ລູກາ 10
10
ພຣະເຢຊູເຈົ້າເຕງເປິເຈັດປຣຽຣ໌ຣາເຍືອຍເຕິກ
1ຫລັງຈາກເຫດການເຫຼົ່າແນັຈົບສະ ອົງພຣະຜູ້ເປັນເຈົ້າກໍປິດເລິີຼກຈ໋ອກຜູ້ຕິດຕາມເປິເຈັດປຣຽຣ໌ຣາ ແລະເຕງເມົ໋າເຫີໂຕດແອເຍືອຍເຕິກເປັນຄູ່ ຄູ່ລະປຣຽຣ໌ຣາ ເຜີເຕິກນອຣ໌ພຣະອົງໂຕດເມືອງເເລະໂຕດເມີງ ບ່ອນທີ່ພຣະອົງວາງແຜ່ນຈະມູດເຕິກເຢຍ. 2ພຣະອົງຊົງເບົ໋າເກິຫາມາຍວ່າ, “ໃມ໋ທຳຣາພ້ອມທີ່ຈະເຊີເຮິນາເປະເກິການເກັບກຽວຕາເມ໋ະ ແຕ່ໃມ໋ປີນຸ໋ຍທິດຊ໋ອກປີນຸ໋ຍທີ່ສາມາດເກັບກ່ຽວປິດ ສະນັ້ນ ຈົ່ງພາວັນນາອະທິຖານຕໍ່ພຣະຜູ້ເປັນເຈົ້າເຈົ້າ, ແຫ່ງການເກັບກ່ຽວເຜີເນພຣະອົງຊົງປີນຸ໋ຍງານເຍືອຍເຕິກເກັບກ່ຽວເຮິການເກັບກ່ຽວ. 3ຈົ່ງເຕິກດຽວແນັ, ແຕ່ຈົ່ງຕາເມິງ ຫຼັງຈາກນາສົ່ງໄປເຕິກສະ ໄປຈະປະສົບເກິອັນຕະລາຍເປະກອນແກະເນິກທີ່ໂກຼນືຕິຕາຕີກະປາງຈໍຈະຈອກທີ່ກະເຈົ໋າ. 4ມະຈຽງປຣັກ, ຫຼື ກະເປົ໋າເດີນທາງ, ຫຼື ແມ່ນແຕ່ເກີບເພີ່ມເຕີມ ມະເບົ໋າເກິປີນຸ໋ຍທີ່ໄມ ພານະລະຫວ່າງໂຕຼງ. ເພາະວ່າໄມຢີໃມ໋ເວລາພຽງພໍ. 5ບໍ່ວ່າໄປຈະມູດນືສະຫນາມອາເຕກໍຕາມ ກ່ອນອື່ນເນເບົ່າອວຍພອນຄອບຄົວເຢຍວ່າ, ‘ສັນຕິສຸກຈົ່ງໃມ໋ແກ່ສະນາມແນັເທີ້ນ.’ 6ຖ້າໃມ໋ປີນຸ໋ຍຮັກສັນຕິສຸກອາໃສ່ໂກຼນືຄອບຄົວແນັ ພຣະພອນແຫ່ງຄວາມສະຫງົບສຸກທິໄມຈະໂກຼເກິລາວ, ແຕ່ຖ້າລາວຢີຮັກສັນຕິສຸກ ລາວຈະຢີປິດຮັບພຣະພອນແຫ່ງຄວາມສະຫງັບສຸກທິໄມ. 7ຈົ່ງໂກຼນືສະນາມເຢຍຈ໋ອງ ແລະເຍດຕາມທີ່ຫາມາຍອຳທ່ານ. ດ້ວຍວ່າ, ຄົນງານກໍ່ຄວນຈະປິດຮັບຄ່າແຮງງານທິຕົນ ມະເຄືອນທີເກິດສະນາມນີ້ ເຕິກໂກຼສະນາມອື່ນ. 8ບໍ່ວ່າໄປຈະມູດນືເມືອງອາເຕກໍຕາມ ແລະໄທເມືອງເຢຍຍິນດີຕອ້ນຮັບທ່ານຈົ່ງຈ໋ອງຈານາທີ່ຫາມາຍຈັດຕຽມອຳທ່ານ. 9ຈົ່ງຮັກສາປີນຸ໋ຍທີ່ໃມ໋ພະຍາດໂກຼນືເມືອງເຢຍເນເຣາະພະຍາດ ແລະປະກາດແກ່ປະຊາຊົນນືເມືອງວ່າ, ‘ອານາຈັກທິພຣະເຈົ້າປິດເຈິະພຶ໋ທ່ານຕຼຸບສະເນ໋ະສະ.’ 10ແຕ່ທຸກສຸບທີ່ໄປມູດນືເມືອງອາເຕ ແລະໄທເມືອງເຢຍຢີໂຍມຕອ້ນຮັບໄປ ຈົ່ງເຍືອຍເຕິກຕາມຖະຫນົນທິເມືອງເຢຍ ແລະເບົ໋າວ່າ, 11‘ແມ່ນແຕ່ຂີ້ຝຸ່ນປະເຕ໋ຍທິເມືອງແນັ ທີ່ເຕັດຊຶງທິສິນາ ສິນາກໍຈະໂປຼຍເຍືອຍເຜີເຕືອນໄປວ່າສີນາຢີຮັບຜິດຊອບຖ້າພຣະເຈົ້າໂທດໄປ ເພາະວ່າໄປຢີເຊີຕາເມິງພຣະເຈົ້າ, ແຕ່ຈົ່ງຈຳທົວະວ່າ ອານາຈັກທິພຣະເຈົ້າປິດເຈິະທາຕຽບບັດພຶ໋ໄປສະ’ 12ພຣະເຢຊູເຈົ້າເບົ໋າອີກວ່າ ເຮິຕະໄງຕັດສິນໂທດທິເມືອງໂຊໂດມ ກໍຈະກັນໂຊດເປີງໂທດທິເມືອງແນັ.”
ຊົງຕິຕຽນເມືອງຕ່າງໆທີ່ຢີໂຍມເຊີ
(ມທ 11:20-24)
13“ແຕ່ປະຊາຊົນທິເມືອງໂຂຣາຊິນເອີຍ ແລະເມືອງເບັດຊາອີດາຈະໃມ໋ບັນຫາໃຫຍ່ລວງ ເພາະຫາມາຍຢີໂຍມກັບໃຈ ປີນຸ໋ຍນືເມືືອງຕີເຣ ແລະຊີໂດນຢີເຄີຍຕາຍການອັດສະຈັນມີສະເນີ ເປະນາປິດປືຼືມນືເມືອງທິໄມ ຖ້າຫາມາຍປິດຕາຍຫາມາຍກໍ່ປິດກັບໃຈດ້ວຍການສົບຜ້າກະສອບປອຣ໌ຈ໋ອກປຣໍປຣຸໃສ່ໂຕຼຍທິຕົນເອງ ເຜີສະແດງເນຕາຍວ່າຫາມາຍປິດປາລັກເກິດບາບທິຫາມາຍສະ, 14ແຕ່ເຮິຕະໄງຕັດສິນໂຕດສະເນ໋ະ ພຣະອົງຈະລົງໂທດເພີ່ມເຕີມປະຊາຊົນທິເມືອງໂຂຣາຊິນ ແລະເມືອງເບັດຊາອີດາກໍ່ຮ້າຍແຮງເປີງເມືອງຕີເຣແລະຊີໂດນ. 15ໄປຊາວກາເປນາອູມເອີຍມະຄຶດວ່າພຣະເຈົ້າຈະໃຫ້ກຽດໄມ ນືສະຫວັນທຳເປີງປີນຸ໋ຍອື່ນ ໄມຈະຕຼໍຕັກເຕືອຍເຮິນະຣົກ.”
16“ສາວົກທິນາເອີຍ ກັອນທີ່ຕາເມິງໄປ ກໍປິດຕາເມິງນາ ແລະ ກັອນທີ່ຢີໂຍມຮັບໄປ ກໍປະຕິເສດນາ ແລະຜູ້ທີ່ປະຕິເສດນາ ກໍປະຕິເສດພຣະເຈົ້າຜູ້ທີ່ສົງນາເຈິະ.”
ເມົ໋າເປິເຈັດປຣຽຣ໌ຣາບີງເຈິະ
17ດັ່ງນັ້ນ ເອີນເປິເຈັດປຣຽຣ໌ຣາເຢຍກໍບີງເຈິະດ້ວຍຄວາມຊົມຊື່ນຍິນດີທີ່ສຸດ ຫາມາຍເບົ໋າວ່າ, “ພຣະອົງເຈົ້າເອີຍ ແມ່ນແຕ່ບັນດາປຼ໋ະປຼີຢີເຣາະກໍເຊີຕາເມິງເອີນຂ້ານ້ອຍ ເມືອເອີນຂ້ານ້ອຍໂຕ໋ະປະຕູໄອເຍືອຍເກິດປີນຸ໋ຍເຮິນາມທິທ່ານ.”
18ພຣະເຢຊູເຈົ້າເບົ໋າເກິເອີນເຫີວ່າ, “ນາປິດຕາຍມານຊາຕານເກຼ໋ະເຕື໋ອຍຈາກກຼົມ ດັ່ງລາລາດ. 19ຮາເລແມ! ນາປິດອຳໄປໃມ໋ສິດອຳນາດຕືພິ໋ ແລະສີໂທຍເອົາຊະນະໄອໂຕດແອ ແລະເນໃມ໋ຣິດອຳນາດເໝືອກຳລັງ ທິສັດຕູ ແລະຢີໃມ໋ສິ່ງອາເຕຈະປືຼມອັນຕະລາຍແກ່ໄປປິດ 20ແຕ່ມະປິດຊົມຊື່ນຍິນດີທຳ ເຮິສິ່ງເຫຼົ່າແນັ ຄືເພາະປຼ໋ະປຼີໂຍມເຊີຕາເມິງໄປ, ແຕ່ຈົ່ງຊົມຊື່ນຍິນດີທຳເປີງເຢຍອີກ ເພາະທີ່ເນາະທິໄປປິດຈົດທົວະສະນືສະຫວັນສະ.”
ພຣະເຢຊູເຈົ້າຊົມຊື່ນຍິນດີ
(ມທ 11:25-27; 13:16-17)
21ເຮິເວລາໂມງເຢຍ ພຣະເຢຊູເຈົ້າກໍປີງເຕິກດ້ວຍຄວາມຊົມຊື່ນຍິນດີ ດວ້ຍພຣະວິນຍານບໍຣິສຸດເຈົ້າ ຈຶ່ງຊົງເບົ໋າວ່າ, “ຂາ້ແດ່ພຣະບິດາເຈົ້າ ອົງພຣະຜູ້ເປັນເຈົ້າທິສະຫວັນ ແລະປຼີປະເຕ໋ຍໂລກ, ຂ້ານ້ອຍຂອບໃຈພຣະອົງ ເພາະພຣະອົງປິດຊົງປິດບັງຄວາມມາດເຫລົ່າແນັທົວະ ຈາກຜູ້ໃມ໋ການສຶກສາແລະສະຕິປັນຍາ ແຕ່ປິດຊົງເປີດເຜີຍອຳແກ່ຜູ້ທີ່ເປຼີຍເປະກອນກາເລດຈື ຂ້າແດ່ພຣະບິດາເຈົ້າ ພຣະບິດາເຈົ້າຊົງພໍໃຈທ່ານທີ່ທ່ານປຼືມເປະແນັ.”
22“ພຣະບິດາເຈົ້າທິຂ້ານ້ອຍພຣະເຈົ້າປິດຊົງມອບສິດອຳນາດອຳແກ່ຂ້ານ້ອຍກ່ຽວເກິໂຕດສິ່ງໂຕດຢ່າງ ຢີໃມ໋ກັອນຈືພຣະບຸດມາດ ນອກຈາກພຣະບິດາເຈົ້າແລະຢີໃມ໋ກັອນຈືພຣະບິດາເຈົ້າມາດນອກຈາກພຣະບຸດ ແລະ ຜູ້ທີ່ພຣະບຸດເລຼີກທີ່ຈະເປີກເຜີຍພຣະອົງ,” 23ຈາກນັ້ນພຣະເຢຊູເຈົ້າກໍປາລັກເຕິກເຮິເອີນສາວົກແລະເບົ໋າຕໍ່ຫາມາຍເປຼີຍທີ່ສ່ວນຕົວວ່າ, “ປະຊາຊົນໂຕດແອ ຜູ້ທີ່ປິດຕາຍ ສິ່ງທີ່ໄປປິດຕາຍກໍໂຊກດີມາດທີ່ປິດຕາຍ. 24ນາເບົ໋າໄປຕາມຄວາມຈິງວ່າ, ‘ຜູ້ທຳນວາຍ ແລະກະສັດທຳຮາ ເຮິສະໄໝ່ບູຮານໂງນຕາຍສິ່ງທີ່ໄປຕາຍ ແຕ່ຫາມາຍຢີປິດຕາຍ ແລະຫາມາຍໂງນປິດຊ໋ອງສິ່ງທີ່ໄປປິດຊ໋ອງ ແຕ່ຫາມາຍຢີປິດຊ໋ອງ.’”
ຄຳອຸປະມາເລື່ຶອງໄທຊາມາເຣຍປີນຸ໋ຍເກີຼມເຣາະ
25ໂມຍຕະໄງ ເຮິຂະນະທີ່ພຣະເຢຊູກຳລັງສອນ, ໃມ໋ຄູສອນກົດບັນຍັດເຈິະທັຽງພຣະອົງເຜີທົດສອບພຣະອົງລາວຈຶ່ງເຕືອນວ່າ, “ອາຈານເອີຍ, ຂ້ານ້ອຍຈະຕ້ອງປືມເປະເຕເຜີວ່າພຣະເຈົ້າຈະອຳຊີວິດນິຣັນດອນແກ່ຂ້ານ້ອຍ?”
26ພຣະເຢຊູເຈົ້າເພຼີບລາວວ່າ, “ກົດບັນຍັດທິໂມເຊໃມ໋ຄຳຂຽນທົວະວ່າເປະເຕ? ເມື່ອທ່ານອ່ານແລ້ວທ່ານເຂົ້າໃຈເປະເຕ?”
27ແລ້ວກະລໍປີນຸ໋ຍເຢຍກໍເພີຼບວ່າ, “ຈົ່ງຮັກອົງພຣະຜູ້ເປັນເຈົ້າ ພຣະເຈົ້າທິໄມ ດ້ວຍສຸດໃຈ ດ້ວຍສຸດຈິດ ດ້ວຍສຸດກຳລັງ ແລະດ້ວຍສຸດຄວາມຄຶດທິໄມ” ແລະ “ຈົ່ງຮັກເມົ໋າເມີງເປະຮັກໄມເອງ.”
28ພຣະເຢຊູເຈົ້າເພຼີບວ່າ, “ທ່ານເບົ໋າຕຼໍສະ ຈົ່ງປຼືມເປະແນັແລະໃມບັດປິດຊີວິດ.”
29ແຕ່ຄູສອນກົດບັນຍັດ ໂງນສະແດງວ່າຕົນເປຼີຍປີນຸ໋ຍສິນທຳ ລາວຈຶ່ງເຕືອນພຣະເຢຊູເຈົ້າຕື່ມວ່າ, “ແມ່ນກັອນເປຼີຍເມົ໋າເມີງທິຂ້ານ້ອຍ?”
30ພຣະເຢຊູເຈົ້າອຳຄຳຕອບແກ່ລາວດັ່ງແນັວ່າ, “ມີສຸບໃມ໋ກະລໍມີຣາ ກຳລັງເຕືອຍເຕິກເກິດນະຄອນເຢຣູຊາເລັມເຕິກທີ່ເມືອງເຢຣີໂກ ແລະເຮິລະຫວ່າງໂຕຼງ ເມົ໋າໂຈນປິດຕາບສົກລາວ ແລະຈ໋ອກໂຕດສິ່ງໂຕດຢ່າງທີ່ລາວໃມ໋ ລວມທັງເຄື່ອງສົບທິລາວ ຫາມາຍປິດສົກລາວ ແລະທີຢາຕູເຕິກປຼືມເນລາວເກືອບເກດ. 31ຕໍ່ມາປະໂຣຫິດມີຣາ ປິດເຕິກຕາມໂຕຼງເຢຍເຜີເຕິກເມືອງເຢຣີໂກເມືອຕາຍປີນຸ໋ຍແນັ ແຕ່ລາວປິດກໍຕາເຕິກເວັ້ນກາຍເຕິກຟາກອື່ນ. 32ເຮິເວລາດຽວກັນ ໃມ໋ປີນຸ໋ຍເລວີອີກມີຣາຕາເຕິກຕາມໂຕຼງເຢຍ ແລະຕາຍກາລໍແນັ ແຕ່ລາວກໍຕາເຕິກເວັ້ນເຕິກໂຕຼງອື່ນກາຍເຕິກມີສະເນີ. 33ແຕ່ໃມ໋ປີນຸ໋ຍຊາມາເຣຍມີຣາ ທີ່ເດີນໂຕຼງເຈິະພຶ໋ບ່ອນທີ່ກາລໍຜູ້ເຢຍກູຍໂກຼ ແລະເມືອເຫີຕາຍປີນຸ໋ຍແນັສະ ເຫີໃມ໋ເກຼີມສະເລິະ. 34ລາວຈຶ່ງມູດເຕິກທັຽງເຫີຈ໋ອກນໍ້າມັນ ແລະຕາເພຍອະງຸ່ນຖອກໃສເຈຼິທິລາວ ແລະຈ໋ອກສາໂຊຍກາຊຼອບເຈິຼອຳລາວ ແລ້ວລາວກໍ່ເຢີກກະລໍປີນຸ໋ຍເຢຍ ຕຶກກຳປຶງປືດແຊ໋ະທິຕົນ ແລະຈຽງລາວເຕິກໂຮງແຮມແຫ່ງໂມຍ ແລະເອົາໃຈໃສ່ບົວລະບັດລາວ. 35ຕະໄງຕໍ່ມາ ລາວປິດຈ໋ອກປຼັກປຣຽຣ໌ຫລຽນອຳຜູ້ຮັກສາໂຣງແຮມ ລາວເບົ໋າປີນຸ໋ຍຮັກສາໂຮງແຮມວ່າ, ‘ຈົ່ງຊ່ວຍຮາເລກາລໍປີນຸ໋ຍແນັເນເຣາະເນີ ເມື່ອຂ້ານ້ອຍບີງເຈິະໂຕຼງແນັ ຂ້ານ້ອຍຈະຈ່າຍປຣັກອຳຄືນ ໄມປິດໃຊ້ຈາຍເກິລາວຕາມາ.’
36ຈາກນັ້ນ ພຣະເຢຊູເຈົ້າຖາມຜູ້ສອນກົດບັນຍັດວ່າ ຕາມຄວາມຄິດເຫັນທິທ່ານກັອນເຮິແປປີນຸ໋ຍແນັ ທີ່ເປຼີຍເພື່ອນບ້ານທີ່ມາດທິປີນຸ໋ຍທີ່ຕຼໍເມົ໋າໂຈນປຸ້ນເຢຍ?”
37ອາຈານສອນກົດໝາຍປີນຸ໋ຍເຢຍເພຼີບວ່າ, “ແມ່ນຜູ້ທີ່ໃມ໋ເກີມສະເລິະຕໍ່ລາວ.”
ພຣະເຢຊູເຈົ້າເບົ໋າສອນລາວວ່າ, “ທ່ານຈົ່ງເຕິກປືມເປະແອມີສະເນີ.”
ພຣະເຢຊູເຈົ້າຢ້ຽມຢາມມາທາ ແລະມາຣີ
38ຂະນະທີ່ພຣະເຢຊູເຈົ້າກຳລັງຕາເຕິກເກິເອີນສາວົກທິພຣະອົງເຕິກທີ່ນະຄອນເຢຣູຊາເລັມ ພຣະອົງກໍເຈິະພຶເມີງແຫ່ງໂມຍ ເຮິທີ່ເມີງເຢຍໃມ໋ຕາເຣມີຣາທີເນາະວ່າ ມາທາ ແລະນາງປິດຕ້ອນຮັບພຣະອົງເກິສາວົກເປີຍແຂກໂກຼເຮິສະນາມທິຕົນ. 39ແລະມາທາໃມ໋ເອ໋າະປີເຣ໋າະມີຣາທີ່ເນາະວ່າ ມາຣີ ຜູ້ທີ່ເຈິະກຳໂກຼຕາຕຽບຊຶງທິພຣະເຢຊູເຈົ້າ ແລະເລີ່ມຕາເມິງຄຳສັ່ງສອນທິພຣະອົງ. 40ສ່ວນມາທາເຢຍ ໃມ໋ແຕ່ວຸ້ນວາຍໂກຼເກິການປືຼມຈານາ ແລະວຽກຕ່າງໆ. ດັ່ງເຢຍນາງຈຶ່ງເຈິະທຽ້ງພຣະເຢຊູເຈົ້າ ແລະເບົ່າວ່າ, “ພຣະອົງເຈົ້າເອີຍເອ໋າະປີເຣ໋າະເປຼເນຂ້ານ້ອຍປືມວຽກໂຕດແອແຕ່ມີຣາ? ຈົ່ງເບົ່ານາງເນເຈິະຊ່ວຍຂ້ານ້ອຍແດ່ທ້ອນ.”
41ແຕ່ອົງພຣະຜູ້ເປັນເຈົ້າເພີຼບນາງວ່າ, “ມາທາ ມາທາ ເອີຍໄມກັງວົນແລະມົວວຸ້ນວາຍໂກຼເກິວຽກແທ້ນໍ 42ແຕ່ໂມຍສິ່ງສຳຄັນມາດເຢຍ ແລະນາງ ມາຣີ ປິດເລີຼກຈ໋ອກສິ່ງທີ່ສຳຄັນທີ່ສຸດເຢຍແລ້ວ ແລະຢີໄມ໋ກັອນຈະຍາດຈ໋ອກສິ່ງແນັເຕິກຈາກນາງປິດ.”
Currently Selected:
ລູກາ 10: LVI
Highlight
Copy
Compare
Share
Want to have your highlights saved across all your devices? Sign up or sign in
La vy Bible by Beyond Translation is licensed under Creative Commons Attribution-ShareAlike 4.0 License.
