ລູກາ 23
23
ພຣະເຢຊູເຈົ້າຄຣາຍປໍ້້ດອງຈະປໍ້້ອັດເຢີບຣານປີລາດ
(ມທ 27:1-2,11-14; ມຣກ 15:1-5; ຢຮ 18:28-38)
1ຢຼ້າຍທີ່ສະພາຫະຢົ້ງສຸດຂອງຄົນຢິວລວມເອີ້ຍຈຸມຜູ້ນຳກຸ້ຍຢິວບອນໂຢຼລຊໍ້ ແລະຄຸມຈະພຣະເຢຊູເຈົ້າປໍ້້ດອງເຢີປີລາດ ຜູ້ປົກຄອງກຸ້ຍໂຣມັນ. 2ເຕິບ້ອນກີຼ ຈຸມປີດໍບອນເລີ່ມກ່າວຟ້ອງພຣະອົງຣ້ວຍ,“ຈຸມແຮກ້ອມກຸ້ຍນໍບອນ ເຕິຂະນະທີ່ກຳລັງປຸກລະດົມປະຊາຊົນຂອງຈຸມແຮ ໂຢນກໍ່ການປັ່ນປ່ວນ ໂດຍຄຣ້າເລິ້ຍໂຢນເສຍພາສີເຢີຈັກກະພັດໂຣມ ແລະອ້າງບອມຢຼະຣ້ວຍ ດໍເກີດພຣະຄຣິດພຣະຜູ້ຊ່ວຍໂຢນພົ້ນຄືກະສັດຂອງຈຸມແຮ.” 3ອີກຼີ ປີລາດຈຶ່ງຕະມໍ໋ພຣະອົງຣ້ວຍ,“ມາຍເກີດຂອງກະສັດຂອງຊາວຢິວລະ?” ພຣະອົງຊົງທຣະອອຍຣ້ວຍ,“ທ່ານໂຊລບອມຢຼະ.” 4ຢຼ້າຍປີລາດກໍໂຊລນັງຈຸມຫົວໜ້າປະໂຣຫິດ ແລະປະຊາຊົນຣ້ວຍ,“ກືເລິ້ຍບອນຫອມຄວາມຜິດເຕິກຸ້ຍໂກນນູ້ນໍພໍມູຫະໂຣ້.” 5ແຕ່ຈຸມປີດໍໂຊລຢືນຢັນຕື່ມຢ່າງນັກແໜ້ນຣ້ວຍ,“ກຸ້ຍນໍບອນຍຸຍົງກຸ້ຍກະເລິ່ງນະໂຢນໂຢຼລຮື້ຊໍ້ກະບົດຕໍ່ຕ້ານລັດຖະບານໂຣມັນແລະສັ່ງສອນທົ່ວທັງແຂວງຢູດາຍ ເລີ່ມທຳອິດບອນແຂວງຄາລີເລ ແລະນີນໍກໍເຕິກະເລິ້ຍບອນນະຄອນເຢຣູຊາເລັມເຢີ.”
ພຣະເຢຊູເຈົ້າຄຣາຍຢຼວນຈະປໍ້້ເຢີກະສັດເຮໂຣດ
6ເຢີປີລາດບອນຊັງຈຸມປີດໍໂຊລພະນຶ້ແຂວງຄາລີເລ ຈຶ່ງຕະມໍ໋ຣ້ວຍ, “ໂກນກຸ້ຍນໍເກີດຊາວຄາລີເລລະ?” 7ພໍບອນຮອຍຣ້ວຍ ພຣະເຢຊູເຈົ້າເຕິເກີດແຂວງຄາລີເລທີ່ເຮໂຣດອັນຕິປາປົກຄອງ ດໍຈຶ່ງຢຼວນພຣະອົງປໍ້້ເຢີເຮໂຣດຜູ້ທີ່ອັດເວລາກຼີເຕິກະລຸງນະຄອນເຢຣູຊາເລັມ. 8ເຮໂຣດອັນຕິປາອໍພະໄຫງ້ທີ່ສຸດ ເຢີບອນຫອມພຣະເຢຊູເຈົ້າ ເພາະດໍບອນສັງກະເລິ້ຍເລື່ອງຂອງພຣະອົງແລະເປິ້ນ ກ້ວນ ທີ່ໄອ້ຈະຫອມພຣະອົງເຕິ ດິນເຢີ ດໍຫວັງທີ່ຈະຫອມພຣະເຢຊູເຈົ້າຕະການອັດສະຈັນບາງອັນ. 9ອີກີ ເຮໂຣດອັນຕິປາຈຶ່ງຕະມໍ໋ພຣະເຢຊູເຈົ້າກະເລິ່ງຂໍ້ ແຕ່ພຣະອົງເລິ້ຍຍອມທຣະອອຍພໍມູຄຳ. 10ຈຸມຫົວໜ້າປະໂຣຫິດແລະຈຸມທໍາມະຈານ ກໍອັດເຕິບ້ອນກຼີ ບອນກ່າວຟ້ອງພຣະອົງຢ່າງໜ້າແໜ້ນ. 11ຫະຣ້າເຮໂຣດອັນຕິປານັງທະຫານຂອງບອມຢຼະຕ່າງກໍເຢາະເຢີ້ຍ ແລະປະໝາດພຣະອົງ ຢ້ຼາຍຈຸມປີດໍກໍອິດຈະແຮຄຸມຂອງກະສັດໂຕທີ່ອໍມາມໂຢນພຣະອົງເສິບ ແລະຢຼວນພຣະອົງລ້າປໍ້້ເຢີປີລາດ. 12ເຕິຕະງ້າຍກຼີ ເຮໂຣດອັນຕິປານັງປີລາດບອນລ້າອໍມະຕຼຸ, ຕອນຍຸງ ເອີ້ຍບາລເກີດສັດຕູທຣະເລິຍ.
ພຣະເຢຊູເຈົ້າຄຣາຍຕັດສີນກະເຈຼດ
(ມທ 27:15-26; ມຣກ 15:6-15; ຢຮ 18:39; 19:16)
13ຢຼ້າຍປີລາດກໍກາວຈຸມຫົວໜ້າປະໂຣຫິດ ບັນດາຜູ້ນຳ ແລະ ປະຊາຊົນເຕິປະຊຸມມະຕຼຸ 14ແລະ ໂຊລນັງຈຸມປີດໍຣ້ວຍ, “ແປຼກະເລິ່ງນະບອນອິດໂກນກຸ້ຍນໍເຕິ ແລະກ່າວຫາຣ້ວຍ ດໍເກີດຜູ້ຊັກສວນໂຢນຕະຜິດ ນີນໍ ກືສຶບສວນດໍເຢີບຣານຈຸມແປຼຢ້ຼາຍ ແລະກືເລິ້ຍບອນຫອມຄວາມຜິດເຕິຂໍ້ມໍ້ຂໍ້ມໍ້ເລີຍ ຕາມທີ່ຈຸມແປຼກ່າວຫລັ້ງເລື່ອງດໍກຼີ ແຕ່ປະການມໍ້. 15ຕະຫລອດນັງເຮໂຣດອັນຕິປາດ້ວຍ ກໍເລິ້ຍບອນທຣຸ້ມຄວາມຜິດແຕ່ປະການມໍ້ທຣະເລິຍ ຈົ່ງຢຼວນດໍລ້າເຕິເຢີຈຸມແຮແອັ້ນ ພຣະເຢຊູເລິ້ຍບອນຕະຜິດຂໍ້ມໍ້ທີ່ສົມຄວນຕອ້ງກະເຈດ. 16ອີກຼີ ກືຈຶ່ງສັ່ງໂຢນຫະແວັດແຕັ້ນດໍຢຼ້າຍປ່ອຍດໍປໍ້້.” 17ດ້ວຍຣ້ວຍ,ເຕິງານເທດສະການປັດສະຄາກຼີ ດໍຕ້ອງປອຍນັກໂທດກຸ້ຍມະນະໂຢນຈຸມປີດໍ. 18ປະຊາຊົນເອີ້ຍ ມະກຼີໂອ້ຍຊໍ້ມະຕຼຸຣ້ວຍ,“ອິດພຣະເຢຊູເຈົ້າປໍ້້ກະເຈຼດສາ ຢ້ຼາຍຈົ່ງປ່ອຍບາຣາບາໂຢນຈຸມຮີ.” 19ບາຣາບານູ້ນໍຄຣາຍຄຸກ ເພາະການວຸ້ນວາຍທີ່ບອນເກີດຊໍ້ນຸງນະຄອນເຢຣູຊາເລັມ ແລະຍ້ອນການກະເຈຼດກຸ້ຍ. 20ສ່ວນປີລາດກຼີ ນັງຕ້ອງການທີ່ຈະປ່ອຍພຣະເຢຊູເຈົ້າ.ອີກີຼ ປີລາດຈຶ່ງຮຽກຮ້ອງນັງປະຊາຊົນແອັ້ນ. 21ແຕ່ຈຸມປີດໍໂອ້ຍທຣະອ້ອຍລ້າຣ້ວຍ,“ຄຶງດໍດໍ້ເຕິລ້ອງກາງແຂນ.” 22ປີລາດແສ້ນັງປະຊາຊົນເກີດເທື່ອທີ່ສາມຣ້ວຍ, “ອະໄມ້ຈຶ່ງຄຶງ ນູ້ນໍເວິຍຕະຜິດອະໄມ້?ກືເລິ້ຍບອນທຣຸ້ມດໍຕະຜິດອະໄມ້ທີ່ສົມຄວນຕ້ອງກະເຈດ ອີກຼີ ເຢີກືສັ່ງໂຢນຫະແວັດຢຼ້າຍ ກໍຈະປ່ອຍດໍປໍ້້.” 23ແຕ່ປະຊາຊົນພອ້ມມະຕຼຸໂອ້ຍຊໍ້ຈົນສຸດສຽງ ເພື່ອໂຢນພຣະອົງຄຣາຍຄຶງດໍ້ບອນລ້ອງກາງແຂນ ແລະທີ່ສຸດ ສຽງໂຮໂອ້ຍຂອງຈຸມປີດໍກໍບອນຮັບໄຊຊະນະ. 24ອີກຼີ ປີລາດຈຶ່ງຕັດສິນໃຈໂຢນເກີດປໍ້້ຕາມຄຳແສ້ໂອ້ຍຂອງຈຸມປີດໍ. 25ປີລາດບອນປ່ອຍກຸ້ຍທີ່ພະນຶ້ບາຣາບາຈຸມປີດໍຕ້ອງການ ຄືນູ້ທີ່ຄຣາຍໂມດຄຸກກຼີເພາະການວຸ້ນວາຍແລະກະເຈຼດກຸ້ຍ ແລະດໍບອນມອບພຣະເຢຊູເຈົ້າໂຢນຈຸມປີດໍອິດປໍ້້ດອງຕະຕາມຄວາມຕ້ອງການຂອງຈຸມປີດໍ.
ພຣະເຢຊູເຈົ້າຄຣາຍຄຶງບອນລ້ອງກາງແຂນ
(ມທ 27:32-44; ມຣກ 15:21-32; ຢຮ 19:17-27)
26ເຢີຈຸມທະຫານພາພຣະອົງລໍ້ປໍ້້ ຈຸມປີດໍບອນກ້ອມໂກນກຸ້ຍມະນະພະນຶ້ຊີໂມນໄທກີເຣເນເຕິເກີດທະວີບອາຟຣິກາເໜືອ ທີ່ກຳລັງເຕິເກີດເວລບ້ານນອກ ຢ້ຼາຍອິດລ້ອງກາງແຂນປະຕ້າຫະຄຣາຍ ໂຢນດໍດັ້ວຕາມພຣະເຢຊູເຈົ້າປໍ້້. 27ປະຊາຊົນຢ່າງຈຳນວນປູດກະເລິ່ງ ບອນປິນພຣະເຢຊູເຈົ້າປໍ້້ ເຕິເຄິ່ງທຣະດີປະຊາຊົນກຼີເວິຍກຸ້ຍກັນບາງນະແຕັ້ນເປີມໂອ້ຍຍາມສຳລັບພຣະອົງ. 28ພຣະເຢຊູເຈົ້າປິ່ນບຣານເຕິເຢີຈຸມນາງແລະກ່າວຣ້ວຍ, “ກັນປະຊາຊົນນະຄອນເຢຣູຊາເລັມເອີຍ,ຊິນສູ່ ໂອ໋ຍ ຍາມຫະເອກກື,ແຕ່ຈົ່ງໂອ້ຍຍາມຍ້ອນສິ່ງທີ່ເກີດຊໍ້ນັງຈະແປຼຢຼະ ນັງໄກ້ໆຂອງຈຸມແປຼ. 29ດ້ວຍຣ້ວຍ,ຕະງ້າຍເວລາກຳລັງຈະເຕິກະເລິ້ຍເຢີ ກຸ້ຍກໍຈະໂຊລກັນຣ້ວຍ, ກັນ ທີ່ເກີດໝັນ ກັນທີ່ເລິ້ຍເຄີຍບອນໄກ້ ແລະກັນທີ່ເລິ້ຍເຄີຍບັ້ນໄກ້ ຈຸມແປຼກໍເກີດສຸກແທ້ນໍ. 30ເຕິເວລາກຼີ ທີພຣະຄຳພີກ່າວດໍ້ປະຊາຊົນກໍຈະໂຊລນັງໂກ໋ກະເລິ່ງໝ່ວຍຣ້ວຍ, ຈົ່ງເຈື່ອນແຊ້ງເຕິຕະກຼຳ້ຈຸມແຮສາ ແລະໂຊລນັງໂນນໂກ໋ທັງກະເລິ່ງໝ່ວຍຣ້ວຍ'ຈົ່ງເກິບບັງຈຸມແຮດໍ້ໂຢຼ. 31ດ້ວຍຣ້ວຍ,ເຕິເຢີຈຸມປີດໍຕະອີນໍນັງລ້ອງທີ່ນັງໃບ້ອໍມາມ ຈຸມປີດໍຈະຕະອີມໍ້ນັງລ້ອງທີ່ແທຣ້ງເຢີ.” 32ເວິຍແອັ້ນບາລນະ ທີ່ເກີດນູ້ເລິ້ຍອໍທີ່ຄຣາຍຈຸມທະຫານຄຸມ ເພື່ອອິດປໍ້້ກະເຈຼດມະຕຼຸນັງພຣະເຢຊູເຈົ້າ. 33ເຢີເຕິກະເລິ້ຍບ່ອນທີ່ເວິຍພະນຶ້ຣ້ວຍ, “ກະໂຫລກປຼໍ” ຈຸມທະຫານກໍຄຶ່ງພຣະອົງດໍ້ບອນລ້ອງກາງແຂນພ້ອມນັງນູ້ເລິ້ຍອໍບາລນະ ຄືນູ້ທີ່ໜຶ່ງອັດຫະຣ້າເຕິ້ມແລະນູ້ທີ່ສອງແອັ້ນອັດຫະຣ້າວຽ໋ລ. 34ພຣະເຢຊູເຈົ້າພາວັນນາອະທິຖານຣ້ວຍ,“ພຣະບິດາເຈົ້າເອີຍ (ອຳເອີຍ) ໂຜດຍົກໂທດໂຢນຈຸມປີດໍນໍໂຢຼ ເພາະປີດໍເລິ້ຍຮອຍອະໄມ້ຣ້ວຍ ຈຸມປີດໍກຳລັງຕະອາໄມ້.” ຢ້ຼາຍຈຸມທະຫານກໍແບ່ງຫະແປປຼອງເສິບຂອງພຣະອົງ ໂດຍໃຊ້ສະຫລາກ. 35ຫະຣ້າປະຊາຊົນກໍຕະເຢິ່ງແນ້ອັດບອນກຼີ,ຂະນະທີ່ບັນດາຜູ້ນຳຊາວຢິວເຢາະເຢີ້ຍພຣະອົງຣ້ວຍ, “ຄັນດໍເກີດພຣະຄຣິດພຣະຜູ້ຊ່ວຍໂຢນພົ້ນ ຜູ້ທີ່ພຣະເຈົ້າບອນເລືອກດໍ້ກີຼ ດໍຊ່ວຍຮັກສາກຸ້ຍກະນໍ້ບອນ ໂຢນຊ່ວຍບອມຢຼະແນ້ແມ.” 36ຈຸມທະຫານກໍບອນເຢາະເຢີ້ຍພຣະອົງທຣະເລິຍ ຈຸມປີດໍໂມດເຕິເຢີພຣະອົງ ຢ້ຼາຍກໍອິດລະຢ່າອະງຸ່ນເຢາະໂຢນພຣະອົງງ້ອຍ 37ແລະ ຈຸມປີດໍໂຊລຣ້ວຍ,“ຄັນມາຍເກີດກະສັດຂອງຊາວຢິວແທ້ຈົ່ງຊ່ວຍຮັກສາບອມຢຼະວິດເກີດການກະເຈດແມ.” 38ເຕິຫະຢົ້ງປະລໍຂອງພຣະອົງເວິຍປ້າຍລອງພ້ອມນັງເວິຍຂໍ້ຄວາມຂຽນຣ້ວຍ,“ນູ້ນໍເກີດກະສັດຂອງຊາວຢິວ.” 39ຫະຣ້າກຸ້ຍມະນະເຕິນູ້ເລິ້ຍອໍ ທີ່ຄຶງດໍ້ ບອນໂຊລໝິ່ນປະໝາດຕໍ່ພຣະອົງຣ້ວຍ,“ມາຍເກີດພຣະຄຣິດເລິ້ຍຄຣາຍລະ?ຈົ່ງຊ່ວຍຮັກສາບອມຢຼະນັງຊ່ວຍຮັກສາກືໂຢນວິດສາ.” 40ແຕ່ນູ້ເລິ້ຍອໍກຸ້ຍມະນະແອັ້ນຕາໍໜິດໍ ແລະໂຊລຣ້ວຍ,“ມາຍເລິ້ຍກໍຼ້ພຣະເຈົ້າລະ?ມາຍກໍຄຣາຍໂທດທຣະເລິຍນັງດໍ. 41ແຕ່ສຳລັບຈຸມແຮກໍສົມຄວນນັງໂທດນໍແທ້ ເພາະຈຸມແຮກຳລັງຣຳ້ຜົນກຳທີ່ຈຸມແຮບອນຕະ,ແຕ່ດໍເລິ້ຍບອນຕະຜິດອະໄມ້ເລີຍ.” 42ຢ້ຼາຍດໍກໍໂຊລນັງ ພຣະເຢຊູເຈົ້າຣ້ວຍ ກືອ້າຕາມຄວາມຈິ່ງຣ້ວຍ, “ພຣະເຢຊູເຈົ້າເອີຍ ຍາມມໍ້ທີ່ທາ່ນເຕິກະລຸງອານາຈັກຂອງທ່ານເພື່ອເກີດກະສັດ.” 43ພຣະເຢຊູເຈົ້າທຣະອອຍດໍຣ້ວຍ,“ກືອ້າມາຍຕາມຄວາມຈິ່ງຣ້ວຍ ຕະງາຍດໍມາຍຈະອັດນັງກືນຸງບອນສະຫວັນ.”
ພຣະເຢຊູເຈົ້າບອນກະເຈດ
(ມທ 27:45-56; ມຣກ 15:33-41; ຢຮ 19:28-30)
44ເຢີປະມານຟລ້າຕະງາ້ຍສິບສອງໂມງ ກໍເກີດຄວາມມືດມົວທົ່ວແຜ່ນບິ້ຈົນກະເລິ້ຍເວລາຕະບືສາມໂມງ, 45ຜ້າກັງທີ່ກາງດໍ້ເຕິພຣະວິຫານ ກໍຈະຄຣາຍຫະແຈ້ ລໍ້ເກີດບາລຕ່ອນ. 46ພຣະເຢຊູເຈົ້າໂອ້ຍຊໍ້ດ້ວຍສຽງກະຊ້າງຣ້ວຍ, “ພຣະບິດາເຈົ້າເອີຍ ໄກ້ແສ້ມອບຈິດວິນຍານຂອງໄກ້ດໍ້ເຕິຕີຂອງພຣະອົງ.” ຢຼ້າຍພຣະອົງກໍຊົງສິ້ນພະຊົນ (ກະເຈດ). 47ເຢີນາຍຮ້ອຍທະຫານຫອມເຫດການທີ່ຈະເກີດຊໍ້ເຢີ ດໍກໍສັນເສີນພຣະເຈົ້າໂດຍໂຊຣຣ້ວຍ, “ຈິ່ງແທ້ເຢີ ທ່ານນູ້ນໍເລິ້ຍບອນຄວາມຜິດ.” 48ເຢີປະຊາຊົນທີ່ບອນເຕົ້າໂຮມມະຕຼຸເຕິບ້ອນກຼີ ເພື່ອແນ້ພຣະເຢຊູເຈົ້າບອນກະເຈດເລື່ອງແປກປະລາດທີ່ເກີດຊໍ້ ເຢີບອນຫອມເຫດການກຼີເຢີ ຕ່າງກໍລ້າໂຈດຸງຂອງບອມຢຼະ ທັງແຕັ້ນເປີມດ້ວຍຄວາມທຸກພະໄຫງ້ (ໂສກເສົ້າ). 49ຄູນະທີ່ຮອຍພຣະເຢຊູເຈົ້າເກີດການສ່ວນຕົວ ຕະຫລອດທັງກຸ້ຍກັນທີ່ບອນຕິດຕາມພຣະອົງເຕິເກີດແຂວງຄາລີເລ ຕ່າງກໍຕະເຢິ່ງຈຳ້ເປິ້ນແນ້ອັດເຢີ່ງໆ.
ການດໍ້ສົບຂອງພຣະເຢຊູເຈົ້າ
(ມທ 27:57-61; ມຣກ 15:42-47; ຢຮ 19:38-42)
50ແລະ ແນ້ແມ! ເວິຍໂກນກຸ້ຍມະນະ ພະນຶ້ໂຢເຊັບ ເກີດສະມາຊິກແຫ່ງສານຫະຢົ້ງສຸດ ດໍເກີດກຸ້ຍອໍແລະຊັດຊື່. 51ດໍຜູ້ນໍເລີ້ຍບອນເຫັນດີຕາມມະຕິ ແລະການຕະຂອງຈຸມປີດໍ ດໍເກີດກຸ້ຍເວລອາຣີມາທາຍ ຊຶ່ງເກີດເວລຂອງຊາວຢິວ ດໍບອນສືບຕໍ່ເປິ້ນເວລາເຢີພຣະເຈົ້າຈະບອນປົກຄອງປະຊາຊົນເອີ້ຍມະກຼີ ເກີດກະສັດ (ຣາຊອານາຈັກຂອງພຣະເຈົ້າ). 52ໂຢເຊັບບອນໂມດປໍ້ເຢີປີລາດ ແລະແສ້ອິດສົບຂອງພຣະເຢຊູເຈົ້າປໍ້້ເຕິບດໍ້. 53ຢຼ້າຍໂຢເຊັບກໍເຣິສົບຂອງພຣະເຢຊູເຈົ້າ ປະແຊ້ງເຕິເກີດລ້ອງກາງແຂນ ອິດແພຣປ່ານອໍມາມກະໂຢມ ແລະອິດປໍ້້ຕ້າດໍ້ກະລຸງອຸບມຸງມູໜຶ່ງ ທີ່ເຈາະດໍ້ກະລຸງກືບຕະມໍ້ ແລະອຸບມຸງນໍນັງເລິ້ຍບອນດໍ້ສົບນູ້ມໍ້ພໍມູຫະໂຫຼ້. 54ຕະງາຍກຼີເກີດຕະງາຍຈັດກຽມ (ວັນສຸກ) ແລະເກືອບຈະກະເລິ້ຍຕະງາຍວັນຊະບາໂຕເຢີ. 55ສ່ວນກຸ້ຍກັນທີ່ຕິດຕາມພຣະອົງເຕິເກີດແຂວງຄາລີເລ ກໍປໍ້້ນັງໂຢເຊັບ ຈຸມນາງບອນຫອມອຸບມຸງ ແລະບອນຫອມພຣະສົບຂອງພຣະອົງປະຕ້າດໍ້ເຕິກະລຸງບອນກຼີອີມໍ້. 56ແລະຈຸມນາງກໍລ້າໂຈດຸງ ແລະຈັດກຽມເຄື່ອງປະໂຫມ ແລະເດີ໋ນຳ້ມັນປະໂຫມ.ເຕິຕະງາຍຊະບາໂຕ ຈຸມນາງຕ້ອງຢຸດພັກຜ່ອນຕາມກົດບັນຍັດ.
Currently Selected:
ລູກາ 23: IRR
Highlight
Copy
Compare
Share
Want to have your highlights saved across all your devices? Sign up or sign in
Inh/In Bible by Beyond Translation is licensed under Creative Commons Attribution-ShareAlike 4.0 License.
