Mothi 23
23
Phorisi tei raida phwrangsa rokni baithe Jisuni kok
(Mark 12:34-40; Luk 11:37-52; 20:45-47)
1Aiphuo Jisu borogroknw tei Bini sagri roknw sakha, 2"Kerong elim tei Phorisirok ongkha Mosini kerongnalni kok sapaywi sanairok. 3Obwni bagwi bok nokhnw jebwnw sanw obwnw khalaidi arw jebwnw tholnw obwnw goseywi ladi. Matwr bok jebwnw khalai obwnw nokh takhalaidi, tamni hinba bok bukhokbai jebwnw sa samungw obwnw khalaiya. 4Bok borogni pharkungw poja hilik hilik bogwi rwgw, matwr obwroknw balni bagwi sakrokni yesi kongsabw phanakni naiya. 5Bok borogroknw phunukni bagwi jotho samungnw khalaiyw. Bok arw borog rokni naikhalai gara khalaywi Elembakni bokso#23:5 elembakni boksoI bokso ongkha mwikurni banainai gira gira bokso jedayo bok Elembakni khep rok suiyoi i bakso bisingo dagwi kopalw tei yagw kanw. Ditiyo biboron 6:6-8, 11:18. banayw, tei kalok kalok bokarai#23:5 kalok kalok bokarai Gonona 15: 37-39 banayw. 6Bok pana nogw boromni jegao tei thumnogw nangru nangru khamplaiyo achukni hamjakgw. 7Bok hatiyw borom manni hamjagw tei borogrokni daini elim ringnai khanani hamjagw.
8"Matwr nokh kaisanwbw nokhnw Rabbi hinwi ta ringrwdi, tamni hinba nokhni Elim kaisase, arw nokh jothobw takhuk bukhukse. 9I hayungw kaisanwbw apha hinwi taringdi, tamni hinba nokhni Apha kaisa chuise tei Bw chukhao tongw. 10Kaisaswk nokhnw phwrangsa hinwi ringthwk obwnw tanaidi, tamni hinba nokhni phwrangsa hinwi kaisachuise tongw, Bw ongkhadwi Khristo. 11Nokhni bisingw jeni jothoni naywi borom tong bw nokhni seleng ongthwk. 12Tei kaisaswk jwtini saknw kuchuk khalayw hingkhalai bwnw tola khalainw arw kaisaswk saknw tola khalayw hingkhalai bwnw kuchuk khalainw.
13"Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentroknai jar! Tamni hinba nokh borogrokni bagwi chukna hani duar khagwi tongw. Nokhbw orw habya arw jebwrok habni phai boknwbw habni rwya. 14Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentrokma jar! Tei bok borog roknw phunokni bagwi kalok khalaywi suri sanw, ijang matwr bok randirokni rang mainw swywi lagw. Araijar borogni kabangma senji ongnai.
15"Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentrokma jar! Tamni hinba nokh kaisanw kothe raida daini Jihudi raidao twbwni bagwi jatejar jegao thangw, tei jephuo kaisaswk Jihudi raidao phai, aiphuo nokh bwnw nokhni naywibo kabangma khalaywi morkeni chognai khalaywi tisagw.
16"Kana ojarok nokhni bagwi imw bwswkse tentrokma jar! Nokh saklai kana matwr kotheroknw lama phunugw. Nokh sagwi tongw nokthar lagwi jwtini kaisaswk swmai tangw obwbai mwngsa ongya, matwr kaisaswk jwtini noktharni rangchak lagwi swmai tangw hingkhlai bw khamka o swmainw mapalenw. 17Butua tei kanarok, nokh sale bwbw gara? Rangchak, na o nokthar jeni bagwi o rangchaknw kathar khalaikha? 18Nokh arwbw sagwi tongw, usrinai chakalanw lagwi swmai tangkhlai obw mwngsaya, matwr kaisaswk o chakala sakani ruainw lagwi swmai tangw hingkhalai bw khamka o swmai mapalenw. 19Kanarok, bwbw gara? O ruai na o chakala jebwni bagwi o ruainw kathar khalaikha? 20Je borog usrinai chakalani mwngwi swmai tang, bwlai usrinai chakala tei bini sakani jotho manwinw lagwise swmai tangw. 21Tei jebw noktharnw lagwi swmai tang, bwlai o nokthar tei o bisingw jebw tong obwni mwngwibo swmai tangw. 22Tei je borog Kaitor jedayw tong o chukhani mwngwi swmai tang, bw Kaitorni bukajiranw arw Kaitor Jebw o sakagw achugwi tong Bini mwngwise swmai tangw.
23Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentroknai jar! Nokh nokhni jotho gam gam moslani bakchisa rwgwi tongw, matwr nokh kerong nalni jothoni naikhalai nangru kothoy nirai nalchir, khaphurma, paitokjuai hela khalaywi tongw. Nokh i nangru kothoyrok tei kothe kothoy roknwbw palethai kalayw. 24Nokh ongkha kana oja. Nokh chaphini thameng masanwbw saywi khibiyw, matwr utnw halai mwlwgwi pairwgw.
25"Kerongnal phwrangsarok bai Phorisirok, nokh ongkha phatra, nokhni bagwi imw bwswkse tentrokma jar! Nokh nwngkhap bai chanai mairangni phatarpang kwchwng khlaywi tonw, matwr orw lopha tei saklopha bai kwpwlwng. 26Phorisi kanarok, pwilagw nwngkhapni bisingninw sakang sap khlaidi, obwbai phatarnibw kwchwng ongnw.
27"Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentrokma jar! nokh kuphul pali rwjak mangkhorni kosol, jebwni phatarpang machang matwr bisingpang borog kwthwini bekereng tei jatejar untha bai kwpwlwng. 28Thi obwtwijar khalaywi, nokh phatarw borogni mokolw raidia hinwi phunugwi tongw matwr nokhni bisingw chutali tei sumsok kwpwlwng.
29"Kerongnal phwrangsa rok bai Phorisirok, nokh ongkha phatra, nokhni bagwi imw bwswkse tentrokma jar! Nokh diyarirokni bagwi mangkhor tangw arw raidia rokni bagwi mangkhor sajogw. 30Tei sagwi tongw, chwng chini hodaipirirokni molw tongtilai, diyariroknw buthalni bagwi bok bai baksa aphak ongyamw. 31Obwbai nokh sakni baithe imwnw yakumu rwgwi tongw, diyariroknw jebwrok buthalkha nokhbw bokni bosongni kaisa. 32Nokhbw nokhni hodaiprirok jebwnw chengjak obwni sokjiyanw sohkrwdi.
33"Chibokni dagi bai chibokni bosongrok! Tama khalaywi nokh morkeni satokma daini yokjanai? 34Obwni bagwi naidi ang nokhni dayw diyari, buju gnang borog tei kerongnal phwrangsa roknw hodok. Bokni bisingw nokh kaisa kainwinw buthalanw tei kaisa kainwinw kruso khachiywi buthalnw. Kaisa kainwinw nokhni thum nogw raidang bai bunw tei kami khungsani arw kami khungsao rwphrinw. 35Aithani raidia Hebolnw buthalmani jimin Borkhiyoni basala Sokhoriyonw nokthar bai chakalani kacharmajio buthalnai jora, hayungw jeswk raidia borog buthaljakha nokh o jotho thwini dai ongnw. 36Ang nokhnw daijw khlaywi sadok, i molni borogrokse o buthaljanai rokni bagwi senji mannai.
Jisu Jirusalemni bagwi dugu khalaikha
(Luk 13:34,35)
37"Jirusalem! ohh Jirusalem! Nwng diyariroknw buthalwi tongw tei Kaitor honai koktwinai roknw holong kokgwi tongw. Tokma jekhalaywi bini basaroknw bekarang tolagw thumwi ton arai khalaywi Ang nini borogroknw oaibwswk Ani koreyw thumwi tonni naijak, matwr bok goseywi lajiya. 38O Jirusalemni borogrok, nokhni nokthar nokhni sakangw bwkcha ongwi kalaywi tongnw. 39Ang nokhnw sadok tamni hinba, nokh tabokni jimin Anw arw nunglak, jeswk sal jora Ang philwi phaiya arw nokh saya,
"Hamsachak Bw, Jebw Subraini mwngwi phaidok!"#23:39 Gitsongita 118:26
Currently Selected:
Mothi 23: TPE
Highlight
Share
Copy
Want to have your highlights saved across all your devices? Sign up or sign in
©️2025 Bible Students Fellowship of Bangladesh
