Lukka 12
12
Yesu ggi alim fih kom tee annas
(Matthew 10:26,27)
1Fih wakati dee, annas milaan zaidi lim bakaan ab Yesu kaan fih fogo. Ummon kaan milaan zaidi ladi ummon kaan ggi dusu badum. Dukur Yesu wonus gidaam mee Swahaba too ligo kelem gali, “Chunnga itakkum Matakkum gum jee nas Farasin kalam adabu tomon ggi awur killa wayyi bassi jee yeasst karab mukati. 2Killa sokol ab kati fata bijja mee killa sokol ab dusu bijja faham. 3Fih jeedde, killa kalam ab itakkum wonus fih duluma bijja asmma fih semsi killa kalam ab itakkum wonus fih kujuura bijja wonus noowo fih rasu juwa annas kuul kee asmma!
Yesu ggi alim kaffu Rabbana
(Matthew 10:8-31)
4Anaa ggi kelem nee itakkum sabiyana tayi, matta kum kaffu annas kalam ummon katul gildu takki baara lakin badda wedede mafih sokol ab ummon agddear soh fih fugu itaa albatal. 5Lakin anaa ggi kelem nee itakkum, kaffu kum Rabbana baara. Kaffu Rabbana endis guddrra tee katul lakin kaman uwo endis mee wezzo tee jadda fih Jahanam. Anaa ggi kelem nee itakkum mara taani kaffu kum Rabbana baara. 6Itakkum maa arfu gali teeran kamsaa ggi tunda ummon jara taanin? Dukur Rabbana maa ggi neesitu wayyi min ummon! 7Lakin jee itakkum, Rabbana shinda teeran ab duga mila.”
Wonus Kristo fih gidaam annas
(Matthew 10:32,33)
8Yesu zidu kelem noomon gali, “Asmma kum seme. Kaan ajol yoyote wonus fih gidaam annas gali uwo ggi amin anaa, dukur anaa kaman nyereku tee ajol bi wonus gidaam Malaika tee Rabbana gali uwo maa fih ggi amin mee anaa. 9Lakin uwo alggi aba Anna gidaam annas mee nyereku tee binadum kaman bijja aba uwo gidaam Malaika tee Rabbana. 10Kaan killa ajol wonus kalama albatal fih nyereku tee binadum, Rabbana bi sama uwo. Lakin kaan ajol yoyote wonus kalama albatal fih Roho abnedif, Rabbana bi sama uwo maa.
11Kaan annas jibu itaa dukur ummon sulu itaa fih bakaan tee lim fogo Sinagoga fih gavana mee annas ab ggi hukkum matta feker fih kalam tee wonus. 12Fih saade siddu, roho abnedif bi weeri nee itaa nammna tee ggibisha ummon.”
Ijamajako tee tagir ab awiri
13Ragi wayyi min kom tee annas kelem nee Yesu, “Malima, kelem nee akku tayi kee wedi nee anaa sokolinna tee Babba tayi.”
14Lakin Yesu ggibisha ragi dee gali, “sabi munu yaa kutu anaa fih gata waala gesim sokolin nee itakkum?” 15Dukur uwo kelem noomon kuul, “Yaa fih jeedde chunnga itakkum min nammna tama. Faida tee hayyi maa ggi ligo fih sokolin milaan ab itakkum endis.”
16Dukur Yesu kelem noomon ijamajako ligo ggi kelem, “Kaan fih naa ragi ab shamba too amla mee akil milaan. 17Yaa, uwo abidu feker fih agil too sunu bi soh mee akil dee kuul, anaa maa endis bakaan, tee kutu fogo matunda tayi.
18Dukur uwo kelem noowo siddu, Anaa sada arfu sunu tee soh. Anaa bi jurru falaata bakaan tee kutu fogo matunda dee dukur kee anaa abinu bakaan ab kebir mee sokolinna taanin. 19Dukur anaa bi kelem nee anaa siddu, Anaa endis sokolinna milaan ab anaa kutu bi saana milaan. Sada amla safa akul asurub mee itaa kee furaayi!”
20Lakin yaa Rabbana kelem uwo, “itaa awiri anaa bi sulu roho takki fileli tee naara. Itaa ggi gali itaa bi faidika fih sokolinna ab itaa yaa chunnga nee itaa siddu?
21Dukur Yesu kalas ijamajako dee ligo uwo ggi kelem, Wedede yaa sokol alggi soh nee killa wayyi ab ggi chunnga noowo sokolin tee tajir noowo siddu fih duniya, lakin ummon maa soh sokol ab Rabbana ggi sulu tee mmana!”
Matakkum maligu gelib
(Matthew 6:19-21; 25-34)
22Dukur Yesu kelem nee Swahaba too gali, “Matakkum feker fih sunu ab itakkum aju hayyi jee sunu tee akul waala sokol tee maana! 23Kalam roho gisinda boyyi akil mee gildu gisinda boyyi gumasa. 24Alim kum min teeran kalam ummon maa ggi ajirra tirra dukur ummon kaman maa ggi amrugu matunda fih shamba. Ummon maa endis bakaan tee chunnga fogo akil lakin Rabbana ggi wedi noomon sokol tee akul. Dukur itakkum tee mmana zaidi nee Rabbana shinda teerana dee. 25Badda weede, kaan itakkum feker, sayi agddear zidu fih yom itakkum tee hayyi ladi dakal wayyi? 26Fih jeedde kaan itakkum maa agddear soh sokol ab sakar zaidi, dukur matta kum feker sokol yoyote fih hayyi.
27Ayinu kum nammna ab mawa tee kaba ggi rabba: ummon gihso maa waala adul gumasa. Lakin anaa ggi kelem nee itakkum gali maa ladi Sultan Solomon mee hishima too mee gumasa too asaasi futu mawa dee. 28Kaan Rabbana aju zaidi mawa tee gaba mee gesan taanin sala ummon fih dukur jadda fih naari saba. Yaa, ummon maa bi chunnga itakkum ab endis iman siya? 29Matakkum feker sunu taa itakkum bi akul mee asurub. Matakkum feker fih sokolin dolde. 30Kalam annas ab anaa arfu Rabbana ummon ggi jarrib zaidi gussu sokolin dole. Lakin wu itakkum, Rabbana arfu jee itakkum aju sokolinna dee. 31Lakin gussu kum mamlaka Rabbana dukur Rabbana bi wedi nee itakkum sokolin dole. Lakin wu itakkum, Rabbana arfu jee itakkum aju sokolinna dee.
32Itakkum kom ab siya tee Swahaba tayi, Babba takkum fih samayi aju wedi nee itakkum mamlaka too. 33Yaa fih jeedde wuzza sokolin ab itakkum endis dukur kee itakkum wedi ssente nee nas ab miskiin. Fih jeedde, itakkum bi ligo utajiri takkum aba maa bi wudur. Mee tajir tee samayi bijja kosa maa mmana too. Mafih ajol ab agddear serregu mee dudu maa agddear karab ummon. 34Sika tajir takkum fogo, yaa mee gelbba takkum bi kun naa kaman.”
Ijamajako tee labbi ab tee hakki mee labbi ab batal
(Matthew 24:42-51)
35Yesu zidu mee kelem, “Adul kum itakkum nee anaa, jee labbiya ab lebisi gumasa too tee kazi mee taa too ligo ggi waala. 36Kun kum jee labbiya ab ggi steenu siddu too aarja min jooju wakati uwo aarja dukur uwo dugu babbu, fih gwaam fata noowo babbu. 37Ummon labbiya ab steenu siddu too ladi ummon endis baraka. Anaa ggi kelem nee itakkum siddu tee Nebbi lebisi gumas tee kazi dukur uwo bi kelem nee labbiya dee kee geni falaata dukur uwo bi wedi noomon akil. 38Sala siddu tomon aarja fih ustu fileli sala ligo munsub lissa maa tim, bakaan uwo aarja oligo labbiya lissa ggi steenu uwo mee adul aarja too, ummon bi kun mee baraka.
39Faham kum muffano wedede, kaan siddu juwa faham saa ab harami bi jaa fogo fih serregu uwo maa kaan bi num. 40Fih nammna wayyi dee itakkum kaman endis tee adul itakkum saa kuul kalam anaa, nyereku tee ajol bi aarja fih saa ligo itakkum maa arfu.”
41Dukur Pita asaadu Yesu gali, “siddi teena, ijamajako dee teena baara waala mee killa ajol ab ggi asmma itaa?”
42Dukur siddi teena ggibisha gali, “Kaan fih naa labbi ab neegi wu kaan uwo kuweesi. Siddi too kutu uwo kee sulu Swahaba too mee wedi noowo wezzo tee wedi noomon akil fih wakati tee akul. 43Labbi dee endis baraka kaan siddu too ligo uwo ggi tummiya weezo too ligo uwo arfu beyy. 44Taasil anaa ggi kelem nee itakkum ggi siddu tee Nebbi wedi noowo wezzo tee chunnga sokolinna too. 45Lakin labbi dee feker fih gelbba too gali siddu too bijja aarja maa mudda towwhil, dukur uwo abidu dugu labbiya dee nuswaana mee rujala mee wezzo too. Mee akul mee asurub mee sakaran. 46Dukur siddu too bijja arfu yom wayyi ligo labbi dee arfu maa. Siddu noo bi izabu uwo dukur kee uwo kutu uwo fih bakaan tee annas ab ggi amin maa.
47Mee labbiya ab arfu sunu yaa siddu tomon aju lakin kaan ummon maa adul ummon waala soh too, bijja izabu ummon zaidi. 48Lakin labbi ab maa arfu sunu ab siddu too aju mee soh sokolin uwo ggi faa mee izabu. Wu killa wayyi ab wedi noo milaan, bijja izabu siya. Mee uwo ab amin zaidi, bi izabu uwo zaidi.”
Kristo ggi jibu kesim badu
(Matthew 10:34-39)
49Dukur Yesu kelem, “jaa tayi fih duniya jibu naari fih annas. Mee feker gali kaala abidu karagu ummon. 50Lakin fih awlan anaa endis tee futu fih batiza tee azibb. Mee kaman anaa bi ligo shinda zaidi labbi bi kalas. 51Itakkum ggi feker anaa jaa fih jibbu raha fih duniya? Anaa ggi kelem nee itakkum ata! Fih hakikisha itakkum gali anaa jibbu kesim badum fih annas. 52Min sada, kaan fih annas kamsaa fih beyy, ummon bi kesim badum talata bi dusman mee tinen, bi dusman mee talata. 53Annas tee juwa wayyi bi kesim badum. Mee Babba bi dusman mee yaalli too yowele too mee yaalli wele bi dusman mee Babba tomon. Mee nas mamma bi dusman mee yaalli banaa mee banaa bi dusman mee mamma tomon. Mee mamma tee wele bi dusman mee mariya tee yowele too mee mariya tee yowele too bi dusman mee mamma tee yowele.”
Faham waakati
(Matthew 16:1-4)
54Dukur Yesu kelem nee annas kuul gali, “Kaan itakkum ayinu subra assuwe fih idda yomin, fih gwaam itakkum bi kelem gali mattara ggi wagga! Mee dee yaa sokol ab ggi sowo.” 55Mee labu kaan bi afuku min idda sumani itakkum bi kelem, “fih gwaam bakaan bi kun harri,” dee yaa sokol ab ggi sowo. 56Itakkum munafikin! Itakkum ggi ayinu duniya mee subra, ley itakkum maa ggi faham mmana too sunu ab ggi sowo sadda?
Geni mee raha mee adduyi takki
57“Ley itakkum sidum maa ggi gata sunu yaa sokol ab addil nee itakkum fih soh too? 58Kaan ajol yoyote asiki itakkum fih sharia dukur uwo aju sulu itakkum fih tee gata kesi, soh killa sokol ab itakkum agddear soh fih kalas makosa fih sika. Kaan maa, uwo bi sulu itakkum nee ajol ab ggi gata kesi fih azibb itakkum. 59Anaa ggi kelem nee itakkum wedede, itakkum endis tee lippa killa sokol ab ggi banja itakkum kabbla tee fih jela.”
Currently Selected:
Lukka 12: KCN
Highlight
Copy
Compare
Share
Want to have your highlights saved across all your devices? Sign up or sign in
Nubi Bible by Beyond Translation is licensed under Creative Commons Attribution-ShareAlike 4.0 License.
