လုကာ 13

အခန် (၁၃)

လှည့်လေး ဖရာဒိုင့်လုဲင်

1အွယ့်ခိန်းကု ပလူးအဟန်ဟန်ဖုန်းဒီ့ လေးကာ ကိုယ်တော်ယေရှုဆောင့်ထွို့ လျှောက်ဒင်လိုကာ အခိန်းခငီးကောင်းကု ရောမခွမ့်ခံပိလတ်အွယ့် အန်ကြွ့လေး ကျေ့စာဖုန်းထွို့ အန်ချန့်မိုးစီ့ကေ့ ဂါလိလဲကန်စာ ကအိုမိုးလိုကာဒါ ပူဇော် ဗွယ်ဖရာအမှုဖုန်း အခီအခို့ခရာ။ 2အွယ့်ခါ့ ကိုယ်တော်အွယ့် “ပလူးအွယ့်ဟိုဒွို ပျန့်ပလူးအပျက်စရိုက်လီခိုဟ ဟေလွို့ထိုင် ဂါလိလဲကန်ကုကအိုဒါ ပလူးလငါ့ကားကအိုဖုန်း အွယ့်ကြားမဲ့ ကြုံလိုကာဘာ တပျန့်နိန်းဒွိုး နားက့ထင်လိုကာ နိန်းအွယ့်နောဝ်။ 3လုံးဝလီမေဟာ။ ငါးအီဒေါင့်နားက့ဒွို။ နားက့ကားကအိုဒွိုလဲ့ အိုအပျက်စရိုက်လီခိုဟကုထွို့ မေလီလ့လိုကာဟ နောင်တသံဝေဂအွယ့် အီကေ့လိုကာဘာတာ#13:3 အီကေ့လိုကာဘာတာ ကဒေါင့်ဒါဒွို နန်ခန္ဓာယောဝ်း သ့ဝိညာဉ်ယောဝ် အီခံဘာမိုးစီ့လူး ဘသာဒေါင့်တိုနိန်းအွယ့်ဟနေ။ နောင်နိန်းအွယ့်အွယ့်။ 4ပလူးအစီ့စူးပလားအွယ့် ရှိလောင်တဟွိုင့်စင်#13:4 ရှိလောင် တဟွိုင့်စင်ဒွို တဟွိုင့်စင်တေစေးကန်း ဂျေရုဆလင်ဝိန်းခူနောင့်ဒိုင့် ကအိုဒါ ရှိလောင်သျှီ့ကန်ဆောင့် ထွိုင်လင်ပလုဲင်ခါ့ လင်တီလွော်ထွို့ စစီ့လိုကာဘာတာ။ ပလူးအွယ့်ဟိုဒွို ပျန့်တို ပလူးအပျက်စရိုက်လီခိုဟ ဟေလွို့ထိုင် ဂျေရုဆလင်ဝိန်းကုကအိုဒါ ပလူးလငါ့ဖုန်းကားကအို နားက့ထင်လိုကာ နိန်းအွယ့်နောဝ်။ 5လုံးဝလီမေဟာ။ ငါးအီဒေါင့်နားက့ဒွို။ နားက့ဒွိုလဲ့ အိုအပျက်စရိုက်လီခိုဟကုထွို့ မေလီလ့လိုကာဟ နောင်တသံဝေဂအွယ့် အီကေ့လိုကာဘာတာ နောင်နိန်းအွယ့်အွယ့်” မိန့်နိန်းအွယ့်။

အသာလီသာဟဒါ တယွူ့မွိုင် တတိုက်တွုန်

6ထွို့မဲ့ ကိုယ်တော်အွယ့် မိန့်အာတပည့်ဖုန်း တတိုက်တွုန်အဘာဒွို “ပလူးအပလားဒီ့ စူ့စေးကန်း တယွူ့မွိုင်အမွိုင် အာစပျစ်ခြန့်ကု။ အငြီးကု တယွူသာသာခိန်း အာအွယ့် ထွိုင်လေဟွိုင့်ခါ့ သျှီဟအသာဖုန်း။ 7အွယ့်ကြားမဲ့ အာအွယ့် ဟောင့်ဥယျာဉ်မှူးထွို့ ‘ချန်းဟွိုင့်ကျန် တယွူ့မွိုင်ဒွိုးမွိုင်လုဲင်။ တမွိုင်ဒွိုးမွိုင်လောင် ထင်မာတယွူ့သာ အီသာထွို့ လေကွင်ဟွိုင့်လိ အန်တွမ့်နိန်းမှန်မှန်လဲ့ အသာအမာ့ငါလဲ့ ခသာကောင်း။ တယွူ့မွိုင်ဒွိုးမွိုင်ဒွို အကျိုလဲ့လီအိုဟ အိုချွော်ဒုဲင့်ဘို့ခမ်လန် ဟန်လောင်ကု အွယ့်ကြားမဲ့ ပေးကေ့ချန်းလုဲင်’ ဒေါင့်နိန်းအွယ့်။

8ဒေါင့်မာလဲ့ ဥယျာဉ်မှူးအွယ့် ‘ဗွယ် အိုပွိုင်းဟွိုင့်ဖီထိုင်ဒါ့ တမွိုင်ဒွိုးမွိုင် ဒါ့အနိန်းအာ့မွန်။ ငါးအီချွာ တမွိုင်ဒွိုးမွိုင်တီးထွို့ အီစူကျန်ဒါ့ ဟန်ဩဇာ။ 9မေမိုးနိန်းအွယ့်အွယ့် ဒါ့အနိန်းကု အသာ အီသာဒါဒါ့တုဲင်းတို။ အသာမေချန်းလီသာဟမဲ့ ပေးကေ့ဒါတို’ ဒေါင့်နိန်းအွယ့်” မိန်းနိန်းအွယ့်။

ကုဖီပမွော်အပလား မငြီးဆောက်တေတာငြီးကု

10မငြီးဆောက်တေတာငြီး အငြီ့ကု ကိုယ်တော်အွယ့် အိုဟိုစွမ့်ဖီ ဗွယ်ဖရာတရာငိုဖုန်း ဓမ္မာရုံအဘာကု။ 11အွယ့်ကုပါအွယ့် ပမွော်အိုခံဘာ မိစ္ဆာတလီခိုဟမိုး အစီ့စူးနိန်မှန်မှန်အွယ့်ကြားမဲ့ အိုခရွိုင်ဟတာထွို့ ငင်ကောင်ထွို့မဲ့ အိုထွိုင်တွို့ဒါဟတာ အိုအပလား။ 12ကိုယ်တော်အွယ့် ထွိုင်သျှီ ပမွော်အွယ့်ပလားထွို့ ဟောင့်လေအာဆောင့်ထွို့မဲ့ “ပမွော်၊ တေဒွိုးမမေငါ့ နားရောဂါဒွို တမာကင်လိထွို့” မိန့်နိန်းအွယ့်ထွို့၊ 13အာထွိုင်ဒင်ထန် အာကျွော့်တော် ပမွော်အွယ့်ပလားငင်လောင်ခါ့ အလိုင်ချင် ပမွော်အွယ့်ပလားအွယ့် ငင်ဒိန့်တွို့ထန်စွူတွို့ အွယ့်ကြားမဲ့ အိုထွိုင်ထန်တာထွို့ အန်ဖရာထန် ဗွယ်ဖရာ။

14ဒေါင့်မာလဲ့ ကိုယ်တော်ယေရှုအွယ့် ကုတမာဖီ တစာ့ရောဂါ မငြီးဆောက်တေတာငြီးကု အွယ့်ကြားမဲ့ ဓမ္မာရုံတာဝန်ခံခုအွယ့် သ့ဒွိုင်တာထွို့ “နားက့တာ အပတ်ကုဒွို မငြီးမိုးတမိုးအခွင်အို အိုအန်စွော့်ငြီး ပညတ်တော်ကုဒီ့ ခွင်စေးကန်းနိန်းအွယ့်။ အီလေကုကာ တစာရောဂါတာ လေးကာဘို့ အွယ့်ငြီးဖုန်းကုလုဲင်။ ကျန်လေးကာမာ ပလူးလီမိုးဟဒါတမိုး မငြီးဆောက်တေတာငြီးကုမာ” ဒေါင့်လူထုပရိသတ်ဖုန်း နိန်းအွယ့်။

15အွယ့်ခါ့ ကိုယ်တော်အွယ့် “ဆူတော်ကောင်ယောင်ဆောင်စာဖုန်း။ အိုပေါင်းကုထွို့ ဖီကြွ့ထန်တို နားက့ ပူဖုန်း၊ လားဖုန်းထွို့ ဟောင့်လေအို့ကာတိုသျှီ့ မငြီးဆောက်တေတာငြီးကု မေဟနောဝ်။ 16မေနိန်းအွယ့်အွယ့် အာဗြဟံဖုမွော် ကခံဘာဒါ မိစ္ဆာတလီခိုဟပူ နိန်းပေါင်းအစီ့စူးနိန်းစာဒွိုးလဲ့ ဖီကြွ့စင်တို မငြီးဆောက်တေတာငြီးကု မေဟနောဝ်” မိန့်နိန်းအွယ့်။

17ကိုယ်တော်ထွိုင်မိန့်တာနိန်းအွယ့်ခါ့ ပလူးကွင်ငိုင်းစာဖုန်းအွယ့် လ့လိုကာတကသ့ထွို့ တွိုပလူးကသျှီဘာဒါ ကိုယ်တော်ကမိုးဒါ တဟွမ့်ဆန်အန်ဖရာခရာအမှုဖုန်းစာ ကားကအိုအွယ့် ပျော်စွင်ယွမ်လိုကာတွို့တာ ဟနေ။

ဟန်ဒူတပလိန်ကွော နောင်ငြီ

(မဿဲ ၁၃:၃၁-၃၂။ မာကု ၄:၃၀-၃၂)

18ထွို့မဲ့ ကိုယ်တော်အွယ့် “ဖရာသာသနာတော်ဒွို ဗွမ့်နောင်တဟနာ။ အီတိုက်တွုန်နေ့ဘာနောင် တဟနာမေဒေါင့်အွယ့် 19ဗွယ်ဖရာသာသနာတော်ဒွို ဗွမ့်တိုနောင် ဟန်ဒူတပလိန်ကွော#13:19 ဟန်ဒူတပလိန် အိုဒို့ဒါ ဂျူးဖုန်းကအိုဒါဒေသကုဒွို အကွော်ပီးပီထွို့ အမွိုင်ဒွို့ထန်ထွို့ မေဒူထန်ခါ့ အစွိုင်းအိုတွို့ အန်တွမ့်မီတာအာ့ဟနေ။။ ပလူးအပလားအွယ့် ချွော်အကွောထွို့ အန်စူ့ဥယျာဉ်ကု။ အိုတကွောအွယ့်ဘာကုထွို့ ထွိုင်ပျန့်ထန်တမွိုင်ဒူခါ့ ထူဖုန်းအွယ့်လဲ့ တေဟွူ့အတိုင်းဖုန်းလောင်ထွို့ အိုစို့ဒါလိုကာတွို့ဟနေ” မိန့်နိန်းအွယ့်။

20ဒါ့အလိုင် ကိုယ်တော်အွယ့် “ဗွယ်ဖရာသာသနာတော်ဒွို အီတိုက်တွုန်ထိုင်ဘာဒါ့ နောင်တဟနာ မေဒေါင့်အွယ့် 21ဗွယ်ဖရာသာသနာတော်ဒွို ဗွမ့်တိုနောင်ငြီး။ ပမွော်ပလားအွယ့် ချွော်ငြီအကျိထွို့ ထွိုင်စူရိုးလင်းဂျုံဖွမ် အန်တွမ့်ပွမ်ကုခါ့ မိုးဖူကြွာထန်ဖီကျီ့ တအန်ဖုန်းဟနေ” မိန့်နိန်းအွယ့်။

ကန်တင်းငွာ့အျန်

(မဿဲ ၇:၁၃-၁၄၊ ၂၁-၂၃)

22ထွို့မဲ့ ကိုယ်တော်ယေရှုအွယ့် အိုဟိုစွမ့်ဖီ လူထုပရိသတ်ကအိုဒါ တလေးကလေ့ အဘောင်လောင်ကု ကအိုဒါ ဝိန်းဒုန့်ဖုန်းကုစာဖုန်းထွို့ ကြွာ့လေ ဂျေရုဆလင်ဝိန်းကု။ 23ပလူးအပလားအွယ့် “ဆရာ၊ ပလူးခံဘာ တကယ်ဆယ်ဒွို ဆျန်ဆျန်ဟို့နောဝ်”

တစီ့လျှောက်ကိုယ်တော်နိန်းအွယ့်။ 24အွယ့်ခါ့ ကိုယ်တော်အွယ့် “နားက့နုဲင့် ဗွမ့်တိုနောင် ပလူးနွူးကျိန်း ဗွယ်ဖရာသာသနာတော်ကု ကန်တင်းငွာ့အျန်ဒိုင့်စာဖုန်း။ နားက့ဒွို ဖီကနွူးကျိန်းဒါကာ ကန်တင်ငွ့ာအျန်ကုတာ ကြိုစာယွမ်ယွမ်ကာလုဲင်။ ကွက်တဟနာမေဒေါင့်ဘာအွယ့် ပလူးဖုန်းဟေတန်အွယ့် အီကြိုစာနွူးယွမ်လိုကာတွို့ ကန်တင်းငွာ့အွယ့်ဘာကုလဲ့ အီနွူးဒါကာ လီမေဟာ။ 25ယွမ်ဗွယ်အွယ့် တထွိုင်ထွို့ မေဖီထွိုင့်ကေ့ကန်တင်းအွယ့် နားက့ဒွို အီအိုထွိုင်ဘာတာ ခူနောင့်ဒိုင့်ထွို့ ဒုန်ကန်တင်းထွို့မဲ့ ‘ဗွယ်၊ ဘောင့်ဖီကန်တင်း’ အီဒေါင့်လိုကာဘာ နိန်းအွယ့်။

ဒေါင့်မာလဲ့ ယွမ်ဗွယ်အွယ့် ‘ဗွမ့်နောင် ငါးလီသိငါဟနားက့ နားက့ အိုကမာရပ်ဒေသကုလေးဒွိုလဲ့ ငါးလီသိဟာ’ အီဒေါင့်ပြန်ချာဒါ့ နိန်းအွယ့်။

26နားက့အွယ့် ‘က့ဒွို အန်အို့ကိုဖိုတိုနောင်ဗွယ်တို။ ဗွယ်ဒွိုလဲ့ ဟိုစွမ့်ဖီဖိုတိုက့ က့ကအိုဒါ ဝိန်းဒုန့်ဖုန်း ကလေ့လောင်ကုဖုန်း’ ဒေါင့်လိုကာ နိန်းအွယ့်လဲ့

27အာအွယ့် ‘ငါးအီဒေါင့်နားက့ဒွို။ ဗွမ့်နောင် ငါးလိသိငါဟ နားက့ နားက့ အိုကမာရပ်ဒေသကုလေးဒွို ငါးသိဟယွမ်တို။ ပလူးသေ့ဖုန်း၊ အိုငါးဆောင့် စစွာ့ထန်ကာချန်းလုဲင်’ အီဒေါင့်နိန်းအွယ့်။

28အွယ့်ခါ့ အီသျှီလိုကာဘာ အာဗြဟံ၊ ဣဇက်၊ ယာကုပ်နောင်#13:28 အာဗြဟံ နျန်းယွမ်ဒီ့ ပျန့်အာဗြံထွို့၊ အဓိပ္ပာယ်အွယ့် ပျန့် ဂျူးပလူးမျိုးကားကအိုဖာ့။ အရိယာဆူတော်ကောင်လငါ့ဖုန်း ကားကအို ဗွယ်ဖရာသာသနာတော်ကုထွို့ တွိုနားက့ဖုန်းဒွို ခံဝါစွာ့ထန်ဘာ ခူနောင့်ဒိုင့် အွယ့်ကြားမဲ့ နားက့ဒွို အိမ်မေ့ထွို့ သ့ပီ ကူလားတာထွို့ အီငွိုလိုကာဘာတာ။ 29ဂျူးပလူးမျို လီမေဟစာဖုန်းအွယ့်လဲ့ အို လကွမ်၊ လပွူး၊ လဝီ၊ လထ့ အရပ်ရပ်ကုထွို့ လေးလိုကာထွို့မဲ့ အီအိုနင်းကို လိုကာဘာတာ နောင်ပလူးအို ဗွယ်ဖရာသာသနာတော်ကုစာဖုန်းထွို့ အီအန်အို့ကာဘာ တာအခိုစွက်ဖုန်း။ 30ဒွိုးခါ့ကု ပလူးအရေလီပါဟစွက်စာဖုန်းဒွို အီပျန့် ပလူးအရေပါစွက်စာဖုန်းထွို့ ပလူးအရေပါစွက်စာဖုန်းဒွို အီပျန့် ပလူးအရေလီပါဟစွက်စာဖုန်း” မိန့်နိန်းအွယ့်။

ကိုယ်တော်ယေရှုနောင် အုပ်ချုပ်စာဟေရုဒ်

(မဿဲ ၂၃:၃၇-၃၉)

31အွယ့်ခိန်းကု ဖာရိရှဲအဟန်ဟန်အွယ့် တွိုလေးကာ ကိုယ်တော်ယေရှုဆောင့်ထွို့ “အုပ်ချုပ်ဂါလိလဲကန်စာ ဟေရုဒ်ဒွို ဘာသာမိုးစီ့နား အွယ့်ကြားမဲ့ အိုဒွိုးရပ်ကု စစွာ့ထန်ယားကေ့လုဲင်” လျှောက်ကာနိန်းအွယ့်။

32အွယ့်ခါ့ ကိုယ်တော်အွယ့် “လေဒေါင့်ကာ ဟေရုဒ် ကကုဲက်ဒါနောင် ချွူဟန်ဒီ့လုဲင်။ ငါးဒွို ဟန်ငြီးနောင် မွိုင်ကိုးညွှော်ကု အီဝါစွာ့ မိစ္ဆာတလီခိုဟဖုန်းထွို့ အီကုဖီဒါ့တုဲင်း ပလူးလီခရွိုင်ဟစာဖုန်း။ မေဘ့အန်တွမ့်ငြီးကုအွယ့် ငါးအမှုတာဝန်ဒွို အီထွို့ဘ့။ 33ဒေါင့်မာလဲ့ အရိယာဆူတော်ကောင်ဖုန်းဒွို လွို့ဂျေရုဆလင်ဝိန်းကုထွို့ လီစီ့ဘာဟ ရပ်ဒေသလငါ့ကု အွယ့်ကြားမဲ့ ငါးဒွို ဟန်ငြီး၊ မွိုင်ကိုးညွှော်နောင် တွိုတွို့ဒါ့အငြီးကု ငါးအီစစွာ့ဆွက်လေးဘာဒါ့တုဲင်းတို ဂျေရုဆလင်ဝိန်းကု။”

ငွိုတာ ဂျေရုဆလင်ဝိန်းတာ

34“အွို ဂျေရုဆလင်ဝိန်းစာဖုန်း၊ နားက့ဒွို မိုးစီ့ကာ အရိယာဆူတော်ကောင်ဖုန်းထွို့ ဗွယ်ဖရာကအန်ကြွ့လင်းဒါ ပလူးလငါ့ နားက့ဆောင့်ဖုန်းဒွိုလဲ့ ဒွီးစီ့လိုကာနောင်လုံ။ ဗွမ့်နောင် စာ့မွိုဒွို အိုရေးဖီစေးကန်း အာစာ့ဖုပီဖုန်း အာကိုင်းခမ်လားကု ငါးဒွို ဘသာရေးဖီငါ နားက့ဖုန်း အွယ့်ကြားမဲ့ ကြိုစာတွို့ခမိန်လိုင်လိုင်လဲ့ နားက့ဒွို လက်ခံလိုကာဟငါး။ 35နားက့ ဗိမာန်တော်ဒွိုလဲ့ အီခံဘာဖီဝိန့်ကေ့။ နားက့ဒွို ‘က့အန်ဖရာတို ပလူးကကြွာ့လေးဒါနောင် ဗွယ်ဖရာ အခွင်အာဏာစာ’ မေခဒေါင့်ကောင်းနိန်းအွယ့် နားက့ဒွို အီသျှီဘာထိုင်ဒါ့ငါး ဒါ့အလိုင် လီမေဟာ” မိန့်နိန်းအွယ့်။

Currently Selected:

လုကာ 13: KVT

Highlight

Copy