Lukka 17
17
Jaa tee mamlaka
(Matthew 18:6,7; Mark 9:42)
1Dukur Yesu kelem nee Swahaba too gali, “Imtihaan ab ggi kutu annas soh zambi bijja kalas, lakin bijja kun batal zaidi nee ajol ab ggi jibu ummon. 2Bakan bi kun kuweesi nee ajol robutu laager ab kebir fih ragabu too dukur kede durobu uwo fih bahari shinda karab annas addil. 3Chunnga itakkum, kaan aku takki karab nee itaa, itaa kede adul uwo fih ab osoh! Kaan uwo seebu, sama uwo. 4Salakun uwo karab neetaa itaa maara saba fih yom wayyi, lakin killa saa ab uwo bi seebu zambi too, sama uwo.”
Amin mee sokol tee soh
(Matthew 17:19-21; Mark 9:28,29)
5Ini yaa mursalin kelem nee siddu tomon Yesu gali, “Awn inna fih amin Rabbana zaidi.” 6Dukur Yesu ggibisha ummon gali, “kaan itakkum endis iman fih Rabbana siya jee tirra ab sakar, itaa agddear kelem nee shedel dee kede ajirawo fih bahari wu dee yaa sokol ab ggi sowo. 7Lakin munu mun itakkum ab endis labbi ab ggi kuruju shamba amaa ab ggi itaa bi kelem nee labbi dee gali taali amaa geni mee anaa kede inna akul sawa? Ata! 8Ini yaa itaa kelem nee labbi dee, gelu gumas takki ab wasani dee kede itaa adul akil tayi kede itaa wedi naana kee akul mee asurub, dukur yaa kee itaa kaman akul mee asurub. 9Itakkum ggi feker gali siddu tee labbi dee bi shukur fih gidaam kuul ab uwo amrisha? 10Fih jeedde, kaan itaa bi soh killa sokol ab siddu takki amrisha, kelem jee dee, inna yaa labbiya ab ggi faa maa inna soh sokol ab ggi faa meena.”
Ponyesha tee annas ab endis ayan tee gildu
11Yom wayyi ligo Yesu ggi masi mee Swahaba too fih meddina tee Jerusalem, dukur uwo ruwa fih sika ab fih-fih ustu tee Galilaya mee Samaliya. 12Waakati Yesu mee Swahaba too ligo geeri kede ummon dakal fih karni wayyi, rujala ashara ab endis ayan tee gildu jju nee Yesu lakin ummon yegif boyyi min uwo. 13Ummon dukur wonus mee sauti tee foo ligo ggi kelem gali, “Yesu siddi teena ayinu meena huruma mee ponyesha inna.” 14Waakati Yesu ayinu ummon okelem gali, “Ruwa kum nee kubarina tee diin kede itakkum weeri itakkum noomon.” Yaa fih ruwa tomon nee kubarina tee diin, Rabbana ponyesha ummon. 15Waakati wayyi min ummon ayinu gali uwo pona, uwo aarja nee Yesu ligo uwo ggi wonus mee sauti foo mee shukur Rabbana. 16Fih gwaam uwo wagga fih kura tee Yesu shukur, ragi wedede kaan Samaliya. 17Yesu dukur kelem nee annas ab kaan fih mee anaa gali, “Ummon rujala ashara dee kuul maa jaa pona!” Dukur rujala tisa dee ummon fuwen. 18Ragi wayyi barraw yaa aarja fih shukur Rabbana wu ligo uwo maa ajol tee Yudaaya. 19Ini yaa Yesu kelem nee ragi dee gali, “Gum kede itaa ruwa pona, itaa fih kuweesi kalam itaa amin anaa.”
Jee tee Mamlaka
(Genesis 6:5-8:22; Genesis 19:12-14)
20Jaa soh yom wayyi ligo nas Farasin ggi asaadu Yesu waakati ab mamlaka tee Rabbana bijja jaa. Yesu ggibisha! Mafih alama ab bijja weeri jaa tee mamlaka tee Rabbana. 21Mafih ajol yoyote ab ggi kelem gali mamlaka tee Rabbana fih ini waala gali fih naa. Kalam mamlaka tee Rabbana fih-fih itakkum saade. 22Dukur Yesu kelem nee Swahaba too gali, “Waakati ggi jaa ligo itakkum aju ayinu nyereku tee ajol ligo ggi hukkum lakin itakkum bi ayinu maa. 23Fih yom dolde, annas bijja kelem nee itakkum gali Massiah fih ini waala naa. Lakin Matakkum amin ummon sala faatiya ummon. 24Jee nammna ab saga ggi waala fih mwisho tee samayi mee fih safa taanin tee mwisho kaan jaa, yaa anaa nyereku tee binadum kaman bijja jaa fih nammna wayyi dee. 25Lakin ligo wedede kuul lissa anaa endis tee ayinu tabu fih sokolin milaan mee annas ab tee zaaman wedede ab anaa. 26Jee nammna ab kaan fih-fih waakati tee Noah, yaa bijja kun fih nammna wayyi ligo anaa nyereku tee binadum aarja fih duniya. 27Kabbla mattara tee guddrra jaa, killa wayyi kaan fih raha jee killa yom, mee akul, mee asurub mee jooju mee wedi itaa fih jooju ladi yom Noah mee beyy too dakal fih fuluka. Dukur fih gwaam mattara tee guddrra keregi killa wayyi ab maa dakal fih fuluka. 28Waakati anaa bi aarja, bi kun jee waakati tee zaaman ligo Luuti bi kun fih-fih duniya. Killa wayyi ab kaan fih-fih meddina tee Sodom ligo ummon ggi geni jee killa yom, akul mee asurub, boyyi mee wuzza sokolinna, ajirra shamba mee abinu juwa. 29Lakin fih yom ab Luuti taala fih meddina tee Sodom Rabbana nenzil naari mee laagera tee naari nenzil falaata min samayi mee katul killa wayyi. 30Gali fih nammna wayyi dee bijja kun fih yom ab anaa nyereku tee binadum aarja marri taani. 31Fih yom naade ajol ab fih-fih rasu juwa uwo maa endis tee aarja falaata fih juwa fih ligo sokol yoyote, ajol yoyote ab fih baara uwo endis tee aarja fih juwa. 32Feker kum fih sunu ab jaa soh nee mariya tee Luuti! 33Killa ajol ab aju ponyesha hayyi too uwo endis tee kosa, mee killa ajol ab kosa hayyi too uwo bi ligo hayyi ab ggi kalas maa. 34Anaa ggi kelem nee itakkum gali fih fileli ab anaa aarja fogo, bi jaa kun annas tini ab num fih idda wayyi, bi sulu wayyi dee taanin dee bi faddul wara. 35Bijja kun naa nuswaana tini ligo ggi rakabu akil bakaan wayyi, bijja sulu wayyi lakin wayyi dee bi faddul wara. 36Bijja kun naa rujala taanin dee bi faddul wara.” 37Ummon asaadu uwo, “Wedede bi soo weeri, siddi teena?” Uwo ggibisha gali, “bakaan ab fogo muttu, bakaan ab kuri lim fogo.”
Currently Selected:
Lukka 17: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
