ລູກາ 16
16
ຜູ້ຈັດການທີ່ຢີສັດຊື່
1ແລ້ວພຣະເຢຊູເຈົ້າກໍປິດເບົ໋າເກິເອີນສາວົກວ່າ, “ໃມ໋ເສດຖີທີ່ໃມ໋ພະນັກງານມີຣາ ລາວເປີຼຍຜູ້ຈັດການຊັບສິນທິເຫີ. ແລ້ວເສດຖີຊ໋ອງວ່າຜູ້ຈັດການປີນຸ໋ຍແນັປິດປຼືມເນປຣັກທິນາຍຮາຢັກ, 2ດັ່ງນັ້ນ ເຫີຈຶ່ງກາເລົາຜູ້ຈັດການທິເຫີມູດເຈິະ ແລະເບົ໋າລາວວ່າ, ‘ເລື່ອງທີ່ເອືອຊ໋ອງກຽວເກິໄມ ຈົ່ງລາຍງານເນເອືອຈືກ່ຽວກັບສິ່ງທີ່ໄມປຼືມເກິຊັບສົມບັດທິເອືອ ເພາະວ່າໄມຈະຢີສາມາດເປຼີຍຜູ້ຈັດການທິເອືອປິດອີກ.’ 3ແລ້ວຜູ້ຈັດການປິດຄຶດກ່ຽວກັບລາວເອງວ່າ, ‘ນາຍທິເອືອກຳລັງຈະປົດເອືອເກິດຕຳແໜງເກິດການປຼືມວຽກທິເອືອ, ເອືອຄວນຈະປຼືມເປະເຕ ເອືອຈະແຈ໋ະປະເຕ໋ຍກໍຢີໃມ໋ເຣງ ແລະຈະຂໍທານກໍກາມາກາເມິຫາມາຍ. 4ບັດແນັ ເອືອຈືສະວ່າຈະປືຼມເປະເຕ ເມື່ອເອືອຕຼໍປົດເຈິກວຽກສະ, ເອືອຈະໃມ໋ເມົ໋າຜູ້ທີ່ຈະຕ້ອນຮັບເອືອໂກຼເຮິສະນາມທິຫາມາຍ.’ 5ດັ່ງນັ້ນ ຜູ້ຈັດການປິດກາເລົ໋າໂຕດສະເນ໋ະທີ່ໃມ໋ໜີ້ຕໍ່ນາຍທິລາວ. ຫຼັງຈາກຫາມາຍເຕິກສະ ລາວປິດເຕືອນປີນຸ໋ຍເຕິກນອຣ໌ວ່າ, ‘ໃມໃມ໋ໜີ້ນາຍທິເອືອຕາມາ?’ 6ປີນຸ໋ຍເຢຍປິດເພີຼບວ່າ, ‘ເອືອໃມ໋ໜີ້ນໍ້າມັນໄປລຕາປວນລ້ອຍຖັງ’#16:6 ລ້ອຍຖັງ 100ຖັງ ເທົ່າກັບ=3700ລິດ ຜູ້ຈັດການປິດເບົ໋າເກິລາວວ່າ, ‘ແນັແມ່ນໃບແຈ້ງໜີ້ທິໄມ ກຳ ແລະຂຽນວ່າໄມໃມ໋ໜີ້ນໍ້າມັນໄປຼຕາປວນເສີງເຈັດຖັງ.’ 7ແລ້ວຜູ້ຈັດການກໍເຕືອນປີນຸ໋ຍອື່ນເກີບວ່າ, ‘ໄມໃມ໋ໜີ້ຕາມາ,?’ ປີນຸ໋ຍແນັເພີຼບວ່າ, ‘ເອືອໃມ໋ໜີ້ປອຣ໌ສາລີລ້ອຍກວຽນ.’ ຜູ້ຈັດການເບົ໋າເກິລາວວ່າ, ‘ແນັແມ່ນໃບແຈ້ງໜີ້ທິໄມ, ເນຂຽນວ່າໄມໃມ໋ໜີ້ປອຮ໌ສາລີຖາມເຈັດກວຽນ.’
8ເຈົ້ານາຍທິລາວປິດຊ໋ອງເຖິງສິ່ງທີ່ຜູ້ຈັດການ ທີ່ຢີສັດຊື່ທິ ‘ລາວປິດປຼືມສະເຫີປິດຊົມເຊີຍລາວ, ເພາະວ່າລາວປິດວາງແຜນການຢ່າງສະຫລາດສຳລັບອານາຄົດທິລາວ. ສິ່ງແນັສະແດງເນຕາຍວ່າປີນຸ໋ຍຝ່າຍໂລກກະທຳຢ່າງສະຫລາດເກິປີນຸ໋ຍທີ່ເປຼີຍເພື່ອນມິດທິຫາມາຍ ທຳເປີງປີນຸ໋ຍທີ່ເປຼີຍຄວາມສະອ່າງ.’
9ສະນັ້ນນາເບົ໋າສິ່ງແນັວ່າ ‘ຈົ່ງໃຊ້ປຣັກທິໄມທີ່ໄມໃມ໋ໂກຼເຮິໂລກເຜີຊ່ວຍປີນຸ໋ຍອື່ນ. ເຜີວ່າຫາມາຍຈະເກີດເມົ໋າທິໄມ. ແລ້ວເມື່ອໄມເກດ ແລະຢີສາມາດໃຊ້ຊັບສົມບັດປິດເກີບຕໍ່ໄປ, ເມົ໋າເຫຼົ່າເຢຍຈະຕ້ອນຮັບໄມນືສະຫວັນບ່ອນທີ່ໄມຈະໂກຼອາໄສອັນຖາວອນເປັນນິດ. 10ຖ້າວ່າໄມສັດຊື່ ເຮິສິ່ງຂອງເລື່ອງກາເລດທຳຢ່າງ, ໄມຈະສັດຊື່ເຮິສິ່ງຂອງທີ່ຕາເມ໋ະທຳຢ່າງປິດ. ແຕ່ຖ້າວ່າໃມຢີສັດຊື່ເຮິສິ່ງຂອງກາເລດທຳຢ່າງ, ໃມກໍຈະຢີສັດຊື່ເກິສິ່ງຂອງທຳຢ່າງມີສະເນີ. 11ສະນັ້ນ ຖ້າວ່າໄມຢີສັດຊື່ ເຮິການນຳໃຊ້ຊັບສົມບັດອັນຢີຍຸດຕິທຳແນັ ກັອນຈະມອບຊັບສິນອັນມາດອຳແກ່ໄປ? 12ແລະຖ້າໄມຢີສັດຊື່ ເຮິຊັບສົມບັດທີ່ເປີຼຍທິປີນຸ໋ຍອື່ນ, ຫຼັງຈາກນັ້ ແນນອນພຣະເຈົ້າຈະຢີອຳເມ໋າະສຳລັບໄມ ເຮິການຈັດການທິໄມເອງ?’”
13“ເປັນໄປຢີປິດສຳລັບມີຣາທີ່ຈະຮັບໃຊ້ນາຍປຣຽຣ໌ຣາເທົ່າທຽມກັນ. ເພາະວ່າປີນຸ໋ຍຮັບໃຊ້ຈະຢີຕານອກນາຍມີຣາ ແລະຮັກນາຍມີຣາ ລາວຢີສັດຊື່ຕໍ່ນາຍມີຣາ ແລະຢີນັບຖືອິກມີຣາ ໄມຢີສາມາດຮັບໃຊ້ພຣະເຈົ້າ ແລະຮັບໃຊ້ປຣັກປິດ.”
ພຣະເຢຊູເຈົ້າຊົງສັ່ງສອນເລື່ອງອື່ນໆອີກ
(ມທ 11:12-13; 5:31-32; ມຣກ 10:11-12)
14ເອີນຟາຣີຊາຍທີ່ຮັກປຣັກຊ໋ອງສິ່ງທີ່ພຣະເຢຊູກຳລັງເບົ໋າ ແລະຫາມາຍສາອາເຢາະເຢີ້ຍພຣະເຢຊູເຈົ້າຍ້ອນວ່າຫາມາຍຮັກປຣັກ. 15ແຕ່ພຣະເຢຊູເຈົ້າເບົ໋າເກິຫາມາຍວ່າ, “ໄມປຼືມເນຕົວເອງ ຮາເລຄືວ່າຊອບທຳທິມັດມະນຸດ, ແຕ່ພຣະເຈົ້າຈືຄວາມຄຶດທີ່ຊົ່ວທິໄມ. ພຣະເຈົ້າຢີຕານອກສິ່ງເຫຼົ່າເຢຍທີ່ມະນຸດພິຈາລະນາວ່າໃມ໋ຄ່າຕາເມ໋ະ.”
16“ກົດບັນຍັດທິໂມເຊ ແລະການຂຽນທິບັນດາຜູ້ທຳນວາຍປິດເປຼີຍຜູ້ນຳທາງຈົນພຶ໋ສະໄໝໂຢຮັນບັບຕິສະໂຕປິດເຈິະປະກາດ ບັດແນັຂ້າພະເຈົ້າປິດປະກາດຂ່າວເຣາະກ່ຽວກັບອານາຈັກທິພຣະເຈົ້າ ແລະໃມ໋ທຳຣາກຳລັງພະຍາຍາມເຜີທີ່ຈະມູດນືອານາຈັກທິພຣະເຈົ້າ. 17ກຼົມ ແລະປຼີປະເຕ໋ຍໂລກແນັຈະຕຼໍທຳລາຍກໍງ່າຍເປີງທີ່ກົດບັນຍັດພຽງຈຸດດຽວທີ່ຈະຕຼໍປ່ຽນແປງ.”
18“ຖ້າວ່າກາລໍປາເລຼເກິເຕຍທິລາວ ແລະເຕິກແຕ່ງງານເກິຕາເຣອື່ນ. ຖ້າວ່າລາວປຼືມເປະແນັ, ລາວກຳລັງໃມ໋ສ່ວນເຮິການຫຼິ້ນຊູ້. ແລະໂຕດສະເນ໋ະທີ່ແຕ່ງງານເກິຕາເຣແມ່ຮ້າງ ກໍຜິດເຮິການລິ້ນຊູ້.”
ເລື່ອງເສດຖີເກິລາຊາໂຣ
19“ແລ້ວພຣະເຢຊູປິດເບົ໋າວ່າ, ຄັ້ງໜຶ່ງເຄີຍໃມ໋ເສດຖີມີຣາທີ່ປິດສົບອາວສີສີວລາຄ່າແພງ ແລະເຄື່ອງທີ່ນຸ້ມສະບາຍ. ແລະລາວກຳລັງຈັດງານກີນລ້ຽງຄູ່ຕະໄງ. 20ແລະ ໃມ໋ປີນຸ໋ຍທ໋ອກຍາກມີຣາທີເນາະ ລາຊາໂຣ ຜູ້ທີ່ໃມ໋ເຈິຼໂທຼຈັກເຈນທິລາວ. ບາງຄົນເຄີຍໂຕຍຈ໋ອກລາວເຈິະເປຼທົວະທີ່ຄະມອງສະນາມທິເສດຖີ. 21ແລະລາຊະໂຣຕ້ອງການທີ່ຈະຈາຈະນາທີ່ເປຼີຍຂອງເລຼີຫຼັງຈາກທີ່ເສດຖີປິດຈາສະ. ທຳເປີງແອເກີບ ກາປາງຈໍປິດເຈິະບຽນເຈິຼທິລາວ.
22ຕໍ່ມາ, ລາຊະໂຣຜູ້ທ໋ອກຍາກເຢຍກໍເກດ ແລະກາປາງເທວະດາປິດຈຽງລາວເຕິກໂກຼເກິບັນພະບຸລຸດອັບຣາຮາມ ເສດຖີກໍເກດມີສະເນີ ແລ້ວຫາມາຍກໍຕົບລາວທົວະ 23ເມື່ອໂກຼເຮິແດນມໍຣະນາ ລາວກຳລັງທໍລະມານຮານືແອ, ລາວປິດເງີຍມັດຕາຍອັບຣາຮາມໂກຼສາງ່າຍ ແລະລາຊາໂຣກຳໂກຼຕາຕຽບເກິເຫີ. 24ດັ່ງນັ້ນເສດຖີ ລາວຈຶ່ງກາເລົ່າເຣງໆວ່າ, ‘ອັບຣາຮາມ ບະເອີຍ ໂຜດສະເລິະເອືອແດ່ທ້ອນ ໂຜດໃຊ້ລາຊາໂຣຈ໋ອກປາຍຕີຈຸມທຽກ ແລະສົງລາວເຕິກທັຽງຂ້ານ້ອຍເຜີເຈິະແປະເຮິຮາປຽດທິເອືອ ເຜີໃມ໋ຄວາມຊຸ່ມພີອຳ ເພາະເອືອທົນທຸກທໍລະມານຢ່າງໜ້າໂທຼງຮານືອູນປານູຍແນັ.’
25ແຕ່ອັບຣາຮາມເພຼີບວ່າ, ‘ກອນເອີຍ ຈົ່ງຈືຈຳທົວະວ່າຂະນະທີ່ໄມນະໃມ໋ຊີວິດ, ໃມປິດຮັບສິ່ງທີ່ເຣ໋າະທຳຢ່າງທີ່ເກີດທິໄມ ແຕ່ລາຊາໂລປິດຮັບສິ່ງທີ່ຢີເຣ໋າະທຳຢ່າງ. ເວລາແນັລາຊາໂຣກຳລັງໃມ໋ຊີວິດໂກຼຮານືຄວາມສຸກສະບາຍ ແຕ່ໄມກຳລັງໃມ໋ຊີວິດນືຄວາມທ໋ອກທໍລະມານ. 26ນອກຈາກແນັເກີບ ລະຫວ່າງສີນາ ແລະໄປໄອໃມ໋ເຫວຊີຣຸລະວາງສີນາ ດັ່ງນັ້ນ ຢີໃມ໋ກອນສາມາດຈະລອຼງເກິດແນັເຕິກພຶ໋ໄປ ແລະຢີໃມ໋ກອນສາມາດຈະລຼອງເກິດແອເຕິກພຶ໋ສີນາປິດ.’ 27ເສດຖີເບົ໋າເກິ ‘ອັບຣາຮາມວ່າ, ຂ້ານ້ອຍຂໍທ່ານ ບະເອີຍ ຂໍເນສົ່ງລາຊະໂຣເຈິະທັຽງເຮິຄອບຄົວທິຂ້ານ້ອຍ. 28ເພາະວ່າຂ້ານ້ອຍໃມ໋ເອ໋າະຢາຍເສີງຣາ. ຈົ່ງເບົ໋າລາວເຕິກເຕືອນຫາມາຍເນກັບໃຈນາວ ປາລັກຕູເກິດຄວາມຜິດບາບທິຫາມາຍ. ແລ້ວເມື່ອຫາມາຍເກດ ຫາມາຍຈະຢີເຈິະສະຖານທີ່ທີ່ທົນທຸກທໍລະມານແນັເປະຂ້ານ້ອຍ.’
29ອັບຣາຮາມເພີຼບວ່າ, ‘ເອ໋າະຢາຍທິໄມ ໃມ໋ກົດບັນຍັດທິໂມເຊ ແລະສິ່ງທີ່ເອີນຜູ້ປະກາດພຣະທຳປິດຂຽນທົວະ. ຫາມາຍຄວນເຊີຕາເມິງສິ່ງທີ່ຫາມາຍຂຽນທົວະເຢຍສາ’ 30ເສດຖີເບົ໋າວ່າ, ‘ອັບຣາຮາມ ບະຜູ້ເປຼີຍບັນພະບຸລຸດເອີຍ ນະຢີພຽງພໍດອກ, ແຕ່ຖ້າບາງຄົນທີ່ເກດບີງເຈິະເກິດກາເຈດເຕິກທັຽງຫາມາຍ ແລະເຕືອນຫາມາຍແລ້ວຫາມາຍກໍຈະປາລັກເກິດບາບທິຫາມາຍ.’ 31ແຕ່ອັບຣາຮາມເບົ໋າເກິເສດຖີວ່າ, ‘ຖ້າວ່າຫາມາຍຢີເຊີຕາເມິງກົດບັນຍັດທິໂມເຊ ແລະໜັງສືທິເອີນຜູ້ທຳນວາຍແລ້ວແຕ່ຫາມາຍປະຕິເສດທີ່ຈະກັບໃຈນາວ ເຖິງຈະໃມ໋ມີຣາບີງເເຈິະເກິດກາເກດ ຫາມາຍກໍນະຢີໂຍມເຊີມີສະເນີ.’”
Currently Selected:
ລູກາ 16: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
