Rumi 9
9
Jihudirok Jisu Khristonw goseliya
1Ang Khristobai kwrwngwi kwbwi sadok. Kathar Phala bai twiduljanai ani khabukbw sadok ang misa kok sadokya. 2Ang Jihudi kamisungni bagwi bakhao jwnwmni dugu tei tekto mandok. 3Bok ani takhuk tei bukhuk, kok ongkha ani sakni dophani. Jwtini boknw chuba manw hintilai, omw tama ani imwtwijar muchumabw ongw bokni bodele ang sraimung mannaitwi tei Khristoni daini yakhak janaitwi. 4Bok Israyel bosongni borog. Kaitor boknw lamasa palokkha Bini basa khalaini bagwi, boknw Bini sakni chwngsacha phunokha, Bw bokbai akha khalaijak tei boknw Mosini kerongnal rwjak, Bw boknw Bwnw mwngnai tei lobnaini hal rwjak tei Bw bokni dayw kabangma samaibw tangjak. 5O borogrokse chini manchuk hodaipiri rokni bosong tei Khristo i dophago mwnisw hinwi achaijak. Kaitor, Jebw jothoni sakao, jotho lobmung molbrum Binise. Amen.
6Ang i koknw sadokya je Kaitor samai tangwi obwnw sohkrwjiya. Matwr jebwrok Israyel dophao achaijak bok jotho kwbwi kwbwini Israyelya. 7Abrahamni bosongni hinwise bok Bini kwbwi kwbwini basa obwya, Matwr Kaitor Abrahamnw sajak, "Keber Isohakni bosongnwse nini bosong hinwi rumjanw." 8Imwni sema ongkha, Israel dophao achaijak hinwi kaisaswk Kaitorni basa obwya, matwr Kaitorni swmaini maping jebwrok achaijak boknwse Abrahamni bosongni hinwi rumjanw. 9O swmai imw "Thi jorao ang philwi phainw tei Sarani chala basa kaisa ongnw."
10Keber obwya, Ribikani aphil chala basa rokbw o kaisa chalani basase. 11O chala ongkha chini hodaipiri Isohak. Bini basarok achaiyakho suni tei jephuo bok gam chaya mwngsase khalaiyakho, aiphuose Kaitor Ribikanw sajak, "Okaraba girani seleng ongnw." 12Omobai Kaitor phunukkha, sakni bachungnw sohkrwni bagwi Bw saywi lagw, O basa bini mwngsa samungni bagwiya matwr Kaitorni rwmamungni bagwise bw chongjakha. 13Aithani kathar elembago suijak tongo,"Jakobnw Ang hamjakha, matwr Esonw gwinw rwjiya."
14Iswkhalai chwng ta satai? Kaitor benirai khalaio? Chwng obwnw samaya. Bw Mosinw sajak, 15"Ang jenw khairoma rwni muchu bwnwse khairoma rwnai, jenw khakhamni muchu bwnwse khakhamnai." 16Omw iswkhlai kaisani chaitok tei muchumani sakao khatonya, Kaitorni khairokmani sakagwse khatonw. 17Kathar elembago Kaitor Phoronnw i kok sajak, "Nwng Ani bagwi i samung tangnw, oboni bagwise Ang nwnw bugra khalaijak, nini bisingtwi Ang Ani juaima phunuk mannaitwi tei hayungw ani bumung sapir jaknaitwi." 18Aithani Kaitor jebwnw khairoma khalaini muchu, bwnwse khairoma khalayo, tei Kaitor jeni bakha karak khalaini muchu, bini bakhanw karak khalaywi tisao.
Kaitorni khairokma
19Iswkhalai nokh anw hinmanw: "Halai Kaitor tani sumsokni bagwi borognw dosa rw?" Twmwi himba Kaitorni muchukmanw swrw mathakman? 20Ang sanw, nwng borog, Kaitorni kokni sakao kok sanai nwng swrw? Kaisa borog jwtini kwrwngsa manwi tak o manwi ta o taknaisanw swngmanw, "Tani anw arai khalayoi takkha?" 21Kwrwngsa ha daini ta jate jar khuri baswn takni sajrani ta bagri kwrwi? Bw ta kwrwngsa man ganang samungni bagwi tei kwrwngsa alangka samungni bagwi takmaya?
22Thi obotwijar Kaitor Bini thamchi tei pharan phunukni naijak, Hekphwng je borogrokni sakao Bw thamchi kathai, boknw khalogwi soioi tongkha. O borogrokni kwrwngsachui manthai ongkhadwi nachra. 23Arw Bw Bini paiphlaiya chwngsachani kokbw sirwni naijak. Jebwrok Bini khaphurma manthai Bw boknw Bini chwngsacha manni bagwi aguo tagwi tonjak. 24Chwng ongkha o borog, jebwrok khaphurma manthai. Bw keber chini Jihudirokni bising daini ringjiya, Bejihudirokni bising dainibw ringjak. 25Diyari Hoseyoni bijapw Kaitor sajak, "Jebwrok Aniya boknw Ang Ani borog hinwi ringnai, tei jenw Ang hamjakjiya bwnw Ang Ani khachuk hinwi ringnw. 26Je jegao boknw sajak 'Nokh Ani borogya,' odayo bokhno kathang Kaitorni basa hinwi ringjaknw."
27Diyari Jisaiyo Israyel dophani kothoyw sajak, "Israyeliorok dolia koreni hachikongni kosol hekphwng bokni bisingni keber baithak borog rokse tekhokma mannai. 28Subrai dodogwi swngsarnw bini manthai senji sarai rwnai." 29Jisaiyo aro sajak, "Jothoni solai phankrak Subrai jwtini chini bagwi chopalasa dophanw kalangyatilai iswk salw chwng Sodom Gomorani kosol ongkhamu."
Israyel dopha tei kothoma
30Iswkhalai chwng i kokse sanw je, Bejihudirok Kaitorni yachakjuai ongnibw chaitokjiya hekphwng bokni paitokmani bagwi bok Kaitorni yachakjuai ongjak. 31Matwr Israyeliyo rok kerongnal palenai bisingtwi yachakjuai ongni chaitokjak, matwr bok omw ongmanjiya. 32Tani ongmanjiya? Twmwi himba bok paitokmani sakao khatonya karwi bokni samungni sakaose khatonjak. je holong bai borog dus cha, o holongwse bok dus chajak. 33I kothoyw Kathar Elembago suijak tongo,
Naidi, Ang Siyonw imwtwijar holong kwrwngsa tongdok jedayo takjagwi borog kalainw, Matwr jebwrok Bwnw paitoknw bok oaisabw lachimao kalaigalak.
Currently Selected:
Rumi 9: TPE
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh