຄັນ ຊຶ່ງເປີຼຍໂຕຼກທິຊີໂມນ ແລະເບົ໋າຕັກໃມສະຕູນເກິດຕະພຽນທິດຊ໋ອກ ແລ້ວພຣະອົງກໍກຳຮານືໂຕຼກ ແລະສັ່ງສອນປະຊາຊົນ.
4ເມື່ອພຣະເຢຊູສັ່ງສອນປະຊາຊົນມ໋ອມ ພຣະອົງເບົ໋າຊີໂມນວ່າ, “ຈ໋ອກໂຕຼກເຕິກເຮິທຽກຊີຣຸ ແລະຈ໋ອກເຕິກຕຣຽກໝອງທິໄປເຕື໋ອຍຣັບຕຼື.”
5ຊີໂມນເພີຼບວ່າ, “ພຣະອາຈານເອີຍ ເມົ໋າເອືອປິດທັຽງຕຼຸບມັງ ຈົນອາສາ ແຕ່ສີນາຢີປິດມາເມ໋າະ, ແຕ່ເອືອກໍຈະຢາຍມ່ອງເຕືອຍຕາມຄຳທິນາຍເບົ໋າ.” 6ດັ່ງເຢຍ ຊີໂມນແລະເມົ໋າທິເຫີປິດຢາຍໝອງເຕືອຍທຽກ ແລະຕຼໍຕຼືທຳອ໌ປອມ ຈົນໝອງທິເມົ໋າເຫີກຳລັງບັດສາສາກ. 7ຊີໂມນແລະເມົ໋າທິເຫີອາເບື໋ອຍຕີຈ໋ອກເມົ໋າ ທີ່ໂກຼເຮິໂຕຼກເກີບມີຄັນທີ່ທັຽງຕືຼເນຫາມາຍເຈິະຊ່ວຍ ຫາມາຍຈຶ່ງເຈິະຊ່ວຍ ແລະປິດຕຼືປີງໂຕຼກປຣຽຣ໌ຄັນ ຈົນໂຕຼກເກືອບສາບັດລ໋ອງ. 8ເມື່ອຊີໂມນເປໂຕຕາຍເຫດການທີ່ພຣະເຢຊູເຈົ້າປຼືມ ເປໂຕຣ໋ຽນຕະເກົ່າເຕືອຍທິຊຶງພຣະເຢຊູເຈົ້າ ແລະເບົ໋າວ່າ, “ພຣະອົງເຈົ້າເອີຍ, ຂໍເນໃມຕູເກິດຂ້ານ້ອຍສາງາຍ ເພາະຂ້ານ້ອຍເປີຼຍປີນຸ໋ຍບາບ.”
9ເປໂຕເບົ໋າເປະແນັ ເພາະວ່າລາວ ແລະເມົ໋າທິລາວ ປະຫລາດໃຈ ທີ່ເມົ໋າເຫີຣັບຕຼືປິດມຶມຶນທຳເປະແນັ. 10ຢາໂກໂບ ແລະໂຢຮັນຜູ້ເປຼີຍກອນກາລໍທິເຊເບດາຍ ຜູ້ຮ່ວມງານທິຊີໂມນ ຫາມາຍກໍແປກໃຈມີສະເນີ ແລ້ວພຣະເຢຊູເຈົ້າກໍເບົ໋າແກ່ຊີໂມນວ່າ, “ມະໂທງ ເຊັດແນັຮາເງືອຣ໌ ໄມຈະເປີຼຍຜູ້ໂຕຍປີນຸ໋ຍເຈິະວ່າງໃຈເຊີເຮິນາ.”
11ຊີໂມນ ແລະເມົ໋າທິເຫີເປີຼອຍໂຕຼກເຈິະພຶ໋ຕະພຽນສະ ເມົ໋າເຫີກໍປິດເປຼຕັກໂຕດສິ່ງ ແລະເຕິກເກິພຣະເຢຊູເຈົ້າເພື່ອເປີຼຍສາວົກທິພຣະອົງ.
ພຣະເຢຊູເຈົ້າຊົງຮັກສາກາລໍມີຣາເນເຣາະພະຍາດຂີ້ທູດ
(ມທ 8:1-4; ມຣກ 1:40-45)
12ມີຕະໄງພຮະເຢຊູເຈົ້າໂກຼເຮິເມືອງໂມຍເຮິແຂງຄາລີເລ ກໍໃມ໋ກາລໍມີຣາເປີຼຍພະຍາດຂີ້ທູດພີງຈັກ ເມືອລາວຕາຍພຮະເຢຊູເຈົ້າ ລາວຈຶງໂກນນ໋ອບທິມັດພຣະອົງ ແລະອ້ອນວອນຂໍວ່າ, “ພຣະອົງເຈົ້າເອີຍຖ້າທ່ານພໍໃຈ ກໍສາມາດປືຼມອຳຂ້ານ້ອຍເຣາະສະອາດປິດ#5:12 ເຣາະສະອາດປິດ ຕາມກົດບັນຍັດທິປີນຸ໋ຍຢິວ ປີນຸ໋ຍທີ່ເປຼີຍພະຍາດຂີ້ທູດ ແມ່ນຈະຢີບໍຣິສຸດຕາມປະເພນີທິຫາມາຍ ເມື່ອຫາມາຍປິດຮັບການປິ່ນປົວ ລາວຈະກາຍເປຼີຍປີນຸ໋ຍສະອາດ ບໍຣິສຸດ.”
13ຈາກເຢຍພຣະເຢຊູເຈົ້າເຕິກປາຍໍຕີຣັບລາວ ແລະພຣະອົງເບົ໋າວ່າ, “ເອືອເຕັມໃຈທີ່ຈະປິ່ນປົ່ວໄມ. ໄມປິດນຽມເຣ໋າະສະ” ເຮິເວລານັ້ນກາລໍປີນຸ໋ຍເຢຍກໍປິດຮັບການປິ່ນປົ່ວ. ລາວຢີໃມ໋ພະຍາດຂີ້ທູດອີກຕໍ່ໄປ. 14ແລ້ວພຣະເຢຊູເຈົ້າ ກໍເຕງລາວວ່າ, “ມະເບົ໋າເລື່ອງແນັເນກ໋ອນໆຕາເມິ່ງວິທີທີ່ໄມປິດຮັບກາປິ່ນປົວ ແຕ່ຈົ່ງເຕິກນືພຣະວິຫານເຮິນະຄອນເຢຣູຊາເລັມ ເຜີສະແດງໂຕຕໍ່ປະໂຣຫິດແລະເນລາວກວດຮາເລໄມ ແລະຢືນຢັນວ່າໄມປິດນຽມເຣາະ ແລ້ວຈົ່ງຖວາຍເຄື່ອງບູຊາ ຕາມກົດບັນຍັດທິໂມເຊປິດເຕງທົວະ ເພືອເນປະຊາຊົນຈືວ່າ ໄມປິດເປຼີຍປີນຸ໋ຍສະອາດສະ.”
15ເຖິງແມ່ນວ່າພຣະເຢຊູເຈົ້າຢີເນກ໋ອນເບົ໋າກຽວກັບເລື່ອງແນັ ແຕ່ຂ່າວກ່ຽວກັບພຮະເຢຊູຈົ້າ ປິດແຜ່ເຕິກຢ່າງກວ້າງຂວາງ ດ້ວຍເຫດນັ້ນ ປະຊາຊົນກໍເຈິະປະໂຊມ ເຜີຕາເມິງພຣະອົງສັງສອນ ແລະເຜີເນພຣະອົງປິ່ນປົວພະຍາດທິຫາມາຍ. 16ແຕ່ພຣະເຢຊູປິດເຍືອຍເກິດຊຸມຊົງເຕິກບ່ອນປ່ຽວ ແລະພາວັນນາອະທິຖານທັຽງພຣະເຈົ້າ.
ພຣະເຢຊູເຈົ້າຊົງຮັກສາປີນຸ໋ຍເປ້ຍມີຣາເນເຣາະພະຍາດ
(ມທ 9:1-8; ມຣກ 2:1-12)
17ມີຕະໄງ ພຣະເຢຊູເຈົ້າກຳລັງສັ່ງສອນໂກຼ ໃມ໋ເອີນຟາຣີຊາຍແລະເອີນຄູສອນກົດບັນຍັດບາງຄົນ ກໍກຳໂກຼນືທີ່ເຢຍດ້ວຍ ຫາມາຍເຈິະຈາກທຳເມີງເຮິແຂງຄາລີເລ, ຈາກແຂງຢູດາຍ ແລະຈາກນະຄອນເຢຣູຊາເລັມ ນືເວລາເຢຍຣິດອຳນາດທິອົງພຣະຜູ້ເປັນເຈົ້າ ກໍສະຖິດຢູເກິພຣະເຢຊູເຈົ້າ ເຜີປິ່ນປົວປີນຸ໋ຍທີ່ໃມ໋ພະຍາດ. 18ໃນເວລານັ້ນໃມ໋ເມົ໋າກາລໍປິດຫາມປີນຸ໋ຍລອຍມີຣາ ທີ່ກູຍໂກຼປຶງບອນກາໂໜຍເຈິະ ຫາມາຍພະຍາຍາມໂຕຍກາລໍປີນຸ໋ຍເຢຍມູດນືສະນາມບ່ອນທີ່ພຣະເຢຊູເຈົ້າໂກຼ ເຜີເປຼລາວຕໍໜ້າພຣະເຢຊູເຈົ້າ ເຜີເນພຣະອົງປິ່ນປົວລາວ. 19ແຕ່ທັຽງໂຕຼງມູດຢີປິດເພາະໃມ໋ປີນຸ໋ຍສະເນ໋ະ ຫາມາຍຈຶ່ງຕຶກປຶງຕຳໂປຼສະນາມຫາມາຍເສ໋າະຕຳໂປຼປຼືມເປຼີຍຈອ່ມ ແລ້ວຈ໋ອກສາໂສ໋ຍທົວະປີນຸ໋ຍລອຍເຢຍປາເຕື໋ອຍ ເຕືອຍຕາມຈ່ອມທິມັດພຣະເຢຊູເຈົ້າ. 20ເມື່ອພຣະເຢຊູເຈົ້າປິດຕາຍຄວາມເຊີທິຫາມາຍ ດັ່ງນັ້ນ ພຣະອົງຈຶ່ງເບົ໋າແກ່ປີນຸ໋ຍລອຍເຢຍວ່າ, “ກາລໍເອີຍ ບາບກຳຕຼຸບສະເນ໋ະທິໄມປີດຮັບການອະໄພສະ.”
21ດັ່ງນັ້ນເອີນຄູສອນກົດບັນຍັດເກິເອີນຟາຣີຊາຍ ຈຶ່ງເລີ່ມເຕືອນກັນວ່າ, “ປີນຸ໋ຍແນັແມ່ນປີນຸ໋ຍອາເຕ ທີ່ກຳລັງເບົ໋າໝຶນປະໝາດພຣະເຈົ້າໂດຍເບົ໋າວ່າຕົນເປຼີຍພຣະເຈົ້າ? ສີນາຈືວ່າໃມ໋ແຕ່ພຣະເຈົ້າເທົ່ານັ້ນທີ່ອະໄພບາບກຳປິດ.”
22ແຕ່ພຣະເຢຊູເຈົ້າຈືຄວາມຄຶດທິຫາມາຍ ຈຶ່ງເບົ໋າເກິຫາມາຍວ່າ, “ເປະເຕໄປຈຶ່ງຄຶດເປະແນັ. 23ອາເຕງາ່ຍກວ່າ ທີ່ບັດເບົ໋າວ່າປີນຸ໋ຍພິການແນັວ່າ, ‘ບາບກຳທິໄມປິດຮັບການອະໄພສະ’ ຫຼືຈະເບົ໋າວ່າ, ‘ຈົ່ງຕຶກຕຶກເຊິງແລະຕາເຕິກ’ 24ແຕ່ນາໂງນເນໄປຕາຍວ່າ ນາເປຼີຍກອນມະນຸດໃມ໋ສິດອຳນາດປຶງປຣີປະເຕ໋ຍໂລກ ສາມາດອຳອະໄພບາບກຳທິປີນຸ໋ຍນືໂລກແນັ.” ດັ່ງນັ້ນ ພຣະອົງຈຶ່ງເບົ໋າແກ່ປີນຸ໋ຍລອຍວ່າ, “ຈົ່ງຕາເມິງນາເຖີດ, ຕຶກຕຶກເຊິງຈ໋ອກບ່ອນກາໂໜຍທິໄມ ແລະເຈິະເຮິສະນາມທິໄມສາ.”
25ເຮິທັນໃດເຢຍ ກາລໍປີນຸ໋ຍລອຍເຢຍກໍປິດຕຶກເຊິງທິມັດຫາມາຍໂຕດສະເນ໋ະ. ລາວປິດເຢີກຈ໋ອກບອ່ນກາໂໜຍທິຕົນ ແລະລາວເຈິະເຮິສະນາມທິລາວໂດຍເບົ໋າສັນລະເສີນພຣະເຈົ້າ. 26ໂຕດສະເນ໋ະປະຫລາດໃຈ ແລະສັນລະເສີນພຣະເຈົ້າ. ສິ່ງທີ່ຫາມາຍປິດຕາຍປຼືມເນຫາມາຍແປກໃຈ, ແລະຫາມາຍເບົ໋າວ່າ, ສີນາປິດຕາຍການອັດສະຈັນອັນຍິ່ງຕາເມ໋ະຕັງໄກ, “ສີນາປິດຕາຍສິ່ງທີ່ເຫຼີເຊີ.”
ພຣະເຢຊູເຈົ້າກາເລົາຈ໋ອກເລວີເຈິະເກີດສາວົກທິພຣະະອົງ
(ມທ 9:9-13; ມຣກ 2:13-17)
27ຫຼັງຈາກເຫດການແນັມັອມ, ພຣະເຢຊູເຈົ້າກໍປິດເຍືອຍເກິດສະນາມເຢຍ ແລະຂະນະທີ່ລາວຕາເຕິກເຢຍ. ພຮະອົງປິດຕາຍປີນຸ໋ຍເກັບພາສີມີຣາທີເນາະວ່າ ເລວີ, ກຳໂກຼເຮິຫ້ອງການພາສີ ພຮະເຢຊູເຈົ້າເບົ໋າເກິລາວວ່າ, “ຈົ່ງຕິດຕາມນາ.” 28ເມື່ອເລວີຊ໋ອງ, ລາວຕຶກເຊິງ. ລາວເປຼຕັກວຽກທີ່ເປຼີຍປີນຸ໋ຍເກັບພາສີ ແລະຕິດຕາມພຣະເຢຊູເຕິກເປຼີຍສາວົກ.
29ແລ້ວເລວີກໍປິດຈັດງານກິນລຽ້ງອັນຕາເມ໋ະ ເຮິສະນາມທິຕົນເຜີຖວາຍກຽດແກ່ພຣະເຢຊູເຈົ້າ ໃມ໋ປີນຸ໋ຍເກັບພາສີທຳຣາ ແລະແຂກປີນຸ໋ຍອື່ນອີກ ຈຳນວນມຶ໋ມຶນທຳເຈິະທີໂຣມຈ໋ອງປອຣ໌ເກິເຫີ. 30ເອີນຟາຣີຊາຍເກິເອີນຄູສອນກົດບັນຍັດ ປິດຈົ່ມຕຳໜິຕໍ່ເອີນສາວົກທິພຣະເຢຊູເຈົ້າ, ຫາມາຍປິດເບົ໋າເກິສາວົກທິພຣະເຢຊູເຈົ້າວ່າ, “ເປະເຕໄປຈຶ່ງຈ໋ອງປອຣ໌ເກິປີນຸ໋ຍເກັັບພາສີ ແລະປີນຸ໋ຍບາບເຫຼົ່າແນັ?”
31ພຣະເຢຊູເຈົ້າເພີຼບຫາມາຍດ້ວຍຄຳສຸພາສິດທີ່ວ່າ, “ປີນຸ໋ຍທີ່ໃມ໋ສຸຂະພາບເຣາະຢີຕ້ອງການແພດປີ່ນປົ່ວ ໃມ໋ແຕ່ປີນຸ໋ຍສິປ່ວຍເທົ່ານັ້ນທີ່ຕ້ອງການແພດ 32ນາຢີປິດເຈິະເຜີກາເລົ່າປີນຸ໋ຍທີ່ຄຶດວ່າຕົນເປຼີຍຊອບທຳ, ແຕ່ນາເຈິະກາເລົ່າຈ໋ອກປີນຸ໋ຍບາບເນກັບໃຈ.”
ພຣະເຢຊູເຈົ້າຕັ້ງຄຳຖາມເລື່ອງການຈຽງສິນອົດຈານາ
(ມທ 9:14-17; ມຣກ 2:18-22)
33ແລ້ວບາງຄົນເບົ໋າເກິພຣະເຢຊູເຈົ້າວ່າ, “ເອີນສາວົກທິໂຢຮັນຈຽງສິນອົດຈານາໂກຼເລື້ອຍ ແລະພາວັນນາອະທິຖານ ແລະເອີນລູກສິດທິເອີນຟາຣີຊາຍກໍປືຼມມີສະເນີ ສວນເອີນລູກສິດທິທ່ານນະຈ໋ອງ ແລະເຍດ.”
34ພຣະເຢຊູເຈົ້າເຕືອນວ່າ, “ໄມຄຶດວ່າ ເຈົ້າສາມາດບັງຄັບແຂກເຮິງານແຕ່ງດອງ ເນອົດຈານາຕອນທີ່ເຈົ້າບ່າວນະໂກຼເກິຫາມາຍບໍ? 35ເມື່ອເວລາຈະເຈິະພຶ໋ ນາຄືເຈົ້າບາວຈະຕຼໍຈ໋ອກເຕິກເກິດຫາມາຍ. ແລ້ວນືເວລາເຢຍແຫຼະ ຫາມາຍຈະຈຽງສິນອົດຈານາ.”
36ແລ້ວພຣະອົງນະປິດເບົ໋າຄຳອຸປະມາອຳຫາມາຍຕາເມິງວ່າ, “ຢີໃມ໋ປີນຸ໋ຍອາເຕດອກ ທີ່ສາກອາວນາວ ແລະສີງໃສ່ອາວເຕີ ຖ້າປືຼມເປະແນັ ກໍຈະປືຼມອາວນາວສາສາກເຕິກ ແລະອາວນາວກໍຈະຢີສົມເກິອາວເຕີ. 37ເຮິທຳນອງດຽວກັນ ຢີໃມ໋ປີນຸ໋ຍເຕດອກ ທີ່ຈ໋ອກຕາເພຍອະງຸ່ນນາວໃສຖ໋ອງຊອສ໌ເຕີ, ເພາະຕາເພຍອະງຸ່ນນາວຈະປືຼມເນຖ໋ອງຊອສ໌ເຕີສາສາກ, ຕາເພຍອະງຸ່ນກໍຈະລັດເຍືອຍ ແລະຖ໋ອງຊອສ໌ກໍຈະຮາຢັກເຕິກມີສະເນີ 38ເຫດສະນັ້ນ ທຽກອະງຸ່ນນາວຕ້ອງຕອກທົວະນືຖ໋ອງຊອສ໌ນາວ 39ຢີໃມ໋ປີນຸ໋ຍເຕທີ່ໂງນເຍດຕາເພຍອະງຸ່ນນາວ ຫລັງຈາກຫາມາຍປິດເຫຍດຕາເພຍອະງຸ່ນເຕີສະ ເຫີຈຶງເບົ໋າວ່າ, ‘ທຽກອະງຸ່ນເຕີເຢຍແຫຼະ ເຣາະກວ່າ.’”#5:39 ນີ້ແມ່ນຕາເພຍອະງຸ່ນເຕີ ເປຼີຍຕົວແທນວິທີ່ການເຕີ ແລະການສິດສອນທິສາສະໜາຢິວ ຕາເພຍນາວເປຼີຍຕົວແທນອຳວິທີນາວ ແລະການສອນທິພຣະເຢຊູເຈົ້າ ຊີ້ແຈ່ງວ່າຜູ້ຄົນຢີເຕັມໃຈທີ່ຈະພິຈາລະນາຂ່າວສານ ເພາະຫາມາຍຄຶດວ່າວິທີເຕີເຣາະເປີງ
Currently Selected:
ລູກາ 5: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
