Johon 10

Probhu Jisu bhiṛikoaʹ ar dhorekoaʹ udâhoron makede

1Jisu menkede, "Ingte ape sârigi metapekâning, eke duârte bhiṛiaʹ khoaṛre bang bolone eṭaʹ hatete bolone ânido hoʹkane komro ar ḍâkât. 2Kheʹ eke duârte bolone ânido hoʹkane bhiṛireʹ dhore. 3Bhiṛioaʹ khoaṛnaʹ duâr eke jogeye ânitedo ananaʹ dhore duâr jhiguruie. Ar bhiṛikodo âniaʹ ṭâhu atenako, ar ânitedo aiʹren nijeren bhiṛiko nutumketeʹ ṭâhuketeʹ baherre idikoe. 4Ânido aiʹren sanam bhiṛiko oṛoʹ tayom ânido angko laha lahate caʹe, ar bhiṛikodo âniaʹ tayom tayomte caʹako ceklaʹbang angkotedo âniaʹ gala cinhitayako. 5Kheʹ angkodo begorcinhu âdmi tayomtedo tisho oho caʹako, angkodo âniṭheʹ khoiʹ sâhingre niruʹkohaʹ, karon angkodo begorcinhu âdmiaʹ gala bang cinhiako."

6Forisiko cedaʹko mako laʹte Jisudo niâ lopor menkede, kheʹ Ânite angko itâʹ metakosane anado angko bang bujhuledako.

Jisugie manja dhore

7Tâkhni Jisute angko arho metakeʹkoe, "Ingte ape sârigi metapekâning, Inggiying bhiṛioaʹ khoaṛnaʹ duâr. 8Ingâʹ lahare ekeko hiʹlenako angkodo sanamkhoiʹgi komro ar ḍâkâtkanako, kheʹ bhiṛikodo angkoaʹ katha bang atenkadako. 9Inggiying ana duâr. Keho judi Ing talate bolone ânido bacoʹheʹ. Ar ânido bhitirre bolonheʹ ar barhe calenkheʹ âtingketeʹ jomaʹ jaga namheʹ. 10Ceklaʹ bang komrodo hijuʹako khâli komro, goiʹ ar nosṭe laʹte. Kheʹ Ingdo hiʹkâning jate angkodo jiui namako ar ana jiui jate puruʹa.

11Inggi hoʹkâning bhiṛiren manja dhoredo, bhiṛiren manja dhoredo aiʹren bhiṛiko laʹte nijeyaʹ jiui emoʹe. 12Ekedo bhaṛauniʹ kâmi âdmikane ar bhiṛiren dhoredo bangkane, bhiṛiko aiʹren nijerendo bangkanako, âni ghenga târup hijuʹte lelekheʹ bhiṛiko bâgiketeʹ nirngene. Ar ghenga taruptedo angko bhiṛikodo sabketeʹ idikoe ar angko chingchâturkoe. 13Ânido niruʹe karon ânido miṭiʹ bhaṛauniʹ kâmi âdmikane ar ânido bhiṛiko laʹtedo bang cintuʹe.

14Inggi hokâning bhiṛiren manja dhore ar Ingtedo cinhukoing Ingren bhiṛiko ar Ingren bhiṛikoteho Ingdo cinhungko. 15Nalakagi Babate Ing baṛekâdinge ar Ingteho Baba baṛeing, ar bhiṛiko laʹte Ingdo nijeyaʹ jiui alaing. 16Ingren arho eṭaʹ bhiṛiko menaʹkoa, angkodo niâ khoaṛrendo bangkanako. Ingte Angkoho obossoi naṛe âgukoinghâʹ ar angkodo Ingâʹ ṭâhu atenkohaʹ anate miṭiʹ bhiṛiaʹ pâl hoʹhaʹ ar miʹhordo bhiṛiren dhore hoʹheʹ.

17Ingren Babate Ing dulâringe, ceklaʹ bang Ingdo nijeyaʹ jiui alainghâʹ jate anado arho enge dareʹing. 18Ekeho Ingâʹ nijeyaʹ jiuido Ingṭheʹ khoiʹ oho idi dareʹe, kheʹ Ingdo nijegi ana emoʹing. Ingâʹ nijeyaʹ Jiui emoʹaʹ khomota Ingâʹdo menaʹtingâ, Ingâʹ jiui arho âcur engeyaʹ khomota Ingâʹdo menaʹtingâ. Niâ hukum Ingdo Ingren Babaṭheʹ khoiʹ namkâding."

19Jisuoaʹ nako sanam katha laʹte Jihudiko talare arho motnaʹ omil lel namna. 20Angko talareʹ aima âdmigi menkedako, "Ânido kharap attate sapkâdie, ar Ânido paglagie, ceklaʹ apedo Âniaʹ katha atendape?"

21Etaʹ âdmiko menkedako, "Nakoto kharap attate namuniʹ âdmiaʹ katha to bangkana. Kharap atta ki miṭiʹ ândhuâoaʹ metʹ manja dareʹe?"

Probhu Jisu bang atanglidiako

22Ana somaido tahalena leyardin, ar ana somaido Jirusalem Mundir teyarnaʹ porob palonsanako. 23Ar Jisudo Mundir talare Solomonaʹ piṛâre daṛa beroʹsane. 24Tâkhni thoṛa Jihudi Jisuoaʹ câryuhate jaoraketeʹ menkedako, ar tiniʹ din Amdo aleyaʹ jiui sondeho talare dohetalemahaʹ. Am judi Khrisṭo hoʹam tahale isposṭoketeʹ ale lâiolem.

25Jisute angko uttor makeʹkoye, Ingto ape laiokaʹpeing kheʹ apedo bang pâtyuʹape. Ingren Babaoaʹ nutumte Ing akako kâmi rikiying anako sanamgi Ing somporke sakkho maʹe. 26Kheʹ apedo bang pâtyuʹkanape, ceklaʹ bang apedo Ingren bhiṛido bangkanape. 27Ingren bhiṛikodo Ingâʹ ṭâhu atenako, Ingte angko baṛekoing ar angko Ingâʹ ṭâhu atenlekheʹ Ingâʹ tayom tayom caʹako. 28Ingte angko ononto jiui makoing, ar angkodo tisho oho nostoʹako ar ekeho Ingâʹ ti khoiʹ angko oho idi darekoako. 29Ingren Baba, eketedo angko Ing makâdinge, Âni sanam khoiʹ marange ar eketeho Babaoaʹ ti khoiʹ itâʹgi bang reʹenge dareʹako. 30Ing ar Babado miʹgiâling.

31Tâkhni Jihudikotedo Âni capadi laʹte arho diri halangkedako. 32Uttorre Jisute angko metakeʹkoe, "Ingte Babaoaʹ hukum laka aima manja manja kâmi ape uduʹkaʹpeing. Anarenaʹ akaṭaʹ kâmi laʹte Ingdo dirite capadinglaʹ namdape?

33Uttorre Jihudikote Jisu metakidiako, manja kâmi laʹtedo aletedo Am dirite bang capatʹmikanale, kheʹ Issor nindâdiam ana laʹte, karon Amdo miṭiʹ âdmi hoketʹ nijegi Issor mente dâbidam."

34Uttorre Jisute angko metakeʹkoe, Mosiaʹ ânre ki ol bânuʹa je, 'Ing mending, apedo issorkanape?'#Siringko 82:6 35Ekekoṭheʹ Issoraʹ katha hiʹlena, Ânite angko Issor laka metaleʹkoe. Pobitro sastronaʹ katha tisho bad bang jutuʹa? 36Jemon Ingren Babate Ingdo pobitrokâdinge ar dhârtire kolkâdinge, apete ceklaʹ metangkanape je, Ingte Issor nindâikâning, karon Ingdo mending, Ingdo Issorren Hopontetʹkâning? 37Ing judi Ingren Babaoaʹ bang kâmiying tahale Ing pâtyu apeyaʹdo ucit bangkana. 38Kheʹ judi Ingren Babaoaʹ kâmi rikiying tahale Ingdo bang pâtyuonglekheʹho Ingâʹ kâmiko pâtyuʹpe. Tahale apedo baṛe dareʹpehaʹ ar bujhu dareʹpehaʹ je, Babado Ing suliʹ Ingâʹ talare ar Ingho Baba suliʹ Babaoaʹ talare miningâ."

39Tâkhni Jihudi netako arho Jisu sabe laʹte kurumuṭukedako, kheʹ Ânido angkoaʹ ti barhere sanggingre cangene.

40Jisu arho Jordon ganganaʹ hanakharre caketeʹ tahenlaʹ lagone. Aṛegi Johonedo palhere bâptisma makosane. 41Ar aima âdmi Jisuṭheʹ hiʹnako. Angkodo menlaʹ lagonako, "Johondo jahan asarjo kâmi bang rikâkade. Kheʹ Nâi âdmi somporke Johon akako katha menlede ana sanamaʹgi sârigiâ." 42Ar aṛe aima âdmigi Jisure pâtyunako.

Currently Selected:

Johon 10: EKL

Highlight

Copy