Preritʹ 13

Barnaba ar Solaʹ procarre ca

1Antiokhiânaʹ monḍolire koekṭeʹ nâbi ar guruko tahelenako. Angkoaʹ nutumdo Barnaba, Simon ekedo Niger metaisanako, Kurini sohorren Lukio, Monohem (ekedo Herod rajaren âsul hara bokot tahelene) ar Sol. 2Angko jâkhni upâsketeʹ Probhuoaʹ upâsonesanako tâkhni Pobitro Attate angkodo metakeʹkoe, "Barnaba ar Sol Ingte ekedo kâmi laʹte ṭâhukaʹkining Ingâʹ ana kâmi laʹtigi nitoʹ ângkin begarkinpe."

3Tâkhni angkodo upâs ar koijongketeʹ ângkin barhor cetanre ti dohokedako ar ângkindo bidâi makeʹkinâko.

Saipras dipre

4Pobitro Atta nengkaketeʹ Barnaba ar Sol Silukiâre kolkeʹkine. Tayomte aṛe khoiʹ jahajte ângkin Saipras dipre canâkin. 5Salamire pâhcuketeʹ ângkin Jihudikoaʹ somaj oraʹre Issoraʹ katha procarkedakin. Tâkhni kormocâri hisâbte Johon ângkin saote tahalene.

6Ângkin goṭai dip âcurketeʹ Pafore hiʹnâkin. Aṛedo Bor Jisu nutumte miṭiʹ Jihudi jâdukor ar bhonḍo nâbi lelnam kidiâkin. 7Âni jâdukordo sasoniʹ Sergio Pol saote tahensane, ar âni Sergio poldo buddhiman âdmi tahalene. Ânido Barnaba ar Solṭheʹ khoiʹ Issoraʹ katha aten laʹte ṭâhukeʹkine. 8Kheʹ Barnaba ar Soldo Ilumate badha makinlaʹ lagone ar Khrisṭo cetanre pâtyu khoiʹ sasoniʹ âcurilaʹ kurumuṭukede. Âni bhonḍo nâbigi Iluma, orthat jâdukor metaisanako. Kheʹ Ilumado angkoaʹ birodhitesane, ânido kurumuṭisane jate sasoniʹdo Khrisṭo pâtyu khoiʹ moca âcurngetene. 9Tâkhni Pobitro Attate pereʹketeʹ Sol, ekedo Pol mente ṭâhuisanako, Iluma hate soja koyoʹketeʹ menkede, 10"Amdo diabolren gidrâkanam ar jagi manjaoa anareʹ dusmânkanam. Amaʹ talare sanam lakanaʹ cholona ar ṭhakonaʹ monobhab menaʹa. Probhuoaʹ soja ḍahar ṭeṛheyaʹ kâmi ki am tinreho oho thiram? 11Lel, Probhuoaʹ ti amaʹ biruddhore rakapkana. Am andhrangenmahaʹ ar thoṛa din dhâriʹ sing cando oho lelnameyam."

Tâkhnigi kuâsa ar nutte âni poṭomkidie ar jahete jate âni ti sabketeʹ idi dareyako niâlaʹte âni hatṛoberelaʹ lagone. 12Niâko lelketeʹ âni sasoniʹdo Probhu cetanre pâtyune, karon Probhuoaʹ bisoite âni akaṭaʹ cetʹaʹ namlede anate ânido asarjolene.

Pisidiâ Prodesnaʹ Antiokhiâre

13Niâ tayom Pol ar aiʹren gateko Pafo bâgiketeʹ jahajte Pamfuliâ prodisâmnaʹ Porga sohorre canako. Johon tâkhni angko bâgiketeʹ Jirusalemre âcur cane. 14Tayomte angko Porga khoiʹ Pisidiâ prodisâmnaʹ Antiokhiâ sohorre canako ar jiruʹaʹ dinre somaj oraʹre caketeʹ duruʹnako. 15Mosiaʹ ân ar nâbikoaʹ boi paṛho cabekheʹ miṭiʹ somaj oraʹren netako angkoṭheʹ miṭiʹ khobor lâiketeʹ kolkedako ar menkedako, "Boihako, âdmiko hub mako laʹte judi jahanaʹ katha tahana tahale menpe."

16Tâkhni Pol beretʹketeʹ tengone ar ti tulketeʹ menkede, "Israyel ar Issorre botoriʹ Ojihudiko, apedo atenpe. 17Israyel jâtren Issorte aboren sederen âdmi bachongeleʹkoe ar jâkhni angko Misor disâmre tahalenako tâkhni angkodo aima marang leʹkoe. Tayomte Issorte aiʹa suktite ana disâm khoiʹ angkodo oṛoʹketeʹ âguleʹkoe, 18ar prai cullis bochor dhâriʹ sansun jaganaʹ talare angkoaʹ onnai bebohar saholeʹtakoe. 19Niâ tayom Ânitedo Konan disâmren satṭeʹ jât dhongsoketeʹ Aiʹren Nijeren âdmiko ana disâm cetanre odhikar maleʹkoe. 20Niâko ghoṭona ghoṭoʹte prai ponso poncas bochor lagolena.

"Niâ tayom nâbi Samuyelaʹ somai dhâriʹ Issorte koekṭeʹ sasoniʹ maleʹkoe. 21Niâ tayom âdmikote Issorṭheʹ miṭiʹ raja koikidiâko. Tâkhni Issorte angkodo Benjamin bongsoren Kisren hopon Sol maleʹkoe. Soldo cullis bochor rajottolede. 22Niâtayom Issorte Sol ocoʹketeʹ Dâud rajalidie. Ânido Dâudaʹ bisoite menlede, 'Ing Jisoyren hopon Dâudaʹ talare Ingâʹ mon lakaniʹ âdmiaʹ khoj namkâding. Ing akaṭaʹ koing ânido anagi rikie.'

23Issordo Aiaʹ rikit laka nâi âdmiren bongsoko tala khoiʹ bacoiʹ Jisu Israyelkoṭheʹ pâhcukidie. 24Jisu hijuʹ laharigi sanam Israyelkoṭheʹ Johondo niâ katha procarlede je, pap khoiʹ mon âcurketeʹ âdmikoaʹ bâptisma engeyaʹ ucit. 25Kâmi caba somai Johondo menlede, 'Ingdo ekekâning, ape itâʹ moneyape? Ingdo Âni Khrisṭodo bangkâning. Ânido ingâʹ tayomte hijuʹheʹ, ar ingdo Âniaʹ jutânaʹ fitâ lareyaʹ joggoho bangkâning.'

26"Boihako, Abraham bongsoren gidrâko, ar apetedo tiniʹ âdmite Issor botoroiape, pap khoiʹ bacoʹaʹ niâ akaṭaʹ khobor anado aleṭheʹgi kol hokana. 27Jirusalemren âdmi ar netakote Jisu bang cinhu darekâdiako. Ar nâbiaʹ akaṭaʹ katha jiruʹaʹ dinre paṛhoʹako ana kathado angko bang bujhu darekadako, anate angkotedo Jisu dusiketeʹ ana katha puronkadako. 28Judiho Jisu gojei lakanaʹ sâsti mailaʹte angkodo jahan karongi bang namkadako taoho angkodo Pilâtṭheʹ dâbikedako jate Jisudo goiʹgiria.

29Âniaʹ bisoite Pobitro Sastrore akako ol tahalena ananaʹ sanamaʹ puron tayom angkotedo Âni kurus khoiʹ agroketeʹ topalidiâko. 30Kheʹ Issorte Âni goiʹ khoiʹ jiuitʹ beretʹkâdie. 31Ar ekeko Âni suliʹ Gâlil khoiʹ Jirusalem hiʹlenako angkotedo Âni aima din dhâriʹ lelnamlidiako. Angkogi nitoʹ sanam âdmiṭheʹ Âniren sâkkhikanako.

32"Aledo apeṭheʹ niâ manja khobor maʹkanale je, aboren sederen âdmiṭheʹ Issor akaṭaʹ rikitlede, 33ana Ânido angkoren bongsodhorko laʹte, orthat abo laʹte Jisu goiʹ khoiʹ jiuitʹketeʹ Issordo Aiaʹ rikit puronkaʹtene. Niâ bisoido Siringkorenaʹ dosra siringre niâ katha ol menaʹa,

"Amdo Ingren Hoponkanam,

tihin Ingdo Amren Bom honing.'#Jisaio 55:3

34Issorte je Âni goiʹ khoiʹ jiuitʹkâdie ar Âniaʹ hormo je ar tinreho bang nosṭoʹa, niâ bisoite Issor menkade, 'Pobitro ar niscit âsirbadnaʹ akaṭaʹ rikit Ingdo Dâudṭheʹ rikâliding ana Ingte am mamhuʹ.'

35Ana bisoite ar miʹ jagare ol menaʹa,

'Issor Aiʹren Pobitro âdmioaʹ hormo tisreho bang nosṭosoʹe."

36"Dâuddo tâkhniniʹ âdmiko talare Issoraʹ uddesso puron tayom goiʹne. Aiʹren laharen âdmiko saote topailekheʹ âniaʹ hormo nosṭongentaya. 37Kheʹ Issorte Eke goiʹ khoiʹ jiuitʹlidie Âniaʹ hormodo bang nosṭokantaya. 38Niâlaʹte Ingren boihako, apeyaʹ baṛeyaʹ dorkar je, Jisuoaʹ talatigi pap mapnaʹ bisoite apeṭheʹ procar hoʹkana. Ape Mosiaʹ ântedo papnaʹ sâsti khoiʹ rehai bang namkadape. 39Kheʹ jahegi Jisu cetanre pâtyuʹako angkogi papnaʹ sâsti khoiʹ rehai namako. 40Niâlaʹte ape sabdhanoʹpe, nâbiko akako menkadako ana jate apeyaʹ jiuire bang ghoṭoʹa,

41Ape ekeko Issor laite tamseyape,

apedo atenpe, Apedo obagoʹpe ar dhongsoʹpe.

Karon apeyaʹ somairigi Ingdo emon jahanaʹ rikilaʹ caʹkâning,

akaṭaʹnaʹ kathado ape akalakatigi oho pâtyuʹape.

Jahe menreho oho pâtyuʹape."#Hobokkuk 1:5

42Pol ar Barnaba somaj oraʹ bâgiketeʹ caʹ somai âdmikote ângkindo nehorkeʹkinâko, jate ângkindo tayomnaʹ jiruʹaʹ dinre niâ bisoite arho jahanaʹ menakin. 43Âdmikodo somaj oraʹ khoiʹ ca tayom aima Jihudi ar Jihudi dhormore pâtyuiʹ Issorbhokto Ojihudi Pol ar Barnaba sao saote canako. Tâkhni angko âdmiko saote Pol ar Barnaba katha menkedakin ar angkodo hub makeʹkoakin jate angkodo Issoraʹ daya talare thir tahanako.

44Tayomnaʹ jiruʹaʹ dinre sohorren prai sanam âdmi Issoraʹ katha aten laʹte miʹṭheʹ jaoranako. 45Jâkhni Jihudi âdmiko aima âdmiaʹ bhiṛ lelkedako, tâkhni angkodo hingsâte pereʹngenako ar Pol akaṭaʹ mensane ananaʹ biruddhore aima katha menketeʹ âni nindâilaʹ lagonako. 46Tâkhni Pol ar Barnabate sâhus salaʹ niâ uttor makeʹkoakin, "Issoraʹ katha palhere apeṭheʹ men âlingaʹ dorkar tahalena, kheʹ ape jâkhni bang atangdape ar ononto jiui namnaʹ joggo mente nijeko bang moneʹkanape, anate âlingdo Ojihudiṭheʹ caʹlinghâʹ. 47Niânaʹ karon hona, Probhute âling niâ hukum makaʹlinge,

'Ingte am Ojihudikoṭheʹ marsal lakakaʹming,

jate am talate goṭa dhârtiren âdmi pap khoiʹ bacoʹako.'"#Jisaio 49:6

48Niâ katha atenketeʹ Ojihudiko hubnako ar Issoraʹ kathanaʹ gouroblaʹ lagonako, ar ononto jiui namlaʹte Issorte ekeko ṭhikketeʹ doholeʹkoe angkodo pâtyunako.

49Ar Probhuoaʹ katha ana elakanaʹ sanam jagare pasnongena. 50Kheʹ Jihudikote Issoraʹ upâsonaonkhoiʹ bhodro rejako ar sohorren marang marang âdmiko uskukeʹkoako. Nengkaketeʹgi angkodo Pol ar Barnaba cetanre ottacar surukedako ar ana elaka khoiʹ ângkindo oṛoʹkeʹkinâko. 51Tâkhni Pol ar Barnabado angko âdmiaʹ biruddhore janganaʹ dhurâ koṭaketeʹ Iknio sohorre canâkin. #13:51 Pol ar Barnaba angko âdmioaʹ biruddhore janganaʹ dhurâ koṭaledakin karon Issorte angko Jihudi âdmiko bang atangleʹkoe. 52Ar aṛeniʹ celako hubte ar Pobitro Attate pereʹnako.

Currently Selected:

Preritʹ 13: EKL

Highlight

Copy

Compare