လုကာ 23
23
အခန် (၂၃)
ဟောင့်လေးရောမခွမ်ခံ ပိလတ်ဆောင့်
(မဿဲ ၂၇:၁-၂၊ ၁၁-၁၄။ မာကု ၁၅:၁-၅။ ယောဟန် ၁၈:၂၈-၃၈)
1ထွို့မဲ့ ဂျူးပလူးမျိုအဒူအကဲဖုန်း ကအိုစုဒါ တရာလွှတ်တော်ကုစာ ကားကအိုဖုန်းအွယ့် ဟောင့်လေးလိုကာ ကိုယ်တော်ယေရှု ရောမခွမ့်ခံပိလတ်ဆောင့်ထွို့ 2“ပလူးဒွိုးပလားဒွို ပျန့်တို ပလူးအိုဒေါင့်တလျှက်တို ဖီကျန်ဆက်လိုကာမာ အခွမ် ရောမဧကရာဇ်ဆောင့်မာ နောင် အာနန်နောင်အာနန် ပျန့်တို ခွမ့်ခမ်းအပါး ကဟောင့်ဒါ မေရှိယနိန်းအွယ့်ထွို့ မိုးဖီပလူးဖုန်း ပုန်ကန်လိုကာရောမစိုးရဒွို က့သျှီဘာ” ဒေါင့်ယွူလိုကာ ကိုယ်တော် ပိလတ်မေငါ့ကု။
3အွယ့်ခါ့ ခွမ့်ခံပိလတ်အွယ့် “နားနုဲင့် ပျန့်ယွမ်တို ဂျူးဖုန်း ခွမ့်ခမ်းနောဝ်” တစီ့ကိုယ်တော်နိန်းအွယ့် အွယ့်ကြားမဲ့
ကိုယ်တော်အွယ့် “နားကဒေါင့်ဒါနုဲင့် အိုမေတို” ပြန်မိန့်ချာဒါ့နိန်းအွယ့်။
4ခွမ့်ခံပိလတ်အွယ့် လှည့်ဟွိုင့်လေး ဂျူးပုရောဟိတ်အဒူအကဲဖုန်းနောင် လူထုဒိုင့်ထွို့ “ငါးလီသျှီဟာ ပလူးဒွိုးပလားလောင် အပျက်တကျွိုကျွိုဟာ” ဒေါင့်တွို့နိန်းအွယ့်လဲ့
5အာကာကားကအိုအွယ့် “ပလူးဒွိုးပလားဒွို တေဂါလိလဲကန်ထွို့ တွိုတွို့ ခမ်လန်ဒွိုးကုပါ စွမ့်တာ ယုဒအကလောင်လူးထွို့ မိုးဖီကန်စာဖုန်း ရှုပ်ချက်ထန်တာ စချိုလေတာထွို့ ဒွိုးခါ့ ဒွိုးကုပါလဲ့ လေမိုးတွိုလိထွို့ဟနေ” ဒေါင့်သေချာကာတာ နိန်းအွယ့်။
ဟောင့်လေးယေရှု အုပ်ချုပ်စာဟေရုဒ်မေငါ့ကု
6ခွမ့်ခံပိလတ် ထွိုင်ဟွမ့် ဒေါင့်တာနိန်းအွယ့်ခါ့ “ပလူးဒွိုးပလားဒွို ဂါလိလဲကန်စာနောဝ်” တစီ့လေနိန်းအွယ့်ထွို့ 7ထွိုင်သိ ပျန့်တို ပလူးအို အုပ်ချုပ်စာဟေရုဒ် ကအုပ်စိုဒါ ဂါလိလဲကန်ကုစာခါ့ ဖီတုန်လေး ကိုယ်တော်ယေရှု အွယ့်ခါ့ကု ကအိုတွိုလေးဒါ ဂျေရုဆလင်ဝိန်းကု အုပ်ချုပ်စာဟေရုဒ်ဆောင့်။
8အုပ်ချုပ်စာဟေရုဒ်အွယ့် အိုဟွမ့်စေးကန်းထွို့လိ ကိုယ်တော်ယေရှုခရာထွို့ အိုဘသာသျှီငီးလိ အွယ့်ကြားမဲ့ ထွိုင်သျှီကိုယ်တော်ထွို့ ဟွမ့်ခိုထန်ယွမ်တွို့တာ။ အာအွယ့် အိုမောင်း အီသျှီဘာ ကိုယ်တော်အီမိုးနေ့ တဟွမ့်ဆန်အန်ဖရာခရာ အကျွိုကျွို။ 9အွယ့်မဲ့ အုပ်ချုပ်စာဟေရုဒ်အွယ့် တစီ့ကိုယ်တော် တတစီ့ဖုန်းဟေတန်လဲ့ ကိုယ်တော်အွယ့် ပြန်ဖရေချာဟ တအကျွိုကျွို။ 10ထွို့မဲ့ ဂျူးပုရောဟိတ်အဒူအကဲဖုန်းနောင် ကျမ်ဒါဆရာဖုန်းအွယ့် တထွိုင်ထန်တာထွို့ ယွူ့နွိုင်လိုကာကိုယ်တော်။ 11အုပ်ချုပ်စာဟေရုဒ်နောင် အာကျေ့ဖုန်းအွယ့် တငါးပလာလိုကာ ကိုယ်တော်ထွို့ အာကာအွယ့် အန်ချန့်လိုကာ ကိုယ်တော် အိုတို့ ကန်ကျိန်းထွော့်ခူနောင့် တန်ဖိုဒူထွို့ ပြန်တုန်လေးချာဒါ့ ခွမ့်ခံပိလတ်ဆောင့်။ 12အုပ်ချုပ်စာဟေရုဒ်နောင် ခွမ့်ခံပိလတ်အွယ့် နောင်နိုင်ငံရေအနေဒွို အကီခါ့ အိုပျန့်ကာတိုရန်ဆူဖုန်းလဲ့ အွယ့်ငြီးကုဟို့ ပျန့်လေးကာတွို့ ဖောဝ်ဖုန်း။
ကိုယ်တော်ယေရှု ခံဘာဖီဒဏ်စီ့
(မဿဲ ၂၇:၁၅-၂၆။ မာကု ၁၅:၆-၁၅။ ယောဟန် ၁၈:၃၉-၁၉:၁၆)
13ခွမ့်ခံပိလတ်အွယ့် အန်ချန့် ပုရောဟိတ်အဒူအကဲဖုန်း၊ ဂျူးပလူးမျိုအဒူအကဲဖုန်းနောင် လူထုပရိသတ်ဖုန်း အိုစုတာထွို့ 14“ပလူးဒွိုးပလားဒွို အိုမိုးဖီ ပလူးဖုန်း ပုန်ကန်လိုကာ ရောမစိုးရ နားက့ဒေါင့်ကာနိန်းအွယ့်ထွို့ ဟောင့်လေးလိုကာငါးဆောင့် အွယ့်ကြားမဲ့ ငါးကျက်ချေတွို့အာ နားက့ကားကအို မေငါ့ကုလဲ့ ငါးလီသျှီဟာ ပလူးဒွိုးပလားလောင် အပျက်တကျွိုကျွိုဟာ။ 15ဟေရုဒ်လဲ့ ကွင်အာအပျက် လီမို့ဟမဲ့ ဖီဟအပျက်ဒဏ် တကျွိုကျွိုထွို့မဲ့ ပြန်တုန်ချာဒါ့ငါးဆောင့်။ ပလူးဒွိုးပလားကု ကစီ့ထွိုက်ဒါ အပျက်တကျွိုကျွို လီအိုဟဒွို အိုတင်ရှာတို။ 16အွယ့်ကြားမဲ့ ဖီအာဒဏ် ခံဘာတွယ်ထွို့ အီဖီကြွ့ချာဒါ့အာ” ဒေါင့်နိန်းအွယ့်။ 17ခွမ့်ခံပိလတ် ကဒေါင့်ဘာဒါ နိန်းအွယ့်ဒွိုပျန့်တို ပွဲငြီးကု ဖီလွှတ်ထန်ဖီဘာ ဂျူးပလူးမျို ထောင်စာအပလား ကွက်ထုံစံအွယ့်ကြားမဲ့ ဟနေ။#23:17 ကျမ်ထိပိန်ဘာဘာကုဒီ့ လိတ်ဒွိုးပိုဒ်ပါဟ။
18ဒေါင့်မာလဲ့ လူထုဖုန်း ကားကအိုအွယ့် “မိုးစီ့အာထွို့ ဖီကြွ့ဖီ ဗာရဗ္ဗ” က့ထွို့ ကျွူ့လိုကာတွို့တာ အလိုင်ချင်။ 19ဒွိုးခါ့ ဗာရဗ္ဗဒွို ပျန့်တို ပလူးမိုးလွမ်မာစေးကန်း ဂျေရုဆလင်ဝိန်းကု ကပျန့်ထန်ဒါ ပုန်ကန်မှုနောင် မိုးစီ့ပလူးမှုစာထွို့ အိုခန့်ဘာတာထောင်ကု။
20ပိလတ်အွယ့် ဘသာဖီကြွ့ ကိုယ်တော်ယေရှု အွယ့်ကြားမဲ့ တစီ့ထိုင်ဒါ့ လူထုဖုန်းကားကအို ဒါ့အလိုင်။ 21ဒေါင့်မာလဲ့ အာကာအွယ့် “ဒင်ထန်အာ တထွမ်အျန့်ကျွော့်ယားလောင်လုဲင်၊ ဒင်ထန်အာ တထွမ်အျန့်ကျွော့်ယားလောင်လုဲင်#23:21 အန်ဒင်ထန်တထွမ်အျန့်ကျွော့်ယားလောင်ဒွို ပျန့်တို ရောမဖုန်းဒွို မေဖီထောင်စာဖုန်းဒဏ်စီ့ခါ့ ကစုံကျီ့ဒါ တနည်ဖုန်းကု အမျိုတိုဟနေ။” အိုကျွူ့ဆွက်လိုကာဘို့နိန်းအွယ့်။
22အွယ့်ခါ့ ပိလတ်အွယ့် “အာဒွို အိုမိုးလွမ်မာစေးကန်း အပျက်မျိုနိန်းမာ။ ငါးလီမို့ဟာ အာအပျက် တွိုတွို့ဖီဘာဒဏ်စီ့။ အွယ့်ကြားမဲ့ ဖီအာဒဏ်ခံဘာတွယ်ထွို့ အီဖီကြွ့ဖီအာ” ဒေါင့်ထိုင်ဒါ့နိန်းအွယ့် အန်တွမ့်လိုင်ကု။
23ဒေါင့်မာလဲ့ လူထုပရိတ်သတ်#23:23ဒွိုးကုပါ လူထုပရိတ်သတ် ကဒေါင့်ဒါဒွို ပျန့်တို ဂျူးပုရောဟိတ်အဒူအကဲဖုန်း ပလူးဖုန်းတိုဟနေ။ဖုန်းအွယ့်လဲ့ က့စင်လိုကာဘို့ ဖီကအန်ဒင်ထန်ကိုယ်တော်ယေရှု တထွမ်အျန့်ကျွော့်ယားလောင်။ 24ကန်စာ့စွက်ကု ခွမ့်ခံပိလတ်လဲ့ ဆုံဖြတ်လေ အီမိုးနောင် လူထုဖုန်းကကျွူ့ဒါအတွုန်ထွို့ 25အာအွယ့် ဖီကြွ့ကေ့ လူထုဖုန်း ဘသာအန်ချန့်ဖီကြွ့ကေ့ဒါ ပလူးမိုးလွမ်မာ ပုန်ကန်မှုနောင် မိုးစီ့ပလူးမှုဖုန်းထွို့ အိုခန့်ဘာတာထောင်ကု ထောင်စာဗာရဗ္ဗထွို့ ဖီကမိုးနောင် ပလူးအွယ့်ဟို ဆန္ဒအတွုန်တာ ဖီအပ်လေကိုယ်တော်ယေရှု အာကျေ့စာဆောင့်။
ဒင်ကိုယ်တော်ယေရှု တထွမ်အန်ကျွော့်ယားလောင်
(မဿဲ ၂၇:၃၂-၄၄။ မာကု ၁၅:၂၁-၃၂။ ယောဟန် ၁၉:၁၇-၂၇)
26ကျေ့စာဖုန်း အိုဟောင့်လေးကိုယ်တော်တွင် သျှီလိုကာ ကုရေနေရပ်ကုကအိုဒါ ပလားနျန်းရှိမုန်အွယ့် အိုလုဲင်ကုထွို့ ကျိန်းကျိန်ဂျေရုဆလင်ဝိန်းကုခါ့ ကျန်းလိုကာအာထွို့ အန်ချန့်ယိုးလိုကာ တထွမ်အျန့်ကျွော့်ယားထွို့မဲ့ အန်ချန့်တွဲ့ကိုယ်တော်ကန်စာ့။ 27နောင်ပလူးဖုန်းဟေတန်ထွို့ တွက်လိုကာအင့်ထွို့ အိုငွိုလိုကာတာ ကိုယ်တော်တာ ပမွော်အွယ့်ဟိုဖုန်းလဲ့ တွဲ့လေးလိုကာ ကိုယ်တော်ကန်စာ့။ 28ဒေါင့်မာလဲ့ ကိုယ်တော်အွယ့် ခွယ်လေ အာကာဒိုင့်ထွို့ “ပမွော်ဂျေရုဆလင်ဝိန်းကုဖုန်း၊ ကျန်ငွိုကာမာ ငါးတာမာ။ ငွိုလိုကာဘို့ နားက့တာနောင် နားက့ဖုဖုန်းတာငါလုဲင်။ 29‘ပမွော်အိုဒုဲင်၊ ပမွော်ဖုလီအိုဖိုဟဖုန်းနောင် ပမွော်လီအိုဖိုဟ ဖုပီအို့ညွှော်စာဖုန်းဒွို ကံခိုတန်’ မငြီး ပလူးဖုန်း အီဒေါင့်ကာနိန်းအွယ့်ဒွို အီတွိုလေးလိထွို့။ 30မေတွိုကာလကုအွယ့် လိတ်ကျမ်ကု ကတျန်စေးကန်းဒါအတွုန်
ပလူးဖုန်းဒွို အီဒေါင့်ကာခေါင့်ဖုန်း ‘ပလင်လင်း က့လောင်လုဲင်’ နိန်းအွယ့်ထွို့
‘အိုပါအွို့က့လုဲင်’ အီဒေါင့်လိုကာ တရွဲဖုန်းနိန်းအွယ့်ဖုန်း။
31ဗွမ့်နောင် တွိုင်မွိုင် အိုတွမ့်စို အပျက်ကကင်ဒါ ငါးဒွိုမသဲ တပျန့်ကေ့နိန်းဒွိုးဖုန်း မေအိုပျန့်အွယ့် ဗွမ့်နောင် တွိုင်မွိုင်ဆိုင့်ဖုန်း ကပျန့်ဒါ အပျက်စရိုက်လီခိုဟစာ နားက့လောင်ဒွို အီကေ့လွို့တွိုတွို့ တျာမာ” မိန့်ဒေါင့်နိန်းအွယ့်။
32အပျက်စာ လငါ့ ဒါ့အန်တငြီ့အွယ့်လဲ့ အီဖီဒဏ်စီ့တွို့နောင်ကိုယ်တော်တာ ခံဘာဟောင့်လေး။ 33မေတွိုထွို့ ခေါင့်နျန်း ခူကလောက်လောင်ထွို့ ဒင်ထန်ကာကိုယ်တော် တထွမ်အျန့်ကျွော့်ယားလောင်ထွို့ သောက်လိုကာမီနာ။ ကိုယ်တော်ပန်တီဒိုင့်နောင် ပန်ချွို့ဒိုင့်အွယ့်လဲ့ ဒင်ထန်လိုကာ အပျက်စာအန်တငြီ့ တထွမ်အျန့်ကျွော့်ယားလောင်ထွို့ သောက်လိုကာမီနာ။ 34အွယ့်ခါ့ ကိုယ်တော်အွယ့် “ဖာ့ဗွယ်ဖရာ၊ အာကာဒွို အိုမိုးလိုကာတဟနာ လီသိလိုကာဟ အွယ့်ကြားမဲ့ ခွင်လွှတ်ဖီ အာကာလုဲင်”#23:34 ဂရိလိတ်ကျမ်အဟန်ဟန်ကုဒီ့ လိမ်ဒွိုးပိုဒ်ပါဟ ဟနေ။ ဆုတောင်တာနိန်းအွယ့်။ ကျေ့စာဖုန်းအွယ့် ဘူ့လိုကာမဲထွို့ ပါးလိုကာ ကိုယ်တော်ကွမ်လာ။
35ပလူးဖုန်းအွယ့် အိုထွိုင်ဟွိုင့်လိုကာတွင် ဂျူးပလူးမျိုအဒူအကဲဖုန်းအွယ့် အိုမိုးပလာလိုကာ ကိုယ်တော်ယေရှုထွို့ “အာဒွို ကယ်ပလူးလငါ့ဖုန်း။ အေ့နေ့ချန်း အာဒွို မေပျန့်ယွမ်တို ဗွယ်ဖရာကရွေစေးကန်းဒါ မေရှိယလဲ့ ဖီအာကယ်ချာတိုးအာနန်လုဲင်” ဒေါင့်လိုကာနိန်းအွယ့်။
36ကျေ့စာဖုန်းအွယ့်လဲ့ မိုးပလာလိုကာထွို့ လေးလိုကာ ကိုယ်တော်ဆောင့်ထွို့မဲ့ ဖီအို့လိုကာဝိုင်စာ#23:36ဝိုင်စာ ကဒေါင့်ဒါဒွို ပျန့်တို တစာသျှီ့အမျို။ စုံလိုကာ ဖီယာစာ့ဖုန်း စက်စာကျီ့တာ။ ယုဒသန် ကျမ်ကုဒီ့ နေ့စေးကန်း ပုံးရည် နိန်းအွယ့်။ထွို့ 37“နားနုဲင့် မေဒေါင့်တို ဂျူးဖုန်း ခွမ့်ခမ်းလဲ့ ကယ်ချာတိုး နားနန်နုဲင့်” ဒေါင့်လိုကာနိန်းအွယ့်။
38ကိုယ်တော် ခူခမ်လွို့ကု ကအိုဒါ တထွမ်အျန့်ကျွော့်ယားလောင်ကုလဲ့ ဖီဘွိုင်စေးကန်းကာ “ပလူးဒွိုးပလားဒွို ပျန့်ဂျူးဖုန်းခွမ့်ခမ်း” #23:38 ဂရိလိတ်ကျမ်အဟန်ဟန်ကုဒီ့ တျန်စေးကန်း လိတ်ဒွိုးပိုဒ်ဒွို တျန်စေးကန်းတိုနောင် ရောမ၊ ဂရိ၊ ဟီဘရူး အန်တွမ်ဖာစာ နိန်းအွယ့်ဟနေ။ကတျန်စေးကန်းဒါ ဆိုင်းဘုတ်အွယ့်ဘာ။
39အပျက်စာ ကခံဘာဒါ ဖီဘွိုင်စေးကန်း တထွမ့်အျန့်ကျွော့်လောင် အပလားကုအွယ့် “နားနုဲင့် မေဒေါင့် ပျန့်မေရှိယအွယ့် ကယ်ချာတိုနားနန်ထွို့ ကယ်ဖီပါငါးလုဲင်” ဒေါင့်ပလာ ကိုယ်တော်နိန်းအွယ့်။
40ဒေါင့်မာလဲ့ အပျက်စာဒါ့ လငါ့ပလားအွယ့် “နားနုဲင် အိုခံဘာလိထွို့ ဖီဒဏ်စီ့ ဗွမ့်ဗွမ့်နောင် ပလူးဒွိုးပလားမသဲ ခစကန်ကောင်း ဗွယ်ဖရာနောဝ်။ 41က့ဒွို မိုးလွမ်မာစေးအပျက် အွယ့်ကြားမဲ့ ခံဘာထွိုက်တို အပျက်ဒဏ်။ ဒေါင့်မာလဲ့ ပလူးဒွိုးပလားဒွို အပျက်တကျွိုငါလဲ့ လီမိုးလွမ်မာဘာဟ” ဒေါင့်ပလူးအွယ့်ပလား နိန်းအွယ့်။
42ထွို့မဲ့ အာအွယ့် “ကိုယ်တော်ယေရှု၊ နားမေကြွာ့ကျိန်းချာဒါ့ အီအုပ်စို ပျန့်နောင်ခွမ့်ခမ်းအပါးခိန်းကု သိနန်ပါငါးလုဲင်” လျှောက်ဆက်ဒါ့ ကိုယ်တော်နိန်းအွယ့်။
43အွယ့်ခါ့ ကိုယ်တော်အွယ့် “ငါးအီဒေါင့်နား အမှန်ဒွို။ နားနုဲင့် ဟန်ငြီးကုဟို့ အီအိုတွဲ့နောင်ငါး ပရဒိသုဘုံ#23:43ပရဒိသုဘုံ ကဒေါင့်ဒါဒွို ပျန့်တို ပလူးတွို့ဖုန်း ဆက်ပြန်မွမ့်ချာဒါ့နောင် ကအိုပွိုင်းဒါ ကျေရင်ဆုံဖြတ်တရာ ကန်စာ့စွက် ခမ်လန်ငင်ချမ်ကု ဟနေ။ကု” မိန့်နိန်းအွယ့်။
ကိုယ်တော်ယေရှု တစီ့
(မဿဲ ၂၇:၄၅-၅၆။ မာကု ၁၅:၃၃-၄၁။ ယောဟန် ၁၉:၂၈-၃၀)
44အွယ့်ခိန်းဒီ့ ပျန့်တို မွိုင်တ့တနွိုင်းခိန်းလဲ့#23:44 မွန်းတည့်ချိန် မွိုင်တ့တနွိုင်းခိန်း ဂရိကျမ်ထိကုဒီ့တွင် “ဆဠမနာရီ” နေ့ထန်စေးကန်းနိန်းအွယ့်။ ဂျူးလူမျိုးဖုန်းဒီ့ တေတွက်အခိန်း နာရီ အို မွိုင်ကိုးအန်စွော့်နာရီကု အွယ့်ကြားမဲ့ “ဆဠမနာရီ” ကဒေါင့်ဒါနိန်းအွယ့်ဒီ့ ဘာသဒေါင့်တို မွိုင်တ့ အစီ့ငြီ့နာရီတိုဟနေ။ တွိုတွို့မွိုင်နိုင့် အန်တွမ့်နာရီခိန်းကု ဟန်ယာအဘာလူးကုအွယ့် အိုသျှီ့တိန်တာ။ 45အွယ့်ခိန်းကုဒီ့ မွိုင်ရောင်ဒွို တမာကျိန်းကေ့ထွို့ ပကင်းဒူ#23:45 ပကင်းဒူဒွိုးဘာဒွို ကအိုပါအွို့စေးကန်းဒါ ခမ်လန်အမြတ်စွက်ဒီ့ဘာတိုဟနေ။ ဗိမာန်တော်ကုအွယ့် ဖာ့ကေ့တွို့ အန်ငြီ့ခို့။ 46ကိုယ်တော်အွယ့်လဲ့ နောင်ငိုစင်းတန်ထွို့ “ငါးဝိညာဉ်ဒွို ဖီအပ်တို ဖာ့ဗွယ်ဖရာကျွော့်ကု” က့ရွက်နိန်းအွယ့်ထွို့ ကျွမ်ကေ့ဆက်။
47ရောမတပ်မှူး ကသျှီဘာဒါ တပျန့်ဒွိုးဘာစာအွယ့် အိုအန်ဖရာဗွယ်ဖရာထွို့ “ပလူးဒွိုးပလားဒွို ပျန့်တို ပလူးတွို့မှန်ယွမ်တွို့စာတို” ဒေါင့်နိန်းအွယ့်။ 48အီလေဟွိုင့်ကာ တသျှီကွင်အွယ့်ဘာတာထွို့ တွိုစုလေးလိုကာဒါ လူထုပရိသတ်ဖုန်းအွယ့် သျှီလိုကာကိုယ်တော်တပျန့်ထွို့ တွက်လိုကာအင့်ထွို့ သ့ပီကာတာထွို့မဲ့ ကျိန်းလိုကာချာဒါ့ အာကာယွမ်ကု။ 49ဒေါင့်မာလဲ့ ကိုယ်တော်ယေရှု ဖောဝ်ကားကအိုနောင် အိုဂါလိလဲကုထွို့ ကပါလေးတွဲ့ဒါ ပမွော်ဖုန်းအွယ့် အိုထွိုင်ပွိုင်းလိုကာတာ ခမ်းလန်ပေါင်းယားယားအတောင်ကုထွို့ ဟွိုင့်လိုကာ တပျန့်အွယ့်ဘာ။
စင်ဂြိုဟ် ကိုယ်တော်ယေရှု
(မဿဲ ၂၇:၅၇-၆၁။ မာကု ၁၅:၄၂-၄၇။ ယောဟန် ၁၉:၃၈-၄၂)
50ယောသပ်အွယ့် ပျန့်ပလူးတွို့ ပလူးခိုအပလားထွို့ ပျန့်ဂျူးပလူးမျိုဖုန်း ဂျူးတရာလွှတ်တော်ကျွိုကုစာ အပလားဟနေ။ 51အာအွယ့် စဖိုတူဟ ဂျူးလွှတ်တော်ကျွိုကုစာလငါ့ တဆုံဖြတ်ဖုန်း နောင် တမိုးဖုန်း ကိုယ်တော်ယေရှုလောင်။ ထွို့ဒါ့ ယောသပ်အွယ့် ပျန့်တိုပလူး အိုအရိမဿဲကုလေးစာထွို့ ပျန့်တိုပလူး အိုလူယွမ်တွို့ ဗွယ်ဖရာသာသနာတော် တွိုလင်းစာ အပလားလဲ့မေမေ။ 52အာအွယ့် အီစင်ဂြိုဟ် ကိုယ်တော်နန်တာ ထွိုင်ကျွူ့ ရောမခွမ့်ခံပိလတ်ဆောင့်ခါ့ ရောမခွမ့်ခံပိလတ်အွယ့်လဲ့ ခွင်ဖီအာ။ 53အွယ့်ကြားမဲ့ အာအွယ့် ချာ့လားလင်းကိုယ်တော်နန် ကအိုဒါ တထွမ်အျန့်ကျွော်ယားလောင်ထွို့ ဗျန့်ဖီနောင် ပိတ်ယာခို။ ထွို့မဲ့ အာအွယ့် အန်ဒင် ကိုယ်တော်နန် စင်ခိုင်အောင့်သ့ ကဒူ့စေးကန်းဒါလုံဒူ ခအန်ဒင်ဖိုကောင်း လမားမားကု။ 54အွယ့်ငြီးအွယ့် ပျန့်မငြီးရျန်းတာငြီးထွို့ အီစမငြီးဆောက်တေတာငြီးတာ အခိန်ဘို့လေလိထွို့။
55ပမွော်အိုဂါလိလဲကု ကပါလေးတွဲ့ဒါ ကိုယ်တော်ဖုန်းအွယ့်လဲ့ တွဲ့လေးကာ ယောသပ်ကန်စာ့ထွို့ စင်ခိုင်အောင့်ခယောဝ်း၊ ဖီအိုတလျာစေးကန်း ကိုယ်တော်နန် နိန်းမာကြားခယောဝ်း သျှီလိုကာဘာ ဟနေ။ 56ထွို့မဲ့ အာကာအွယ့် ကျိန်းချာကာ ဂျေရုဆလင်ဝိန်းကုကအိုဒါ အာကာယွမ်ကုထွို့ အီပူဇော်ကိုယ်တော်တာ ရျန်းစေးကန်းကာ နမ့်မန်ဟွမ်နောင် နံစာဟွမ်ဖုန်း။ ဒေါင့်မာလဲ့ အာကာအွယ့် နောင်ဗွယ်ဖရာပညတ်တော်အတွုန် အိုနာကျာကာတာ မငြီးဆောက်တေတာငြီးကု။
Currently Selected:
လုကာ 23: KVT
Highlight
Share
Copy
Want to have your highlights saved across all your devices? Sign up or sign in
Lahta Bible by Beyond Translation is licensed under Creative Commons Attribution-ShareAlike 4.0 License.
